1, 2. a) Ka libiamanbei gumadi le súdinitimabei según lariñaguni Hesusu? b) Kaba burí álügüdahani ounabúa lidan arütíkulu le?

 DAN le lálügüdünbalin aban fariséu Hesusu ka lan gumadi súdinitimabei lídangiñe Lúrudu, aba lariñagun Hesusu lun: “Hínsiñela Babureme le Bubungiute bun tau sun banigi, tau sun buani luma lau sun bisaminan”. Lidan arütíkulu le lubaragiñebei le ariha wamuti ka lan mini lubéi katei le. Gama lumoun, ábaya layanuhan Hesusu luagu libiaman gumadi le súdinitimabei: “Hínsiñe hamá bíbirigu bun kei bínsiñegua bungua” (Mat. 22:34-39).

² Ariñagati Hesusu mosu lan hínsiñe hamá híbiri gürigia woun kei wínsiñegua woungua. Ligía lunti lubéi wálügüdagun woungua: Ka san mini lubéi hínsiñedun gürigia woun kei wínsiñegua woungua? Ani ida luba san warufuduni ínsiñeni ligía? Lounabúba álügüdahani burí le lidan arütíkulu le.

3, 4. a) Ka abahüdaguni layusurubei Hesusu lun lóunabuni wügüri le álügüdahabei kátaña lan líbirigubaña? b) Ida liña líderaguni samariana huríu le bulesei wáalibei? (Ariha huméi dibuhu le lídanbei lagumeseha arütíkulu.)

³ Aba lálügüdüni aban wügüri Hesusu: “Kátañagia níbirigubaña?”. Lun lóunabuni Hesusu lálügüdahan, aba labahüdagun aban hénpulu  lun luáguti samariana le buídubei ani aba larufudahani lun le mini lubéi ínsiñeni hawagu híbiri gürigia (aliiha huméi Lúkasi 10:29-37). Aba layanuhan luagu aban huríu le hárügüdübei híwerutiña, aba habuleseiruni ani aba hígiruni ǘmadarugu hilamémeeli. Ábati lásügürün aban fádiri, lárigiñe, aba lásügürün aban ladügawagún Lewí. Íderagua hamuti san, kei lagurabún lun hadügüni? Uá. Dan le harihinbalin, aba hasigiruni hémeri. Aban samariana araramagubei lun líderaguni. Súdiniti katei le, lugundun lidan meha dan ligía mínsiñeguatiña meha samariana houngua hama huríu (Huan 4:9).

⁴ Lun lagaranihan lun burí biti le luágubei huríu ligía, aba léserun samariana ligía diwéin luagun luma garaba. Lárigiñe, aba lanügüni tidoun aban haban chülüdügütiña ani aba líchugun bián denariu lun tabureme muna lun letenirun lun huríu ligía (Mat. 20:2). Ménrengunti wasubudiruni luagu samariana lan ligía óuserubei kei aban íbiri buiti. Arufudahati lani Hesusu hénpulu woun luagu lunti lan warufudun ínsiñeni luma gudemehabu houn sun gürigia, meberesenga halíana hamá o ka lan héchunbei.

5. Ida liña harufudun gefentiña luagu Heowá ínsiñeni hawagu gürigia lidan aban chagaguaü lánina liñawan dan le málügilibei lasuseredun?

⁵ Lidoun “lagumuhóun dan” le hénrenguti hadarirún gürigia gudemehabutiña; saragu gürigia guentó furundetiña, hanarimetiña, ani mebereseguntiña hau híbiri gürigia (2 Tim. 3:1-3). Arihúati katei le dan le lasuseredunbei aban durumandei gíriti Sandy uburugu Nueva York, lidan diisi-hati, irumu 2012. Lidan aban fulasu le ñein lubéi weiri lan chagaguaü, chülütiña híwerutiña íweruhei hálegu gürigia ha asufurirubaña ladüga lúan leiti ua ligía ni kata lun hásüdagüdünu haban luma amu burí katei le hemegeirubei. Ani lídanmeme fulasu ligía, adügatiña gefentiña luagu Heowá aransehani lun houdin íderaguaña híbirigu ani íderagua hagía amu burí gürigia. Keisi kristiánugu, óuseratiwa ítara ladüga hínsiñe hamá gürigia woun. Gama lumoun, gayarati san warufuduni wínsiñehabu lidan amu manera?

6. Ka uagu warufuduña lubéi hínsiñe hamá gürigia woun dan le wapurichihani uganu buiti?

⁶ Íderagua wamaña gürigia asubudirei Bungiu. Dan le wapurichihan barütiwa “gurasu” houn gürigia (Rom. 15:4). Furanguti arufuda wamá ínsiñeni houn lau wasubudiragüdüni uganu buiti luáguti Larúeihan Bungiu houn (Mat. 24:14). Ariha wamuti kei aban óunwenbu chansi gayara lan wanügüni uganu houn lúmagiñeti “Bungiu, le íchugubalin emenigini” (Rom. 15:13).

7. a) Ka mini lubéi wóuseruniña gürigia kei wabusenrun wouserúniwa? b) Ida liña buidu lan lidin woun dan le wóuseruniña gürigia kei wabusenrún wouserún?

⁷ Óusera wamaña gürigia kei wabusenrun lun wouserún. Ariñaga lumuti Hesusu woun ka lan mini lubéi gumadi le dan le lariñagunbei lidan Serumu luagu Wübü: “Súnwandanla lubeiti hadügün houn amu kei le habusenrubei lun hadügün hun; ladüga ligía lariñagubei lilurudun Moisesi tuma haliburun profetagu” (Mat. 7:12). Dan le wóuseruniña ha híbiri kei aubei lariñagei Hesusu, wawinwanduña según le lariñagubei “lilurudun Moisesi” (Agumesehani dagá 2 Lúrudu) luma tidan “haliburun profetagu” (líburu burí to ñein lubéi saragu profesía lidan Abürüdǘni Ebüréu). Arufudatu líburu burí to luagu biní lániña Bungiu ha hínsiñehabubaña houn amu. Kei hénpulu, ariñagati Heowá liyumulugugiñe profeta Isaíasi: “Adüga humá irichaü, adüga huméi le úaraguabei [...]. Fuleseiwatiña gürigia ha afalarubalin gumadi le” (Isa. 56:1, 2). Anhein hínsiñe habéi gürigia woun ani óusera wagía lau irichaü, labinirubadiwa Heowá.

8. a) Ka uagu lunti lubéi hínsiñedun wáganiñu woun? b) Ka gayarabei lasuseredun ánhawa arufuda ínsiñeni houn wáganiñu?

⁸ Hínsiñe hamá wáganiñu woun. Ariñagati Hesusu: “Aganbaadün giñe luagu ariñawagúa lan meha: ‘Hínsiñela bumada bun, liyereegudáme bágani bun’. Au nariñahare hun: Hínsiñe hamá háganiñu hun, biní humaña ha íñaragubalün, adüga humá buiti houn ha iyereehabúbaña hun,  afurieida huguyame lun Bungiu hawagu ha anabagubalün, ha wuribabei óuserunün. Ítara luba lirahüñü humá Húguchi Bungiu le siélubei” (Mat. 5:43-45). Ruti giñe apostolu Pábulu aban adundehani lenege le dan le labürühanbei: “Anhein lamá habéi báganiñu, ruba éigini houn; anhein mágürabu habéi, ruba duna houn” (Rom. 12:20; Ari. 25:21). Lábugiñe Lilurudun Moisesi, anhein meha ariha aban ísüraelina luagu dahigua lan lilügün lágani burigü lábugiñe lanügün, mosu meha líderaguni esefurei animaalu ligía (Afu. 23:5). Gayarati meha ladügün katei le lun gamadagua hamá bián gürigia ha meha gáganiguatiña. Ani ítara liña giñe uguñe weyu. Dan le wóuseruniña wáganiñu lau ínsiñeni, íbini ha hanarimebei héibaahaniwa, gayarati wadügün lun hasansirun. Ani ibidiñeti woun; háfuga gayarati heseriwidun lun Heowá.

9. Ka lariñagubei Hesusu luagu waransehani waturobulin hama wíbirigu?

⁹ “Lidan [wa]má darangilaü hama sun gürigia.” (Ebü. 12:14.) Furanguti lunti lan giñe wóuserun ítara hama wíbirigu, ariñagati Hesusu: “Anhein banüga bidewese luagun lani Bungiu latarü, bau ñein aba baritaguni luagu anihein lan katei lidan furumiñeguarügü gürigia bubá, ígirabei le lunbei bedewehani ñein ligibugiñe latarü, ábame bidin arandara luma gürigia ligía. Lárigiñemeti, gayaraahalime bagiribudun luagun latarü íchigei bidewese” (Mat. 5:23, 24). Labinirubadiwa Heowá ánhawa arufuda ínsiñeni houn wíbirigu íbini gaturobulin wamá hama ani áfaagua wagía lun warandarun hama lau lóufudagun.

10. Ka uagu moun lumuti lubéi wáluahani hachara amu?

¹⁰ Machuraha wamá. “Míchiga humá hadurun amu, michugúnwa láamuga giñe hidurun, ladüga kei ligaburi híchugun hadurun amu, ítara luba giñe lichugúniwa hidurun; le aubei hamisuraha, lauba giñe lamisurahaün Bungiu. Ka uagu haríaguei liraüraü ifei le lídanbei lagu híbiri ani masandi humuti durusu le lídanbei hagu? O ka uagu hariñaga lun híbiri: ‘Saganéi liraüraü ifei le bágurugubei’, anihalu aban durusu lidan hagu? Biangua tigibu huguya le! Sagá huméi durusu le lídanbei hagu furumiñe, ítara luba gayara lan harihin buidu lun hasagaruni liraüraü ifei le lídanbei lagu híbiri” (Mat. 7:1-5). Kaba san uagu wachuraguaña amu luagu lirahüñü hachara ani wéinamutimati wachara hawéi? Ma lanarime arufudahani!

11, 12. Ka igaburi buídutimabei lun warufudun hínsiñe hamá gürigia woun?

¹¹ Arufudahati Hesusu woun arufuda wamani hínsiñe hamá gürigia woun lau wapurichihani  uganu buiti luáguti Larúeihan Bungiu houn (Luk. 8:1). Ru lumuti gumadi le houn lani disipulugu: “Heiba lubeiti habügürü gürigia ha lílana sun fulasu, adüga humaña nánime disipulugu” (Mat. 28:19, 20). Dan le wagunfulirun lau wadagimanu le, hóuchatiwa wíderaguniña gürigia lun hígiruni üma dabubereti le anügübei lidoun óunweni luma lun hayabin lidoun üma bürüraüti le anügübei lidoun ibagari (Mat. 7:13, 14). Chóuruti gunda lan Heowá lau áfaaguni le wadügübei ani biní lumutiwa lan.

¹² Ítara kei Hesusu, íderagua wamutiña gürigia lun hasubudiruni luagu megei hamani lídehan Heowá (Mat. 5:3). Anhein arufuda somu gürigia busén lan lafurendeirun, íderagua wamuti lau wanügüni “uganu luáguti asalbaruni” lun (Rom. 1:1). Ha eresibiruti uganu luáguti Larúeihan Bungiu aba harandarun luma Bungiu seremei lani Hesukrístu sákürifisiu (2 Ko. 5:18, 19). Le linarün katei, apurichihani ligía ábanrügü igaburi súdiniti lun warufuduni hínsiñe hamá gürigia woun.

13. Ida liña san harihini wadagimanu lánina lapurichihóun luagu Larúeihan Bungiu?

¹³ Dan le waranserun buidu lun wagiribudun abisidahaña gürigia o lun warufudahan houn tuagu Bíbülia, gúndaatiwa lau wíderaguniña lun hawinwandun según lilurudun Bungiu. Añahein gürigia mosu hadügün asansiruni le wéinamuti lidan habagari (1 Ko. 6:9-11). Gúndaatiwa lau warihini achawaha lániña Bungiu ‘ha busenbaña hibinihi ibagari magumuchaditi’ ani íderagua lumutiña lun hasansirun lun gayara lan hadügün aban umadaguaü buiti luma (Adü. 13:48). Saragu dan aba lasaliragun idiheri ugundanime. Aba agumuchagueina lan idiheri le hawagubei eibu hafiñerun luagu Háguchi le siélubei. Wéiriti wagundan dan le warihini hawanserun. Ma aban abinirúni gayara lan warufuduni wínsiñehabu hawagu gürigia lidan igaburi espechaliti le?

14. Ka burí luáguti ínsiñeni le líridubei Pábulu hínsiñetimabei hun?

¹⁴ Afuranguagüda lumuti Pábulu le mini lubéi ínsiñeni. Anhein wadüga le lariñagubei lidan wóuserun hama amu gürigia, wagundaaragüdübei Heowá, mebelubadiwa lidoun saragu turóbuli ani gúndaabadiwa (aliiha huméi 1 Korintuna 13:4-8). Akutiha waméi le labürühabei Pábulu ani ariha waméi ida luba lan wagunfuliruni le lariñagubei lidan ligaburi wóuserun hama wíbirigu.

15. a) Ka uagu lunti lubéi gaguraasun wamá ani areida wagíame? b) Ka uagu lunti lubéi wígiruni gimugaü luma anaaguni unguaü?

¹⁵ “Le hínsiñehabuti gaguraasunti, [ani] areidati.” Arufudaali Heowá gaguraasuni luma areiduni houn sun gürigia, ladüga charatiwa súngubei. Ma lunti giñe gaguraasun wamá ani areida wagíame dan le hachararun amu, íbini dan le magudemehabu hamá? “Magimuganti” ínsiñeni. Anhein inarüni lubéi hínsiñe hamá wíbirigu woun, magimugarun wabaña, ni luagu hámati ni luagu buligasion le heresibirubei lidan damuriguaü. Ani anhein inarüniti lubéi ínsiñeni le warufudubei, míñugunbei wanaagun woungua ani mayanuhan wagíame wawougua lau uéiriguni. Ariñagatu Bíbülia iyereegutiña lan ha ‘íñuti hanaagun houngua ani panta hagía’ lun Heowá (Ari. 21:4).

16, 17. Ka burí ligaburi larufudún ínsiñeni iridúbei lidan 1 Korintuna 13:5, 6?

¹⁶ Líderagubadiwa ínsiñeni lun wóuserun súnwandan keisi lubudubu, lun meyeehan wamaniña gürigia, míweruhan wamañame, ani madügün wagíame ni kata houn le kóntürati luagu lilurudun Heowá. Líderagubadiwa giñe ínsiñeni lun mámarügü lan wawouguoun wasaminara, lun giñe wáluahani le buídubei houn amu (Fili. 2:4).

¹⁷ Ínsiñeni le inarüniti “magañidunti, máguyugüdünti wuribani luagu wuribani”. Ánhawa lóusera somu gürigia wuriba, magañiduntiwa lau lóufudagun. Ani mabahüdün wamuti giñe átirihali lan wéiyaasu ladügǘn dañu woun (1 Tesa. 5:15). Siñabei hamuga lagundaarun Bungiu wau ánhawa areida igarihabu tidan wanigi. Luagu amu oubaü, gayarati giñe lerederun igarihabu ligía tidan wanigi kei aban watu, ani  ladügüba dañu woun luma houn amu (Fad. 19:18). Buítimati feruduna wamá ani bulíei wagía. Ani kei le ‘magundaarun lubéi ínsiñeni lau marichaü’, magundaaruntiwa dan le louserún aban gürigia wuriba o lau marichaü íbini iyereegu wamá lun gürigia ligía (aliiha huméi Ariñawagúni 24:17, 18).

18. Ka larufudahabei 1 Korintuna 13:7, 8 woun luagu ínsiñeni?

¹⁸ Ariñagati Pábulu: “Súfuri lumuti le hínsiñehabubei sun katei”. Ligíati, dan le ladügün somu gürigia somu katei le mínsiñeti woun ani aba lamuriahan ferudun wama, ínchaha lumutiwa ínsiñeni lun feruduna wamani. “Afiñe” lumuti giñe ínsiñeni sun katei. Afiñe wamuti sun le tariñagubei Bíbülia ani geteingiraditiwa luagu sun ariñahani le weresibirubei túmagiñe lóundarun Bungiu. “Aguraba” lumuti giñe ínsiñeni sun katei. Aguraba wamuti sun le füramase lubéi Heowá woun lau afiñeni. Ani kei le hínsiñe habéi gürigia woun, ayanuhatiwa houn luagu emenigini ligía (1 Fe. 3:15). Ani dan le lídanñadiwa lan turóbuli, furíeitiwa lun Heowá ani agurabatiwa lun buidu lan léibugun sun katei. “Awanda lumuti” giñe ínsiñeni sun katei. Íbini anhein afigouha aban gürigia kóntüra wagía o ánhawa éibaahoua, awanda wamuti. Ani lagumuhóun, ariñagati Pábulu lau ichouruni: “Magumuchagunbei ínsiñeni”. Ani ítara liña, hasigiruba lubúeingu Bungiu arufuda ínsiñeni lun súnwandan.

19, 20. Ka burí bérusu tídangiñeti Bíbülia arufudahabei woun luagu súdini lan hínsiñedun sun gürigia woun?

¹⁹ Ánhawa gaganbadi lun le tariñagubei Bíbülia, hínsiñebaña sun gürigia woun kei wínsiñegua wóuniwagua (Mat. 22:39). Dandu Heowá kei Hesusu agurabatiña lun wadügüni ítara. Le linarün katei, agurabatiña lun hínsiñedun sun gürigia woun meberesenga halíana hamá o ka lan héchunbei. Anihein san dan hénrengu lan woun warufudun ínsiñeni houn amu? Anhein ítara liña lubéi, amuriaha wamá sífiri sandu luma Heowá. Anhein wadüga ítara lagundaaruba Heowá ani líderagubadiwa lun wóuserun lau ínsiñeni (Rom. 8:26, 27).

²⁰ Súdiniti gumadi lun hínsiñedun híbiri gürigia woun kei wínsiñegua woungua darí lun laguarún lun gumadi ligía: “Liñun-agei lúrudu” (Sant. 2:8). Lidan Lilurudun Moisesi, ruti Heowá saragu gumadi houn ísüraelina le arufudahabei houn lun hínsiñedun ha híbiri gürigia houn. Dan lárigiñe, aba ladügün lun labürühani Pábulu le: “Gúnfuli wamaali sun gumadi le, luma burí le líbiri, lau wagunfulirun lau lilurudun Bungiu le ariñagubei: ‘Hínsiñela gürigia bíledi bun keisi bínsiñegua bungua’. Le hínsiñehabubei, madügünti wuribati lun ni aban; ánhawa lubeiti hínsiñehabu, gúnfuli wamaali sun lilurudun Bungiu keisi lubudubu” (Rom. 13:8-10). Mígira waméi lubeiti warufudun ínsiñeni houn amu.

21, 22. Ka uagu lunti lubéi línsiñedun Bungiu woun hínsiñe hagíame gürigia woun?

²¹ Lau wasaminarun luagun resun burí le uágubei lunti lan hínsiñedun gürigia wáledigu woun, buiti lun waritaguni dimurei le lariñagubei Hesusu luagu Lúguchi: “Ítara luba lirahüñü humá Húguchi Bungiu le siélubei; le óunahabalin weyu houn buítiña hama wuribatiña, óunahalei huya dandu houn múarantiña keisi houn úaratiña” (Mat. 5:43-45). Ka larufudahabei le woun? Mosu lan hínsiñedun gürigia woun, dandu anhein buidu habéi o wuriba hamá. Ani kei lariñawagún, arufuda wamuti wínsiñehabu lau wanügüni uganu luáguti Larúeihan Bungiu houn. Anhein heresibira uganu buiti lau taruman hanigi, gayarabei lumadagu hamá Bungiu. Anihein funagia abinirúni wéiritimati luéi le?

²² Anihein saragu resun lun línsiñedun Heowá woun sunsuinagubei. Ani kei aubei warihei, anihein saragu manera lun warufuduni hínsiñe hamá gürigia wáledigu woun. Lau línsiñedun Bungiu woun ani hínsiñe hagía gürigia wáledigu woun warufuduñein gaganbadi wamá lun bián gumadi le wéinamutimabei. Gama lumoun, le súdinitimabei, wagundaaragüdübei Wáguchi le siélubei, Heowá.