1, 2. a) Ka burí meha idewesei libihibei Adán lúmagiñe Heowá? b) Ka uagu líchiga Heowá aban würi lun Adán lánime weiriou? (Ariha huméi dibuhu le lídanbei lagumeseha arütíkulu.)

 ADÜGA lumuti Heowá Ubóu lun “haganóun gürigia” lidan (Isa. 45:18). Mafigounti meha ladügüni Bungiu Adán, le furumiñeti wügüri, ani aba líchugun aban lubuidun fulasu lun lun lawinwandun ñein. Ma meha lugundan Adán aríaguei óunwenbu burí tídibu wewe, aganbei léibaagun duna o aríaguei háhurerun animaalu! Gama lumoun mégeigili meha aban katei súdiniti lun. Subuditi meha lun Heowá katei lan, ligía lariñagunbei: “Mabuidunti lun lábuguarügü lan wügüri. Nadüga aban ídemuei lun lidan sun katei”. Ligía ladügünbei lun léiguadun Adán lidoun aban idabagu huliliti, aba lanügün aban lídangiñe luruhure, aba ladügünu “würi lídangiñe uruhurei ligía”. Ma lugundan Adán dan le lagagudunbei! Aba lariñagun: “Anati to, lídangiñetu nǘgürügü luma nabu! ‘Würi’ ligíaba tiri, ladüga lídangiñe wügüri lasagaroun Bungiu” (Agu. 2:18-23).

² Resibiti Adán aban idewesei espechaliti lúmagiñe Bungiu, lugundun ábanboun meha ídemuei buitu würi tuguya lun. Gayarabei meha giñe garahüñü tan. “Aba líchugun wügüri tiri lúmari: Ewa, tuguya háguchuboun sun gürigia ubouagu.” (Agu. 3:20.) Ma meha lubuídunmeraü idewesei le líchugubei Heowá houn furumiñetiña gürigia! Gayarati meha garahüñü hamá ha mafigountiña. Ítarati, ábanbei yebe meha paraísu sun Ubóu buin hau gürigia mafigountiña ha lúnbaña hóunigiruni sun líbiri katei le gabagaribei (Agu. 1:27, 28).

3. a) Ka meha lunbei hadügüni Adán tuma Ewa lun labiniruniña Heowá, ani ka asuseredubei? b) Kaba burí álügüdahani wóunaba?

 ³ Lun meha heresibiruni Adán tuma Ewa abinirúni le aranse láalibei Heowá habá, mosu meha gaganbadi hamá lun ani subudi hameime lilurudun (Agu. 2:15-17). Ítararügübei meha gayara lan hagunfuliruni lisuuni. Gama lumoun, aba hafalaruni le tariñagubei “binadu hewe”, Satanási, ani aba hafigouhan kóntüra Bungiu (Aruf. 12:9; Agu. 3:1-6). Ka lánibei ebedaaguni ligía efekütu hawagu würiña? Ka meha katei wéiriguti hadügübei fiú würiña úaraguatiña lidan binadu dan? Ka uagu gayara lubéi wariñagun “saragu haña [lan] würiña” apurichihei luganute Bungiu? (Sal. 68:11.)

4. Ligibugiñe Heowá, ka gadurunbei luagu hafigoun furumiñetiña wagübürigu?

⁴ Dan le lálügüdünbalin Bungiu Adán luagu le ladügübei, aba lóunabun: “Würi to bíchuguboun nun lun númarime, tuguya íchuguboun tídangiñe tin wewe tuguya nun, aba néiginu” (Agu. 3:12). Máhati lun lidurun, ábarüga líchuguni duru tuagun lani weiriou. Ani le linarün katei, luagun Bungiu líchigei duru, ladüga ligía íchugubarun würi tuguya lun lau ínsiñehabuni. Íbini biángubei lan hagía afigouhatiña, ligibugiñe Bungiu Adán gadurunbei. Ligía labürühanbei apostolu Pábulu: “Lídangiñe [...] meha aban wügüri [Adán] lebelura figóu ubouagun, belú ligía óunweni lídangiñe figóu” (Rom. 5:12).

5. Ka erederubei furangu lau lígirun Bungiu lun hagumadiragun gürigia houngua?

⁵ Aba lafiñeragüdüniña Satanási furumiñetiña wagübürigu luagu memegeirun hamá lun Bungiu lan harúeite. Adügati katei le lun láfuachun álügüdahani súdiniti le: “Ka garichabei lun larúeihan?”. Lun gayara lan lounabúniwa álügüdahani le sunsuinagubei, aba lígirun Bungiu lun gürigia lan agumadiragua houngua, ítara luba meha larufudun luagu úati lan arúeihani buiti dise luéi Bungiu. Lidan sun sígulu le sügühalibei, lamiselurügüñein lanüga harúeihan wügüriña. Lídanrügü sígulu le ásügürübei hilaguatiña kéiburi 100 míñunu gürigia lidan wuribu, dandu wügüriña, würiña hama irahüñü maduruntiña. Ítarati, arufudúati furangu luagu “siñagua lan wügüri lungua lun ladundehani lémeri guánarügü” (Jer. 10:23, TNM). Ligía wánharunbei lun Heowá keisi warúeite (aliiha huméi Ariñawagúni 3:5, 6).

6. Ida liña houserúniwa würiña lidan saragu ageiraü?

⁶ Dandu wügüriña kei würiña súfurihaña saragu lidan ubóu le lábugiñebei lubafu Satanási (Apur. 8:9; 1 Huan 5:19). Gama lumoun, würiña asufurirubalin fiú lídangiñe wuribani le wéinamutimabei. Kei hénpulu, lidan sun ubóu, 1 hádangiñe kada 3 würiña agayuahatiña hani weiriei o hapanaagu hawagu. Ani lidan amu burí fulasu hímeiwatiña wügüriña irahüñü, ladüga saminawati luagu hagíaba lan adüga lun lakipurúniwa lúgubu iri ani hanuriahabaña lan hagübürigu hama hárugutinu. Lidan burí amu ageiraü, mínsiñeti houn gürigia gasaanigu hamá würiña, ani gíbetimati haragahóun würiña irahüñü sügǘ lau haragahóun wügüriña.

7. Ka agumesehani líchugubei Heowá lun wügüri luma tun würi?

⁷ Mínsiñeti lun Bungiu houserúniwa würiña wuriba. Óusera lumutiña kei lóuseruniña wügüriña ani inebetiña lun. Ariha wamá aban sügǘ le arufudubalin. Dan le meha ladügünbarun Bungiu Ewa, adüga lumutu lau burí igaburi le buiti lun gayara lan tíderaguni Adán, le tani weiriei, mama lun lidamun tan. Ligía aban lídangiñe resun le uágubei lariñaga Bungiu lidan lagumuchun lisisin weyu lánina luadigimari “luagu buidu lan sun le ladügübei” (Agu. 1:31). Anha, ‘buiti’ sun le ladügübei Heowá. Dandu wügüriña kei würiña ruti aban lubuidun agumesehani houn.

8. a) Ida liña hóuserun hibe-agei gürigia? b) Ka íderagua láañabaña Bungiu lúmagiñe sun dan?

⁸ Wuribatimarügüti hóuserun gürigia lúmagiñe ebedaaguni Edén, dandu wügüriña kei  würiña. Ani lidan sígulu le ásügürübei gánwountimarügüti wuribani. Ariñagatu Bíbülia ligíaba lan aban seini lidan “lagumuhóun dan”, ani chóuruti buruguatimahali lan wuribani lidan sun ubóu, ani le linarün katei, wawinwanduña lidan “weyu hénrenguti” (2 Tim. 3:1-5). Gama lumoun, añaheingubeiñanu wügüriña hama würiña afiñerutiña luagu Bungiu, ha gaganbaditiña lun lilurudun ani ánhatiña lun kei harúeite. Ani íderagua laaña Heowá (aliiha huméi Sálumu 71:5).

9. Átiriñanu san gürigia esefurutiña lídangiñe Guran, ani ka uagu?

⁹ Dan le lagünrinchagunbalin Bungiu ubóu wuribati le lánina lidaani Noé lau aban guran, fiúrügüñanu gürigia esefurutiña. Ani anhein wínwangiña lubéi meha líbirigu Noé lidan dan ligía, hilatiña giñe (Agu. 5:30). Kátaña san erederubaña wínwanñu? Gádürü würiña hama gádürü wügüriña: Noé, lani weiriou, ǘrüwa lisaanigu hama hánigu weiriou. Sefu lumutiña Bungiu ladüga gaganbadi hamá ani adüga hamuti le lariñagubei houn. Saragu milu míñunu gürigia ha awinwandubaña uguñe weyu hadügawagun widü gürigia hagía ha eresibirubalin lídehan Bungiu (Agu. 7:7; 1 Fe. 3:20).

10. Ka meha uagu hibihei hánigu furumiñetiña hachügüdina iduheñu weiriou lídehan Bungiu?

¹⁰ Fiú irumu lárigiñe, sun hánigu furumiñetiña hachügüdina iduheñu ha úaragubaña weiriou resibi hamuti lídehan Bungiu. Siñanbei hamuga meha lasuseredun lira lun hamuga magundan hamá lau habagari lidan dan ligía (Hud. 16). Masaminaruntiwa tuagun Sara, to lani Abüraámü weiriou, ekehera ladüga mosu lan tígiruni lubuidun tibagari Uru lun tidin awinwanda tidan kianpu lidan fulasu díseti. “Gaganbaditu [Sara] lun Abüraámü, aba tagúarun lun, ‘nabureme’.” (1 Fe. 3:6.) Haritagua waméi aban lan giñe idewesei lúmagiñeti Heowá Rebeka lun Isaakü. Maweiriduntu wanigi lau waliihan “aba [lan] tínsiñedun Rebeka lun Isaakü saragu, ítara liña lárügüdagun lungua lárigi tounwen lúguchu” (Agu. 24:67). Ma lanarime wagundan uguñe weyu luagu añahein lan würiña úaraguatiña wadan kei meha Sara tuma Rebeka!

11. Ida liña harufuduni bián ágüdahatiña ebüréana luagu ganigi hamá?

¹¹ Lidan meha sun dan le haubei ísüraelina amudirawagua Ehiptu, aba haganwoundun saragu, ani aba líchugun faraón lúrudu lun háfarawagun sun wügüriña irahüñü ebüréuna ha agurahóutiña. Gama lumoun, añahein meha bián würiña ebüréana ágüdahatiña, Sifürá tuma Puá híribei, háfuga hagía lan meha hábutibaña híbiri ágüdahatiña, ganigitiña bián würiña hagía, aba magunfulirun hamani lilurudun urúei. Ladüga lineben Heowá houn, máhatiña lun hadügüni lanarime wuribani ligía, aba líchugun Heowá hafayeiruaha lau gasaanigu hamá (Afu. 1:15-21).

12. Ka katei súdiniti gayarabei wariñaguni tuagu Débora tuma Haeli?

¹² Lidan meha hadaani aguseragüdütiña Ísüraeli, resibi tumuti aban würi gíritu Débora lídehan Bungiu. Rutu dǘgüdaguaü lun aguseragüdüti Barakü ani íderagua taña ísüraelina lun hesefurun hawéi háganiñu. Gama lumoun, ariñagatu mámaba lan Barakü ibihei agañeiruni kóntüra kananna. Ladügüba meha Bungiu lun lábürühan Sísara, le hábuti súdara kananna, ‘túhaburugun aban würi’. Ani ítara liña lasuseredun, aban würi mama ísüraelina gíritu Haeli áfarubalin (Ali. 4:4-9, 17-22).

13. Ka tariñagubei Bíbülia woun tuagu Awigaili?

¹³ Awigaili, tuguya ábanya würi to awinwanduboun kéiburi 1,100 irumu lubaragiñe Kristu. Chuti meha tau, ánheinti Nawali, le tani weiriei, aban meha wügüri meseriwínti, rófuti ani wuribati lóuserun (1 Sam. 25:2, 3, 25). Góunigi lumutiña meha Dawidi hama luwügüriñanigu lilügüniña Nawali mudún hama lubúeingu luagu fiú dan, gama lumoun dan le hamuriahanbei éigini luma, “wuribati leresibiruniña” ani míchuti ni kata houn. Aba lagañidun Dawidi saragu darí lun lasaminarun lagumuchun lau Nawali hau sun luwügüriñanigu. Dan le tíchugunbei Awigaili fe, aba tanügün éigini luma uniñein lun Dawidi  luma houn luwügüriñanigu, ítara liña tadügün lun ua lan áfarahani (1 Sam. 25:8-18). Dan lárigiñe, aba lariñagun Dawidi tun: “Biniwati Wabureme le Lubungiute Ísüraeli, ladüga lóunahanibu nubaroun” (1 Sam. 25:32). Lárigiñebei lounwen Nawali, aba lamarieidun Dawidi tuma Awigaili (1 Sam. 25:37-42).

14. a) Ka wadagimanu ídanbei hídeha lirahüñü Salumu? b) Ka idan genegegua hamá saragu würiña kristiánugu uguñe weyu hama lirahüñü Salumu?

¹⁴ Saragu haña wügüriña, würiña hama irahüñü óunwegutiña dan le hagünrinchagunbalin babilóniana Herusalén tuma litenpulun lidan irumu 607 lubaragiñe wadaani. Ábaya lábunawagun lubarieirun uburugu lidan irumu 455, lábugiñe laríaahan Neemíasi. Haganagua ha ídehabaña lidan laranserunya lubarieirun Herusalén añahein meha lirahüñü Salumu, “le meha gálidibei lidan le ábanya lamidan munisípu lani Herusalén” (Neem. 3:12). Furanguti rúguatiña lan houngua lau sun hagundan lun hadügün aban wadagimanu ǘnabuguti. Uguñe weyu, gíbetiña kristiánugu würiña ídehatiña lau sun hagundan lidan wadagimanu lánina ábunaguni le tadügübei lóundarun Heowá. Wéiriti wagundan lau wadagimanu le hadügübei!

15. Ka chansi líchugunbei Bungiu tun aban würi gíritu María?

¹⁵ Lidan furumiñeti sígulu lidan wadaani, gíbetiña würiña labinirun Heowá lidan ámuñegueinarügü manera. Aban würi gañüngiru gíritu María aban hádangiñe. Gadaradunhaaru meha luma Hosé, gama lumoun, lubaragiñe tamarieidun aba tadageinadun lau lubafu lani Bungiu sífiri sandu. Ka uagu lanúadirunbarun Bungiu lun tuguya lan lúguchu Hesusu? Ladüga gagaburi tani igaburi le mégeiwabei lun tagüriahani tiráü le mafigounbei. Ma lubuidun chansi lun lúguchu tan wügüri wéirigutimati le wínwanhalibei ubouagu! (Mat. 1:18-25.)

16. Ida liña meha lóuseruniña Hesusu würiña? Ru humá aban hénpulu.

¹⁶ Óusera lumutiña meha Hesusu würiña lau ínsiñehabuni. Haritagua humagili san ida liña lan meha lóuserunu aban würi to meha barüharuboun duusu irumu lau lésehan hitaü tídangiñe? Dan le tayarafadunbei lanagangiñe haganagua saragu gürigia, ani aba taguurunu ladaüragun, ka ladügübei Hesusu? Lubaragiñe hamuga ladeinhan tun, aba lariñagun tun lau ínsiñeni: “Niráü, areidaguaadibu ladüga bafiñen. Beiba lau darangilaü, areidaguñu lídangiñe bisandi” (Mar. 5:25-34).

17. Ka milaguru asuseredubei lidan Pentekosutesi irumu 33?

¹⁷ Hadan lani Hesusu disipulugu añahein meha fiú würiña ha etenirubaña lun luma houn apostolugu (Luk. 8:1-3). Ani lidan Pentekosutesi irumu 33 resibi hamuti kéiburi 120 wügüriña hama würiña lani Bungiu sífiri lidan aban igaburi espechaliti (aliiha huméi Adügaü 2:1-4). Ariñaga laali meha Heowá lau dimurei le: “Nóunahabei nani Sífiri hawagun sun gürigia: Hadimurehaba hisaanigu [dandu wügüriña kei würiña] luéigiñe nóubadina [...]. Lidoun burime weyu ligía, nóunahabei giñe nani Sífiri hawagun idamuni” (Hoe. 2:28, 29). Lau milaguru le, arufuda lumuti Heowá míchugun laali lan lídehan lun néchani Ísüraeli le ebedaagubei lun, ani guentó himei lumutiña lílana “Ísüraeli le lani Bungiu”, le ñein habéi wügüriña hama würiña (Gal. 3:28; 6:15, 16, TNM). Hadan würiña kristiánugu ha apurichihabalin uganu buiti lidan furumiñeti sígulu añahein meha gádürü lisaanigu Felipe le apurichihabei (Adü. 21:8, 9).

18, 19. a) Libügürü áhuduraguni inarüniti, ka chansi ru láalibei Bungiu dandu houn wügüriña kei houn würiña? b) Ka lariñagubei abürühati sálumu hawagu würiña ha apurichihabalin uganu buiti?

¹⁸ Lidan burí irumu 1870, ñéinñanu saragu wügüriña hama würiña arufudutiña busén hamá hasubudiruni ka lan igaburi richabei lun háhuduragun lun Bungiu. Hagía aransehabalin  üma habá ha agunfulirubalin dimurei le lídanbei lani Hesusu profesía le: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Mat. 24:14).

¹⁹ Liraüraü sétanu hani Aturiahatiña Bíbülia ligía wéirihali darí lun hóustaaña lan kéiburi 8,000,000 gefentiña luagu Heowá uguñe weyu. Ani ligibuagun lira, añahein hóugiñe 11,000,000 gürigia ha achülürübaña lidoun Aritaguagülei irumu-auti luáguti lounwen Hesukrístu lidan irumu 2013. Lidan saragu ageiraü, hibe-agei gürigia ha achülürübaña würiña. Luagu amu oubaü, hóugiñe haaña aban míñunu íbirigu ha eseriwidubaña lidan dan dayarüti lidan sun ubóu, ani würiña hibe-agei. Kei le aubei warihei, ru laali Bungiu chansi houn würiña úaraguatiña lun hídehan lidan lagunfulirun lererun abürühati sálumu le: “Ruti Bungiu aban uganu; saragu haña würiña ariñaguti [uganu ligía]” (Sal. 68:11).

20. Ka gayarabei waturiahani lidan wáhuduragun lun Bungiu?

²⁰ Lóuguabei hamuga dan lun wayanuhan hawagu saragu würiña úaraguatiña ha uágubaña tayanuha Bíbülia. Gama lumoun, gayarati wáluahani abahüdaguni hawagu tidan Lererun Bungiu luma lidan arütíkulu burí le furihalibei tidan wani agumeiraguagüdüni. Samina wamá, kei hénpulu, luagu tikesin Rudu. Wasaminarun saragu luagu úaraguni le meha tarufudubei líderagubadiwa saragu (Rudu 1:16, 17). Kaba wariñaga tuagu urúei Esütérü? Waliihanu líburu to anügübalin tiri luma amu burí arütíkulu le ayanuhabei tuagu lederebudagüdübei wafiñen. Áfaagua wamá lun wadügün aransehani lun waturiahani katei burí le lidan wáhuduragun lun Bungiu hama waduheñu. Anhein wábuguarügüñadiwa lubéi, gayarabei wakutihani tema burí le dan le waturiahanu Bíbülia.

21. Ida liña harufuduni saragu würiña kristiánugu úaragua hamá lun Heowá lidan lénrengunga?

²¹ Chóuruti biní lani Heowá wadagimanu lánina apurichihani le hadügübei würiña kristiánugu ani íderagua lumutiña lidan lidaani lénrengunga. Kei hénpulu, íderagua lumutiña wíbirigu würiña lun úaragua hamá lun lábugiñe hagumadihan nazis luma lábugiñe hagumadihan amu urúeigu furundetiña. Saragu hádangiñe súfuritiña darí heferidiruni habagari ladüga haganbadi lun Bungiu (Adü. 5:29). Uguñe weyu kei lidan dan le sügühalibei, sun kristiánugu dandu wügüriña kei würiña, anúadaha hamaali Heowá keisi harúeite. Ani kei meha ladüga houn ísüraelina lidan binadu dan, ragǘ lumuti Bungiu háhabu ani aba lariñagun houn: “Manufudedabá, ladüga anahein buma; [...] íderagua numutibu” (Isa. 41:10-13).

22. Ka lubuidun chansi hagurabubei lubúeingu Heowá ha úaraguabaña?

²² Yarafa madise, dandu wügüriña kei würiña ha úaraguatiña hadügüba lun ábanbei lan paraísu sun Ubóu ani harufudahaba houn ha lúnbaña hásaarun lídangiñe óunweni lun hafurendeirun luagu lisuuni Heowá. Lidan awanha lan agurabahei dan ligía, ariha waméi chansi le wibihibei lun weseriwidun lun Wabungiute lidan “úarani” kei aban katei gebegiti (Sof. 3:9, TNM).