1, 2. Ka meha uagu gayara lubéi gunfuranda lani Pábulu le hasandirubei ha débilibaña?

 SUN wagía anihein dan débili lan wasandiragun woungua. Dan le wuriba lan wasandiragun woungua, gayarati wadebilidun darí lun lásiñarun wagunfulirun lau wadagimanu le lánina sagü weyu. Guentó, samina humá lun hamuga débili lan hasandiragun hungua, mama luagu aban dimaasu, luagu saragu dan, hati ligibuagun hati. Ma busenbadün hamuga lun gunfuranda hamanün ha híbiri?

² Subudi lumuti meha apostolu Pábulu le mini lubéi hasandiragun gürigia houngua wuriba, íbini débiliñu, ladüga óuchawaguni le ñǘbuinti múnadagiñe luma bóugudigiñe lun damuriguaü. Saragu wéiyaasu sandiguati lungua siñá lan lawandun (2 Ko. 1:8; 7:5). Dan le meha lasaminarunbei luagu libagari luma luagun sun turóbuli le lásügürübei, ariñagati: “Anhein débili lubéi aban gürigia, sanditina kamá hamuga au débilibei” (2 Ko. 11:29). Ani dan le konparárü lániña lílana damuriguaü kristiánu luma lumegegun aban úgubu, ariñagati íbini lan ha ‘arihúbaña kamá débilitiña, mégeiwatiña’ (1 Ko. 12:22). Ka labusenrubei lariñagun? Ida liña larihiniña Heowá ha genegebei débilitima hamá? Ka uagu lunti lubéi warihiniña kei larihiniña Bungiu? Ani ida luba lahuudun katei le woun?

3. Ka gayarabei ladügün lun lasansirun ligaburi warihiniña lílana damuriguaü ha mégeibaña ídemuei?

³ Lidan ubóu le ídanbei wawinwanda gíbeti ásügüraguni ani wéiriti lichugún uéiriguni houn ha hérebaña hama ha nibureingiñabaña. Gíbetiña adügatiña furumiñeguarügü katei lun hibihini le habusenrubei, libe-agei dan meberesenga ka lan hasandirubei ha débilibaña. Furanguti magundan wamá lau igaburi le. Gama lumoun, sin wíchugun fe gayarati wagumeserun asaminara wuriba hawagun lílana damuriguaü ha mégeibaña ídemuei súnwandan. Ida luba warihiniña kei larihiniña Heowá?

4, 5. a) Ka larufudahabei hénpulu le lídanbei 1 Korintuna 12:21-23 luagu ligaburi larihiniña Heowá ha débilibaña? b) Ida liña lahuudun woun wíderaguniña ha débilibaña?

⁴ Gayarati líderaguniwa hénpulu le layusurubei Pábulu tidan furumiñetu ligaradan houn Korintuna lun gunfuranda wamani ida liña lan larihiniña Heowá ha débilibaña. Lidan kapítulu 12, haritaguagüda lumutiwa apostolu le luagu íbini lan lumegen úgubu le mabuidunbei larihín o le débilitimabei huuti (aliiha huméi 1 Korintuna 12:12, 18, 21-23). Añahein fiú hádangiñe ha arufudahabaña luagu ewolusión ariñagatiña iyeeni lan katei le. Gama lumoun, lidan laturiahóun úgubu dariwati luagu anihein lan lumegegun úgubu le meha arihíbei kamá meseriwínti lun ni kata gúnfuliti wadagimanu le súdiniti lidan úgubu. Kei hénpulu, añahein meha saminatiña meseriwin lan liraüraü lifinga hagudi gürigia lun ni kata, ani guentó subudi waali luagu ligía lan ídehabei lun gayara lan hararamun luma lun héibugun gürigia buidu.

⁵ Hénpulu le layusurubei Pábulu arufudahati woun luagu sun lan lílana damuriguaü huutiña. Busenti Satanási lun wafiñerun luagu meseriwin wamá lun ni kata, ani meberesen lan Heowá wau (Hob. 4:18, 19). Ánheinti Heowá megei lumutiña sun lubúeingu, íbini ha genegebei débili hamá. Líderagubadiwa saminaü le lun gunda lan wasandiragun woungua lau lúgaaru le wibihibei lidan damuriguaü ani gunda wagíame ladüga lídanñadiwa lan aban damuriguaü hama lubúeingu Bungiu ha lídanbaña sun ubóu. Kei hénpulu, samina humá san luagu aban weyu dan le hárügüdünbei aban íbiri le mégeiti ídemuei lun léibugun. Chóuruti mosu lan hidin lau lupasun gürigia ligía. Chóuruti giñe íderagua humani gürigia ligía saragu, gama lumoun, ma íbini giñe hugía sandiguatün hungua buidu? Le linarün katei, dan le wíderagun amu lidan le hemegeirubei, sanditiwa ugundani ladüga wetenirun houn ani aba laweiridun waguraasun luma wínsiñehabu ani aba giñe derebugutima wamá (Efe. 4:15, 16). Busenti Wáguchi le hínsiñehabubei lun gebegi hamá sun wíbirigu woun, meberesenga ka lan hadebilinbei. Anhein wadüga ítara, derebugubei damuriguaü ani larihúba anihein lan ínsiñeni lidan.

6. Ida liña layusuruni Pábulu dimurei débilibaña luma dimurei le hérebei?

⁶ Dan le labürühan Pábulu houn kristiánugu korintuna, yusu lumuti dimurei débilibaña lun lafuranguagüdüni ka lan meha hasaminarubei ha mámabaña kristiánu hawagun kristiánugu lidan furumiñeti sígulu luma ida liña lan meha lasandiragun lungua (1 Ko. 1:26, 27; 2:3). Dan le layusurunbalin dimurei le hérebei lun layanuhan hawagu fiú kristiánugu, mama meha lariñaguña lau lira luagu buídutima hamá hawéi ha híbiri (Rom. 15:1). Ariñagarügüti ha lan lǘtimahañabaña afurendeira mosu lan gaguraasun hamá habá ha méregilibei hafiñen.

7. Ka uagu anihein lubéi dan hénrengu lan woun wíderaguniña ha mégeibaña ídemuei?

⁷ Dan le wíderaguniña “ha mérebaña hama ha gudemebaña”, áyeiha wamuti Heowá ani gúndaati giñe wau (Sal. 41:1; Efe. 5:1). Háfuga hénrengu lan woun wíderagun aban íbiri.  Ka uagu? Háfuga ladüga wasaminarun mama lan wani bísinisi turóbuli le gádanbalin. O háfuga ibidiñe lan woun kaba lan wariñaga houn, o ladüga masandiragun wamá woungua buidu hama, ligía aba lubéi wadisedun hawéi. Rosario, a aban íbiri to lígiruboun tani weiriei, ariñagatu: “Gáriti dan le barihin hadisedun íbirigu buéi o dan le madügün hamani le yebe agurabúbei lúmagiñe aban umadaü buiti. Dan le wuribañein lan léibugun katei bau, ligía bemegeirun umadagu yarafa bun”. Subudi lumuti meha urúei Dawidi le mini lubéi hasandirun gürigia meberesenwa lan hau (Sal. 31:12).

8. Kaba íderaguawa lun gunfuranda wamaniña wíbirigu?

⁸ Háfuga gunfurandatima wabaña lan wíbirigu anhein waritagua luagu aba lan hadebilidun fiú hádangiñe ladüga saragu turóbuli, ladüga sandi, o ladüga anihein lan fánreinguaü hadan haduheñu. Gayarati lachülürün aban oura lun wasandiragun woungua kei hagía. Lubaragiñe hebelurun lidoun Fulasu Füramasewati, haritaguagüda lumutiña Heowá ísüraelina —ha meha gudemebaña ani débili hagía Ehiptu— luagu moun lumuti lan ‘hamahadun híderaguniña’ ha asufurirubaña. Busenti meha lun híderagubaña lan ha gudemebaña hama ha débilibaña haganagua (2 Lur. 15:7, 11; Fad. 25:35-38).

9. Ka katei lunbei wetenirun lun dan le ledebilidun lafiñen somu íbiri? Ru humá aban hénpulu.

⁹ Lubaragiñe wayanuhan o wasaminarun wuriba hawagun ha lídanbaña turóbuli, lunti wíchugun dǘgüdaguaü houn tídangiñe Bíbülia (Hob. 33:6, 7; Mat. 7:1). Ru wamá aban hénpulu. Dan le lachülürün aban abugahati moto le buleseihali tidoun aban haspítali, áluahatiña san surusiagu hasubudiruni anhein ligía lubéi gadurunbei lidan danaguaü le ñein lubéi labuleseira? Uá. Afureseharügütiña agaraniha lun. Ítarameme, anhein débilihali lubéi aban íbiri ladüga gibe lan liturobulin, lunti wíderaguni lun laransehani lumadagua luma Bungiu, ligía súdinitimabei (aliiha huméi 1 Tesalónikana 5:14).

10. Ka uagu wariñaga ha lan genegebei débili hamá gayarati lan “risi hamá lidan hafiñen”?

¹⁰ Ánhawa araramagua asaminara luagu gádantiña wíbirigu, gayarabei amu lan ligaburi warihini hadebilin. Añahein íbirigu barühaña saragu irumu awandei hebedaagun haduheñu ani gayarati genege lan débili hamá, gama lumoun, ma arufudatiña aban afiñeni luma aban erei le wéiriti? O dan le warihin aban úguchuru to agüriahabaliña tisaanigu tábuguarügü súnwandan lan tidin adamuridagua, ma wéiritu wanigi lau tafiñen luma tawandun? Agia nibureintiña ha asigirubaña lidan inarüni lau sun lanarime óuchawaguni le hasufurirubei leskuelarugu? Ánhawa asaminara luagun sun le hadügübei wíbirigu lun heseriwidun lun Heowá, wíchuguba fe luagu íbini lan genege lan débili hamá, gayarati “risi hamá lidan hafiñen” (Sant. 2:5).

11, 12. a) Kaba íderaguawa lun warihiniña débilitiña kei larihiniña Heowá? b) Ka wafurendeirubei lídangiñe ligaburi lóuseruni Heowá Aarón?

¹¹ Wakutihani ida liña lan lóuseruniña Heowá fiú hádangiñe lubúeingu líderagubadiwa lun warihiniña ha genegebei débili hamá kei larihiniña Heowá (aliiha huméi Sálumu 130:3). Kei hénpulu, lun hamuga meha ñéinñadiwa lan luma Moisesi dan le ladügünbalin Aarón bágasu lauti golu, kaba hamuga meha wasaminara dan le waganbuni le lariñagubei Aarón luagu ka lan lébunabei ladügüni? (Afu. 32:21-24.) O kaba hamuga meha wasaminara luagun dan le lígiraguagüdünbei lungua tun Míriam, to líbugaña, lun layanuhan wuriba luagu Moisesi ladüga lamarieidun tuma aban terencha? (1 Lur. 12:1, 2.) Kaba hamuga meha san wadüga lun hamuga warihini luagu míchugun lan Moisesi luma Aarón uéiriguni lun Heowá dan le ladügün lun láfuridun duna lídangiñe aban dübü Meribá? (1 Lur. 20:10-13.)

¹² Lidan sun sügǘ burí ligía, gayarati hamuga meha labeichuni Heowá Aarón óurameme  ligía. Gama lumoun, aba gunfuranda lani íbini lan gibe lan lichara, mama lan aban gürigia wuribati. Genegeti ígiraguagüdarügü lan Aarón lungua lun le gádanbalin o lun héredun amu luagu. Gama lumoun, dan le lariñawagunbei sun lidurun lun, meyeedagunti ani sigí lumuti ladundehan Bungiu (Afu. 32:26; 1 Lur. 12:11; 20:23-27). Himei lumuti meha Heowá letenirun lun lafiñen Aarón luma luagu asakürihaali lan. Ani saragu sígulu lárigiñe, haritawaguagili luagun luma hawagun ladügawagun ladüga gürigia hamá ha inebehabutiña lun Heowá (Sal. 115:10-12; 135:19, 20).

13. Ka egüsámini lunbei wadügüni wóuniwagua lun wáyeihani Heowá?

¹³ Lun gayara lan wáyeihani Heowá, furumiñe mosu wakutihani ida liña lan warihiniña ha débilibaña. Mégeitiwa san wasansiruni ligaburi warihini katei? (1 Sam. 16:7.) Kei hénpulu, ka wadügübei dan le manúadirun lani aban nibureinti lisebáhari buidu o dan le larufudun meberesenhabuni? Lubaragiñe wachuraguni, ka uagu míderagun wabalin lun derebugutima lan lafiñen? Dan le wíderagun aban gürigia le mégeiti ídemuei, ábatima gudemehabu wamá ani hínsiñehabu wagía.

14, 15. a) Ida liña san lóunabun Heowá dan le larihinbalin aba lan leferidiruni Elíasi ganigi le luágubei luagu fiú dan? b) Ka wafurendeirubei lídangiñe lásügürün Elíasi?

¹⁴ Ka lasaminarubei Heowá hawagu ha asufurirubaña lanarime íruni? Ariha waméi ida liña lan líderagun aban hádangiñe lubúeingu le asandiragubei lungua ítara: profeta Elíasi. Íbini rárama lan Elíasi lau ganigi houn 450 lánigu Baali profetagu, aba lanurahan dan le líchugunbei fe luagu taransehaña lan urúei Hesawéli lun táfaruni. Lárigiñebei laweiyasuhan kéiburi 150 kilómeturu (95 maili) lun lachülürün Bérüsewa, aba lebelurun lidoun fulasu mageirawati. Lidan lubucha luagu lárigiñe laweiyasuhan lábugiñe lara weyu, aba lañuurun profeta le lábugiñe  aban tídibu wewe ani aba lamuriahan luma Bungiu lun lagidaruni libagari (1 Uru. 18:19; 19:1-4).

¹⁵ Ida liña san lóunabun Heowá dan le larihin siélugiñe lun ǘnabun ani aba larihini lani profeta ibidiñe lan lun kaba lan ladüga? Aba san mabusenrun laali lan ladüga leferidiruni anigi le luágubei ani aba léiguadun lidoun lanarime íruni? Uá! Gabaroun lumuti Heowá gádanti Elíasi ani aba lóunahan aban ánheli íchiga gurasu lun. Ariñagati ánheli ligía lun bián wéiyaasu lun leigin lun “lárügüdün erei” lubá lidise wéiyaasu le lunbei ladügüni (aliiha huméi 1 Urúeigu 19:5-8). Kei aubei warihei, lubaragiñe líchugun Heowá adundehani lun, aba laganbuni ani áluaha ligía ida luba lan líchugun erei lun.

16, 17. Ida luba warufudun ínsiñeni houn wíbirigu kei ladüga Heowá lun Elíasi?

¹⁶ Ida liña san gayara lan wáyeihani Wabungiute le hínsiñehabubei? Moun lumuti wéibaagun íchiga adundehani (Ari. 18:13). Dan le wayanuhan hama gürigia ha asandirutiña mebegi hamá “ni kata” ladüga gádantiña, buítimati waganbuniña furumiñe ani gunfuranda wameime sun gádantiña buidu (1 Ko. 12:23). Ítara luba wasubudiruni kátima lan hemegeirubei lun gayara lan wíderaguniña.

¹⁷ Samina wamá luagun tásügürün Rosario, würi to buga uáguboun wayanuha, to erederuboun tábugua hau bián tisaanigu dan le lígirunbalun tani weiriei. Ka san hadügübei fiú Gefentiña? Ariñagatu: “Dan le nabahüdagunbalin houn luagu gágamuru ka lan asuseredubei, másügürünti ni bián-wein-seingü minutu lárigiñe, aba hachülürün múnadoun. Anihein águiraü hágurugu. Kéiburi luagu biama o ǘrüwa weyu mígirun hamutiwa wábugua ni murusun oura. Ani kei le meigin wabéi buidu ani awanhagua adadagara, resibi hamutiwa hábiñe luagu fiú dan”. Háfuga haritaguagüda lumutiwa le luagun le labürühabei Santiagu: “Kei hamuga guentó, anihein aban iduhei wügüri o würi emegeiruti daüguaü luma éigini, lariñaga aban hídangiñe lun: ‘Buidulá lidin bun; daruguabá baugua, hou buguyame’, ani michu lumuti le lemegeirubei lun, kagia hu lan lira? Ítara liña lasuseredun luma afiñeni: anhein marufudun hamá gürigia lau katei le hadügübei, afiñeni lábuguarügü, ítara liña kei aban katei hilaali” (Sant. 2:15-17). Seremei ídemuei le tibihibei hámagiñe íbirigu, dandu wügüriña kei würiña, ibihatu Rosario hama tisaanigu erei lun heseriwidun kei prekursorugu ídehatiña sisi hati lárigiñe lirun sügǘ ligía (2 Ko. 12:10).

18, 19. a) Ida liña gayara lan wíderaguniña ha débilibaña? b) Ka asagarubaña buiti dan le wíderaguniña ha débilibaña?

¹⁸ Gayarati subudi wamani luagu hénrengu lan hiñuragun gürigia lídangiñe aban sandi le wéiriti, háfuga ladüga sügühadiwa lan lídangiñe. Ítarameme, aban kristiánu le débilihali lumadagua luma Heowá ladüga lichara guánarügü o ladüga somu turóbuli lidan libagari háfuga megei lan dan lun liñuragun. Inarüni mosu lan laturiahan, lafurieidun ani adüga ligía saragu amu katei lidan leseriwidun lun léredagüdüni lafiñen. Agia wagía, gaguraasunbadiwa san lubá? Ani lidan láfaagun lun liñuragun, ñéinbadiwa san luma arufudei lun hínsiñe lan woun? Adüga waméi sun wayaraati lun hasandiruni ha débilibaña luagu hínsiñe hamá woun ani gebegi hamá giñe woun (2 Ko. 8:8).

¹⁹ Mabulieida waméi dan le lan wíderaguniña wíbirigu sandí wamuti lan ugundani le hasandirubei gürigia dánrügü le híchugun. Furendeitiwa giñe lun wíchaagun woungua lidan halugaarun ani gaguraasun wagíame habá. Gama lumoun, mámarügüñadiwa wagía asagara buiti, sun lílana damuriguaü furendeitiña arufuda ínsiñeni. Ani le súdinitimabei, dan le “híderawagún ha aniheinbei hemegeirun” áyeiha wamuti Heowá, le unbei gebegi hamá sun gürigia (Adü. 20:35).