Ariñaga tumuti Bíbülia kaba lan ladüga Heowá luma Hesukrístu, le Lisaani, lau asufuriruni le lanügübei Satanási. “Aba liabin Liráü Bungiu lun lagünrinchaguni luadigimari Mafia” (1 Huan 3:8.) Ubóu le buin liña lau gimugaü, iyereehabúni luma wuribani. Sun katei le lagumuchaguba. Ani luagu Mafia, “le agumadihabei lidan ubóu le”, füramaseti Hesusu luagu lagidarúba lan ubouagugiñe (Huan 12:31). Mabafuhali ligíame ánheli wuribati le luagu ubóu, ladügüba Bungiu lun lagumeserun aban iseri ubóu ani ñeinbei darangilaü luma úarani ubouagu (2 Féduru 3:13).

Agia san ha máhabaña hasansiruni ligaburi hawinwandun ani añahagua adügei le wuribabei? Darí wamuti óunabagülei lidan füramasei tídangiñeti Bíbülia le: “Ha abagaridubaña lidan ísuruni sunsuinagubei, habagariduba súnwandan ubouagu; ánhaña ha salufuribaña hama ha múaranbaña, hahulúba, bugawa hagíame ubouagugiñe” (Ariñawagúni 2:21, 22). Anha, hagumuchaguba wuribatiña ani ábame ñein lan darangilaü. Lidan aban ubóu buin lau darangilaü, hesefurúba gürigia lídangiñe figóu murusun murusun (Rómana 6:17, 18; 8:21).

Lun lagumuchun Bungiu lau wuribani madügünbei lun ítara wamá kei aban máhina lun lásiñarun wanúadahan kaba lan wadüga, arufudaharügü lumuti lilurudun woun ani íderagua lawa lun wígiruni saminaü luma katei le mabuidunbei.

Kábati ladüga lau katei burí le asuseredubei sódini dan le magurabún lan? Füramase haali luagu málühali lan Larúeihan ligibuagun Ubóu, ani írida laali Hesukrístu lun ligía lan urúei lidan arúeihani ligía, ani gabafuti Hesusu lun lareidaguagüdün sánditiña (Matéu 14:14). Gabafuti Liráü Bungiu íbini luagu garabali luma barana (Márükosu 4:35-41). Lagumuchuba lau asufuriruni le lanügübei katei wuribati le asuseredubei magurabúnga. Lábugiñe Larúeihan, úadigiaalime ni aban lamiselu ábürühati hawagun gürigia (Ariñawagúni 1:33).

Anihein giñe emenigini houn saragu gürigia maduruntiña ha súfuruhañabaña aban óunweni le hanarimeti. Lárigiñebei láguyuguagüdüni Hesusu Lásaru le lumada, aba lariñagun: “Au águyugunibei, au ibagari” (Huan 11:25). Ítara liña, gabafuti Hesusu lun láguyuguagüdüniña gürigia hagía.

Anhein busén hubéi hawinwandun lidan aban ubóu le ídanbei masuseredunbei lan katei wuribati houn gürigia buítiña, ka uagu maturiahan hubarun Bíbülia? Tidan, hafurendeirúba saragu katei luagu Bungiu le inarüniti luma luagu lisuuni. Gayarabei híderagunün gefentiña luagu Heowá ha lídanbaña fulasu le ñein lubéi hawinwanda lau sun hagundan. Amisuraha wamutün lun hayanuhan hama o lun habürühan houn ha adügübarun garüdia to.