Smita, a aban würi 35 irumu tau to meha awinwanduboun Daca (Bangladés), subudiwatu meha luagu tínsiñehabu. Sun meha gürigia subudi hamutu kei aban würi maríeitu to gúndaatu ani benefatu to íderagubaliña gürigia asubudirei lémeri Bungiu. Gama lumoun, aba lebelurun aban lanarime íruni hadoun tiduheñu dan le ladagarunbei aban sandi tuagu le áfarubarun lídanrügü aban dimaasu.

James tuma lani weiriou, kéiburi meha 35 irumu hau, subudiwatiña meha giñe luagu hínsiñehabu ítara kei Smita. Sügühali fiú irumu lúmagiñe houdin ebeluha hamoun fiú hamadagu lidan aban fulasu Meriga, ani aba magiribudundigiaaña lan hábiñoun Nueva York. Aba hóunwegun lidan aban danaguaü tidan karü, ígiratiña aban lanarime íruni hadan haduheñu hama hamadagu.

Furumiñeguarügü gürigia gayarati líchugun fe luagu anihein lan wuribani luma asufuriruni lidan sun fulasu: lidan wuribu hilatiña dandu súdaragu kei amu gürigia; günringua lumuti anarimeni luma wuribani habagari saragu gürigia maduruntiña; dandu danaguaü kei sandi le burí máraninati manúadahanti, dagati hawagu wéinamuhaña kei hawagu irahüñü, hawagu rísitiña kei hawagu gudemetiña; chagaguaü le lánina liñawan dan gumuti lau sun aban uburugu, ani anihein giñe mínsiñehabuni haganagua gürigia luma marichaü lidan sun fulasu. Gayarati íbini lan huguya súfurihadün aban lídangiñe sügǘ burí le.

Ligía garicha lubéi hálügüdagun gürigia houngua:

• Ka san uagu lasusereda katei wuribati houn gürigia buítiña?

• Ladüga san Bungiu?

• Ítaraguarügüti san lasuseredun turóbuli burí le, o wügüri lébunabei?

• Wafayeihaña san ladüga wadügün somu katei wuribati lidan binadu wabagari?

• Anhein anihein lubéi aban Bungiu suntigabafu, ka uagu móunigirun lubaliña gürigia buítiña?

• Lachülürüba san dan lun lagumuchun wuribani luma asufuriruni?

Lun wóunabuni álügüdahani burí le mosu wóunabun bián álügüdahani súdiniti: Ka uagu lasusereda katei wuribati?, luma Kaba san ladüga Bungiu?