1, 2. Ida liña larihiniña Heowá lubúeingu?

 DAN le harihiniña agübürigu hasaanigu áhurera, libe-agei dan aba taweiridun hanigi dan le harihini le hayarabei hasaanigu adüga. Háfuga ariha humaali lasuseredun katei le. Lau sun íbirigu hamá bián irahüñü, háfuga buidu lan aban hádangiñe lun somu huraraü, ani le aban háfuga dibuhu lan hínsiñebei lun o lun ladaagun burí katei lau lúhabu. Gama lumoun, meberesenga ka lan hayaraabei hasaanigu adüga, hínsiñeti houn agübürigu lun híderaguniña lun buídutima lan hadügüni.

² Bereseti giñe Heowá hau lisaanigu. Ani ariha lumutiña lumutuniña uguñe weyu keisi ‘lirisin sun néchani’ le ubouagubei (Ahéu 2:7). Le linarün katei, ítara haña kei ‘irisini’ ladüga hafiñen luma hederegeragun houngua. Ani háfuga ariha humaali lan luagu gibe lan giñe katei hayaraati Gefentiña úaraguatiña adüga uguñe weyu. Añahein hagía gíchigaditiña yanu, ani añahein amu subudiwatiña luagu hadügadi lubuidun aransehani. Añahein saragu íbirigu würiña ménrengunti houn hafurendeirun aban iseri iñeñein lun hapurichihan, o añahein amu gudemehabutiña ani súnwandan aranseñu haña lan lun houdin íchiga dǘgüdaguaü houn ha mégeibalin o lun houdin óunigira  sánditiña (Rom. 16:1, 12). Ma geteingiraditiwa luagu añahein lan íbirigu ha wama lidan damuriguaü?

3. Kaba burí álügüdahani ounabúa lidan arütíkulu le?

³ Gama lumoun, añahein fiú íbirigu háfuga madari hamagili halugaarun lidan damuriguaü, kéiburi nibureintiña hama ha málügilibei habadiseirun. Ida luba wíderaguniña lun buídutima hamá lidan katei burí le ídanbei buidu hamá? Ka uagu lunti lubéi wáluahani katei le buídubei hawagu lun gayara lan warihiniña kei larihiniña Heowá?

4, 5. Según abahüdaguni le lídanbei Alidihatiña 6:11-16, a) ka larihibei Heowá luagu Hedeón? b) ka katei unbei letenira Heowá dan le laríaguniña lubúeingu?

⁴ Gíbeti abahüdaguni tidan Bíbülia le arufudubalin furangu mámarügüñein lan buiti le arihíbei hawagu lubúeingu Heowá lariha, ariha lumuti giñe katei le gayarabei buidu hamá lidan. Ariha waméi lani Hedeón hénpulu. Dan le lanuadirúnbalin Bungiu lun lesefuruniña lumutuniña háhaburugugiñe madianna, háfuga aba lan taweiridun lanigi lau ligaburi labusuragun aban ánheli lun: “Anihein Wabureme buma, wügüri héreti ani ganigiti”. Dan le lariñagunbalin ánheli dimurei le lun Hedeón, masandiragunti meha lungua kei aban gürigia “héreti”. Lubaragiñe lira, ariñagati luagu anihein lan machouruni luagu ani ligía lan ñǘraütimabei. Gama lumoun, yanu le asigirubei arufudati luagu ariha lan Heowá katei buiti luagu (aliiha huméi Alidihatiña 6:11-16).

⁵ Ariha laali meha Heowá lubuidun burí igaburi le luágubei Hedeón, ani ligía lafiñerunbei luagu lun lesefuruniña ísüraelina. Luagu aban oubaü, ariha laali meha lani Heowá ánheli ida liña lan láfarahani Hedeón türigu lau sun lere lun lafanreinraguni ilaü luéi lídibu. Gama lumoun, arihati meha ánheli amu katei luagu. Lidan tidaani Bíbülia, éfereha hamuti meha nadagimeintiña múa türigu lidan burí fulasu wéinamuti lun lanügüni garabali life türigu. Gama lumoun, adüga lumuti meha Hedeón wadagimanu le aramudaguarügü lidan aban fulasu le ñein lubéi tachuinhóua beibei lun ladügǘn diwéin luéi harihini madianna, ábame híweruhani murusun türigu le lalubahabei. Ma lanarime lichú lau! Marihin lumuti Heowá Hedeón kéirügü aban nadagimeinti múa le benefati, ariha lumuti kei aban nadagimeinti le wéiriti lichú lau, le gabafuti lun desidírü lan buidu lun lanurahan luéi peliguru. Ligíati, lau larihini sun le liyaraabei adüga, aba líchuguni wadagimanu ligía lun.

6, 7. a) Ítara liña meha san larihini Heowá Amosu kei harihini fiú ísüraelina? b) Ka arufudubalin luagu gibe lan meha katei lasubudirun Amosu?

⁶ Arufuda lumuti giñe lásügürün profeta Amosu luagu ariha lani Heowá iyaraani le luágubei. Besafu gürigia ariha hamuti meha Amosu kei aban wügüri furumiñeguarügü. Íbini ligía guánarügü ayanuhati luougua kei aban hóuniri mudún ani kei aban gürigia le ímirahabarun aban tuwuyeri igu áraabuna, to meha eseriwiduboun éiginime houn gudemetiña. Dan le líridunbalin Heowá lun lanügüni uganu lánina asiadirúni lun arúeihani le lánina diisi türibu Ísüraeli, háfuga gíbetiña meha ísüraelina asaminarutiña luagu mama lan ligía gürigia le buídutimabei lun lagunfuliruni wadagimanu ligía (aliiha huméi Amosu 7:14, 15).

⁷ Lídangiñeti meha aban aüdü díseti Amosu, gama lumoun, le lasubudirubei luagu burí échuni luma hawaguti urúeigu ha lánina lidaani arufudati luagu mama lan meha aban ibidiougua tau. Háfuga ruti meha fe luagu le asuseredubei Ísüraeli, ani háfuga subudi lani meha giñe ka lan asuseredubei lidan burí ageiraü le yarafabei ñein ladüga lani bísinisi hama alugurahatiña (Amos. 1:6, 9, 11, 13; 2:8; 6:4-6). Ariñagatiña fiú subudihabutiña tuáguti Bíbülia luagu buidu lan meha Amosu lidan abürühani. Mámarügüñein dimurei sensiyuti ani dǘgüdati layusura, konparárüti giñe aban katei luma amu ani yusu ligía dimurei burí le genegeguati. Óunabagülei le líchugubei Amosu lun fádiri marichati le gíribei Amasíasi arufudati furangu luagu buidu lan  gürigia le lanúadirubei Heowá lun líchuguni uganu. Gíbeti meha igaburi buiti luagu profeta le, le marihínti furangu, ani Heowá ariha lumuti (Amos. 7:12, 13, 16, 17).

8. a) Ka lachoururubei Heowá lun Dawidi? b) Ka uagu weiri lubéi líchugun dimurei le lídanbei Sálumu 32:8 dǘgüdaguaü houn ha mafiñenbaña hawougua?

⁸ Subudi lumuti Heowá ka lan hayaraabei kada aban hádangiñe lubúeingu adüga. Ariñagati lun urúei Dawidi luagu ladundehabei lan súnwandan ani larufudahaba lan lun lau larihin luagun (aliiha huméi Sálumu 32:8). Ida liña líchugun katei le gurasu woun? Gayarati wasaminarun siñaguabadiwa lan woungua lun wadügün somu katei, gama lumoun, gayarati líderaguniwa Heowá adüga katei le masaminarungubeitiwa gayarabei lan wadügüni. Ítara kei ladudehani aban máisturu aban aturiahati le lagumeseruña, ítara liña giñe ladundehaniwa Heowá lun gayara lan wawanserun lidan wafiñen. Ani lun ladügüni yúsuti íbirigu kristiánugu lun híderaguniwa lun buídutima lan wadügüni katei. Ida?

9. Ida liña gayara lan wasigiruni ladundehan Pábulu lun weberesedun hau ha híbiri?

⁹ Ínchaha lumutiña Pábulu sun kristiánugu lun hasaminarun hawagun híbirigu (aliiha huméi Filipuna 2:3, 4). Mini lan le lunti lan warihini lubuidun igaburi le hawagubei amu ani lun wariñaguni houn. Ida liña san wasandiragun woungua dan le harihini amu katei buiti le wadügübei ani aba hariñagun woun buidu lan wadüga? Ínchaha lumutiwa katei le lun buídutima lan wadügüni katei. Ítarameme, dan le wayanuhan hama íbirigu luagu katei buiti le warihibei hawagu, ábatima busén hamá hawanserun lidan heseriwidun lun Bungiu.

10. Kátañatima san gayarabei hemegeirun lun letenirúniwa houn?

¹⁰ Kátañatima san gayarabei hemegeirun lun wetenirun houn? Le linarün katei, súngubei wagía chülüti oura lun wemegeirun ídemuei. Gama lumoun, ha nibureingiñabaña hama ha málügilibei habadiseirun hagíatima mégeibaña lun wadügün lun hasandiruni luagu abahüdúa hamá lidan sun katei le adügǘbei lidan damuriguaü. Ítara luba hasubudiruni luagu gabara hamá waganagua. Gama lumoun, anhein mariñagun wamá houn buidu lan hadüga, gayarabei mabusenrun hamá hibihin amu buligasion lidan damuriguaü, lau sun ligía lan tariñagubei Lererun Bungiu houn lun hadügüni (1 Tim. 3:1).

11. a) Ida liña líderagun aban wéiyaali lidan afiñeni aban nibureinti lun lawanserun lidan lafiñen? b) Ka wafurendeirubei lídangiñe luáguti Julien?

¹¹ Aban wéiyaali lidan afiñeni gíriti Ludovic sagati saragu buiti dan le harufudunbei íbirigu berese hamá lau dan le meha nibureingili. Ariñagati: “Dan le narufuduni lun aban íbiri berese nan lau tídangiñe sun nanigi, furesetimati lawanserun”. Ábati layanuhan luagu Julien, aban nibureinti haburiti, ariñagati luagu: “Ladüga machourun lan luougua, anihein dan busén lan lun harihin gürigia luagun, ábatiha lagumeserun óusera kamá fósuguarügüti lungua. Gama lumoun, arihatinaha luagu hínsiñehabu lan ani busén lan lídehan lidan damuriguaü. Ligíati, lubaragiñe nerederun asaminara wuriba luagu, aba netenirun lun katei buiti le ladügübei ani aba náfaagun lun níchugun dǘgüdaguaü lun”. Lau lásügürün dan, aba leseriwidun Julien kei ídehati lidan damuriguaü, ani guentó leseriwiduña kei prekursoru le adügübei ǘrüwa-wein-diisi oura.

12. Ka lubuidun igaburi mégeiwabei lun gayara lan wíderagun amu lun hasagaruni sun le hayaraati? Ru humá aban hénpulu.

¹² Furanguti lun lan gayara lan wíderagun amu lun hadügüni sun hayaraati mosu wetenirun houn. Kei larufuduni lani Julien hénpulu, háfuga mosu mámarügü lan hadebilin wíbirigu wariha lunti giñe warihini lubuidun igaburi le hawagubei le gayarabei buídutima lan harufuduni. Ligía meha ladügübei Hesusu lun apostolu Féduru. Íbini anihein lan burí dan mabudubu lan larihín apostolu Féduru, ru lumuti Hesusu iri Séfasi  luagu, mini lan iri le dübü. Ítara liña larufuduni Hesusu luagu derebugubei lan kei aban dübü (Huan 1:42).

13, 14. a) Ka meha larihibei Berünawé luagu Márükosu? b) Ida liña libihin aban nibureinti aban ídemuei libe le meha libihibei Márükosu? (Ariha huméi dibuhu le lídanbei lagumeseha arütíkulu.)

¹³ Arufudati Berünawé aban lichú aau libe lira lidan luáguti Huan, le unbei laguahóua Márükosu, aban iri rómana (Adü. 12:25). Lidan furumiñeti luéiyasun Pábulu luma Berünawé, ñǘdünti Márükosu hama “íderaguaña”, háfuga lun letenirun lun le hemegeirubei. Gama lumoun, dan le hachülürünbei Panfilia aba lidin hawéi sin lawisahan, lidan lóurate haweiyasuhan luagun nórute ani mosu meha hásügürün lídangiñe fulasu le ñein habéi wuribatiña (Adü. 13:5, 13). Ka ladügübei Berünawé? Genegeti lubaragiñe lan letenirun lun lidebilin Márükosu, aba letenirun lun igaburi buiti le luágubei, ani eibu lásügürün dan, aba lasigirun arufudaha lun (Adü. 15:37-39). Kei resultóu, aba lasigirun nibureinti ligía awansera darí lun aban lan lubúein Heowá le derebuguti. Súdiniti dan le lan labürüdünbalun Pábulu ligaradan houn Kolosana, Rómañein meha Márükosu etenira lun dan le ladaürǘnbei. Tidan gárada tuguya, ayanuhati apostolu luagu mábuigaü le lóunahabei Márükosu ani ayanuhati buidu luagu (Kol. 4:10). Samina humá san luagun ugundani le funa lasandirubei Berünawé dan le lamuriahanbalin Pábulu lídehan Márükosu (2 Tim. 4:11).

¹⁴ Ariha wamá aban sügǘ le lánina wadaani. Alexandre, aban wéiyaali lidan afiñeni le málügili liridún, haritagua lumuti ida liña lan líderaguni aban íbiri: “Dan le meha nibureinraügidina, súfuritina meha dan le lunti lan nafurieidun hadan bandi gürigia. Aba líderagunina aban wéiyaali lidan afiñeni lun naranserun, luma lun darangilu nan. Lubaragiñe hamuga mayusurun láadina lan, súnwandan meha líchugun chansi nun lun nafurieidun lidan adamuridaguni lubá apurichihani. Seremei katei ligía, aba agidareina lan anufudei nuéi murusun murusun”.

15. Ida liña meha larufuduni Pábulu hínsiñe hamá líbirigu lun?

¹⁵ Ka wadügübei dan le warihin aban lubuidun igaburi luagu somu kristiánu? Ariñaga wamuti san lun buidu lan ladüga? Tidan gárada houn Rómana, kapítulu 16, ayanuhati Pábulu buidu kéiburi hawagu wein íbirigu ladüga lubuidun hagaburi le adügübei lun hínsiñedun lun (Rom. 16:3-7, 13). Kei hénpulu, ariñagati luagu lǘtimahaaña lan Andüróniku luma Huniasi eseriwida lun Kristu lubaragiñe ani ítara liña layanuhan luagu awanduni le arufuda hamaalibei lidan heseriwidun. Ayanuhati giñe tuagu lúguchu Rufo, háfuga layanuhaña meha luagu ligaburi tóunigiruni lidan meha dan le sügühalibei.

16. Ka gayarabei lasuseredun dan le lariñawagún houn nibureintiña buidu lan hadüga?

¹⁶ Dan le wariñaguni buiti le hadügübei gürigia houn lau sun taruman wanigi, ruti buiti resultóu. Samina wamá luagun Rico, aban irahü faransu, le eferidirubalin liguraasun dan le lamahadunbei lúguchi lun labadiseirun, mama gefenti luagu Heowá lúguchi. Saminati yebe Rico mosu lan lagurabahan danme le wéiriaali lubá gayara lan leseriwidun lun Heowá buidu. Ani híruti meha giñe ladüga habularuni lánigu paaná leskuelarugu. Frédéric, aban wéiyaali lidan afiñeni le úmabei lamuriahóua lun líchugun aturiahani tídangiñeti Bíbülia lun irahü  le, ariñagati: “Aba nariñagun lun Rico buidu lan ladüga, lugundun sun ebedaaguni ligía arufudati luagu ganigi lan lun layanuhan luagu lafiñen”. Dimurei burí ligía íderagua lumuti lun lasigirun awansera luma lun labuiduragüdüni lumadagua luma lúguchi. Lagumuhóun oura, badiseiti dan le 12 lubéi irumu lau.

17. a) Ida liña gayara lan wíderaguniña wíbirigu lun hawanserun? b) Ka ladügübei aban misioneru lun líderaguniña nibureintiña, ani ka resultóu libihibei?

¹⁷ Sagü wariñaguni houn wíbirigu weiri lan lebegi hawadigimari woun, wínchahañanu lun buídutima lan heseriwidun lun Heowá. Sylvie, a aban íbiri to barüharuboun saragu irumu Betelirugu Francia, ariñagatu luagu gayara lan giñe híchugun íbirigu würiña dǘgüdaguaü lugundun arihatiña katei burí le marihin hamuti wügüriña. Ítarati, “gurasu le híchugubei gayarati líchugun erei lun hererun íbirigu ha derebuguhaña”. Ani ábaya tariñagun: “Níchugun gurasu houn amu ligía aban buligasion súdiniti le lunbei nagunfulirun lau” (Ari. 3:27). Jérôme, le eseriwidubei kei misioneru Guayana Francesa, íderaguali saragu wügüriña nibureingiña lun heseriwidun kei misioneru. Abahüdaguati: “Ariha naali dan le lan nariñaguni houn buidu lan hadüga lidan somu katei lidan hani ministeriu o ladüga híchugun óunabagülei le buiti lidan adamuridaguni, aba ganigitima hamá ani aba buídutima lan hadügüni katei”.

18. Ka uagu buidu lubéi lawadigimariduniwa hama íbirigu ha nibureingiña?

¹⁸ Gayarati giñe wíderaguniña íbirigu lun hawanserun lidan hafiñen lau wamisurahaniña lun hawadigimaridun wama. Anhein buidu lubéi somu nibureinti lidan tayusurún sun tuwuyerigu máhina, gayarati lamuriahan aban wéiyaali lidan afiñeni luma lun imprimírü lan somu ariñahani lídangiñe jw.org le gayarabei líchugun gurasu houn íbirigu ha derebuguhaña o ha mánibaña konputadora. O anhein warumadahañoun lubéi Luban Wadamuridagun o anhein waransehaña lubéi somu katei tidan, ka uagu mamuriahan wabéi luma somu nibureinti lun líderaguniwa? Ítarati, gayarabei wetenirun lun ani gayarabei wariñaguni lun luagu buiti le ladügübei lun warihini lani katei le efekütu luagu (Ari. 15:23).

19, 20. Ka uagu lunti lubéi wíderagun amu lun hawanserun?

¹⁹ Dan le líridunbalin Heowá Hosué lun ladundehaniña ísüraelina, ariñagati lun Moisesi: “Ruba gurasu luma anigi lun” (aliiha huméi 2 Lúrudu 3:28). Eibu dan gíbetimahaña gürigia ebelurutiña tidoun lóundarun Heowá lidan sun ubóu, ani sun íbirigu ha derebuguhali hafiñen —mámarügü wéiyaaña lidan afiñeni— gayarati híderaguniña nibureintiña hama ha málügilibei habadiseirun lun buídutima hamá lidan le hadügübei. Ítarati, eibu dan gíbetimabaña íbirigu ha eseriwidutiña lidan dan dayarüti ani ha aransetiña lun ‘harufudahan houn amu’ (2 Tim. 2:2).

²⁰ Dandu anhein lídanñadiwa lubéi aban damuriguaü le héreti o lidan aban liraüraü sétanu le áfaagubei lun aban lan damuriguaü, nadagimein wamá ani ru waméi wasaminan luagu ámuñegü. Ani aban katei le lunbei mabulieidun wamani: wáluahani katei buiti le hawagubei wíbirigu, ítara kei ladüga Heowá.