KA UAGU MACHOURUN HABALIN FIÚ GÜRIGIA: Según aban aturiahani le málügili, ariñawagúati luagu anihein lan saragu míñunu planeta lidan sun wani galaxia. Ligía añahein habéi saragu asaminarutiña: “Kati uagu lunti lubéi leberesedun Bungiu luagu katei burí le hadügübei gürigia garaüwarügütiña lidan aban liraüraü planeta?”.

KA TARUFUDAHABEI BÍBÜLIA: Mama rúrügü lumutu Heowá * Bíbülia woun ñéingiñe aba labulieidagun wawéi. Ariñagati woun: “Buágunñein narihin. Narufudahaba bun” (Sálumu 32:8).

Samina wamá luagun tani Agarü hénpulu, aban ehiptuna to awinwanduboun lidan sígulu XX lubaragiñe wadaani. Aba meha tarufudun menebenehabuni tun Saraí, to tiyubudiri, ani ligía aba lubéi tanügünu Saraí Agarü kei ni kata. Ábati tanurahan Agarü lidoun fulasu mageirawati. Aba san labulieidagun Bungiu tuéi ladüga tachararun? Abahüdaguatu Bíbülia “aba [lan] ladarirunu aban lani Bungiu ánheli” ani aba líchugun gurasu tun lau dimurei le: “Aganba laali Bungiu bidiheri”. Aba tóunabun Agarü: “[Buguya] Bungiu le arihubalina” (Agumesehani 16:4-13).

Ariha lumutün giñe Bungiu. Ida? Líderagubadiwa hénpulu le lun gunfuranda wamani ida liña lan larihiniwa. Aban úguchuru góunigi tumutiña sun tisaanigu lau ínsiñeni, gama lumoun, ténitimaatu houn ha ñǘbürigiñabaña, lugundun mégeitimatiña lun letenirún houn. Ítarameme, ténitimaati Heowá woun dan le débili wamá. Ariñagati Heowá: “Lidan aban fulasu íñuti ani sagüráuti naganóua, gama lumoun anahein giñe luma le ǘnabugubei ani nidiheri ligía, ani rútina gurasu luma dǘgüdaguaü lun” (Isaíasi 57:15).

Íbini ítara, gayaraati wálügüdagun woungua: “Ida liña san larihinina Bungiu? Bóugudigiñerügüñein san nun lariha, odi ariha lumutu nanigi ani gunfuranda lana?”.