1. Ka katei espechalibei lidan wáhuduragun?

 ARIHAÑAHA humaali san iri Heowá bürüñu tuagu somu muna o luagu somu katei lidan aban muséu? Chóuruti aba lan hasandirun ugundani lugundun espechaliti liri Bungiu lidan wáhuduragun: gefentiña luagu Heowá wagía! Úati amu sétanu asubudirúati luagu liri Bungiu kei wagía. Gama lumoun, subudi wamuti weiri lan wani buligasion lau wanügüni liri Bungiu.

2. Ka buligasion lanügübei wakipuruni liri Bungiu?

² Lun gunda lan Heowá wau, úati buídurügü lan wayusuruni liri. Lunti giñe wawinwandun según lilurudun le harumabei. Ligía aba lubéi taritaguagüdüniwa Bíbülia: “Disebá luéi wuribani” (Sal. 34:14). Afuranguagüda lumuti apostolu Pábulu luagu weiri lan wani buligasion dan le lariñagun: “Sun ha agúarubalin liri Bungiu, lunti hadisedun luéi wuribani” (2 Tim. 2:19). Wagía, Gefentiña, subudiwatiwa luagu wayusuruni liri Heowá. Guentó, ida liña san wadisedun luéi wuribani?

3, 4. Ka bérusu tídangiñeti Bíbülia adügübei lun liabin bandi álügüdahani lidoun hachügü saragu akutihatiña Bíbülia, ani ka uagu?

³ (Aliiha huméi 2 Timotéu 2:19.) Lidan bérusu le ayanuhati Pábulu luagu “ebu derebuguti” le lani Bungiu, ani lárigiñe aba  layanuhan luagu bián inarüni le bürüwañubei luagu ebu ligía. Le furumiñeti, ‘subudi lumutiña Heowá lánigu’, furanguti lídangiñe lan 1 Lúrudu 16:5 lasagarei (ariha huméi arütíkulu le lubaragiñebei le). Le libiaman, “sun ha agúarubalin liri Bungiu, lunti hadisedun luéi wuribani”, adügaali lun liabin saragu álügüdahani lidoun hachügü saragu akutihatiña Bíbülia luagu saragu dan. Ka uagu?

⁴ Lugundun, íbini genege lan luagu sagá lani Pábulu dimurei le lídangiñe amu fánreinti lidan Abürüdǘni Ebüréu, le linarün katei, genegeti ua lan ni aban bérusu le úarati luma dimurei le lariñagubei. Ka méhati uagu layanuha Pábulu dan le lariñagunbei: “Sun ha agúarubalin liri Bungiu, lunti hadisedun luéi wuribani”? Lubaragiñeraü dimurei le, ayanuhati Pábulu luagu dimurei le lariñagubei 1 Lúrudu kapítulu 16, le abahüdagubei luagu lebedaagun Koré. Gayarati san úara lan giñe libiaman fánreinti le luma sügǘ ligía?

5-7. Ka sügǘ lánina lidaani Moisesi uágubei layanuha Pábulu lidan 2 Timotéu 2:19? (Ariha huméi dibuhu le lídanbei lagumeseha arütíkulu.)

⁵ Ariñagatu Bíbülia aba lan lóundarun Datán luma Abirámü, ha lirahüñü Eliabü, luma Koré lun hagía lan ábutigu lun hebedaagun kóntüra Moisesi luma Aarón (1 Lur. 16:1-5). Minebenti meha Moisesi houn ani furanguti meha harufuduni luagu magundan hamá luagu ubafu le líchugubei Bungiu lun. Sigitiña meha wügüriña hagía awinwanda haganagua lumutuniña Bungiu ani ru hamuti meha hamadagua ha híbiri luma Heowá lidan peliguru. Gama lumoun, dan le lachülürünbei weyu lun larufudúniwa kátaña lan áhuduragubaña lun Bungiu lau úaraguni luma kátaña lan maganbadibaña, ruti Heowá aban gumadi furanguti.

⁶ Ariñagati abahüdaguni: “Aba lariñagun Wabureme lun Moisesi: ‘Ariñagabá houn sun Ísüraelina lun hadisedun tuéi muna to ñein habéi Koré, Datán luma Abirámü’. Aba lásaarun Moisesi hama ábutigu Ísüraelina lárigiñe aba houdin le ñein habéi Datán luma Abirámü. Ábati lariñagun houn lílana fulasu: ‘Dise humá tuéi haban wügüriña wuribatiña ha, maguura humá luagu ni kata le hemegen luéi giñe hóunwegun luéigiñe hafigoun’. Aba hadireirun gürigia le ñéingiñe habéi Koré, Datán luma Abirámü”. (1 Lur. 16:23-27). Ábati láfaraguniña Heowá sun ha maganbadibaña. Ánhañati ha úaraguabaña séfutiña, lugundun lau hadisedun hawéi ha maganbadibaña arufudatiña luagu mínsiñe lan marichaü houn.

⁷ Ariha lumuti Heowá ka lan tídanbei hanigi gürigia ani ariha lumuti úaraguni le tídanbei hanigi lánigu. Íbini ítara, mosu meha desidírü hamá ha úaraguabaña hadisedun hawéi ha marichabaña. Ligíati, háfuga layanuhaña lan meha Pábulu luagu abahüdaguni le lídanbei 1 Lúrudu 16:5, 23-27 dan le labürühanbei: “Sun ha agúarubalin liri Bungiu, lunti hadisedun luéi wuribani”. Buiti saminaü le lugundun lubaragiñeraü dimurei ligía ariñagati Pábulu: ‘Subudi lumutiña Heowá lánigu’, ani furanguti lídangiñe lan ligiaméme abahüdaguni lasagarei (2 Tim. 2:19).

8. Ka uagu ua lubéi buídurügü lan wayusuruni liri Heowá o lidan wamá aban damuriguaü kristiánu?

⁸ Dan le layanuhan luagu sügǘ le asuseredubei lidan lidaani Moisesi, haritaguagüda lumuti Pábulu lun Timotéu luagu lunti lan ladügüni katei lau ichouruni lun lóunigiruni lubuidun lumadagua luma Heowá. Úati meha buídurügü lan lílana lan damuriguaü kristiánu, ítara kei ua lan meha buídurügü lan lun Koré hama lánigu hayusuruni liri Bungiu. Súdiniti lun sun lan lubúeingu Heowá ha úaraguatiña lun desidírü hamá “hadisedun luéi wuribani”. Ka meha mini lubéi dimurei burí le lun Timotéu? Ani kei lubúeingu Heowá uguñe weyu, ka gayarabei wafurendeiruni lídangiñe adundehani le líchugubei Pábulu lau ladundehan Bungiu?

9. Ka meha lánibei “sigenei málati” efekütu hawagu lílana damuriguaü kristiánu lidan furumiñeti sígulu?

 ⁹ Furanguti teweridiruniwa Lererun Bungiu luéi luwuyeri marichaü le lunbei wadisedun luéi. Yarafa lun 2 Timotéu 2:19 arihatiwa ariñaga lan Pábulu lun Timotéu lun masigenehan lan luagu katei “luáguti dimurei” ani lun ladisedun luéi “dimurei burí málati” (aliiha huméi 2 Timotéu 2:14, 16, 23). Fiú lílana damuriguaü ayanuhatiña meha luagu arufudahani le kóntürati luagu le tarufudahabei Bíbülia. Añahein meha giñe ebelaagüdütiña saminaü le barüti sigenei, ani íbini ua lan kóntüra lan sunsuinagubei luagu le tarufudahabei Bíbülia, gayarati meha ladügün lun ñein lan fánreinguaü lidan damuriguaü. Ligía aba lubéi lariñagun Pábulu lun Timotéu mosu lan ladisedun luéi “sigenei málati”.

10. Ka lunbei wadügüni ánhawa adunragua luma arufudahani kóntürati luagu le tarufudahabei Bíbülia?

¹⁰ Uguñe weyu, hénrenguti hadunragun lubúeingu Bungiu luma saminaü le mama lúmagiñeti Bungiu lidan damuriguaü. Gama lumoun, dan le wadunragun luma somu arufudahani le múaranti luma le tariñagubei Bíbülia, lunti wamahadun lun, meberesenga ka lan úmagiñe liabin. Mabuidunbei hamuga wasigenehan hama ha díreihañabaña luéi arufudahani le inarüniti, ni ánhawa adunragua hama kéiburi lidan Internet. Íbini anhein busén wabéi wíderaguni gürigia ligía, kóntürabei yanu ligía luagu gumadi tídangiñeti Bíbülia le wakutihabei oura le. Wagía, lubúeingu Heowá, dísetiwa luéi furumiñeguarügü arufudahani kóntürati luagu le tarufudahabei Bíbülia.

11. a) Ka burí katei gayarabei ladügün lun ñein lan “sigenei le málati”? b) Ida liña gayara lan híchugun wéiyaaña lidan afiñeni aban hénpulu buiti?

¹¹ Anihein giñe amu burí katei le gayarati lagidaruni darangilaü lídangiñe damuriguaü. Kéiburi ámuñegueinarügü saminaü luagu somu isebáhari gayarati ladügün lun ñein lan sigenei luagu “katei málati”. Furanguti anhein lan ñübuin somu gürigia aburuchaguagüda somu isebáhari le adüraaguti lilurudun Bungiu le luáguti laruman ibagari, mígirunbaña wéiyaaña lidan afiñeni lun lasigirun lúnrügü ua lan turóbuli (Sal. 11:5; Efe. 5:3-5). Gama lumoun, mosu duari hamá lun marufudahan hamani hasaminan guánarügü. Lubaragiñe lira, lunti hasigiruni adundehani tídangiñeti Bíbülia le ichugúbei houn ha iridúbaña lidan damuriguaü: “Góunigi humaña lirahüñü Bungiu ha lábugiñebaña haríaahan keisi hóunigiruniña hóuniri mudún mudún. [...] Móusera humá kamá hamuga haburiña ha lábugiñebaña haríaahan huguya; hóucharügü humá lun aban humá hénpulu buiti houn” (1 Fe. 5:2, 3; aliiha huméi 2 Korintuna 1:24).

12, 13. a) Ka hasaminanbei gefentiña luagu Heowá luagu isebáhari? b) Ka adundehani tídangiñeti Bíbülia huubei lidan luáguti isebáhari? c) Ka burí amu katei lánina ibagari ídanbei gayara lan lahuudun adundehani burí le lídanbei párafu 12?

¹² Makutihan tumuti wóundarun pelikula, bidéu burí, líburu luma burí uremu lun lariñawagún woun kaba lan lídangiñe maríagun wamá o maganbahan wamá. Ka uagu? Lugundun ariñagatu Bíbülia lunti lan lasubudirunu kada kristiánu ‘Lererun Bungiu buidu, lun lasubudiruni arufudahani le buídubei lumoun le wuribabei’ (Ebü. 5:14). Tidan Bíbülia anihein adundehani le íderagubaliwa lun desidírü wamá buidu lidan luáguti isebáhari. Kei lidan furumiñeguarügü amu katei lidan wabagari, lunti wachoururuni “ka lan hínsiñebei lun Wabureme” (Efe. 5:10). Gama lumoun, arufudahatu Bíbülia luagu galurudun hamá lichügüdina familia, gayarati lubeiti hadügün lun mádaragun hamá tílana haban houngua lidoun somu burí luwuyeri isebáhari (1 Ko. 11:3; Efe. 6:1-4). a

¹³ Adundehani tídangiñeti Bíbülia le iridúaalibei ya mámarügüñein lun luáguti  isebáhari lahuuda. Anihein giñe ámuñegueinarügü saminaü luáguti ligaburi asansiraguni luma aranseraguni unguaü, luagu átuadi luma éigini luma luagu amu burí katei le lunti desidírü lani kada gürigia, gayarati giñe lanügün sigenei. Ligíati, anhein mama lubéi ladüraaguña ni aban adundehani tídangiñeti Bíbülia, buiti lun masigenehan hamá lubúeingu Heowá luagu, lugundun “moun lumuti gadan lani wuribu aban lubúein Bungiu; lubaragiñe lira, lunti buidu lan hama sun gürigia” (2 Tim. 2:24).

14. Ka hénpulu layusurubei Pábulu lun lafuranguagüdüni súdini lan wadisedun hawéi hagübüri umadagu?

¹⁴ Ka amu manera ídanbei gayara lan ‘hadisedun sun ha agúarubalin liri Bungiu luéi wuribani’? Gayarati hadügüni lau hadisedun hawéi ha adügübaña marichaü. Súdiniti lárigiñe lan layusuruni Pábulu hénpulu luáguti “ebu derebuguti” le lani Bungiu, ábaya lan layanuhan luagu amu hénpulu. Ayanuhati tuagu “aban muna wéiritu” to ídanboun “mámarügüñein [lan] umegeni golu o pülata ñein; anihein giñe le lauti fulansu luma lauti múa; anihein lunti lueirin-agei ayusuruni, anihein lunti furumiñeguarügü yusu”, íbini lun katei wuribati (2 Tim. 2:20, 21). Ábati leweridiruniña kristiánugu lun hadisedun luéi burí umegeguni le ayusurúbei lun katei wuribati.

15, 16. Ka wafurendeirubei lídangiñe hénpulu tuáguti aban “muna wéiritu”?

¹⁵ Ka mini lubéi hénpulu le? Konparárü lumuti Pábulu damuriguaü kristiánu tuma aban “muna wéiritu”, ani lílana damuriguaü konparárü lumutiña luma “umegeguni”. Umegeguni le tídanbei aban muna gayarati lawiyedun ladüga lichugúniwa yarafa lun somu péisini o somu iwiyei. Ligía aba lubéi lichugún dise luéi umegeguni le harumabei, kéiburi le ayusurúbei lun lábouwagun éigini.

¹⁶ Ítarameme, lubúeingu Heowá ha áfaagubaña lun haruma lan habagari moun lumuti weiri lan hamadagua hama lílana damuriguaü ha asigirubaña lau maganbadi hamá lun adundehani le tídanbei Bíbülia (aliiha huméi 1 Korintuna 15:33). Ani anhein lunti  lubéi ítara lan wóuserun hama lílana damuriguaü, lunti tima madügün wamá umadaguaü hama ha bóugudibaña luéi damuriguaü, lugundun saragu hádangiñe ‘hínsiñeti seinsu houn, maganbun hamutiña hagübürigu, marasualugutiña, márügüdaguntiña houngua, hanarimetiña, láganigu sun le buídubei, áluaha hamuti hagundan guánarügü lubaragiñe hamuga háluahani Bungiu’ (2 Tim. 3:1-5).

17. Ida liña hóunabun ísüraelina ha úaraguabaña lun gumadi lun hadisedun luéi marichaü?

¹⁷ Ayanuhatu Bíbülia luagu lufuresen hóunabun ísüraelina dan le lichugúnbei gumadi houn lun hadisedun tuéi hakianpun Koré, Datán luma Abirámü. Ariñagati abahüdaguni aba lan “hadireirun gürigia le ñéingiñe habéi ouraméme ligía”, masaminarun hamuti bián wéiyaasu (1 Lur. 16:24, 27, TNM). Ayanuhatu giñe luagu duari le harufudubei dan le gaganbadi hamá: “Aba hadisedun [...] luéigiñe sun oubaü”. Ha úaraguabaña, mabusenruntiña híchuguni habagari lidan peliguru, ligía gaganbadi habéi sunsuinagubei. Furanguti aba lan houdin luéigiñe lóubadina Heowá ani kóntüratiña luagu marichaü. Ka larufudahabei hani hénpulu woun?

18. Ka meha uéi labusenra Pábulu leweridiruni Timotéu dan le lariñagun lun: “Anurahabá [...] luéi luriban hayumahan nibureingiña”?

¹⁸ Dan le lídanñein lan peliguru wamadagua luma Heowá, lunti desidírü wamá lau lóufudagun. Ligía labusenrubei Pábulu lariñagun lun Timotéu lau dimurei burí le: “Anurahabá lubeiti luéi luriban hayumahan nibureingiña” (2 Tim. 2:22). Wéiriaali meha Timotéu lidoun dan ligía, háfuga lóugiñehali meha 30 irumu lau. Ka méhati uagu líchigei Pábulu eweridihani ligía lun? Lugundun ‘luriban ayumahani ligía’ mámarügüñanu ha nibureintimagiñabaña asandirei. Ligía mosu lubéi meha giñe lanurahan Timotéu luéi. Lidan amu dimurei, mosu meha “[l]adisedun luéi wuribani”. Arufudahati Hesusu aban saminaü libe le dan le lariñagunbei: “Anhein bagu lubéi afigougüdübadibu, sagabei, fuibei dise buáriua” (Mat. 18:9). Uguñe weyu, kristiánugu ha gaganbadibaña lun adundehani le desidírütiña hadisedun luéi peliguru burí le gayarabei lagadeiruni hamadagua luma Heowá, ani masaminarun hamuti bián wéiyaasu.

19. Ida liña desidírü hamá fiú kristiánugu lun hóunigiragun houngua luéi peliguru le gayarabei lagadeiruni hamadagua luma Heowá?

¹⁹ Añahein burí íbirigu ha meha gaturobulintiñu luma binu lubaragiñe gefén hamá luagu Heowá desidírühaña lun mouchun hamá ni aban luwuyeri uniñein le gaganati binu. Añahein amu, aba hadisedun luéi somu isebáhari le gayarati ladügün lun héiguadun, íbini mariban lan isebáhari ligía (Sal. 101:3). Anihein aban íbiri, lubaragiñe meha gefén lan luagu Heowá, hínsiñeti meha liwiye igaburi lun le burí arihíbei lidan abinahani le ídanbei lidin. Ligía lúmagiñe lubéi lafurendeiruni inarüni, mídinti lidan ni aban luwuyeri abinahani, íbini hadan íbirigu, ladüga hanufudeti luéi láfuachun somu luriban saminaü o ayumahani le meha luágubei furumiñe. Inarüni mafosurúniwa hamá gefentiña luagu Heowá lun matun hamá ni murusun binu, lun mabinahan hamá o lun madügün hamá ni kata le gayarati lariñawagún mariban lan. Gama lumoun, agurabúati lun wanurahan lau lóufudagun dan le anihein lan somu katei le íchuguti wamadagua luma Heowá lidan peliguru.

20. íbini mama lan súnwandan lun ménrengunbei lan “[w]adisedun luéi wuribani”, ka íchugubei emenigini luma gurasu woun?

²⁰ Chansi le wibihibei lun wanügüni liri Heowá barüti aban óunwenbu buligasion. Mosu “[w]adisedun luéi wuribani” (Sal. 34:14). Mama súnwandan lun ménrengunbei lan. Gama lumoun, ruti gurasu woun wasubudiruni luagu hínsiñebaña lan “lánigu” Bungiu lun súnwandan ánhaña madireirun luéi lémeri le richabei (2 Tim. 2:19; aliiha huméi 2 Krónikasi 16:9a).