1, 2. a) Ka meha san luadigimaribei aban hóuniri mudún lidan binadu Ísüraeli? b) Ida liña genegegua hamá agübürigu hama hóuniri mudún?

 HÉNRENGUTI meha libagari aban hóuniri mudún lidan binadu Ísüraeli. Mosu meha lawanduni lidiliga o lárouga lun lóunigiruniña lilügüniña mudún dandu hawéi animaalugu áraabuna kei hawéi híwerutiña. Téniti meha buidu houn lilügüniña mudún, anhein anuhein lubéi aban to sánditu o to buleseiharu, ábatima letenirun tun. Wéiritimati giñe letenirun houn mudún ha ñǘbürigiña, lugundun débilitimatiña sügǘ hau ha wéinamuhaña (Agu. 33:13).

² Ítara haña agübürigu kristiánu kei hóuniri mudún lidan fiú katei. Mosu hóuserun kei aban hóuniri mudún lun gayara lan hagunfulirun lau hani buligasion, lun hagüriahaniña hasaanigu “arufudaheina houn kei labusenruni Wabureme (Efe. 6:4). Hénrenguti san ladügǘn le? Anha. Lugundun mosu háfaagun isaanigu kóntüra figóu le hádanbei. Ani ligibuagun lira, gíbeti saminaü lúmagiñeti Mafia lidan ubóu le (2 Tim. 2:22; 1 Huan 2:16). Anhein gasaanigu hubéi, ida luba san hadundehaniña? Ariha wamá ǘrüwa katei le gayarabei hadügüni: hasubudiruniña, héigagüdüniña luma hadundehaniña.

3. Ida luba san hadüga agübürigu lun hasubudiruniña hasaanigu buidu?

³ Aban hóuniri mudún le buiti góunigi lumutiña kada aban hádangiñe lilügüniña mudún buidu lun lachoururuni úati lan mégeiti houn. Gayarati giñe hadügüni ligiaméme hau hisaanigu. Ariñagatu Bíbülia: “Subudibéi hawaguti bilügüniña mudún [buidu]” (Ari. 27:23). Lun hasubudiruniña hisaanigu buidu, mosu hetenirun lun le hadügübei, le hasaminarubei luma le hasandirubei. Ida luba hadügüni? Mosu hayanuhan hama súnwandan.

4, 5. a) Ka gayarabei hadügüni agübürigu lun hariñaguni hasaanigu houn ka lan hasaminanbei? (Ariha huméi dibuhu le lídanbei lagumeseha arütíkulu.) b) Ka katei seriwihalibei hun lun hadügün lun hayanuhan hisaanigu huma?

⁴ Hénrenguti houn fiú agübürigu hayanuhan hama hasaanigu dan le aweinamudeina hamá irahüñü hagía. Lidan dan ligía, aba hagumeserun isaanigu adiseda ani háfuga hénrenguti houn hayanuhan luagu le hasaminarubei luma le hasandirubei. Anhein asusereda katei le houn hisaanigu, ka gayarabei hadügüni? Lubaragiñe hafosuruniña lun hañuurun ayanuha huma luagu saragu dan, áluaha humá lirahüñü chansi lun hadügüni. Houcha humá hayanuhan hama dan le darangilañu hamá (2 Lur. 6:6, 7). Lun lira mosu hásügürün dan hama. Gayarati háfuridun éibuga murusun oura o hidin águra pasu tidan karü, háhurerun somu huraraü o hadügün somu wadagimanu múnada úara. Lidan burí katei ítarati, darangilatimati hasandiragun nibureintiña houngua ani aransetimatiña lun hayanuhan.

⁵ Ánheinti mabusenrunmémegili lubéi hisaani layanuhan? Houcha humá amu katei. Kei hénpulu, lubaragiñe hálügüdünu hisaani ka lan tadügübei sun weyu, abahüdagua huméi tun ka lan hadügübei. Háfuga ítara luba tabahüdagun somu katei hun lídangiñe le tadügübei. O anhein busén hubéi hasubudiruni ka lan tisaminanbei luagu somu katei, mariñaga humá tun: “Ka san bisaminanbei luagu ítaga katei?”. Álügüdarügü humóun ka lan tisaminanbei somu tumada luagu katei ligía. Lárigiñe, ábame hálügüdünu kaba lan hamuga tariñaga tun tumada lun tíderagunu.

6. Kaba hadüga lun hasandiruni hisaanigu ñéinbadün lan lun híderaguniña súnwandan?

⁶ Anhein busén hubéi lun hadaarunu hisaanigu hanigi hun, mosu harufuduni houn luagu gadaani humá houn ani busén humá haganbuniña. Dan le genege lan luagu bereseguhei hamá agübürigu, aba mabusenrun hamá isaanigu hayanuhan. Ida luba san harufuduni lun hisaani aranse humá lun haganbuni? Úati buídurügü lan hariñagun lun: “Dánmetia le bemegeirunina anaheintia ya súnwandan”. Mégeiti lasubudiruni luagu marihin hubéi lan lituróbulin kamá úati súdini lan ani maweiridunboun lan hanigi luagu le lunbei lariñaguni. Ariñagatu aban nibureintu 19 irumu tau gíritu Kayla: “Gayarati nayanuhan luma núguchi luagu furumiñeguarügü katei. Madüraagun lumuti nayanuhan, ani masaminarunti wuriba nuagun; aganbarügü lumutina. Ani lárigiñe súnwandan líchugun adundehani le buiti nun”.

7. a) Ka gayarabei hadügüni agübürigu lun mabalachun hamá luagun ni aban oubaü dan le hayanuhan luagu katei súdiniti, kéiburi luagu áfuriduni luma somu gürigia? b) Ida liña gayara lan ‘lásügüragun hagumadiruniña agübürigu hasaanigu’ sin híchugun fe?

⁷ Samina humá hayanuhaña lan hama hisaanigu luagu somu katei súdiniti, kéiburi luagu gadari hamá. Ánhadün agumesera íchiga saragu eweridihani houn, gayarabei habulieiduni hafuranguagüdüni houn ida luba lan harihini katei. Lun gunfuranda humani, samina humá aba lan hidin eiga tidan aban éigagülei, ñein aban tichugún aban lísüta hun lau sun éigini le alugurahóubei ñein, gama lumoun lóubagiñe kada éigini anihein aban eweridihani luagu gayarabei lan hasandirun anhein heiga éigini ligía. Chóuruti aba lanme háfuridun ñéingiñe lun hidin tidoun amu éigagülei. Chóuruti ítara  luba lan hadüga hisaanigu ánhaña amuriaha adundehani huma ani ábarüga híchugun saragu eweridihani houn (aliiha huméi Kolosana 3:21). Houcha humá lun mabalachun humá luagun ni aban oubaü. Afuranguagüdatu aban íbiri nibureingiru gíritu Emily: “Dan le hayanuhan nagübürigu numa luagu áfuriduni luma somu nibureinti, mariñaguntiña wuriba lan. Ayanuhatiña luagu lubuidun basubudirun o badarirun aban gürigia lun bamarieidun luma. Adügati katei le lun buidu lan nasandiragun nungua lun nayanuhan hama luagu katei le. Le linarün katei, lubaragiñe nadügüni katei hanagangiñe, busentina lun híchugun fe dan le nagumeserun asubudira somu gürigia”.

8, 9. a) Ka uagu buidu lubéi lun waganbun furumiñe sin wadüraaguni yanu? b) Ida liña san lidin hun dan le haganbuniña hisaanigu?

⁸ Darangilu humá dan le habahüdagun hisaanigu somu katei hun, ítara luba harufuduni houn luagu aranseñu hiña lan lun haganbuniña, úarati katei le luma le tariñagubei Kayla (aliiha huméi Santiagu 1:19). Aban úguchuru gíritu Katia, to agüriahabarun tisaani tábuguarügü, ariñagatu: “Furumiñe, súnwandan meha maguraasun nan tubá. Mígirun numutuha lun tagumuchuni le tariñagubei. Anihein dan buchati nuagu lun naganbunu o anihein dan mabusenruntina lun naganbun ni kata. Guenlé, kei le sánsihadina lubéi, ayanuhaaru numa furangu”.

⁹ Susereti giñe aban katei ítarati lun aban úguchili gíriti Ronald. Ariñagati: “Dan le tariñagunbei nisaani nun hínsiñe lan aban nibureinti tun leskuelarugu, furumiñe aba nagañidun, gama lumoun aba naritaguni gaguraasun lan Heowá hama lubúeingu ani aba nasaminarun mosu lan nígirun lun tadimurehan lubaragiñe nererehan tun. Ani seremei nadügüni ítara! Ligía furumiñeti wéiyaasu gunfuranda nani ka lan tasandirubei. Dan le lásurunbei tayanuhan, ménrenguntimahali nun nayanuhan tun lau ínsiñeni. Magurabun numuti yebe, gama lumoun aganba tumuti nadundehan buidu ani aba tariñagun táfaaguba lan lun tasansirun”. Líderagubadün hayanuhan hama hisaanigu súnwandan lun hasubudiruni ka lan lídanbei hasaminan tuma hanigi. Ani lahuuduba hun lun híderaguniña lun desidírü hamá buidu. a

10, 11. Ida luba híderaguniña hisaanigu lun madireirun hamá luéi inarüni?

¹⁰ Aban hóuniri mudún le buiti subudi lumuti gayara lan heferidiragun lilügüniña  mudún. Gayarati harihin mudún hagía somu fulasu le ñein lumuti sagadi buiti ani ábame houdin ñeinhin, lárigiñe ábaya harihin aban fulasu le dísetimati darí lun hadisedun sunsuinagubei hawéi ha híbiri mudún. Ítarameme, gayarabei giñe adisedeina lan aban isaani luéi inarüni murusun murusun, háfuga ladüga lanúadirun hagübüri umadagu, o isebáhari le mabuidunti (Ari. 13:20). Kaba san hadüga lun masuseredun lan le houn hisaanigu?

¹¹ Ánhadün ariha débili hamá lidan somu katei, madarasaha humá. Íderagua humaña lau lóufudagun. Ayanuha humá giñe houn luagu igaburi buiti le hawagubei (2 Fe. 1:5-8). Huuti áhuduraguni lidan familia lun katei le. Ariñagatu Wani Ministeriu to lánina diisi-hati irumu 2008: “Ariñagatiwa houn lichügüdina familia lun hetenirun lun hani buligasion ligibugiñe Heowá ani lun hasigirun aban programa buiti lánina taturiahóun Bíbülia lidan familia”. Hayusuruñein san dan ligía buidu lun hadundehaniña hisaanigu? Gayarati hachoururuni heteingirubadün lan hisaanigu luagu híderaguniña akipurei hamadagua luma Heowá (Mat. 5:3; Fili. 1:10).

12. a) Ida liña líderaguniña áhuduraguni lidan familia nibureintiña? (Ariha huméi rekuáduru “ Heteingirubadün hisaanigu”.) b) Ida liña san líderagunün áhuduraguni lidan familia?

¹² Ariha huméi ka lan tariñagubei aban nibureintu gíritu Carissa luagu Guñoun lánina Áhuduraguni lidan Familia: “Hínsiñeti nun ladüga aba lan wañuurun súngubei ayanuha. Adügati katei le lun lidan wamá aban ani adügati lun lerederun katei buiti lidan wasaminan. Mabulieidagunti núguchi luéi waturiahan. Dan le narihini súdini lan aturiahani ligía lun, adügati lun giñe súdini lan nun. Ani adügati giñe lun inebetima lan nun keisi úguchili ani kei lichügüdina familia”. Ariñagatu aban íbiri nibureintu gíritu Brittney: “Adügaali áhuduraguni lidan familia lúntima nayarafadun houn nagübürigu. Ariha numuti luagu berese hamá lau turóbuli le gádantina ani nidiheri hamá nuagu. Ruti áhuduraguni le erei woun ani yarafaguagüda lumutiwa keisi iduheñu”. Furanguti lubeiti dan le lan haturiahanu Bíbülia hama hisaanigu —lídantima áhuduraguni lidan familia— ligía igaburi buídutimabei lun hadundehaniña buidu. b

13. Ka gayarabei hadügüni agübürigu lun hínchahaniña hasaanigu lun heseriwidun lun Heowá?

¹³ Aban hóuniri mudún le buiti anihein wewe luma lun ladundehaniña mudún luma lun lóunigiruniña. Le súdinitimabei lun ladundehaniña mudún “eiga lubuidun-agei sagadi” (Ese. 34:13, 14). Ma ligía giñe habusenrubei hadügün hau hisaanigu? Gayarati hadundehaniña lun heseriwidun lun Heowá ani íderagua humañame lun hasandiragun houngua kei abürühati sálumu le ariñagubei: “Hínsiñeti nun lun nadügüni bugundan, barǘ numuti barufudahan tidan nanigi!” (Sal. 40:8). Ánhaña asandiragua hisaanigu houngua ítara, chóuruti busenbaña lan hederegeragun houngua lun Heowá ani badisei hagía. Gama lumoun, lun hadügüni katei súdiniti le mosu derebuguraü lan hafiñen ani busén hagía heseriwidun lun Heowá.

14, 15. a) Ka katei lunbei súdinitima lan houn agübürigu kristiánugu? b) Ka uagu anihein lubéi machouruni hawagu fiú nibureintiña?

¹⁴ Ánheinti genege lubéi mawanserun lan hisaani lidan lafiñen ani machourun lumuti luagu anihán lan inarünibei? Adüga huméi sun hiyaraati lun línsiñedun Heowá lun ani geteingiradi ligíame luagu sun le adüga láalibei Heowá (Aruf. 4:11). Dánmeti le aranseeli lun ladügüni, ligíaba lungua desidírü leseriwidun lun Heowá.

¹⁵ Ánheinti agumesera hisaani arufuda machouruni? Ida luba harufuduni lun eseriwiduni lan lun Heowá igaburi le buídutimabei lun hawinwandun gürigia ani lagundaaruba lan lun súnwandan? Furumiñe,  áluaha humá hasubudiruni ka lan lébunabei machouruni le luágubei. Ladüga san magundan lan lau le tariñagubei Bíbülia, o ladüga manigi lan lun lafuranguagüdüni le tariñagubei houn lánigu paaná? Ladüga san samina lan luagu hénrengu lan lagunfulirún lilurudun Heowá, o ladüga sandí lan luagu lábuguarügüñein lan o mínsiñewa lan?

16, 17. Ida liña gayara lan híderaguniña agübürigu hasaanigu lun hadügün aban umadaguaü buiti luma Heowá?

¹⁶ Meberesenga ka lan lébunabei machouruni le luágubei hisaani, gayarati híderaguni. Ida? Ibihatiña fiú agübürigu buiti resultóu dan le hálügüdüni hasaani: “Hínsiñeti san bun kristiánu ban, o hénrenguti bun? Ka uagu buidu lubéi kristiánu lan aban gürigia según bisaminan? Ka katei mabuidunti lanügübei? Menegeti san bun ni kata lan sákürifisiu burí le badügübei dan le konparárua lan luma sun buiti le bibihibei guentó luma le lunbei bibihini ámuñegü?”. Ítara liña, adüga huméi álügüdahani burí le houn lau dimurei le áfuriduti tídangiñe hanigi ani lau ínsiñeni luma furangu. Madüga huméi kamá aban aguseragüdüti hugía. Lidan yanu ligía, gayarabei hakutihani le lariñagubei Márükosu 10:29, 30. Añahein fiú nibureintiña buídubei lun habürüdüni buiti le lanügübei luma le wuribabei tidan aban gárada. Líderagubaña harihini bürüñu lun híchugun fe ka lan lébunabei machouruni le hawagubei luma lun hadariruni árani. Luagu amu oubaü, aturiaha humaaru san líburu Kátima san tuma Línsiñehabu Bungiu hama hisaanigu? Anhein yusu hubarun hama amu gürigia, buídutimabei hayusurunu hama hisaanigu!

¹⁷ Yarafa madise, mósume desidírü hamá hisaanigu anhein heseriwiduba lubéi lun Heowá o meseriwidunbaña lan. Masaminara humá lebeluruba lan hafiñen tidoun hanigi hisaanigu ítaraguarügü. Mosu gamadagua hamá hisaanigu luma Heowá (Ari. 3:1, 2). Ánhadün ariha hénrengu lan lun hisaani ladügün umadaguaü luma Heowá, íderagua huméi lun lasaminarun luagun inarüni burí le sensiyutimabei. Íderagua huméi lun lálügüdagun lungua: “Ida liña san nasubudiruni anihein lan Bungiu? Ida liña san nasubudiruni hínsiñe nan lun? Ka san uagu nafiñera luagu buidu lan lilurudun nun?”. Arufuda huméi aban lan hóuniri mudún le buiti hugía ani adundeha humaña hisaanigu lun híchugun fe luagu eseriwiduni lan lun Heowá katei buítimati le gayarabei hadügüni lau habagari (Rom. 12:2). c

18. Ida liña san gayara lan háyeihani agübürigu Hóuniri Mudún le Wéiritimabei?

¹⁸ Sun kristiánugu inarünitiña busentiwa wáyeihani Heowá, Hóuniri Mudún le Wéiritimabei (Efe. 5:1; 1 Fe. 2:25). Agübürigutima, mosu hasubudiruniña hasaanigu buidu. Lunti hadügüni sun hayaraati lun hadundehaniña lidoun abinirúni le aranse láalibei Heowá habá. Ligíati, agübürigu, adundeha humaña hisaanigu: arufudaha humá houn lun línsiñedun Háguchi le siélubei houn.