Kei le Heowá a lan adügübalin sun katei ani ligía suntigabafubei, gíbetiña gürigia íchuguti duru luagun luagu sun le asuseredubei ubouagu, íbini luagu katei le wuribabei. Gama lumoun, ariñagatu Bíbülia luagu:

• “Richati Aburemei lidan sun lémeri.” (Sálumu 145:17.)

• “Lídanñein dan sun le ladügübei [Bungiu], richaguati sun le ladügübei ligía Búngiubei lánina inarüni, úati marichaü lidan, richaguati ani inarüniti.” (2 Lúrudu 32:4.)

• “Areidati [Heowá], gudemehabu ligía.” (Santiagu 5:11.)

Furanguti madügün lan Bungiu katei wuribati. Gama lumoun, añahein asaminarutiña luagu ínchaha lániña gürigia lun hadügüni. Inarüni san le? Uá. Ariñagatu Bíbülia: “Dan le lebelurun lun aban gürigia lun ladügün katei wuribati, maritagualá luagu Bungiu lan ádarubalin katei ligía lidoun; lugundun mebeluti lidoun Bungiu ladügün wuribani, mada lumuti giñe hadoun gürigia lun hadügüni” (Santiagu 1:13). Móuchagun lumutiña Bungiu gürigia lau línchahaniña lun hadügüni le wuribabei. Madügünti katei wuribati ani mínchahan lumutiña gürigia lun hadügüni. Kábati uagun lichugúa duru?

Afuranguagüdatu Bíbülia aban lídangiñe resun le uágubei hasufurira gürigia: “Ítara kei hábürühan dunuru tidoun sádara, ítara liña giñe gürigia lidan magaradahan lan, ligía lábürühan” (Apurichihati 9:12). Dan le lasuseredun aban danaguaü o aban katei le magurabúnwati, gayarati ñein hamá abuleseirutiña ani gayarati giñe ua hamá. Ani susereti ítara según lóurate lasuseredun luma fulasu le ñein lubéi lasusereda. Kéiburi bián-milu irumu guentó, ayanuhati Hesukrístu luagu lábürühan aban wáyelesi ani áfarati 18 gürigia (Lúkasi 13:1-5). Móunweguntiña gürigia hagía ladüga wuriba lan hanügüni habagari: hilatiña ladüga yarafa hamá lun wáyelesi ligía dan le léiguadunbei. Lidan hárabaganali le asuseredubei Haití lidan eneru lidan irumu 2010 hilatiña 300,000 gürigia, según ariñahani le líchugubei lúrudu, ani hilatiña sun hawuyeri gürigia. Gayarati giñe ladagarun sandi hawagu furumiñeguarügü gürigia ani lidan furumiñeguarügü dan.

Gayarati lálügüdagun somu gürigia lungua: “Siñati meha san ladügün Bungiu lun masuseredun lan chagaguaü ligía? Ka san uagu mesefurun lubaliña gürigia buítiña lídangiñe chagaguaü ligía?”. Lun gayara lan ladügün Bungiu somu katei, mosu hamuga lasubudiruni ídaba lan lasusereda katei burí ligía. Ani íbini inarüni lan luagu gabafu lan lun lasubudiruni le lunbei lasuseredun, lunti wálügüdagun woungua: yusu lumuti san lubafu lun lasubudiruni sun le lunbei lasuseredun? (Isaíasi 42:9.)

Ariñagatu Bíbülia: “Anihein Wabungiute sielu; adüga laali sun le labusenrubei” (Sálumu 115:3). Ítara liña, adüga lumuti Heowá sun le larihibei  mégeiwa lan lun ladügǘn, gama lumoun, madügün lumuti sun le liyaraabei adüga. Lídantima luáguti lasubudirúniwa le lunbei lasuseredun. Kei hénpulu, dan le labuinchunbei binadu uburugu Sodoma luma Gomora lau wuribani, aba lariñagun Bungiu lun Abüraámü: “Néibuga lubeiti ñein guentó arihei anhein inarüni lubéi luagu weiri lan hariban kei lariñawagúniwa nun. Ítara luba nasubudiruni” (Agumesehani 18:20, 21). Luagu saragu dan, mabusenrunti meha Heowá lasubudiruni ídatima liña lan lanarime wuribani le lídanbei ageiraü ligía, arufudati le luagu ligía lan desidírübei lun masubudirun lani sun katei (Agumesehani 22:12). Gama lumoun, úati mini lan lira luagu anihein lan figóu lidan o luagu débili lan. Ariñagatu Bíbülia: “richaguati sun le ladügübei”, ligíati, yusu lumuti lubafu buidu lun lasubudiragüdüni le lunbei lasuseredun ámuñegü luma lagunfuliruni lisuuni. Mafosurunti ni aban lun gaganbadi hamá lun lilurudun (2 Lúrudu 32:4). b Lidan murusun dimurei, Bungiu desidírübei ka lan katei lunbei lasubudiruni luma ka lan lunbei masubudirun lani.

Gíbeti wuribani ubouagu ani gadurunti wügüri lidan. Ítara liña tafuranguagüdüni Bíbülia sügǘ le adügübei lun lagumeserun aban katei wuribati: “Dan le lachawahani luriban layumahan gürigia, ligía lábürühan lidoun ladügǘn le wuribabei. Lídangiñe burí luriban ayumahani le liabin figóu; danti le laweiridun figóu barüti óunweni” (Santiagu 1:14, 15). Le linarün katei, dan le hadügüni gürigia katei wuribati le hayumahabei, chóuruti hasufurirubei lan lani resultóu (Rómana 7:21-23). Luagu amu oubaü, adügaaña gürigia katei burí le hanarimeti luriban ani barüti saragu asufuriruni houn amu, ítara kei larihín lidan sun dan le sügühalibei. Ani ligibuagun lira, gürigia ha wuribabaña ínchahatiña amu gürigia lidoun wuribani, ligía magumuchun lubéi wuribani (Ariñawagúni 1:10-16).

Lunti yebe san lídehan Bungiu? Lunti yebe san mígirun lan lun wadügün katei wuribati? Samina wamá luagun ligaburi wadügǘn. Ariñagatu Bíbülia lenege guánarügü lan Bungiu ladügawa. Ligía gayara lubéi wáyeihani ligaburi (Agumesehani 1:26). Ruti giñe aban lubuidun idewesei woun: adüga lumutiwa lun gayara lan wanúadahan. Gayarati desidírü wamá anhein línsiñeduba lubéi woun ani anhein gaganbadibadiwa lubéi lun (2 Lúrudu 30:19, 20). Lun hamuga lafosuruniwa lun wóuserun lidan somu manera, ma lagidaruñein hamuga idewesei le ru láalibei woun wawéi? Ma ítara waña hamuga kei muñegu ha aranserúaña lun hadügüni sun le labusenrun? Ligiamémeba hamuga asusereda lun hamuga sinu lan adundehei le wadügübei luma le asuseredubei woun. Lunti weteingiruni Bungiu luagu lóuseruniwa lau inebesei ani ígira ligía lun wanúadahani émeri le wabusenrubei wafalarun lidan wabagari. Gama  lumoun, úati mini lan lira siadiwadiwa lan lun wasufurirun lun súnwandan luagu hachara amu.

Lun hamuga wadügüni álügüdahani le luágubei tidáü garüdia to lun aban indú o lun aban budista, chóuruti lariñaguña lan hamuga: “Susereti katei wuribati houn gürigia buítiña ladüga aban lúrudu le subudiwabei kei karma: hafayeihaña luagu le hadügübei lidan binadu habagari”. c

Lun gunfuranda wamani katei le buidu, ariha waméi ka lan tariñagubei Bíbülia luagu óunweni. Lidan fuluri-agei Edén, ñein lubéi hawinwanda furumiñetiña gürigia ubouagu, ariñagati Bungiu lun Adán, le furumiñeti wügüri: “Gayaraati beigin tídangiñe tin su wewe to yaaboun, gama lumoun meigabóun tin wewe to lánina lasubudirúniwa le buídubei lumoun le wuribabei. Meigabóun tin wewe tuguya, ladüga anhoun beiga, ninarün bau bóunwenba” (Agumesehani 2:16, 17). Lun hamuga meha gaganbaditi Adán lun Bungiu ani lun hamuga mafigouhan lan, wínwanti hamuga meha lun súnwandan. Ladüga maganbadi lan lun Bungiu ligía lóunwenbei. Dan le gasaanigu lubéi, aba lebelurun óunweni hadoun “sun gürigia” (Rómana 5:12). Ligía gayara lubéi wariñagun óunweni lan lafayeihabei figóu (Rómana 6:23). Ariñagatu giñe Bíbülia: “Lugundun le hilaalibei, furihali lídangiñe figóu” (Rómana 6:7). Lidan amu dimurei, masigiruntiña gürigia afayeiha luagu hafigoun lárigiñe hounwen.

Uguñe weyu, añahein míñunu gürigia saminatiña súfuri hamá gürigia ladüga katei wuribati le meha hadügübei lidan amu habagari. Ha afiñebaña luagu katei le ariha hamuti hasufurirun luma hasufurirun amu ani madiheriduntiña saragu. Gama lumoun, afiñeni le, míchugunti ni murusun emenigini luagu lararamuba lan lasuseredun katei wuribati. Afiñetiña lun lan úaali lanme nasirua lan gürigia lidan amu úgubu, mosu lan lóuserun buidu ani resibi ligíame aban subudi le espechaliti. Amu saminaü le luéi le tarufudahabei Bíbülia. d

Satanási lébunabei wuribani, mama wügüri. Furumiñe, aban meha ánheli le gaganbaditi, gama lumoun, “márügüdünti luéigiñe inarüni”, aba ladügün lun lagumeserun figóu ubouagu (Huan 8:44). Ida? Gumeseti aban ebedaaguni lidan fuluri-agei Edén (Agumesehani 3:1-5). Wati Hesukrístu lun: “salufuriti” ani “le agumadihabei lidan ubóu le (Matéu 6:13, Traducción del Nuevo Mundo; Huan 14:30). Hibe-agei gürigia falá hamuti Satanási. Ida? Lau hadügüni le hayumahabei meberesenga lau lilurudun Heowá (1 Huan 2:15, 16). Ariñagati 1 Huan 5:19 luagu “lábugiñeñanu lan lubafu Mafia sun ha lánigubaña ubóu”. Gama lumoun, añahein amu ánheligu ha maganbadibaña ani aba hóundarun luma Satanási. Chóurugüda tumuti Bíbülia luagu ligía lan “le eyeehabalin sun ubóu” úara hama lumafianu, barüti katei le aban lanarime igarigu houn sun gürigia (Arufudúni 12:9, 12). Ligíati, Satanási lébunabei wuribani.

Furanguti lubeiti mama lan Bungiu gadurunbei luagu katei wuribati le asuseredubei houn gürigia. Iyeeni giñe ligía lan adügübei lun hasufurirun. Lubaragiñe lira, füramaseti lagumuchun lau wuribani, ligíaba wariha lidan le aban arütíkulu.