1. Ka adüga hamaalibei lábutigu relihión lidan lidaani wuribu?

 BUSENTI san Bungiu lun houdin kristiánugu awuribuha ani áfaraha hagía gürigia ha lídangiñetiña amu ageiraü? Lidan san irumu le sügühalibei, ligía hadügübei besafu gürigia ha ariñagutiña kristiánugu hamá. Biní hamutiña fádirigu katoliku súdaragu tau sun hárumate lun houdin áfaraguaña katoliku háledigu ha lídangiñetiña amu ageiraü le ágani. Ani ligiaméme hadügübei lábutigu amu burí relihión. Le libiaman Wuribu Wéiriti ligía aban hénpulu furanguti luagu áfarahani le ídanbei hídeha.

2, 3. Ka meha igaburi harufudubei gefentiña luagu Heowá lidan lidaani Libiaman Wuribu Wéiriti luma lárigiñe? b) Ka meha uagu hóusera ítara?

² Ka hadügübei gefentiña luagu Heowá lidan Libiaman Wuribu Wéiriti? Arufuda lumuti sun le asuseredubei mádaragun hamá houngua lidoun ni kata luáguti awuribuhani. Ka uagu? Lugundun falá hamuti lani Hesusu hénpulu luma larufudahan. Ariñagati: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Gabaroun hamuti giñe dimurei le labürühabei Pábulu houn kristiánugu ha Korintubaña ani aba hayusuruni lidan gádantiña (aliiha huméi 2 Korintuna 10:3, 4).

³ Kei le aranse hamaali lubéi kristiánugu inarünitiña  hasaminan según le tarufudahabei Bíbülia, mafurendeiruntiña ageindagua ani midin hagía awuribuha. Ladüga úaraguni le harufudubei, súfurihaña saragu gefentiña luagu Heowá éibaahouni. Saragu hádangiñe dáwaguatiña furisunrugun luma lidoun burí fulasu le ñein lubéi hafosurúa gürigia lun hawadigimaridun lábugiñe hagumadihan ábutigu ha magudemehabutiña. Lidan meha hadaani nazis Yámani, áfarawaguatiña saragu hádangiñe. Lau sun le meha hasufurirubei, mabulieidun hamuti wíbirigu ha Yurópabaña mosu lan hagunfulirun lau hapurichihani uganu buiti luáguti Larúeihan Heowá. Ligía meha hapurichihanbei lau úaraguni furisunrugu, lidan fulasu le ñein lubéi hafosurúa gürigia lun hawadigimaridun luma dan le hasagarún hageiragiñe. a Saragu irumu lárigiñe, madan lumutiña giñe lanarime áfarahani le asuseredubei Ruanda lidan irumu 1994, dan le háfaragunbei lílana ámuñegueinarügü rasa houngua. Kíputiña giñe úaraguni lidan wuribu le agünrinchagubalin binadu Yugoslavia.

4. Ka hachoururubei saragu gürigia dan le harihini úaraguni le warufudubei keisi kristiánugu?

⁴ Dan le harihini gürigia úaraguni le harufudubei gefentiña luagu Heowá, aba hachoururuni luagu hínsiñe lan Bungiu woun ani hínsiñe hagía híbiri gürigia woun lau sun wanarün, ani kristiánugu wamá ha inarünitiña. Ka amu katei lidan weseriwidun lun Bungiu adügübei lun hachoururuni gürigia luagu kristiánugu wamá ha inarünitiña?

5. Ka asansiruni úmabei hagagibudagua furumiñetiña lánigu Hesusu?

⁵ Lúmagiñe lagumeseruni Hesusu lani ministeriu ya ubouagu, ígirati furangu lunti lan lapurichihóun uganu buiti luáguti Larúeihan Bungiu. Anúadahati 12 disipulugu lun hagumeseruni wadagimanu le lunbei ladügǘn lidan sun ubóu; lárigiñe lira, ábaya larufudahan houn 70 disipulugu hanwoun (Luk. 6:13; 10:1). Aranse lumutiña lun hanügüni uganu buiti houn amu. Furumiñe mosu meha hapurichihan houn huríu, ani lárigiñe, aba liabin aban katei magurabúnti: mosu meha giñe hapurichihan houn gürigia ha lídangiñetiña amu néchani. Ma lanarime asansiruni houn lánigu Hesusu ha huríu! (Adü. 1:8.)

6. Ida liña líchugun Féduru fe luagu úati lan himei lan Heowá aban gürigia luéi aban?

⁶ Ounahóuati apostolu Féduru lúbiñoun Korunéliu, aban wügüri mama huríu. Ñein líchiga fe úati lan himei lan Bungiu aban gürigia luéi aban. Ábati líchugun gumadi lun labadiseiruba lan Korunéliu hau sun tílana luban (Adü. 10:9-48). Lúmagiñe oura ligía, mosu meha lapurichihóun uganu buiti lidan sun Ubóu; gayaraahali meha haganbuni gürigia ha lílana sun fulasu inarüni ani anha hagía lun.

7, 8. Ka adüga táalibei lóundarun Heowá lun tachülürün hamoun hibe-agei gürigia lau uganu luáguti Larúeihan Bungiu? (Ariha huméi dibuhu le lídanbei lagumeseha arütíkulu.)

⁷ Uguñe weyu, íbirigu ha alidihabalin hawadigimari gefentiña luagu Heowá áfaaguatiña lun lapurichihóuba lan uganu buiti lidan sun ubóu lau ubebeni luma lun lichugún aturiahani tídangiñeti Bíbülia. Añaheinhaña yarafa lun widü míñunu gefentiña luagu Heowá lidan sun ubóu ha apurichihabalin uganu buiti lidan lóugiñe 600 iñeñein, ani yarafa madise gíbetimabei. Ménrengunti hasubudirúniwa luagu hapurichihan muna tuagu muna luma ǘmadarugu, anihein dan aba híchugunu hani agumeiraguagüdüni luagu aban dábula o tuagu aban tiraüraü kareta.

⁸ Arufudahóuati houn hóugiñe 2,900 ásügüragüdütiña lun hásügüragüdünu Bíbülia tuma amu burí agumeiraguagüdüni  lidoun amu burí iñeñein. Ani mámarügüñein lidoun iñeñein burí le súdinibei larihín hásügüragüda. Adüga hamuti giñe lidan amu burí iñeñein le maganbahóunwati luagu saragu, ani ayanuha hamuti saragu míñunu gürigia. Kéiburi Esüpáña, gíbetiña gürigia ayanuhatiña aban iñeñein gíriti catalán. Ani lidan lagumuhóun burí irumu, wéiritimahali layanuhóun iñeñein le úara luma amu burí ligaburi layanuhóun. Adügatiña gefentiña luagu Heowá agumeiraguagüdüni ani adüga hagía adamuridaguni lidan catalán, iñeñein le adunrubalun hanigi ha ayanuhabalin.

9, 10. Ka arufudubalin luagu teni tan lóundarun Heowá lun tarufudahani inarüni luáguti Bungiu houn sun gürigia?

⁹ Ladügǘña ligiaméme wadagimanu lidan amu burí fulasu. Kéiburi Méhiku, hibe-agei gürigia chumagü hayanuhabei, gama lumoun, añahein saragu gürigia ñein ha ayanuhatiña amu burí iñeñein. Kéiburi maya. Málügili tadügün sukursáli aransehani lun háguyun íbirigu ha ásügüragüdübarun agumeiraguagüdüni lidoun maya lidoun fulasu le ñein lubéi gayara lan hayanuhani ani aganba haméi hererun sagü weyu. Anihein giñe nepalés, aban lídangiñe iñeñein le ayanuhóubei Nepal, ñein lubéi hawinwanda hóugiñe 29 míñunu gürigia. Íbini ayanuhóua lan kéiburi 120 iñeñein lidan ageiraü le, nepalés hayanuhabei hóugiñe 10 míñunu gürigia, ani añahein saragu yusu hamuti kei libiaman hañeñe. Adügǘwatu giñe wani agumeiraguagüdüni lidan iñeñein le.

¹⁰ Ka uagu híbebei ásügüragüdütiña tayusurun lóundarun Heowá? Ladüga súdini lan harihini wadagimanu lánina lapurichihóun uganu buiti lidan sun fulasu. Afanreinhaaña gefentiña luagu Heowá saragu míñunu tratadu tuma burí garüdia lidan sun ubóu maguburahanga. Fayei hamuti seinsu le mégeiwabei lau hani budagia lau gundaü, ítara liña hasigiruni gumadi le líchugubei Hesusu: “Mafayeihantün lun hibihini [...], maguburaha humá giñe luagu” (Mat. 10:8).

11, 12. Ka lánibei wadagimanu lánina apurichihani le hadügübei gefentiña luagu Heowá lidan sun ubóu efekütu hawagu saragu gürigia?

¹¹ Lau ugundani hapurichiha gefentiña luagu Heowá. Chouru hamuti luagu darí hamaali lan inarüni darí lun hadügün sákürifisiu lun hanügüni inarüni tídangiñe Lererun Bungiu houn gürigia lidoun burí amu ageiraü luma houn lílana amu rasa. Gíbetiña adügütiña asansiruni lun sensiyu lan habagari, lun hafurendeirun amu  iñeñein luma lun héchudun luagu hechun amu gürigia lidan hageira. Wadagimanu lánina apurichihani luma arufudahani le ligía aban katei le adügübei lun hachoururuni amu gürigia luagu gefentiña lan luagu Heowá lánigubaña Hesusu disipulu ha inarünitiña.

¹² Wagía gefentiña luagu Heowá adüga wamuti sun katei le ladüga chouru wamani luagu darí wamaali lan inarüni. Ka san amu katei adügübei lun hachoururuni fiú luagu anihán lan relihión le inarünibei? (Aliiha huméi Rómana 14:17, 18.)

13. Ka san hadügübei Gefentiña lun hakipuruni lóundarun Heowá harumañu?

¹³ Ka uagu chouru habalin fiú kristiánugu úaraguatiña lidan wadaani luagu darí hamaali lan inarüni? Ariñagati aban íbiri le barühaali saragu irumu eseriwida lun Bungiu: “Adügǘwati aban óunwenbu áfaaguni lun takipurúniwa lóundarun Heowá harumañu, meberesenga anhein mosu lubéi lererehóun lun furumiñeguarügü”. Ida liña san gayara lan lakipurún arumani ligía? Sun Gefentiña áfaaguatiña lun hasigiruni adundehani le tídanbei Lererun Bungiu luma hénpulu le lígirubei Hesusu hama lani disipulugu. Seremei aransehani le gayarati wariñagun fiúrügüñanu lan ha mégeihañabaña habugún lídangiñe damuriguaü ladüga maganbadi hamá lun lilurudun Bungiu. Hibe-agei gefentiña luagu Heowá harumati habagari, íbini fiú hádangiñe ha meha adügübaña katei le auti magundan lan Bungiu lubaragiñe hasubudiruni (aliiha huméi 1 Korintuna 6:9-11).

14. Ka adüga hamaalibei saragu hádangiñe ha abugúbaña lídangiñe damuriguaü, ani ka resultóubei?

¹⁴ Kati asuseredubei houn ha mósubei habugún lídangiñe damuriguaü según adundehani le tídanbei Bíbülia? Saragu hádangiñe asakürihaaña luagu katei wuribati le hadügübei, ani resibiwaaña lidan damuriguaü lau ugundani (aliiha huméi 2 Korintuna 2:6-8). Adügaali gaganbadi lun adundehani le tídanbei Bíbülia lun ñein lan aban damuriguaü kristiánu le harumati ani le gayarati lafiñerúniwa luagu. Tidan amu burí ligilisi gayarati hadügün gürigia furumiñeguarügü katei, ánheinti gefentiña luagu Heowá, sigí hamuti lilurudun Bungiu lau úaraguni. Ligía adügübei lun hachoururuni saragu gürigia luagu winwan hamani Gefentiña inarüni.

15. Ka adügübei lun lachoururuni aban íbiri luagu lídanñein lan inarüni?

¹⁵ Ka uagu hachoururei amu Gefentiña ha lǘhaña tidan óundaruni luagu darí hamaali lan inarüni? Ariñagati aban íbiri 54 irumu lau: “Lúmagiñe niñuraü, ru numuti nafiñen luagu 3 afiñeni súdiniti: 1) luagu anihein lan Bungiu; 2) luagu ligía lan abürügüdübarün Bíbülia, luma 3) luagu layusuruñein lan ani labiniruñein lan damuriguaü hani gefentiña luagu Heowá. Lidan sun irumu le naubei aturiahoun Bíbülia, súnwandan nóuchaguni afiñeni le lun narihini anhein inarüni lubéi. Ani eibu dan furangutimati luagu ítara liña lan, ani adügati  katei le lun léredun nafiñen luma lúntima nachoururuni luagu anihán lan inarünibei”.

16. Ka íchugubei ichouruni tun aban íbiri luagu anihán lan inarünibei?

¹⁶ Aban íbiri maríeitu to eseriwiduboun tidan sukursáli Meriga, ariñagatu tuagu lóundarun Heowá: “Tuguyarügüñoun óundaruni asubudiragüdei liri Heowá. Ladüga fuati liri Bungiu kéiburi 7,000 wéiyaasu tidan Bíbülia! Ani ruti dimurei le lídanbei 2 Krónikasi 16:9 dǘgüdaguaü nun, ariñagati: ‘Aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati’”. Ani ábaya tariñagun: “Arufuda laali inarüni nun mosu lan dayarü tan nanigi lun gayara lan líderagunina Heowá. Numadagua luma ligía katei súdinitimabei nun. Ani seremei numuti giñe Hesusu lau líderaguniwa asubudirei. Subudi le ligía ágüdahabalina”.

17. Ka uagu lafiñera aban íbiri le meha mafiñenbei luagu Bungiu luagu darí laali lan inarüni?

¹⁷ Ariñagati aban íbiri le meha mafiñenbei luagu Bungiu: “Dan le narihini sun le aniheinbei, aba níchugun fe busén lan Bungiu lun wagundaarun lau wabagari; ligía subudi nubalin luagu mígirunbei lan lun wasufurirun lun súnwandan. Ani eibu agadeireinatima lan ubóu, héretimati hafiñen lumutuniña Heowá, wéiritimati giñe hínsiñehabu luma ubebeni le harufudubei. Lánirügüñein Heowá sífiri sandu gayara ladügüni milaguru le” (aliiha huméi 1 Féduru 4:1-4).

18. a) ¿Ka hariñagubei bián ámuya íbirigu? b) Úaratün san luma le hariñagubei íbirigu ha?

¹⁸ Ábanya íbiri le lǘhalibei eseriwida lun Heowá ariñaga lumuti ka lan uagu lafiñera luagu inarüni le wapurichihabei: “Lidan sun irumu le sügühalibei, íderagua láadina naturiahan lun nachoururuni luagu áfaagua hamá Gefentiña lun hasigiruni hani kristiánugu ha lánina furumiñeti sígulu hénpulu. Aweiyasuhaadina lidoun sun ubóu ani ariha naali úarani le hádanbei lau nagu. Rúhali inarüni le tídanbei Bíbülia ugundani nun”. Dan le lálügüdünwabei aban íbiri le barühali lóugiñe 60 irumu ka lan uagu chouru lubalin luagu hámañein lan gefentiña luagu Heowá inarüni, aba lariñagun luagu hagía lan asigirubalin Hesusu lau sun hanarün. Ariñagati: “Aturiaha wamaali libagari Hesusu luma lani ministeriu buidu, ani gebegiti lani hénpulu woun. Adügaadiwa asansiruni lidan wabagari lun wayarafaduntima lun Bungiu. Afiñetiwa luagu lani lan Hesusu sákürifisiu lébunabei wasalbarun. Ani subudi wamuti giñe luagu águyugua lan hádangiñe hilaaña, lugundun añahein meha gürigia arihiti lasuseredun” (aliiha huméi 1 Korintuna 15:3-8).

19, 20. a) Ka buligasion laritaguagüdübei Pábulu houn kristiánugu rómana? b) Ka chansi wibihibei wagía kristiánugu?

¹⁹ Kei le hínsiñe habéi gürigia wáledigu woun, siñati wareiduni inarüni wóunguarügü. Ariñagati Pábulu houn íbirigu ha lídanbaña damuriguaü Roma: “Ánhabu ariñaga lau biyuma luagu Hesusu lan Baburemebei, afiñe buguya tidan banigi luagu saragüda lani Bungiu lídangiñe óunweni, basalbaruba. Ladüga lau bafiñerun tau sun banigi, leresibirabu Bungiu keisi gürigia richaguati; lau bagufeserun lau biyuma, basalbara” (Rom. 10:9, 10).

²⁰ Chouru wamuti wagía gefentiña luagu Heowá luagu darí wamaali lan inarüni. Ani subudi wamuti giñe luagu aban lan lubuidun chansi gayara lan warufudahani uganu buiti luáguti Larúeihan Bungiu houn amu gürigia. Danme le wapurichihan houn, houcha wamá lun línsiñedun uganu houn, mámarügü ladüga tídangiñeti lan Bíbülia, lunti giñe harihini luagu chouru wamani luagu ligía lan inarünibei.