1. Ka uagu súdini lubéi ligaburi wóuseruniña gürigia lidan wani ministeriu? Ru humá aban hénpulu (ariha huméi dibuhu le lídanbei lagumeseha arütíkulu).

 FIÚ irumu lubaragiñe le, hapurichihaña aban feru íbirigu maríeitiña amisurahaña gürigia lubá Aritaguagülei lánina lounwen Kristu. Dan le hayanuhaña lubéi tuma aban gürigia, aba láhuyun huya. Aba líchugun íbiri ligía aban farusu tun gürigia tuguya, aba ladouragun tuma lani weiriou lau le aban. Ma lanarime ugundani le hasandirubei dan le harihinu würi tuguya lidan Aritaguagülei! Íbini ariñaga tan luagu maritagun tani le uágubei hayanuha Gefentiña tuma, wéiritu tanigi lau ligaburi hóuserunu, ligía aba lubéi tachülürün lidoun adamuridaguni. Ka san hadügübei íbirigu ha? Aba hasigirun aban adundehani le subudiwati.

2. a) Katei san adundehani subudiwati le meha líchugubei Hesusu? b) Ida luba wasigiruni adundehani ligía?

² Katei san adundehani subudiwati ligía. Wayanuhaña luagu ladundehan Hesusu le: “Súnwandanla lubeiti hadügün houn amu kei le habusenrubei lun hadügün hun” (Mat. 7:12). Ida luba wasigiruni adundehani le? Sigí wamuti lau wadügün bián katei. Le furumiñeti, wálügüdagun woungua: “Lun hamuga nuguya lan gürigia le, ida liña hamuga línsiñedun nun lun nouserúniwa?”. Le libiaman, wóuseruni gürigia ligía kei wabusenrun lun wouserún (1 Ko. 10:24).

3, 4. a) Ka uagu moun lubéi hámarügü lan wíbirigu lidan afiñeni wóusera kei wabuserun lun wouserún? b) Kaba wariha lidan arütíkulu le?

 ³ Súnwandan wóuseruniña wíbirigu kei wabusenrún wouserúniwa. Gama lumoun mariñagunti Hesusu hagíarügübaña lan wóusera ítara. Le linarün katei, dan le líchugunbalin adundehani le layanuhaña meha luagu ida luba lan houserún sun gürigia, íbini áganiñu (aliiha huméi Lúkasi 6:27, 28, 31, 35). Anhein mosu lubéi wóuseruniña wáganiñu kei wabusenrun wouserún, lúntitima wóuserun ítara hama gürigia ha únbaña wapurichiha, lugundun saragu hádangiñe gayarati hagía lan aransebaña lun hibihin “ibagari le magumuchaditi” (Adü. 13:48).

⁴ Ariha wamá guentó gádürü katei le gayarabei líderaguniwa lidan wapurichihan: 1) kaba uma nayanuha, 2) halíaba nayanuha luma, 3) kátima dan buídubei lun nayanuhan luma ani 4) ida luba nagumeseruni yanu. Wasaminarun luagun puntu burí le líderagubadiwa lun wíchuguni uganu le hemegeirubei gürigia houn ani gabaroun wameime ida liña lan hasandiragun houngua (1 Ko. 9:19-23).

5. Ka burí álügüdahani lunbei wadügüni wóuniwagua dan le wayanuhan hama ámuñegueinarügü gürigia?

⁵ Lidan wani ministeriu, ayanuhatiwa hama ámuñegueinarügü gürigia ha ámuñegueinarügüti hagaburi, hásügürün luma haturóbulin (2 Kro. 6:29). Danme le houchun hayanuhani uganu buiti lun somu gürigia, álügüdagua humá hungua: “Lun hamuga nuguya lan gürigia le, hínsiñeti hamuga san nun lun ariharügü hamanina kei aban habesinan? O himei numuti hamuga lun hasubudirunina buidu?”. Wadügüni álügüdahani le wóuniwagua íderagua lumutiwa lun gabaroun wamani kada lan gürigia ámuñegueinarügütiwa.

6, 7. Ka lunbei wadügüni ánhawa lóusera somu gürigia wuriba lidan wapurichihan?

⁶ Moun lumuti wasaminarun wuriba luagun somu gürigia o wafuresehan asaminara luagu “mani lan manasi”. Íbini wagía kristiánugu inarünitiña, áfaaguatiwa lun wagunfuliruni lúrudu le lánina wayanuhan ‘lau aban lubuidun igaburi’, gama lumoun kei le gafigoun wabéi, anihein dan aba wariñagun dimurei le moun lumuti wariñaguni, ani aba wasakürihan lárigiñe (Kol. 4:6; Sant. 3:2). Lun hamuga wariñagun somu katei le mabuidunti laganbún lun somu gürigia, háfuga ladüga mabuidun lan wasandiragun woungua weyu ligía, mínsiñebei hamuga woun lun lariñagun luagu “hanarime wamá” o “magudemehabu wamá”, adián? Hínsiñeti hamuga woun lun gunfuranda lániwa. Ligíati, ma lunti giñe ítara lan wóuserun hama amu?

⁷ Ánhawa lóusera somu gürigia wuriba lidan wapurichihaña lan, ka uagu masaminarun wabéi luagu háfuga lan wuriba lan lasandiragun lungua? Háfuga gíbeti lituróbulin lidan luadigimari o leskuelarugu, o háfuga sánditi. Gíbetiña gürigia ha arufudutiña lanarime igañi furumiñe óunabatiña buidu dan le hóuseruniña lubúeingu Heowá lau darangilaü luma inebesei (Ari. 15:1; 1 Fe. 3:15).

8. Ka uagu lunti lubéi wanügüni uganu buiti houn sun “hawuyeri gürigia”?

⁸ Chülüti apurichihani hamoun sun hawuyeri gürigia. Lidan lagumuhóun burí irumu, furihali aban fánreinti tidan Garüdia Atalaya le gíribei “La Biblia les cambió la vida” (Sansi tumuti Bíbülia habagari) ani fuáli abahüdaguni ñein hawagu hóugiñe ǘrüwa-wein gürigia. Fiú hádangiñe gürigia hagía híwerutiña meha, gabacharuadaditiña, ha ayusurutiña duroga o lídanñanu somu sétanu hani gürigia wuribatiña. Añahein amu lídanñanu meha polítika, lábutiguñanu meha somu relihión o wéiriti meha hetenirun lun furendei le hibihibei tidan luban furendei íñuti. Añahein amu wíyeti meha habagari. Gama lumoun, sun hagía aganba hamuti uganu buiti, anha hagía lun aturiahani tídangiñeti Bíbülia, aba hasansiruni habagari ani aba gefén hamá luagu Heowá. Ligíati, masaminara  wamá maweiyasunbaña lan fiú gürigia eresibirei uganu luáguti Larúeihan Bungiu (aliiha huméi 1 Korintuna 6:9-11). Haritagua waméi gayara lan lachülürün uganu le tidoun hanigi sun “hawuyeri gürigia” (1 Ko. 9:22).

9. Ka uagu mosu lubéi warufudun inebesei tidan muna burí to ñein lubéi woudin apurichiha?

⁹ Halíaba san wayanuha hama gürigia dan le wapurichihan? Libe-agei dan, hábiñe wadariraña (Mat. 10:11-13). Ani samina waméi le: sun wagía busentiwa lun inebe tan waban luma wamegen houn amu. Súdiniti katei le woun. Busentiwa lun aban tan aramudaguagülei chóurutu waban, gayara láamuga darangilañu wamá ñein. Ligía lunti lubéi warufuduni ligiaméme inebesei tun haban wabesinanigu. Warufuduñein san? (Adü. 5:42.)

10. Ka lunbei gabaroun wamani lun magañidagüdün wamaniña gürigia lidan wagunfulirun lau wani ministeriu?

¹⁰ Uguñe weyu, gíbeti wuribani ubouagu, ani gíbetiña gürigia saminatiña wuriba hawagun gürigia ha ibidiñetiña houn (2 Tim. 3:1-5). Moun lumuti wadügün lun laganwoundun luriban saminaü ligía. Kei hénpulu, samina humá aba lan wachülürün tidoun aban muna ani aba wagúahan luagu bena le tigibugiñebei muna, anhein móunabun ni aban gürigia, gayarabei busén wamá waganarihan luéigiñe funedera o wegeyedagun tau muna lun warihini anhein gálouga lubéi. Lidan fulasu le ñein lubéi hapurichiha, hagañiduña hamuga san gürigia anhein hadüga katei le? Kaba hasaminara besinagu ha arihibadün? Inarüni lunti lan warufudun ubebeni lidan wani ministeriu (Adü. 10:42). Aban uganu lánina gurasu wanügübei ani busentiwa lun hasubudiruni gürigia; buiti katei le (Rom. 1:14, 15). Gama lumoun, lunti duari wamá ani houcha wagíame lun madügün wamá katei le gayarati lagañidagüdüniña gürigia. Abürühati apostolu Pábulu: “Míchutiwa lébuna lachugeragun ni aban, merede láamuga wawadigimari wuriba” (2 Ko. 6:3). Anhoun inebe haban luma hamegen gürigia woun lidan fulasu le ñein lubéi wapurichiha, háfuga ladügün wousan lun habusenrun gürigia hasubudiruni inarüni (aliiha huméi 1 Féduru 2:12).

11. Ka uagu gunda wabéi dan le inebe lan wadaani houn amu?

¹¹ Hibe-agei gürigia bereseguheitiwa. Lun wagunfulirun lau sun wani buligasion, mosu wasubudiruni ka lan súdinitimabei lídangiñe ani adüga wagía aban aransehani buiti (Efe. 5:16; Fili. 1:10). Anhein ñüdün somu gürigia adarasahawa lidan wawadigimari, háfuga wasafaragun. Ligíati, seremei wamutiña ha híbiri dan le harufudun inebesei ani gunfuranda haméi luagu siñá lan wálüdün ayanuha hama. Mabulieidunga waméi wóuseruniña gürigia kei wabuserun wouserúniwa, ida luba warufudun inebesei houn gürigia ha únbaña wapurichiha?

12. Ida luba wasubudiruni ka lan oura buídutimabei lun woudin abisidahaña gürigia ha lídanbaña fulasu le ñein lubéi wapurichiha?

¹² Houcha wamá wasubudiruni ka lan oura buídutima lan woudin bisidaña gürigia. Lidan fulasu le ñein lubéi wapurichiha, ka oura hadarirúa gürigia hábiñe? Ka oura gadaani hamá lun haganbuniwa? Súdiniti lun wagía lan ñüdün lau hadaani gürigia. Lidan saragu fulasu ubouagu, buídutimati apurichihani rábounweyu. Anhein ligía lubéi asuseredubei lidan fulasu le ñein lubéi wawinwanda, gayarati san wadügün aransehani lun wáfuridun apurichiha muna tuagu muna rábounweyu? (Aliiha huméi 1 Korintuna 10:24.) Gayarati wachoururuni labinirubei lan Heowá áfaaguni le wadügübei lun wáfuridun apurichiha lidan oura le buídutimabei houn gürigia.

13. Ka amu igaburi ídanbei gayara lan warufudun inebesei houn gürigia?

¹³ Ka amu igaburi ídanbei gayara lan warufudun inebesei? Dan le wadarirun aban  gürigia le busenti laganbuniwa, lunti wíchugun aban buiti uganu lun, gama lumoun lunti málüdün wamá. Háfuga ígira lumuti gürigia ligía dan ligía lun ladügün somu katei le súdiniti lun. Anhein ariñaga woun bereseguñein lan, gayarati wariñagun lun murusunrügübei lan wayanuhan... ani murusunrügülá (Mat. 5:37). Danme le lagumuchun wayanuhan, lunti wálügüdüni ídanme lan gayara lan wabisidahani. Ibihaaña fiú apurichihatiña buiti resultóu dan le hariñagun: “Hínsiñeti hamuga nun nagiribudun amu weyu. Buídutimabei san nagúarun hun lubaragiñe niabin o nóunahan aban uganu hun luagu gágamuru?”. Dan le woudin lau hadaani gürigia, sigí wamuti lani Pábulu hénpulu, le ariñagubei: “Mámarügüñein nuougua naritagua, haritaguatina giñe hawagu híbiri lun gayaraabei lan [...] hasalbarun” (1 Ko. 10:33).

14-16. a) Ka uagu lunti lubéi wariñaguni houn gürigia lúmagiñe wachülürün ka lan lébunabei wani bisida? Ru humá aban hénpulu. b) Ida liña lagumeseruni aban óunigiruti sirkuitu yanu hama gürigia ani ibihati buiti resultóu?

¹⁴ Samina humá lun hamuga lagúarun aban gürigia hun luagu gágamuru ani ibidiñeti hun ka lan agúarubei, ani aba hamuga lálügüdünün ka lan luwuyeri éigini hínsiñebei hun. Lidan hichügü hasaminaruña katei lan funa gürigia le ani ka lan labusenrubei. Lúnrügü harufuduni galeskuelan humá, háfuga hayanuhan luma murusun oura, gama lumoun, murusun oura lárigiñe ábame hadüraaguni yanu. Luagu amu oubaü, samina humá dan le lagúarun gürigia ligía aba lariñagun hun luadigimariduña lan lidan luáguti lounigirún átuadi ani aba líchugun aban ariñahani le huuti hun. Haganbuñein  hamuga, adián? Hínsiñeti woun lun hadimurehan gürigia wama lau inebesei ani furangu. Gayarati san warufuduni ligiaméme igaburi hama gürigia ha wadarirubaña lidan ministeriu?

¹⁵ Lidan saragu fulasu lunti wariñaguni furangu lun gürigia le eresibirubadiwa ka lan lébunabei wachülürün lúbiñoun. Inarüni barütiwa lan ariñahani huuti le úati luma, gama lumoun, samina huma san sódini lan wachülürün ayanuha luma sin wabusurun míridun waméi ka lan wáluahabei ani aba hamuga wálügüdüni: “Lun hamuga gabafu humá lun hagidarun somu lídangiñe turóbuli le ubouagubei, kaba hamuga hagidara?”. Subuditi woun busenrügütiwa lan wasubudiruni ka lan lisaminanbei lun aba lan wanügüni tidoun Bíbülia. Gama lumoun gayarati lasaminarun gürigia: “Káteigia gürigia le, ani ka uagu ladügei álügüdahani le nun? Ka san labusenrubei?”. Ligíati, adüga wamá lun buidu lan lasandiragun lungua (Fili. 2:3, 4). Ida luba wadügüni?

¹⁶ Anihán ladügübei aban óunigiruti sirkuitu ani buiti lidin lun. Lárigiñe labusuragun houn gürigia ani iridaléi liri, aba líchugun aban tiraüraü garüdia houn to gíriboun Hínsiñeti hamuga san hun hasubudiruni inarüni? Aba lariñagun: “Uguñe wederegeruña aban ubanaü tídangiñe to houn sun gürigia ha wadarirun. Tayanuhaña luagu sisi álügüdahani le burí hadügübei gürigia hóuniwagua. Níchigaaru to hun”. (Ariñagati íbiri le aba lan darangilu hamá saragu gürigia dan le hasubudiruni ka lan gabügürübalin, ani ménrengunhali lan lasigirun ayanuha hama.) Ábati lasigirun íbiri le ariñaga: “Adügañahadün san aban lídangiñe álügüdahani le húniwagua?”. Anhein arufuda gürigia ligía aban lídangiñe álügüdahani le tídanbei garüdia, aba ladaarunu íbiri garüdia ani aba larufuduni lun ka lan tariñagubei Bíbülia luagu álügüdahani le. Anhein marufudun ni aban, aba lanúadirun íbiri ligía aban lídangiñe aba lasigirun ayanuha. Ítara liña, gíbeti luwuyeri lagumeserún yanu. Lidan fiú fulasu agurabúati saragu katei lubaragiñe wariñaguni ka lan lébunabei wabisidahan. Lun wibihin lubuidun resultóu hama gürigia ha únbaña wapurichiha lunti wayanuhan lidan aban igaburi le adügüti lun busén hamá hasigirun afurendeira.

17. Kei warihini lidan arütíkulu le, ida luba wóuseruniña gürigia kei wabuserun wouserún?

¹⁷ Lidan fiú dimurei, ida luba gayara lan wasigiruni gumadi le líchugubei Hesusu lidan wani ministeriu? Lau wóuseruniña amu gürigia buidu. Lau inebe tan haban kada aban woun luma hafulasun. Lau wáfaagun lun wapurichihan lidan lóurate hadarirún gürigia hábiñe luma dan le aranseñu haña lan lun haganbun. Mosu giñe waranseruni ligaburi wapurichihan según hechun gürigia ha lídanbaña fulasu le ñein lubéi wapurichiha.

18. Ka uagu lunti lubéi wóuseruniña gürigia ha únbaña wapurichihan kei línsiñe woun lun wouserúniwa?

¹⁸ Ibihatiwa resultóu buiti dan le wóuseruniña gürigia kei línsiñe woun lun wouserúniwa. Dan le buidu lan wagaburi, adügatiwa lun lámirihan waleitin, arufuda wamuti lebegi adundehani le tídanbei Bíbülia ani rútiwa uéiriguni lun Wáguchi le siélubei (Mat. 5:16). Ítarati, dan le wanügüni uganu gayarabei lachawahaniña saragu gürigia lidoun inarüni (1 Tim. 4:16). Dandu anhein haganba gürigia uganu luagu Larúeihan Bungiu o maganbun hamani, gúndaatiwa lau wasubudiruni adüga wamani sun wayaraati lun wagunfulirun buidu lau wani ministeriu (2 Tim. 4:5). Áyeiha waméi apostolu Pábulu, le ariñagubei: “Ani nadügüni sun le luagu línsiñe uganu le lánina asalbaruni nun, lun gafanranbadina lan lidan” (1 Ko. 9:23). Ligíati, sigí wamá súnwandan lidan wani ministeriu óuseraña gürigia kei línsiñe woun lun wouserúniwa.