Dan le haganbahan ñunsu, háfuga rutün fe luagu anihein lan dan layusurún relihión lun ladügǘn katei le mabuidunti. Le linarün katei, mama lúmagiñe Bungiu liabin sun relihión (Matéu 7:15). Hibe-agei gürigia ubouagu hawinwanduña lidan iyeeni. (Aliiha huméi 1 Huan 5:19.)

Gama lumoun, subudi lumuti Bungiu añahein lan gürigia harumatu hanigi ani hínsiñeti inarüni houn luma irichaü (Huan 4:23). Ligía lamisurahanbaliña lun háluahani inarüni tidan Bíbülia, to Lererun. (Aliiha huméi 1 Timotéu 2:3-5.)

Ladügüña Heowá lun lidan hamá aban gürigia ha meha lídanbaña ámuñegueinarügü relihión. Ida? Lau larufudahani inarüni houn luma lun hínsiñegua hamá hámagua (Mikeasi 4:2, 3). Gayarati lubeiti hasubudiruniña lílana relihión le inarünibei lau ligaburi hóuseragun houngua. (Aliiha huméi Huan 13:35.)

Lubúeingu Bungiu ha inarünitiña afiñetiña luagu le tariñagubei Bíbülia ani gaganbaditiña lun lúrudu burí le tídanbei (2 Timotéu 3:16). Inebeti liri Bungiu houn (Salmo 83:18, Reina-Valera Actualizada). Ani apurichihatiña giñe luagu Larúeihan lan Bungiu emeniginibei houn sun gürigia (Danieli 2:44). Ani durunguagüda hamuti halanpun lau híderaguniña gürigia, ítara kei meha ladügüni Hesusu (Matéu 5:16). Ani ménrengunti hasubudirúniwa luagu hachülürün hábiñoun habesinanigu ayanuha houn luagu sun buiti le lunbei lanügüni Larúeihan Bungiu. (Aliiha huméi Matéu 24:14; Adügaü 5:42 luma 20:20.)