HANARIMETI meha layahuahan Féduru lárigiñebei leyeedagun luagu subudi lan Hesusu lun; mosu meha láfaagun saragu lunya lárügüdün erei lidan leseriwidun lun Bungiu. Íbini ítara, busenti meha Hesusu layusuruni lun líderagun amu disipulugu. Ligía meha lariñagunbei lun: “Danme le bagiribudun nun, bíchigame dǘgüdaguaü houn bíbirigu” (Luk. 22:32, 54-62). Féduru meha liderebugubei damuriguaü kristiánu lidan furumiñeti sígulu (Gal. 2:9). Ítarameme, íbirigu ha meha seriwihañabaña kei wéiyaaña lidan afiñeni lidan dan le sügühalibei háfuga gayarabei giñe heseriwidunya kei wéiyaaña lunya hagundaarun lau híderaguniña híbirigu.

Añahein fiú kristiánugu ha mámaaña wéiyaaña lidan afiñeni ladüga magunfulirun hamaali lan le tariñagubei Bíbülia háfuga hasandiragun houngua luagu mabuidun lan hadügüni hawadigimari. Ariñagati Julio, * aban íbiri le eseriwidubei lóugiñe wein irumu kei wéiyaali lidan afiñeni Sudamérica: “Yusu numuti meha lueirin-agei nidaani aranseha yanu luma abisidahaña íbirigu lun níchugun dǘgüdaguaü houn. Sódini, aba neferidiruni sun katei le ani aba nasandirun aban lanarime íruni. Hénrenguti meha dan ligía nun”. Guentó, seriwi yaali Julio keisi wéiyaali lidan afiñeni.

Abürühati disipulu Santiagu: “Niduheñu, lunti gunda humá dan le hasufurirun furumiñeguarügü óuchawaguni” (Sant. 1:2). Layanuhaña meha Santiagu luagu óuchawaguni le wasufurirubei ladüga lani éibaahouni efekütu luma wafigoun guánarügü. Ayanuhati luagu hasaminarun gürigia hawouguounrügü luma luagu himei hamá aban gürigia luéi aban, luma burí amu katei (Sant. 1:14; 2:1; 4:1, 2, 11). Furanguti dan le lan lererehan Heowá woun, gayarati gari lan woun, gama lumoun, moun lumuti weferidiruni wagundan (Ebü. 12:11).

Anhein féridihadiwa lubéi somu buligasion lidan damuriguaü, súnwandan mosu lan wakutihani ida liña lan wafiñen ani arufuda wameime lun Heowá  luagu hínsiñe lan woun. Gayarati giñe wálügüdagun woungua ka lan uagu busén wabéi wakipuruni lúgaaru ligía. Somu san igaburi mabuidunti lébunabei? O ladüga hínsiñe lan Heowá woun ani chouru wamuti luagu lani lan Heowá damuriguaü ani mosu lan lounigirúniwa lau ínsiñeni? (Adü. 20:28-30.) Íbirigu ha meha eseriwidubaña keisi wéiyaaña lidan afiñeni ani añahagua adügei lau úaraguni lun Bungiu, arufuda hamuti houn súngubei, íbini lun Satanási, luagu inarüniti lan ínsiñeni le hasandirubei luagu Heowá.

Dan le meha ladeinhóunbei lun urúei Dawidi luagu óunwenbu burí figóu le meha ladügübei, ánhati lun ererehóuni ligía ani ferudunawati. Dan lárigiñe eremuhati: “Fuleseiwatiña gürigia ha ferudunawaalibei hadurun luma hafigoun. Fuleseiwatiña gürigia ha buídubaña isaminan, ha giñe madurunhañabaña ligibugiñe Aburemei luagu ni kata” (Sal. 32:1, 2). Íderagua lumuti adeinhani ligía saragu, ani chóuruti luagu íderagua lani lun buídutima lan letenirun houn lumutuniña Bungiu.

Libe-agei dan, íbirigu ha eferidirubalin hani buligasion keisi wéiyaaña lidan afiñeni ani ábaya hibihini, buídutimati heseriwidun sügǘ meha lau furumiñe. Ariñagati aban hádangiñe: “Guentó gayarahali buídutima lan níderaguniña ha achararutiña”. Ariñagati ábanya: “Guentó, gebegitimahali narihini chansi le nibihibei lun níderaguniña íbirigu”.

Ariñagati abürühati sálumu: “Madeinhanti [Heowá] woun sagü dan, madurati giñe ligañi lun súnwandan” (Sal. 103:9). Ligía moun lumuti lubéi wasaminarun luagu mafiñerundigiaali lan Bungiu luagu aban gürigia le wéiriti lichara. Ariñagati Ricardo, aban íbiri le ígirubalin leseriwidun kei wéiyaali lidan afiñeni lárigiñe seriwihali lan luagu saragu irumu: “Wéiriti meha luriban nasandiragun nungua ladüga nachararun. Luagu saragu dan, siñati meha neseriwidunya kei wéiyaali lidan afiñeni ladüga nasandiragun nungua kamá meseriwintina lun ni kata. Hanufudetina meha luéi mafiñerunhaaña lanme íbirigu nuagu. Gama lumoun, kei le hínsiñe lan nun lun níderagun amu, rútina aturiahani tídangiñeti Bíbülia, rútina burí gurasu houn íbirigu tidan Luban Adamuridaguni ani furí au apurichiha. Íderagua lumutina katei le saragu lun neferidiruni anufudei ligía, ani guentó seriwi yáadina kei wéiyaali lidan afiñeni”.

Anhein areida aban íbiri igarihabu, hénrengutimabei lun lunya leseriwidun kei wéiyaali lidan afiñeni. Buítimati lun láyeihani Dawidi. Mosu meha lanurahan luéi urúei Saulu le gimugabei. Gama lumoun íbini meha darí lan Dawidi bandi chansi lun ladügün wuribani lun, madügün lumuti (1 Sam. 24:4-7; 26:8-12). Dan le lóunwenbei Saulu lidan aban wuribu, ayahuahati Dawidi ani ariñagati luagu dandu lan Saulu kei Yónatan le liráü “hínsiñetiña  meha lun” (2 Sam. 1:21-23, Reina-Valera). Mareidunti meha Dawidi igarihabu.

Anhein genege lubéi hun luagu adügǘwarügü lan somu marichaü hun o úarügü liña lan gunfurandawa lan katei buidu, mígira humá lun ladouragun igarihabu lau hisaminan. William, aban íbiri le meha eseriwidubei kei wéiyaali lidan afiñeni Gran Bretaña kéiburi darandi irumu, gáñiti hama fiú wéiyaaña lidan afiñeni dan le leferidirunbalin chansi le. Ka íderagubalin lun lagidaruni igarihabu ligía luáriua? Ariñagati: “Naliihanu liliburun Hobu ligía íderagubalina saragu. Anhein íderagua lubalin Heowá Hobu lun larandarun hama ǘrüwa lánigu paaná, míderagun lubadina funagia lun narandarun hama wéiyaaña lidan afiñeni?” (Hob. 42:7-9).

Anhein hugía lubéi desidírübei lun hígiruni heseriwidun kei wéiyaali lidan afiñeni, buiti lun hálügüdagun hungua ka lan uagu hadügei. Gíberügü liña meha san turóbuli lidan hibagari? Anihein meha san amu katei le súdinitimabei hun lidan hibagari? Féridirügü humuti san higuraasun ladüga hachara amu íbirigu? Meberesenga ka lan uagu hígirei, haritagua huméi dan lan meha le heseriwidunbei kei wéiyaali lidan afiñeni gayarati meha híderaguniña híbirigu saragu. Ruti meha yanu burí le híchugubei erei houn, hénpulu le híchugubei ruti meha giñe dǘgüdaguaü houn ani dan meha le hidin abisidahaña íderagua humutiña meha lun hawanduni óuchawaguni. Ani wadagimanu le meha hadügübei kei aban wéiyaali lidan afiñeni le úaraguati, gúndaagüda lumutu meha lanigi Heowá ani gúndaatün giñe (Ari. 27:11).

Íderaguali Heowá saragu íbirigu lunya hasandiruni ugundani luma lunya busén hamá hadundehani damuriguaü. Dandu anhein hugía lubéi desidírübei hígiruni heseriwidun kei wéiyaali lidan afiñeni o anhein féridirügü hubalin, ka uagu máfaagun hubéi lunya aban humá ‘alidihati’ o, aban wéiyaali lidan afiñeni? (1 Tim. 3:1.) Másuti meha lamuriahan Pábulu lun hasubudiruni kristiánugu kolosana ka lan lugundanbei Bungiu buidu buidu. Ka uagu? Lun “gayara lan hagaburidun keisi lunti lan hagaburidun lánigu Wabureme, adügei le aubei lagundaara súnwandan” (Kol. 1:9, 10). Ánheinya hibiha chansi lun heseriwidun kei wéiyaali lidan afiñeni, amuriaha humá luma Heowá lun líchugun erei hun, gurasu luma ugundani. Lidan lagumuhóun dan le, mégeitiña lumutuniña Bungiu ídemuei hámagiñe wéiyaaña lidan afiñeni ha hínsiñehabutiña lun hakipuruni hafiñen héreñu. Gayarati san híchugun iderebugu houn híbirigu? Busentün san hadügüni?