1. a) Ka katei hemegeirubei sun gürigia? b) Kátaña gayarabei híchuguni katei ligía woun?

 SUN gürigia mégeitiwa wasandiragun woungua yarafa houn amu. Ariñawagúati yarafagua hamá bián gürigia dan le hínsiñegua hamá houngua ani subudigua hagía houngua buidu. Ma sun wagía buiti wasandiragun woungua hama waduheñu o wamadagu ha hínsiñehabutiña woun, gebegitiwa houn ani gunfuranda hamutiwa? Gama lumoun, lúmatima Bungiu le adügübaliwa lun buídutima lan wanaagun woungua (Apur. 12:1).

2. a) Ka füramase lubéi Heowá woun? b) Ka uagu mafiñerun habéi besafu gürigia luagu füramasei le?

² Amisuraha lumutiwa Heowá tidan Lererun lun wayarafadun lun ani füramaseti woun ánhawa lan ayarafada lun, ábame lan giñe “layarafadun” woun (Sant. 4:8). Ma lubuidun saminaü! Gama lumoun, gíbetiña gürigia hénrenguti houn hafiñerun luagu busén lan Bungiu layarafadun houn, sanditiña madüna hamá lun layarafadun houn o luagu weiri lan lidise. Le san lúgubu gayara lan lumadagu wamá Heowá?

3. Ka lunbei wachoururuni wóuniwagua?

³ Lunti wachoururuni wóuniwagua luagu gayara lan wasubudiruni Heowá, lugundun ‘madiseti’ hawéi ha busenbaña hadariruni (aliiha huméi Adügaü 17:26, 27 luma Sálumu 145:18). Íbini gafigoun wamá, busenti Wabungiute lun wayarafadun lun luma lun lumadagu wamá (Isa. 41:8; 55:6). Ariha lumuti abürühati sálumu  katei le lungua, ligía lariñagunbei luagu Heowá: “Ladüga aganba bumuti afurieiduni! Ñǘbuintiña sun gürigia bumoun. Fuleseiwatiña gürigia ha banúadirubaña aba banügüniña aganóua bubadu” (Sal. 65:2, 4). Ariha wamá aban hénpulu lani aban gürigia le ayarafadubei lun Bungiu: urúei Asá. Ani ariha waméi ka lan tariñagubei Bíbülia luagu ligaburi lóunabun Heowá. *

4. Ka lubuidun hénpulu líchugubei urúei Asá houn huríu?

⁴ Ageindaguati urúei Asá luagu lufulesein áhuduraguni inarüniti: gumuti lau ahoruhani le hadügübei gürigia ténpulurugu luma lau áhuduraguni houn guáriua, bián katei le meha aweiridagubei lidan ageiraü (1 Uru. 15:9-13). Ligía gayara lubéi lariñagun houn lílana uburugu furangu lun “háluahani Wabureme, le Habungiute hagüchagu, luma lun hagunfuliruni lúrudu luma gumadi”. Le furumiñeti diisi irumu lidan larúeihan biní lumutiña Heowá lau darangilaü. Subudi lumuti meha Asá lúmagiñeti lan Heowá darangilaü ligía. Ligía lariñagunbei houn gürigia hagía: “Áluaha wamaali Bungiu le Wabungiute, rúhali darangilaü woun” (2 Kro. 14:1-7). Ka asuseredubei lárigiñe?

5. a) Ka sügǘ óuchagubalin lafiñen Asá luagu Bungiu? b) Ka resultóubei?

⁵ Rugua humá hungua lidan lilugaarun Asá. Añate 1,000,000 wügüriña tau 300 karü lánina wuribu lábugiñe ladundehan “Sera le Etiopíana” kóntüra Hudá (2 Kro. 14:8-10). Ánheinti huguya, seingü-san-gádürü-wein-mílurügüñanu súdara huma. Ánheinti áganiñu dóbuliti hibe! Kaba hamuga san hadüga? Hálügüdaguña hamuga san hungua ka lan uagu lígira Bungiu lun lasuseredun? Hafiñeruña hamuga san huougua, odi háluahañein hamuga ladundehan Heowá? Arufuda lumuti ligaburi lóunabun Asá luagu buidu lan lumadagua luma Heowá ani afiñe lan luagu. Ayumuraguati lun: “Íderaguabawa [...] Wabungiute Wabureme, ladüga hemenigitiwa buagu, ani lidan biri wayabin awuribuha hama gürigia ha! Wabureme, buguya Wabungiutebei, arufudabéi luagu ua lan ni aban lun gayara lan lageindagun buma!”. Ida liña san lóunabun Heowá lun layumuragun Asá? ‘Aba lagañeiragüdüni wuribu kóntüra etiopíana’. Meredeti ni aban hádangiñe wínwanñu! (2 Kro. 14:11-13.)

6. Ka idan mosu lan wáyeihani Asá?

⁶ Ka meha uagu gayara lubéi lafiñerun Asá sunsuinagubei luagu ladundehabei lan Bungiu ani góunigilei? Lugundun, kei tariñaguni Bíbülia, ‘buiti lóuserun ligibugiñe Bungiu’ ani ‘gúnfuliti luma súnwandan’ (1 Uru. 15:11, 14). Wagía, mosu giñe weseriwidun lun Heowá tau sun wanigi. Mosu wadügüni anhein busén wabéi wadügün aban umadaguaü buiti luma guentó luma ámuñegü. Ru laali Heowá furumiñeti pasu lun lachawahaniwa luouguoun luma lun líderaguniwa lun madisedun wamá luéi. Wéiriti weteingiruni luagu katei le! Guentó, ariha wamá bián igaburi le ídanbei lachawahawa luouguoun.

7. a) Ka burí katei adüga láalibei Heowá lun lachawahaniwa luouguoun? b) Kátima katei ladügübei Heowá lun lachawahaniwa luouguoun?

⁷ Arufuda lumuti Heowá hínsiñe wamá lun lau ladügüni lubuidun Ubóu le. Ani sagü weyu larufuduni hínsiñe wamá lun lau lakipuruniwa wínwanñu (Adü. 17:28; Aruf. 4:11). Ani le súdinitimabei, ru lumuti le wemegeirubei woun lun werederun yarafa lun (Luk. 12:42). Ani chouru lumuti giñe woun luagu aganba lani lafurieidun kada aban wádangiñe (1 Huan 5:14). Gama lumoun, láutima lebegi asalbaruni lachawahawa luouguoun, lugundun láutima ebegi  ligía larufudei hínsiñe wamá lun; ani lebegi giñe asalbaruni ínchahabaliwa lúntima wayarafadun lun (aliiha huméi 1 Huan 4:9, 10, 19). Óunaha lumuti Heowá Liráü lun lesefuruniwa lídangiñe figóu luma óunweni (Huan 3:16).

8, 9. Ka luadigimaribei Hesusu lidan lisuuni Heowá?

⁸ Adügaali Heowá lun hasagarun sun gürigia buiti lídangiñe lebegi asalbaruni, íbini ha awinwandubaña lubaragiñe Kristu. Lúmagiñebei láfuridun profesía luagu ñeinbei lan aban Esefuhati le lunbei lasalbaruniña gürigia, lun Heowá ítara liña kamá hamuga fayei waali ebegi ligía, lugundun subudi lumuti luagu lagunfuliruba lan lisuuni (Agu. 3:15). Saragu sígulu lárigiñe, arufuda lumuti apostolu Pábulu leteingiradi lun Bungiu luagu ‘lafayeiruni Kristu wafigoun’. Ani ábaya lariñagun: “Ítara liña labusenrun Bungiu larufuduni woun ida liña lan laricharaguagüdüniwa: Lau feruduna lani wafigoun” (Rom. 3:21-26). Lun hamuga úati Hesusu, siñati hamuga wayarafadun lun Bungiu.

⁹ Lunti hafiñerun gürigia ha ǘnabugubaña luagu Hesusu lun gayara lan hasubudiruni Heowá ani adüga hagíame aban umadaguaü buiti luma. Ida liña san tafuranguagüdüni Bíbülia inarüni le? Abürühati Pábulu: “Ánheinti Bungiu, arufuda lumuti lueirin línsiñehabu woun lau lóunahani Hesukrístu lun lounwen wawagu, lau sun meha gafigoungidiwa lan” (Rom. 5:6-8). Míchugun lumuti Heowá luma Hesusu sákürifisiu ligía ladüga gañei wamaali lan, adüga hamuti ladüga wínsiñe houn. Ariñagati Hesusu: “Siñati liabin ni aban numoun anhein mama lubéi lanügün Bungiu Úguchili le óunahabalina”. Ani ariñagati lidan amu dan: “Úati achülürüti lumoun Bungiu Úguchili anhein mama lubéi nuéigiñe” (Huan 6:44; 14:6). Ida liña san layusuruni Heowá Hesusu lun layarafadagüdüniwa luouguoun? Yusu lumuti lani sífiri sandu. Achawaha lumutiwa lau lani sífiri ani íderagua lumutiwa lun werederun yarafa lun luma lun gayara lan wawinwandun lun súnwandan (aliiha huméi Húdasi 20, 21). Gama lumoun, anihagua amu igaburi le ídanbei lachawahawa Heowá luouguoun.

10. Ida liña tíderaguniwa Bíbülia lun wayarafadun lun Bungiu?

¹⁰ Lidan arütíkulu le yúsuhadiwa bérusu tídangiñeti 14 líburu tidan Bíbülia. Lun hamuga úatu Bíbülia, ida luba hamuga wasubudiruni gayara lan wayarafadun lun Bungiu le adügübaliwa? Ida liña hamuga wasubudiruni le mini lubéi lebegi esefuruni ani yusu lani Heowá Hesusu lun lachawahaniwa luouguoun? Yusu lumuti Heowá lani sífiri lun labürüdagüdünu Bíbülia, to ayanuhaboun woun luagu lubuidun ligaburi luma luagu luéirigun lisuuni. Kei hénpulu, lidan Áfuriduni 34:6, 7, ariñagati Heowá luougua: “Gudemehabutina, gaguraasuntina, wéiritina lidan ínsiñeni luma inarüni! Deregüdaguati nínsiñehabu súnwandan, feruduna numuti wuribani, maganbadi luma figóu”. Ka mabusenrunbei layarafadun lun aban Bungiu ítarati? Subudi lumuti Heowá eibu lanme wafurendeirun luagu tidan Bíbülia, inarünitimabei lan woun ani yarafatimabei wasandiragun woungua lun.

11. Ka uagu lunti lubéi wáfaagun lun waturiahani ligaburi luma lémeri Bungiu? (Ariha huméi dibuhu le lídanbei lagumeseha arütíkulu.)

¹¹ Lun tafuranguagüdüni ida luba lan gamadagua wamá luma Bungiu, ariñawagúati lidan tebelaagüle líburu Acerquémonos a Jehová: “Gumesetiwa gamadagua luma aban gürigia ladüga hínsiñe lan ligaburi woun. Ligía súdini lubéi lun waturiahani ligaburi luma lémeri Bungiu, según lafuranguagüdüniwa tidan Bíbülia”. Adügati Heowá lun tabürüdǘn Lererun lun gayara lan gunfuranda wamanu. Wéiriti weteingiruni luagu katei le!

12. Ka meha san uagu layusura Heowá wügüriña lun habürüdünu Bíbülia?

 ¹² Gayarati hamuga meha labürüdagüdünu Heowá Bíbülia houn ánheligu. Lau sun luwuyeri, beresetiña giñe wau saragu ani ténitiña lun le wadügübei (1 Fe. 1:12). Chóuruti gayarati lan hamuga meha habürüdüni luganute Bungiu houn gürigia. Gama lumoun, harihiñein hamuga san katei kei harihini gürigia? Gayarabei hamuga san habürühan luagu ida liña lan hasandiragun gürigia houngua, luagu le hemegeirubei luma luagu hadebilin? Uá, ani subudi lumuti meha Heowá. Ligía desidírü lubéi lun wügüriñaba lan buga abürüdoun Bíbülia. Ménrengunti woun gunfuranda wamani le hasaminarubei abürühatiña Bíbülia luma ida liña lan hasandiragun houngua luma giñe ka lan hasandirubei gürigia ha uágubaña hayanuha. Gayarati gunfuranda wamani hadiheri, machouruni le hasandirubei, anufudei luma hachara, ani gayarati giñe wagundaarun lau hagundan luma hagañeirun. Ítara kei profeta Elíasi, sun wügüriña ha abürühabarun Bíbülia ítara haña meha “kei wagía” (Sant. 5:17).

13. Ida liña san hasandiragun hungua dan le haliihani lafurieidun Honasi?

¹³ Samina humá san ida liña lan meha lasandiragun Honasi lungua dan le lanurahanbei luéi lagunfulirun lau wadagimanu le líchugubei Bungiu lun. Gayarati hamuga meha san lasubudiruni aban ánheli buidu ida liña lan lasandiragun Honasi lungua lun gayara lan labürüdüni? Chóuruti buítimati lan meha layusuruni Heowá Honasi lun ligía lan abürühei lásügürün. Ani ma lubuidun burí dimurei le lanúadirubei Honasi! Kéiburi dan le lídanñein lubéi lilulin-agei barana, ariñagati lidan aban furíei: “Dan le nasandirunbei luagu lídiña lan nibagari, aba naritagun buagun Nabureme” (Hon. 1:3, 10; 2:1-9).

14. Ka uagu gayara lubéi gunfuranda wamani le labürühabei Isaíasi luougua?

¹⁴ Samina humá giñe luagun le labürühabei Isaíasi. Dan le larihini luéirigun Bungiu  lidan aban arufudúni, aba líchugun fe luagu gafigoun lan ani aban labürühan: “Fugiabu au, nounwe! Ariha naali Urúei Wabureme Suntigabafu lau nagu; au, aban wügüri le wíyeti niyuma, ani hadan gürigia wiye tiyuma naganawa” (Isa. 6:5). Gayarabei hamuga san labürüdüni somu ánheli dimurei burí le? Gama lumoun, gayarati meha labürüdüni Isaíasi, ani kei le gafigoun wabéi kei ligía, gayarati gunfuranda wamani le meha lasandirubei.

15, 16. a) Ka uagu gayara lubéi gunfuranda wamani le hasandirubei amu gürigia buidu? Ru humá hénpulu burí. b) Kaba íderaguawa lúntima wayarafadun lun Heowá?

¹⁵ Gayarati hamuga meha san lariñaguni aban ánheli luougua luagu ‘madüna lani lareini Bungiu’, kei lariñagun Hakobu luougua, o luagu ‘gafigoun lan’, kei lariñagun Féduru? (Agu. 32:10; Luk. 5:8.) Lanufudeduña hamuga meha san kei lánigu Hesusu disipulu? Lemegeiruña hamuga san ganigi lun lapurichihani uganu buiti laganagua éibaahouni, kei meha ladüga Pábulu hama ha híbiri kristiánugu? (Huan 6:19; 1 Tesa. 2:2.) Uá, lugundun mafigountiña ánheligu ani héretimatiña hawéi gürigia. Ánheinti wagía, gafigountiwa. Ligíati, dan le hariñaguni amu gürigia ida liña lan hasandiragun houngua, fureseti gunfuranda wamaniña. Dan le waliihanu Lererun Bungiu, gayarati wagundaarun hama ha gúndaabaña ani ayahuaha wagía hama ha ayahubaña (Rom. 12:15).

¹⁶ Ánhawa asaminara luagun le tariñagubei Bíbülia luagu ligaburi lóuseruniña Heowá lubúeingu ha úaraguabaña lidan binadu dan, wafurendeiruba saragu katei luagu Wabungiute, le ayarafadubei houn gürigia gafigountiña hagía lau ínsiñeni luma gaguraasuni. Ítara luba wasubudiruni buidu ani hínsiñe ligíame woun tídangiñe sun wanigi. Kei resultóu, wasandiraguba woungua yarafa lun (aliiha huméi Sálumu 25:14).

17. a) Ka adundehani líchugubei Asaríasi lun Asá? b) Ídabuga maganbadi lan Asá lun ladundehan Asaríasi, ani ka resultóubei?

¹⁷ Lárigiñebei lagañeiruni urúei Asá wuribu kóntüra etiopíana, aba líchugun profeta Asaríasi aban adundehani buiti lun luma houn lílana ageiraü. Aba lariñagun houn: “Húmañein Wabungiute anhein lúmañadün lubéi. Anhein háluaha hadarirubei; gama lumoun anhein hígira, lígirubadün giñe” (2 Kro. 15:1, 2). Gama lumoun, lau lásügürün dan, híruti aba lan labulieidagun Asá luéi adundehani le. Dan le larihinbei hábürüha lan diisi türibu nórute lani Ísüraeli luagun, aba láluahan ídemuei luma Siria. Lubaragiñe hamuga meha lamuriahanya ídemuei luma Heowá, aba lóundarun luma néchani ligía, le máhuduragunbei lun Heowá. Aba lariñagun Bungiu lun: “Óuseraadibu kei aban ibidiougua tau! [...] Lúmagiñe guentó bawuribuhátimaha” (2 Kro. 16:1-9). Ka wafurendeirubei lídangiñe le?

18, 19. a) Ka lunbei wadügüni anhein wagumeseruña lubéi adiseda luéi Heowá? b) Ida luba wayarafadun lun Heowá?

¹⁸ Maweiyasun wamá adiseda luéi Heowá. Anhein díseraühadiwa lubéi luéi murusunraü, sigí waméi adundehani le lídanbei Oseasi 12:6: “Giribubá lun Bubungiute; buadigimarida lau úarani, hemenigibá luagu Bubungiute súnwandan”. Yarafa wamá lun Heowá eibu lásügürün dan lau wasaminarun luagun lebegi asalbaruni lau ínsiñeni, luma lau waturiahanu Bíbülia buidu (aliiha huméi 2 Lúrudu 13:4).

¹⁹ Ariñagati abürühati sálumu: “Nayarafahóuba lun Bungiu, ladüga anihán lubuidun-ágeibei katei nun” (Sal. 73:28). Ligiaméme wasaminarubei. Ligíati, sigí wamá afurendeira luagu Heowá. Ítara luba wadarirun amu burí resun lun línsiñedun woun. Ánhawa ayarafada lun, layarafaduba giñe woun guentó luma lun súnwandan!