DAN le háfuridunbei ísüraelina Babilóniagiñe lidan irumu 537 lubaragiñe wadaani, aba lasaminarun Heowá luagu üma le ñéingiñeba lubéi héibuga lun hagiribudun Herusaléun. Aba lariñagun houn: “Aranse huméi üma habá numutuniña, úaraguagüda huméi émeri, gidagua huméi dübü luéigiñe” (Isa. 62:10). Ida liña meha gaganbadi hamá huríu lun dimurei burí le? Háfuga aba houdin fiú hádangiñe furumiñe lun hachagahani üma ani úaraguagüda hameime, gayara láamuga hásügürün ha ñǘbuinbaña hárigiñe.

Gayarati konparárü wamani üma le meha héibugubei ísüraelina luma üma le anügübaliwa lidoun aban lubuidun umadaguaü luma Bungiu. Busenti Heowá lun héibugun sun lubúeingu luéigiñe üma ligía ani lun ua lan ni kata adarasahati hémeri. Ligía líchugunbalin adundehani le tidan Lererun: “Arihabá buidu halía lan bíchigei bugudi, ítara luba bararamun buidu súnwandan” (Ari. 4:26). Dandu anhein nibureingidiwa lubéi o wéiyaadiwa lan, huuti adundehani le woun sungua luagu.

Dan le hayanuhan gürigia luagu aban nibureinti, agurabatiña ladügün saragu katei ani lun buidu lan lidin lun. Le linarün katei, hibe-agei nibureintiña buiti hátuadi, fureseti hafurendeirun ani busentiña lun hiñuragun. Ligía tariñagunbei Bíbülia: “Here nibureingiña hapantagülebei” (Ari. 20:29). Anhein layusura aban nibureinti lere luma liyara lun leseriwidun lun Bungiu, gayarabei libihini le labusenrubei lidan leseriwidun ani darí ligíame ugundani le inarüniti.

Háfuga ariha humaali luagu teni lan ubóu le lun le hayaraabei nibureintiña adüga. Dan le buidu lan lidin lun aban nibureinti gefenti luagu Heowá leskuelarugu, aba háluahan máisturugu hama lánigu paaná leskuelarugu lun héredun luagu lun laturiahan tidan luban furendei íñuti o lun láluahan wéirigu lan lidan ubóu le. O anhein buidu lubéi lidan somu huraraü, háfuga hínchahani lun lasigirun lidan huraraü ligía lun libihin uéiriguni. Susereñahaali san katei le bun? Subuditibu san somu gürigia  le unbei lasusereda? Ka gayarabei líderaguni aban kristiánu lun desidírü lan buidu?

Gayarati líderagunibu arufudahani le tídanbei Bíbülia lun béibugun lidan üma le buídutimabei. Ariñagati Apurichihati 12:1: “Haritaguabá luagu Bungiu guentó lau nibureingidibu lan”. Ida luba san gayara lan ‘baritagun’ luagun Bungiu? O, ida luba san waritagun luagun sun wagía?

Samina wamá luagun le asuseredubei lun aban íbiri gíriti Eric a yágüta Áfürika. Wéiriti meha línsiñe tahurerún bali lun, dan le 15 lubéi irumu lau aba láluahoun lun láhurerun lidan aban sétanu ñein lidan lageira. Mini lan le gayarabei lan meha lafurendeirun áhurera buídutima luma aban máisturu Yuropa ani ábame wéirigu lan lidan tahurerún bali. Úarati meha san katei le luma adundehani lun laritagun luagun Bungiu? Warihaali ka lan desidírü lubéi Eric ani ka lan gayarabei wafurendeiruni lídangiñe lani hénpulu.

Dan le magumu lágiru Eric lileskuelan, aba lagumeserun aturiahoun Bíbülia hama gefentiña luagu Heowá ani aba lafurendeirun luagu laransehabei lan Bungiu sun haturobulin gürigia lun súnwandan. Aba líchugun fe luagu súdini lan layusuruni lidaani luma lere lun ladügüni lugundan Bungiu. Ligíati, lubaragiñe lasigirun lidan huraraü, aba labadiseirun ani aba letenirun éredagüdei lafiñen. Lau lásügürün dan, aban liridún kei ídehati lidan damuriguaü, ani lárigiñe aban lagunbirahóun tidoun Leskuela kristiánu houn Wügüriña Mamarieidungiña.

Lun hamuga meha desidírü lan lasigirun awansera lidan tahurerún bali, háfuga subudiwati hamuga lidan sun ubóu ani rísiti hamuga. Gama lumoun, subudi lumuti meha inarüni lan adundehani tídangiñeti Bíbülia le: “Ha rísibaña, haritaguatiña luagu ítara liña lan harisin kei aban uburugu le íñuti lubarieirun” (Ari. 18:11). Ítara liña, ichouruni le genegebei ru lani seinsu houn gürigia ábanrügüñein uénedü. Le linarün katei, ha adügübalin sun hayaraati lun harisidun libe-agei dan aba habuinchagüdüni habagari lau “asufuriruni” (1 Tim. 6:9, 10).

Gúndaatiwa lugundun gíbetiña nibureintiña desidírütiña heseriwidun lidan dan dayarüti, ani seremei hadügüni ítara, gúndaatiña ani chóuruti hasandiragun houngua. Ariñagati Eric: “Lídanhadina aban óunwenbu sétanu hani ha eseriwidubaña lidan dan dayarüti. Ligía sétanu buídutimabei lun lidan nan, ani seremei numuti Heowá luagu líderagunina asigirei émeri le anügübei lidoun ugundani luma agañeiruni le inarüniti”.

Agia buguya? Lubaragiñe bidin lárigi katei burí le líchugubei ubóu, ka uagu machoururun bubalin bémeri lau beseriwidun kei prekursoru?

Aban feru maríeitiña ha ñǘdünbaña ebeluha tidan sukursáli to Merigaboun aba harihini hagundan íbirigu ha eseriwidubaña ñein. Aba tabürühan íbiri tuguya: “Wéirihali meha lidili wanügüni wabagari”. Tuguya lau sun tani weiriei aba desidírü hamá haganwoundagüdüni heseriwidun lun Heowá.

Furumiñe, ariha hamuti meha asansiruni burí le lunbei hadügüni kamá wéinamuyati. Gama lumoun, luagu aban weyu, aba hasaminarun luagun le lariñagubei bérusu le lánina sagü weyu. Weyu ligía sagawati lídangiñe Huan 8:31, le ñein lubéi lariñaga Hesusu: “Anhaün agunfulira lau nererun, hiábinba lun nani humá disipulugu le tímatimaati”. Lau katei le lidan hasaminan, aba hariñagun: “Meberesenga ka lan lunbei wadügüni lun sensiyutima lan wabagari, gebegi lumuti busiganu sákürifisiu ligía”. Aba halugurunu óunwenbu haban, aba hagidarun saragu amu ihürügu hawariua, aba háguyun lidoun aban damuriguaü le mégeibei ídemuei. Guentó heseriwiduña kei prekursorugu, ani ídehatiña giñe lidan tábunawagun Luban Adamuridaguni ani ídeha hagía lidan burí adamurini le lánina distritu. Ida liña san hasandiragun houngua? Aba hariñagun: “Wéiritu wanigi lau sun buiti le lanügübei aban ibagari sensiyuti, ani adüga waméi le tariñagubei lóundarun Heowá woun lun wadügüni”.

Abürühati Salomón: “Bubaruaguounlá bariha súnwandan” (Ari. 4:25). Ítara kei siñati lan ladigiruni aban abugahati larihin luéi üma, lunti giñe wadisedun luéi katei burí le gayarati ladügün lun lásiñarun wasaminarun waganwoundagüdüni weseriwidun lun Heowá ani gúnfuli wameime.

Ka burí san katei gayarabei wadügüni lidan weseriwidun? Anihein eseriwiduni lidan dan dayarüti. Gayarati giñe wasaminarun wáguyun lidoun amu damuriguaü le ídanbei mégeiwa hamá hanwoun  apurichihatiña, o lidoun aban le ñein lubéi hemegeirúa wéiyaaña lidan afiñeni o ídehatiña lidan damuriguaü. Gayarati san bídehan? Ka uagu mamuriahan bubéi adundehani luma óunigiruti sirkuitu? Anhein busén bubéi beseriwidun lidan aban fulasu le díseti, gayarati bálügüdahan anhein anihein lubéi damuriguaü le burí mégeiti ídemuei. b

Giribuya wamá lidoun sügǘ le uágubei layanuha Isaíasi 62:10. Chóuruti nadagimein hamá fiú huríu aransehei üma lun gayara lan hagiribudun híbiri ísüraelina hageiroun. Huuti san wadagimanu ligía? Anha, lugundun aba gayara lan hagiribudun lumutuniña Bungiu sin turóbuli. Ligíati, anhein báfaaguña lubéi lun bawanserun lidan beseriwidun lun Bungiu, mabuchadalá buagu. Lau lídehan Heowá, bibihibei le babusenrubei. Gidabei furumiñeguarügü katei le gayarati ladarasahanibu lidan bémeri ani bamuriaha lichú aau luma Bungiu. Barihibei líderagubadibu lan arihei halíaba lan ‘bíchigei bugudi, lun bararamun buidu súnwandan’ (Ari 4:26).