FUATI meha arütíkulu súdiniti le tidan aban periodiku koreana to gíriboun The Chosun Ilbo: “Shim Cheong, aban würi buitu to masubudirunboun ni kata luagu Hesusu. Aba funa san tidin máfiougatin?”.

Gíbeti meha sigenei lanügün ariñahani ligía, ladüga Shim Cheong aban meha nibureintu hínsiñewatu tidan burí líburu ani adügatu meha sákürifisiu lun tíderaguni túguchi le marihinbei. Lau lásügürün dan ibihatu uéiriguni luagu sun le tadügübei, darí lun tuguya lan hénpuluboun houn nibureintiña koreana.

Besafu gürigia marichati harihini saminaü luagu gayara lan tidin aban gürigia buitu kei Shim Cheong asufurira máfiougati ladügarügü mabadiseirun tan tidan ligilisi. Lau sun luwuyeri, susereti katei le saragu dan lubaragiñe lachülürün uganu luáguti eseriwiduni lun Kristu lidoun fulasu le ñein lubéi meha teredera nibureintu tuguya.

Lidan arütíkulu ligía adügüwati aban álügüdahani lun aban tábuti ligilisi. Dan le lálügüdünwabei anhein sun lubéi ha óunwegubaña sin hasubudirun luagu Kristu hóudinba lubéi máfiougatin, aba lariñagun: “Ibidiñeti woun. Saminatiwa luagu háfuga lan ladügüba lan Bungiu somu katei lun lesefuruniña [gürigia burí ha]”.

Ariñagatu Catecismo de la Iglesia Católica: “Wabureme guánarügü ariñagubei mégeiwa lan Badisei lun gayara lan hesefurun gürigia (cf Jn 3,5)”. Ariñagati bérusu le tidan Biblia de Jerusalén: “Le úati nasirua lan lídangiñe duna luma lídangiñe Sífiri, siñabei lebelurun lidoun Larúeihan Bungiu”. Ladüga katei le, añahein afiñetiña luagu sun lan gürigia ha óunwegubaña sin habadiseirun aban lan houdin máfiougatin o súfuri hamá lidan somu manera.

Gama lumoun, añahein amu mafiñen hamuti arufudahani le. Hilaaña saragu míñunu gürigia sin hasubudirunu Bíbülia. Yuuti san lun hasufurirun lun súnwandan? Ka tariñagubei Bíbülia luagu katei le?

Arufuda tumuti Bíbülia furangu mamahan lan Bungiu houn gürigia ha úmounbei machülügili lan lilurudun. Ariñagati Adügaü 17:30 lau ichouruni: “Meberesegúnti meha Bungiu lau katei le hadügübei gürigia lábugiñe libidiñe houn”. Ligíati, ka san emeniginibei houn gürigia ha óunwegubaña sin hasubudiruni Bungiu?

Darí wamuti óunabagülei lidan dimurei le lariñagubei Hesusu lun aban hádangiñe wügüriña wuribatiña ha óunwegubaña lóubagiñe. Ayumuraguali meha wügüri ligía lun: “Haritaguabatia nuagun danme le lagumeserun barúeihan” (Lúkasi 23:39-42). Ka san lariñagubei Hesusu lun? “Ariñagatina bun uguñe: ‘Númabadibu lidan Paraísu’.” (Lúkasi 23:43, TNM.)

Füramaseñein meha san Hesusu lun lídinba lan sielun? Uá, ladüga úagili meha nasirua lan wügüri ligía ábanya wéiyaasu, ni lídangiñe duna ni lídangiñe sífiri, ani mégeiwati katei le lun hebelurun gürigia lidoun Larúeihan Bungiu sielu (Huan 3:3-6). Ibagari lidan “paraísu” füramase lubéi Hesusu lun. Wügüri huríu ligía, chóuruti aganbaali lan meha layanuhóun luagu furumiñeti Paraísu, fuluri-agei Edén le uágubei layanuhóua tidan furumiñetu líburu to tídanboun Bíbülia (Agumesehani 2:8). Le linarün katei, füramaseñein meha Hesusu lun luagu láguyuguba lan ubouagu danme le paraísuhali.

Füramasetu Bíbülia luagu “lásaaragüdübaña lan [Bungiu] hilaaña, dandu ha buídubaña (ha richabaña) kei ha wuribabaña (ha marichabaña)” (Adügaü 24:15). Marichatiña hagía ha magunfulirunbalin lilurudun Bungiu ladüga masubudirun hamani. Lásaaragüdübei Hesusu wügüri wuribati ligía ani saragüda ligíame saragu milu míñunu gürigia ha óunwegubaña sin hasubudiruni Bungiu. Ñein lidan paraísu, sun gürigia hagía hafurendeirubei lilurudun Bungiu ani hibihiba chansi lun gaganbadi hamá luma lun harufuduni hínsiñe lan Bungiu houn.

Danme le háguyugun ha marichabaña, haguserawagüdüba san luagu le hadügübei lidan habagari le sügühalibei? Uá. Ariñagati Rómana 6:7 “Lugundun  le hilaalibei, furihali lídangiñe figóu”. Ani kei aubei warihei, gürigia ha marichabaña fayei hamaali hafigoun lau habagari, ligía haguseruba lubéi luagu katei le hadügübei lárigiñe háguyugun, mama luagu le hadügübei lubaragiñe hounwen. Ka uagu buidu lubéi katei le?

Lugundun hibihiba chansi lun hafurendeiruni lilurudun Bungiu, le lunbei lasubudiragüdüniwa danme le tadaraawagun líburu. Ábameti haguserawagüdün luagu le hadügübei “según le bürüwañubei tidan burí líburu tuguya”, lidan amu dimurei, según anhein gaganbadi habéi lun lúrudu burí ligía o maganbun hamani (Arufudúni 20:12, 13). Hibe-agei hibihibei, mama libiaman, hibihibei furumiñeti chansi inarüniti lun hafurendeirun luagu Bungiu luma lun hadügüni lugundan lun gayara lan hibihin ibagari magumuchaditi ligibuagu Ubóu.

Arufudahani tídangiñeti Bíbülia le íderaguaali saragu gürigia lunya hafiñerun luagu Bungiu. Yeong Sug aban hádangiñe. Lidan meha afiñeni katóliku tagüriara ani wéiriti meha línsiñe tun. Añahein meha íbini fádirigu hadan tiduheñu. Kei le meha busén tan monha tan, aba tebelurun tidoun muna burí to ñein lubéi heredera monha; gama lumoun, fiú dan lárigiñe aba táfuridun ñéingiñe lárigiñe tarihini katei burí le asuseredubei ñein. Ani máhatu meha giñe lun saminaü luagu súfuri hamá gürigia máfiougati; ariha tumuti meha kei aban marichaü luma aban furundei.

Lau lásügürün dan, aba tarufuduni aban gefentu luagu Heowá dimurei tídangiñeti Bíbülia le tun: “Ha giñe wínwangiñabaña subudi hamuti luagu hóunweguba lan, ánhaña ha hilaañabaña ibidiñeti ni kata houn” (Apurichihati 9:5). Aba tafuranguagüdüni tun mama lan hasufuriruña tiduheñu ha hilaañabaña máfiougati, harumugarügüña lan lidan óunweni, agurabahei lidaani águyuguni.

Kei le subudi tani Yeong Sug luagu gibe hamá gürigia ibidiñeti inarüni le tídanbei Bíbülia houn, aba desidírü tan hádangiñe tan gürigia ha agunfulirubalin lererun Hesusu le lídanbei Matéu 24:14: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu”. Guentó tanügüñein uganu buiti houn gürigia ani ayanuhatu houn luagu lubuidun emenigini le tafurendeirubei tídangiñe Bíbülia.

“Úati [...] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei” (Adügaü 10:34, 35.) Anihán irichaü le gayarabei wagurabahani lúmagiñe Bungiu. Ka uagu? Lugundun “hínsiñeti katei le richabei luma le úaraguabei lun [Heowá]” (Sálumu 33:5).