1, 2. a) Ida liña meha san habagari Adán tuma Ewa furumiñe? b) Kaba burí álügüdahani wóunaba lidan arütíkulu le?

 DAN le meha ladügünbaliña Bungiu Adán tuma Ewa, máganitiña meha. Mafigountiña meha ani lidan meha aban paraísu hawinwanda. Kei lisaanigu Bungiu, gúndaatiña meha lau aban lubuidun umadaguaü luma (Agu. 2:7-9; Luk. 3:38). Arufuda lumuti meha wadagimanu le líchugubei Bungiu houn átiribei lan dan hawinwandun (aliiha huméi Agumesehani 1:28). Mama meha mosu hawinwandun lun súnwandan lun gayara lan ‘habuinchagüdüni ubóu ani gumadi haméi’. Gama lumoun, lun hasigirun óunigiraña “animaalugu” ha ubouagubaña mosu hamuga hawinwandun lun súnwandan. Gayarati hamuga meha hasigirun Adán tuma Ewa agunfulirei wadagimanu le lun súnwandan.

² Kati uagu amu lubéi katei uguñe weyu? Ka uagu gibe habéi wáganiñu darí lun siñá lan wawinwandun lidan darangilaü? Ida liña lebelurun óunweni, ágani le wéiritimabei? Kaba ladüga Bungiu lun lagumuchun hau? Óunaba tumuti Bíbülia álügüdahani burí le luma ámuya. Ariha waméi ka lan tariñagubei.

3, 4. a) Ka meha eweridihani líchugubei Heowá lun Adán tuma Ewa? b) Ka meha uagu súdini lubéi lun gaganbadi hamá lun eweridihani ligía?

³ Íbini gayara lan meha hawinwandun Adán tuma Ewa lun súnwandan, mibihintiña meha aban úgubu móunwedaditi. Lun hasigirun awinwanda mosu meha hawaragun, heigin, hatun luma harumugun. Ani ligibuagun lira, lun hasigirun awinwanda mosu meha gaganbadi hamá lun Heowá, le ágüdahabalin habagari (2 Lur. 8:3). Lun hasigirun awinwanda mosu meha hánharun lun ladundehan Bungiu. Íbini lubaragiñe ladügünu Heowá Ewa ariñagati lun Adán: “Gayaraati beigin tídangiñe tin sun wewe to yaaboun, gama lumoun meigabóun tin wewe to lánina lasubudirúniwa le buídubei lumoun le wuribabei. Meigabóun tin wewe tuguya, ladüga anhoun beiga ninarün bau bóunweba” (Agu. 2:16, 17).

⁴ “Wewe to lánina lasubudirúniwa le buídubei lumoun le wuribabei” aban meha sínbolu lánina liricha Bungiu lun lariñaguni le buídubei luma le wuribabei. Subudihali meha Adán saragu katei luagu le buídubei luma le wuribabei: lenege meha Bungiu ladügei ani gasaminanti meha. Gama lumoun, súnwandan meha taritaguagüdüni tídibu wewe tuguya houn luagu mosu lan hasigiruni ladundehan Heowá. Ánhaña eiga tídangiñe furuda ítara liña kamá hariñaguña lun Bungiu: “Memegeirun wamuti bilurudun”. Ánhaña adiseda luéi Bungiu wuribabei meha lidin houn. Hóunweguba meha anhein hadüga, ítara kei lariñaguni Heowá houn.

5. Ka meha uagu maganbadi habéi Adán tuma Ewa lun Heowá?

⁵ Ariñaga lumuti meha Adán tun Ewa ka lan gumadi líchugubei Bungiu. Subudi tumuti meha gumadi ligía buidu darí lun gayara lan táguyuguagüdüni dimurei luagu dimurei (Agu. 3:1-3). Águyuguagüda tumuti lun Satanási le arufudagubei lungua kei aban hewe. Aban meha liráü Bungiu Satanási, aba lígiraguagüdün lungua lun layumahan libihin ubafu luma lun lungua lan (konparárü huméi luma Santiagu 1:14, 15). Lun libihini le labusenrubei, aba lariñagun ye lan Bungiu. Ariñagati tun Ewa lau ichouruni móunwenboun lan anhoun maganbadi. Aba lanme ítara tan kei Bungiu (Agu. 3:4, 5). Afiñetu Ewa lun ani aba teigin tídangiñe furuda, ítara liña tarufudun mabusenrun tan tasigiruni ladundehan Bungiu. Lárigiñe, aba tadügün lun ladügüni Adán ligiaméme (Agu. 3:6, 17). Yeeda laaru meha Satanási (aliiha huméi 1 Timotéu 2:14). Ani íbini meha subudi lani Adán wuriba lan katei ligía, adüga lumuti le tariñagubei lani weiriou. Genegeti meha buidu tan hewe, gama lumoun anihein meha aban lanarime ágani tanagangiñe le subudibalin kaba lan lani lanarime liyeeni resultóu.

6, 7. Ida liña san laguseragüdüniña Heowá Adán tuma Ewa?

⁶ Lúnrügü hibihin Adán tuma Ewa buiti houngua aba hebedaagun kóntüra Heowá, le íchugubalin habagari houn luma sun le hámabei. Aríagu liña meha Bungiu lun sun le asuseredubei (1 Kro. 28:9; aliiha huméi Ariñawagúni 15:3). Gama lumoun, ígirati meha lun harufuduni Adán, Ewa luma Satanási le hasandirubei luagu. Kei le ligía lan Háguchibei, chóuruti gari lan lun larihini le hadügübei (konparárü huméi luma Agumesehani 6:6). Gama lumoun, keisi aguseragüdüti, mosu meha ladügüni katei según lúrudu le ru láalibei ani fáyeigüda laña luagu le hadügübei.

⁷ Ariñagaali meha Bungiu lun Adán: “Meigabóun tin wewe [to lánina lasubudirúniwa le buídubei lumoun le wuribabei] ladüga anhoun beiga ninarün bau bóunweba”. Háfuga saminati meha Adán luagu lóunweba lan lubaragiñe lálüdün Weyu. Gama lumoun luagun “láfurun lidili  garabali rábounweyu”, ábaya layanuhan Heowá houn (Agu. 3:8). Keisi aguseragüdüti le richati, aba laganbuni le lunbei hariñaguni gaduruntiña furumiñe (Agu. 3:9-13). Lárigiñe lira, aba lasiadiruniña lun hóunwegun (Agu. 3:14-19). Lun hamuga meha áfaragua lumutiña óurameme ligía, magunfulirunti hamuga meha lisuuni houn gürigia (Isa. 55:11). Ligíati, íbini gumese lan meha lani figóu efekütu arihíwa lúmagiñe oura ligía, ígirati Heowá lun lasigirun Adán tuma Ewa awinwanda saragu dan lun gasaanigu hamá, isaanigu ha meha lúnbaña hibihin emenigini lubá ámuñegü. Gama lumoun, ligibugiñe lagu Heowá, hilaguaaña meha biángubei hagía lúmagiñe weyu le hafigouhanbei. Ani kei le ítara liña lubéi milu irumu lun kei aban weyu, gayarati wariñagun hilá hamá lidan aban “weyu” (2 Fe. 3:8).

8, 9. Ka lánibei lifigoun Adán efekütu hawagu ladügawagun? (Ariha huméi dibuhu le lídanbei lagumeseha arütíkulu.)

⁸ Gániti meha san le hadügübei Adán tuma Ewa efekütu hawagu hasaanigu? Anha. Lidan Rómana 5:12, ariñagati apostolu Pábulu: “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei”. Le furumiñeti óunweti Aweli, aban wügüri úaraguati (Agu. 4:8). Ítarameme, sun ha híbiri lisaanigu hama libaña Adán tuma Ewa hilatiña giñe. Galagante hamuti meha san figóu? Ariñagati Pábulu: “Ladüga lubeiti lumaganbadin ábanrügü wügüri, ñǘbuintiña sun gürigia lun hafigouhaba lan” (Rom. 5:19). Le linarün katei, galagante hamuti gürigia figóu luma óunweni hámagiñe Adán tuma Ewa, bián ágani le siñati hanurahan luéi. Íbini ibidiñe lan woun ídatima liña lan lásügürün figóu, furanguti luagu anihein lan.

⁹ Ligía garicha lubéi konparárü tani Bíbülia figóu luma óunweni tuma aban “belu to adouraguboun hau sun lílana fulasu” ani kei “manda to adouraguañahaboun hau sun néchanigu” (Isa. 25:7). Manda hǘrütu to, darugu tiña hau sun gürigia. Ariñagatu Bíbülia luagu ‘hóunweguña lan súngubei ladüga lídangiñe lan Adán hayabin’ (1 Ko. 15:22). Ligía lálügüdahanbei Pábulu: “Kaba san esefurana lídangiñe igaburi lánina figóu le nídanbei, le anügübalina lidoun óunweni?” (Rom. 7:24). Anihein meha san somu gürigia gayarati lesefuruni Pábulu? a

10. a) Ka burí bérusu tídangiñeti Bíbülia ariñagubei luagu lagumuchuba lan Heowá lau óunweni? b) Ka larufudahabei bérusu burí le woun luagu Heowá luma luagu Liráü?

¹⁰ Anha, gayarati meha lesefuruni Heowá Pábulu. Lárigiñebei layanuhan tuagu “manda” to uáguboun wayanuha furumiñe, abürühati Isaíasi: “Lagünrinchagubei Wabureme óunweni lun súnwandan, laragahabei águiraü luéigiñe hagu sun gürigia” (Isa. 25:8). Ítara kei aban úguchili le agumuchubei lau katei le asufuriragüdübalin lisaani ani aragahaléi láguira, lagumuchuba giñe Bungiu lau óunweni le galagante wabéi lúmagiñe Adán. Ani anihein Hesusu luma lun líderaguni. Lidan 1 Korintuna 15:22 aliihatiwa: “Ítara kei hóunwegun súngubei ladüga lídangiñe lan Adán hayabin, ítara luba giñe gabagariya hamá súngubei lárigiñe óunweni ladüga lánigu hamá Kristu”. Ítarameme, lárigiñebei lálügüdahan Pábulu kaba lan esefurei, ligía guánarügü óunabubei: “Búngiugubeirügü, lídangiñe Wabureme Hesukrístu” (Rom. 7:25). Furanguti íbini lan ebedaagua hamá Adán tuma Ewa lun  Heowá, hínsiñememetiña gürigia lun. Ni Hesusu, le íderagubalin Lúguchi adügaña furumiñetiña gürigia, meferidirun lumuti línsiñehabu hawagu gürigia (Ari. 8:30, 31, TNM). Ida luba san lesefuruniña gürigia lídangiñe figóu luma óunweni?

11. Ka meha san ladügübei Heowá lun líderaguniña gürigia?

¹¹ Dan le lafigouhanbei Adán, aba lasiadiruni Heowá lun lounwen. Ani kei resultóu, sun gürigia galagante hamuti figóu luma óunweni (Rom. 5:12, 16). Ariñagatu Bíbülia: “Lídangiñe [...] lumaganbadin aban liabin lisiadin Bungiu hawagun sun gürigia” (Rom. 5:18). Kaba meha san ladüga Heowá lun lagidaruni resultóu ligía ani gúnfulileime lilurudun? Darí wamuti óunabagülei lidan lererun Hesusu le: “Mama [...] niábiña, au le Wügüri Garaüwarügüti, lun neseriwidúniwa, niábiña lun neseriwidun luma lun níchuguni nibagari lebegime hasalbarun saragu” (Mat. 20:28). Keisi gürigia mafigounti, gayarati meha lounwen Hesusu lun “lafayeiruni lebegi hasalbarun sun gürigia”. Ida liña san lagunfuliruni lebegi asalbaruni lilurudun Heowá le lánina irichaü? (1 Tim. 2:5, 6.)

12. Ida liña lagunfuliruni lebegi asalbaruni lilurudun Heowá le richabei?

¹² Kei aban wügüri mafigounti, gayarati hamuga meha lawinwandun Hesusu lun súnwandan. Ligía meha labusenrubei Heowá lun Adán. Ligíati, ladüga línsiñe Lúguchi Hesusu lun ani hínsiñe hagía ladügawagun Adán lun, aba líchuguni libagari lidan sákürifisiu, aban ibagari le ítarabei kei le meha leferidirubei Adán. Lárigiñe, aba láguyuguagüdüni Heowá kei aban sífiri (1 Fe. 3:18). Lagunfulirubei meha san sákürifisiu ligía lilurudun Heowá le richabei? Anha, lugundun gayarati wariñagun luagu aba lan lárügüdüni Hesusu lubara Adán. Seriwiti meha lederegeruni Hesusu libagari sin figóu lebegime wasalbarun, lun líchugun aban emenigini woun le meha féridi láalibei Adán. Afuranguagüdati Pábulu: “Ítara liña tariñagun Lererun Bungiu: ‘Adán le furumiñeti wügüri, aban meha wügüri wínwanti’; ánheinti Kristu, le giñe gíribei lagumuhóun Adán, aban sífiri ligía le íchugubei ibagari” (1 Ko. 15:45).

13. Kaba san ladüga “lagumuhóun Adán” hawagu gürigia ha hilaguaañabaña?

¹³ Málühali Hesusu, le “lagumuhóun Adán”, nadagimein hawagu ladügawagun Adán kei “aban sífiri [...] le íchugubei ibagari”. Ani kei le hilaguaaña lubéi hibe-agei, láguyuguagüdübaña lunya hawinwandun ubouagu (Huan 5:28, 29).

14. Ida luba san hesefurún gürigia lídangiñe figóu?

¹⁴ Ida luba san hesefurún gürigia lídangiñe figóu? Adügaali Heowá aban Arúeihani sielu le ñein lubéi “lagumuhóun Adán” hama 144,000 gürigia ha anuadahóubaña ubouagugiñe (aliiha huméi Arufudúni 5:9, 10). Subudi habéi 144,000 hagía buidu ka lan mini lubéi gafigoun hamá gürigia, lugundun gafigountiña meha giñe. Luagu milu irumu, dandu hagía kei Hesusu híderagubaña gürigia ha ubouagubaña lun lagidarun figóu hawéi sunsuinagubei (Aruf. 20:6).

15, 16. a) Ka mini tubéi Bíbülia dan le tayanuhan luagu óunweni kei “lagumuhóun ágani”, ani ídaba lagumuchagua? b) Según 1 Korintuna 15:28, kaba ladüga Hesusu danme le lachülürün oura?

¹⁵ Lúmounme lagumuchun milu irumu, séfuhañame gürigia ha gaganbadibaña lídangiñe figóu luma óunweni. Ariñagati Pábulu: “Ítara kei hóunwegun súngubei ladüga lídangiñe lan Adán hayabin, ítara luba giñe gabagariya hamá súngubei lárigiñe óunweni ladüga lánigu hamá Kristu. Lunti lásaarun kada aban lidan lidaani: Furumiñeti meha ásaaruti, Kristu; lárigiñeme, danme le lagiribudun Kristu ubouagun, ligíame hásaarun lánigu lídangiñe óunweni. Ligiabati liabin lagumuchagüle sun katei, ábame lagünrinchaguni Kristu sun líbiri luwuyeri arúeihani, ubafu,  luma erei le ubouagubei; ábame lederegeruni arúeihani lun Bungiu Úguchili. Ladüga larúeihaba Kristu darime líchuguniña láganiñu lábugiñoun lugudi; óunweni, ligíaba lagumuhóun ágani agünrinchawaguti” (1 Ko. 15:22-26). Ítara liña, gumugualime “lagumuhóun ágani”, óunweni le galagante wabéi lúmagiñe Adán. “Manda” to adouraguboun hau sun gürigia terederuba lidan bulíeiguaü (Isa. 25:7, 8).

¹⁶ Sigiti apostolu Pábulu ariñaga: “Dánmeti le rédeihali sun katei lábugiñe lubafu Kristu, ábame lerederun Kristu, le Liráü Bungiu, lábugiñe lubafu Bungiu, le íchugubalin sun katei lun Kristu. Lun Búngiurügüba lan sun katei hadan súngubei” (1 Ko. 15:28). Gúnfulihalime lisuuni larúeihan Kristu. Lau saragu ugundani, ábame lagiribudagüdüni ubafu lun Heowá ani derege láñame gürigia lun sin ni murusun figóu.

17. Kaba san asusereda lun Satanási?

¹⁷ Kaba san asusereda lun Satanási le gadurunbei luagu sun halamiserun gürigia? Darí wamuti óunabagülei lidan Arufudúni 20:7-15. Danme lagumuchun milu irumu, ábayame louchun Satanási leyeeduniña gürigia luagu lagumuhóun wéiyaasu, danme le mafigounhaña. Larigiñe, ábame lagünrinchawagun úara hama ha afalarubalin. Watu Bíbülia lun agünrinchawaguni ligía ‘libiaman óunweni’ (Aruf. 21:8). ‘Magumuchagunbei’ óunweni ligía, lugundun ha asufuriruti óunweni ligía mawinwadundigiañame, ábahalime hounwen. Gama lumoun, ha hínsiñehabubaña lun Heowá ani seriwi hagía lun lau úaraguni, mámabei ágani ‘libiaman óunweni’ houn.

18. Ida luba san lagunfulirún wadagimanu le meha líchugubei Bungiu lun Adán?

¹⁸ Sun gürigia mafigounhañame ani rúhalime Heowá ibagari magumuchaditi houn. Úaañame áganiñu! Adügüwaalime wadagimanu le yebe meha lunbei ladügüni Adán lau sun úaali lan. Buin luba Ubóu hau ladügawagun, ha lúnbaña hagundaarun óunigirei Ubóu hama animaalugu. Ma wagundan lau wasubudiruni luagu lagumuchuba lan Heowá lau óunweni, le lagumuhóun wágani!