Arufuda lumuti dimurei le luagu magumuchadi lan Ubóu, anhein gürigia gagumuchaditi habagari. Gíbeeña gürigia awinwandutiña ubouagu. Gama lumoun, arufuda laali Ubóu luagu gayara lan lasigirun íchiga ibagari lun sun le wínwanbei. Gama lumoun, genegeti lasansiraguña lan katei.

Lúmagiñe libiaman Wuribu Wéiriti wéiritimahali lufuresen lagadeirun Ubóu sügǘ lau lidan amu dan. Lídanrügü ǘrüwa-wein-diisi irumu, aniheinhali óunwenbu burí awanseruni lidan tuáguti ugunei, lidan luáguti ayanuhani luma amu burí katei. Sun katei le barühali lanarime burí asansiruni lidan luáguti seinsu. Besafu gürigia buíduhali ligaburi hawinwandun, aban katei le meha genegeti masuseredunbei lan. Lidan aniha lan sun le asusereda, gánwounhaali hanumerun gürigia ha awinwandubaña ubouagu kéiburi ǘrüwa wéiyaasu.

Gama lumoun, íñuti lebegi sun awanseruni le. Añahein ariñagutiña weiri lan lagadeiruni wügüri Ubóu darí lun gayara lan mawadigimaridunhali lanme buidu. Ani ariñagatiña fiú aturiahatiña siensia luagu weiri lan lani luadigimari wügüri efekütu luagu Ubóu lidan lagumuhóun burí irumu ani arihúa lan asansiraguni ligía furangu.

Ariñagatu meha Bíbülia lagadeirubei lan wügüri Ubóu (Arufudúni 11:18). Lagunfuliruña san profesía  le? Hasigiruba san gürigia agadeirei Ubóu? Lachülürüba san dan lun máraninaali lanme?

Siñá funa san lasigirun Ubóu awanda? Añahein aturiahatiña siensia ariñagutiña hénrengu lan lasubudirúniwa kaba lan lani lasansiragun ligaburi dan efekütu. Nidiheritiña luéi sódini lanme lasansiragun ligaburi dan ani ábame lagünrinchagun Ubóu.

Kei hénpulu, samina wamá luagun yelu le lídanbei Antártida occidental. Añahein saminatiña anhein lan asigira ubóu ásüda, lachülürüba lan dan mararamagunbei lan larürüdagun. Ka uagu? Ladüga yelu eredehabalin lara Weyu, ani eibu agumuchagueina lan yelu ábame lidin lara Weyu sügülügü luagun duna le ábugiñaübei. Lau laburidun likolorun barana, siñabei leredehani lara Weyu ani ábatima lárougadun, aba giñe furesetimahali lan larürüdagun yelu. Katei le gayarati mararamagun lan ani gayarati giñe ladügün saragu damichi, lugundun gayarati ladügün lun liñurun barana saragu darí lun ladügün damichi houn saragu míñunu gürigia.

Adügǘwaali fiú katei lun lararamúniwa turóbuli le. Kéiburi aransehani le adügǘbei lun laganwoundun irisini ani ganwoun hagía gürigia ubouagu sin hagadeiruni Ubóu. Barühali san aransehani le resultóu buiti?

Híruti ítara lan kei laganwoundun ladúeihan saragu ageiraü darí lun laganwoundun turóbuli luáguti seinsu le ubouagubei, ítara liña giñe agumucheina hamá gürigia lau Ubóu. Hanarimeti hayusuruni gürigia katei naturáliti le ubouagubei darí lun mígirun hamá lunya lárügüdagun lungua. Gayarati san ladügǘn somu katei? Ariñagati aban sásaamu: “Ibidiñeti woun ida luba lan wóunigiruni Ubóu”. Úarati katei le luma le ariñawagúbei tidan Bíbülia: “Úati yu lan lun wügüri lun ladundehani lupasun guánarügü” (Jeremías 10:23, TNM).

Gama lumoun, chóurugüda tumuti Bíbülia woun mígirunbei lan Bungiu lun lagünrinchaguni wügüri ubóu. Ariñagati Sálumu 115:16 luagu ru lumuti lan Bungiu múa “houn gürigia”. Anha, aban idewesei lúmagiñeti Bungiu Ubóu (Santiagu 1:17). Wagurabuña hamuga san luágurügübei lan murusun dan luadigimarida  buidu? Uá. Buídurügüti warihini ida liña lan ladügǘniwa Ubóu lun gunfuranda wamani katei le.

Afuranguagüdatu líburu Agumesehani luagu aranse lani Bungiu Ubóu buidu. Ariñagatu giñe: “Magaburigili meha ubóu; larihín meha keisi aban barana huliliti daruguñu luburiga lau”. Ariñagatu giñe anihein lan meha duna, katei le mégeiwabei lun ibagari (Agumesehani 1:2). Ábati lariñagun Bungiu: “Harugoungalá” (Agumesehani 1:3). Genegeti lúmagiñe lan dan ligía aba aniheinhali lan larugounga ubouagu luagu furumiñeti wéiyaasu. Lárigiñe, ariñawagúati aba lan aniheinhali lan fulasu mábeiti luma barana (Agumesehani 1:9, 10). Lárigiñe, “aba labouchun sun luwuyeri nadü ligibuagu múa: Híduru le íchuguti ilaü luma burí tídibu wewe gagindaditi” (Agumesehani 1:12). Lúmagiñe dan ligía aba lagumeserun sun aransehani le mégeiwabei lun lakipurúniwa ibagari, kéiburi le gíribei fotosíntesis. Ka meha san uagu láfaagua Bungiu saragu?

Ariñagati profeta Isaíasi Bungiu lan “adügübalin múa, aranseléi, le ederebudagüdübalin lun haganóun gürigia” (Isaíasi 45:18). Furanguti busén lan Bungiu lun haganóun gürigia ubouagu lun súnwandan.

Híruti wuriba lan hóuseruni gürigia lubuidun idewesei le líchugubei Bungiu woun ani günringuaméme hamaali. Íbini ítara, masansiragungili le lasaminarubei Bungiu ladügün. Ariñagati aban binadu abürühati: “Mítaranti Bungiu kei ha góunwedadibaña: Meyeehan liña masansiragun laritagun. Dan le lariñagun aban katei, adüga lumuti” (1 Lúrudu 23:19). Mígirunbei Bungiu lun lagünrinchaguni wügüri Ubóu; yarafa madise lagünrinchagubaña “ha agünrinchagubalin ubóu” (Arufudúni 11:18).

Lidan Serumu luagu Wübü, ariñagati Hesusu: “Fuleseiwatiña ha ǘnabugubaña ani mabafu hagía, ladüga heresibirubei múa keisi alagan” (Matéu 5:5). Lídanmeme yanu ligía, arufuda lumuti Hesusu kaba lan ayusurúa lun magünrinchawagun lan Ubóu sunsuinagubei. Ariñagati houn lani disipulugu lun lan hamuriahan: “Ñǘbuinla barúeihan; adügüwalá bugundan ya ubouagu kei ladügǘniwa sielu”. Anha,  lagunfulirubei Larúeihan Bungiu lisuuni Bungiu lun Ubóu (Matéu 6:10).

Chóurugüda lumuti Bungiu woun ladügüba lan Larúeihan óunwenbu burí asansiruni ubouagu. Ariñagati: “Arihabá, adüga numuti sun katei iserime” (Arufudúni 21:5). Mini lan san dimurei burí le lasansirubei lan Bungiu Ubóu le luagu amu? Uá. Lugundun mama Ubóu turóbulibei, gumadimatiña ha arúeihabaña hagía “agünrinchagubalin” Ubóu, ani hagía gadurunbaña luagu lirun wásügürün. Ariñagatu Bíbülia lagumuchuba lan Bungiu hau, ani ábame larúeihan aban “iseri sielu” luagu aban “iseri ubóu”. Mini lan “iseri sielu” Larúeihan Bungiu, ánheinti “iseri ubóu”, gürigia ha gaganbaditiña (Arufudúni 21:1).

Lun laranseruni Bungiu sun damichi le adüga láalibei wügüri lun Ubóu, ladügüba lunya luadigimaridun Ubóu kei meha furumiñe. Afuranguagüda lumuti abürühati sálumu le lunbei ladügüni Bungiu: “Góunigi bumuti múa lau báhuyagüdün luagun; aba babuiduragüdüni lun ábunaguni”. Danme le buíduhali ligaburi dan ubouagu, ani danme le labiniruniwa Bungiu, ábanme paraísu lan Ubóu ani ábame ñein lan saragu éigini (Sálumu 65:9-13).

Haritagua lumuti meha Pyarelal Nayyar, le eseriwidubei keisi lani Mohandas Gandhi sekretariu dimurei burí le: “Anihein saragu katei ubouagu lun letenirúniwa lun sun le hemegeirubei gürigia, gama lumoun mama lun igaaduaü le hawagubei”. Lagumuchuba Larúeihan Bungiu lau lébuna sun turóbuli le ubouagubei. Ida? Lau lasansirunu hanigi gürigia. Lidan aban profesía, ariñagati meha Isaíasi luagu madügünbaña lan gürigia dañu ni houn gürigia háledigu ni lun Ubóu lábugiñe Larúeihan Bungiu (Isaíasi 11:9). Saragu gürigia uguñe weyu hafurendeiruñein ka lan lilurudunbei Bungiu. Hafurendeiruña asandira ínsiñeni luagu Bungiu luma hawagu gürigia, hafurendeiruña giñe lun geteingiradi hamá, lun hóunigiruni ubóu luma sun le lídanbei luma awinwanda aban ibagari le arufuduti lúmagiñeñanu lan Bungiu. Haranserúña lubá hawinwandun lidan paraísu ya ubouagu (Apurichihati 12:13; Matéu 22:37-39; Kolosana 3:15).

Gumuti abahüdaguni luáguti ladügǘn Ubóu ítara: “Aba larihin Bungiu luagu buidu lan sun le ladügübei” (Agumesehani 1:31). Ítara liña, hanarimeti lubuidun Ubóu lun lagünrinchawagun. Ligía wagundaarunbei lau wasubudiruni luagu larihiba lan Heowá lau Ubóu ámuñegü. Ani chóurugüda lumuti giñe woun luagu “galangantehabei [lan] gürigia buítiña múa, haganóuba giñe lidan súnwandan” (Sálumu 37:29). Gayarabei hugía lan aban hádangiñe gürigia buítiña ha lúnbaña hawinwandun lun súnwandan ubouagu.