TÍTULU LE LUÁGUBEI TIDÁÜ: HÍNSIÑETÜN SAN LUN BUNGIU?
Ruti bungiu gurasu hun
“Bungiu, le íchugubei gurasu houn ha maguraasunbaña, aba líchugun gurasu woun.” (2 KORINTUNA 7:6)
“Aba lederegeragun [Liráü Bungiu] lungua lun lounwen nuagu.” (GALASIANA 2:20)
KA UAGU MACHOURUN HABALIN FIÚ GÜRIGIA: Gíbetiña gürigia wéiriti hemegeirun ídemuei, ani mamuriahantiña luma Bungiu lun líderaguniña ladüga saminatiña anhein lan hadüga hawouguounrügüñein lan haritagua. Ariñagatu aban würi gíritu Raquel: “Dan le nasaminarun luagu gibe hamá gürigia ubouagu luma luagun luéinamun haturóbulin, aba narihini nituróbulin kamá ñǘraüraüti ani adügati katei le lun mamuriahan nan ídemuei luma Bungiu”.
KA TARUFUDAHABEI BÍBÜLIA: Adügaali Bungiu aban katei buiti lun líderaguniña gürigia luma lun líchugun gurasu houn. Sun wagía lidan figóu nasirua wamá, ani ítara liña figóu ligía keisi aban lanarime sandi galugurahati. Ligía siñá lubéi wagunfuliruni lilurudun Bungiu sin wachararun. Gama lumoun, hínsiñetiwa lun Bungiu, “aba lóunahani Liráü le ábanrügüti lun lounwen, lun lébuname ferudunawa lan wafigoun” (1 Huan 4:10). Lau lani Hesusu sákürifisiu, feruduna lumuti Bungiu wafigoun, ruti aban lubuidun saminaü woun luma ibagari magumuchaditi lidan darangilaü lidan aban iseri ubóu. * Larufuduñein san Bungiu línsiñehabu ítara houn sun gürigia ubouagu, o larufuduñein giñe hun luagu hínsiñe humá lun?
Ariha waméi lani apostolu Pábulu hénpulu. Hanarimeti leteingiradi luagu lani Hesusu sákürifisiu darí lun aba lan labürühan: “Aba lederegeragun [Liráü Bungiu] lungua lun lounwen nuagu” (Galasiana 2:20). Íbini hilaali lan Hesusu dan le kristiánu lubéi Pábulu, ariha lumuti Pábulu sákürifisiu ligía kei aban idewesei le líchugubei Bungiu lun.
Aban giñe idewesei le ru láalibei Bungiu hun lani Hesusu sákürifisiu lun larufuduni hun luagu hínsiñe humá lun. Idewesei le gayarati líchugun “ámalihouni le magumuchaditi woun luma aban emenigini buiti” ani ru ligíame erei woun “lun [w]adügüni sun le buídubei” (2 Tesalónikana 2:16, 17).
Gama lumoun, sügühali kéiburi bián-milu irumu lúmagiñe líchuguni Hesusu libagari. Ida liñati wasubudiruni luagu beresegili lan Bungiu wau uguñe weyu?
^ Anhein busén hubéi haganwoundagüdüni hisubudin luagu lani Hesusu sákürifisiu, aliiha huméi kapítulu 5 tidan líburu Kátima san tarufudahabei Bíbülia?, hadügün gefentiña luagu Heowá.
