Aba lariñagun aban úguchili lun lisaani sedü irumu lau: “Lüha meha, aba ladügüni Bungiu Ubóu lau sun katei le lídanbei. Adüga lumuti giñe Weyu, Hati tuma waruguma”. Aba lerederun irahü asaminara murusun oura ani aba lálügüdahan: “Núguchi... angia Bungiu, ka san adügübalin?”.

“Ni aban —liña lóunabun úguchili—. Aniheingubeiñein Bungiu lúmagiñe sun dan.” Kei le ñǘraügili lubéi irahü, gúndaati lau óunabagülei le. Gama lumoun, eibu aweirideina lan, anihagua asaminara luagun katei le. Hénrenguti lun gunfuranda lani luagu magumeseha lan Bungiu. Ábati lasaminarun: “Ida liña san gayara lan lasuseredun le? Íbini sielu luma Ubóu gagumesehati”. Móunabunwamemegili álügüdahani: “halíagiñe san liabin Bungiu?”.

Ka tariñagubei Bíbülia? Gayarati lariñawagún ligiaméme lan le lariñagubei úguchili le uágubei wayanuha. Abürühati Moisesi: “Aburemei lúmagiñe meha lubaragiñe ladügǘn burí wübü, lubaragiñe buga anihein lan múa luma ubóu, lúmagiñe binadu dan lumoun lébeha dan, Bungiu buguya ” (Sálumu 90:1, 2). Ani ariñagati profeta Isaíasi: “Ibidiñeti funagia bun? Maganbun bágili funagia? Aburemei, Bungiu le magumuchaditi [ligía] adügübalin sun ubóu” (Isaíasi 40:28). Tidan ligaradan Húdasi ariñawagúati aniheingubeiñein lan Bungiu lúmagiñe “súnwandan” (Judas 25, TNM).

Arufuda lumuti bérusu burí le luagu Bungiu lan “Warúeitebei lun sun dan”, ítara kei lagúarun apostolu Pábulu lun (1 Timotéu 1:17). Lidan amu dimurei, aniheingubeiñein Bungiu lúmagiñe súnwandan. Ani aniheinmémebei (Arufudúni 1:8). Magumuchaditi Bungiu; ligía aban lídangiñe katei le uágubei lasubudirúa.

Ka uagu hénrengu lubéi woun gunfuranda wamani saminaü le? Ladüga chati lan wabagari, ligía amu lubéi ligaburi wabahüdüni dan luéi Heowá. Kei hénpulu, ítara liña milu irumu lun kei aban weyu, lugundun magumesehati (2 Féduru 3:8). Ariha wamá aban hénpulu. Aban chagagaru gayarati lawinwandun kéiburi 50 weyu. Gayarabei hamuga san gunfuranda lani le mini lubéi lawinwandúniwa 70 o 80 irumu, kei hawinwandun gürigia? Uá! Ítara waña kei chagagaru ligía ánhawa konparárua luma Bungiu. Mítaranti lisaminan kei wasaminan (Isaíasi 40:22; 55:8, 9). Ligía anihein lubéi katei úati gunfuranda wamani luagu.

Íbini hénrengu lan gunfuranda wamani magumuchadi lan Bungiu, garichati saminaü le. Lun hamuga anihein lan adügüti Bungiu, ligía hamuga Adügübalin sun katei. Gama lumoun, ariñagatu Bíbülia Heowá lan “adügübalin sun katei” (Arufudúni 4:11). Subudi wamuti giñe luagu anihein lan meha aban dan dan le úagili sielu ni ubóu (Agumesehani 1:1, 2). Ida liña san aba lan aniheinhali lan lárigiñe? Furanguti aniheinhali lan meha le adügübalin. Ani mosu giñe aniheinhali lan lubaragiñe furumiñeguarügü gürigia o ánheli, kéiburi furumiñeti Liráü hama ánheligu (Hobu 38:4, 7; Kolosana 1:15). Furanguti lubeiti lábuguarügüñein lan meha Bungiu lubaragiñe ladügüni sun katei. Ani siñati adügǘwarügü lan, lugundun úati meha ni aban gürigia o katei lubaragiñe.

Awanheinhadiwa ligía ani anihein sielu luma ubóu, furanguti luagu anihein lan aban Bungiu le magumuchaditi. Bungiu le adügübalin ubóu ani ruléi lúrudu burí le adundehabalin chóuruti winwan lan lúmagiñe súnwandan. Ligíarügüñein meha gayara ladügün saragu amu katei gabagariti (Hobu 33:4).