Samina wamá hawagun ha eseriwidubaña lidan dan dayarüti
“Súnwandan waritagun [...] luagu lubuidun heseriwidun.” (1 TESA. 1:3)
1. Ida liña meha larihiniña Pábulu ha nadagimeinbaña saragu luagu uganu buiti?
GEBEGITIÑA meha ha nadagimeinbaña saragu luagu uganu buiti lun apostolu Pábulu. Abürühati: “Súnwandan waritagun ligibugiñe Wáguchi luagu lubuidun heseriwidun lun [...] ladüga hafiñen luagu [...], luma lubuidun hawanduni sun asufuriruni ladüga hemenigidun luagu Wabureme Hesukrístu” (1 Tesa. 1:3). Gebegiti giñe sun áfaaguni le hadügübei íbirigu ha eseriwidubaña tau sun hanigi lun Heowá, dandu anhein gayara lubéi hadügün bandi o murusun (Ebü. 6:10).
2. Kaba wariha lidan arütíkulu le?
2 Dandu lidan dan le sügühalibei kei uguñe weyu, adügaaña saragu íbirigu sákürifisiu lun heseriwidun lun Heowá lidan dan dayarüti. Akutiha wamá fiú hénpulu lánina furumiñeti sígulu ani lárigiñe, ábame warihini ka lan burí hawadigimaribei ha eseriwidubaña lidan dan dayarüti uguñe weyu luma ida luba lan waritagun hawagun.
ESERIWIDUTIÑA LIDAN DAN DAYARÜTI LIDAN FURUMIÑETI SÍGULU
3, 4. a) Ida liña meha heseriwidun fiú kristiánugu lun Heowá lidan furumiñeti sígulu? b) Ida liña meha san hadariruni ha eseriwidubaña lidan dan dayarüti sun le hemegeirubei?
3 Murusun dan lárigiñe labadiseirun, gumeseti Hesusu aban wadagimanu lánina apurichihani le lunbei buga lachülürün lidoun sun ubóu (Luk. 3:21-23; 4:14, 15, 43). Lárigiñebei lounwen, aba hasigirun apostolugu lau wadagimanu ligía (Adü. 5:42; 6:7). Añahein meha kristiánugu ígirutu haban lun heseriwidun keisi apurichihatiña o kei misioneru. Apurichihati meha Felipe lidan ámuñegueinarügü fulasu Palestina (Adü. 8:5, 40; 21:8). Ánheinti Pábulu, apurichiha lumuti uganu buiti lidan fulasu le dísetimati (Adü. 13:2-4; 14:26; 2 Ko. 1:19). Añahein fiú kéiburi Silübánu, Márükosu luma Lúkasi, abürühatiña somu líburu tídangiñe to tídanboun Bíbülia o seriwitiña keisi hani abürühatiña sekretariu (1 Fe. 5:12). Gíbetiña íbirigu würiña nadagimeintiña íderaguaña wügüriña úaraguatiña ha (Adü. 18:26; Rom. 16:1, 2). Buin liña fánreinti le lánina Abürüdǘni Güriegu lau abahüdaguni hawaguti kristiánugu ganigitiña ha, sun le arufudati luagu mabulieidagun lan Heowá hawéi lubúeingu ani góunigi lumutiña.
4 Ida liña meha san hadariruni kristiánugu ha eseriwidubaña lidan dan dayarüti lidan furumiñeti sígulu sun le hemegeirubei? Subudi wamuti luagu añahein lan meha fiú hádangiñe, kéiburi Pábulu hama ha aweiyasuhabaña luma, nadagimeintiña meha fiú dan luagu dimaasu o luagu hati. Magurabahantiña meha hibihin ni kata hámagiñe íbirigu, gama lumoun, súnwandan meha resibi hamá ídemuei hámagiñe (1 Ko. 9:11-15). Anihein meha dan hamisurahaniña eiga o lun herederun hama hábiñe. Busentiña meha íbirigu híderaguniña dandu kei damuriguaü o aban aban (aliiha huméi Adügaü 16:14, 15 luma Filipuna 4:15-18).
ESERIWIDUTIÑA LIDAN DAN DAYARÜTI UGUÑE WEYU
5. Ka hariñagubei aban feru maríeitiña luagu habagari lidan dan dayarüti?
5 Uguñe weyu, gíbetiña íbirigu adügüti sun hayaraati lun heseriwidun lun Bungiu lidan dan dayarüti (ariha huméi rekuáduru “ Luwuyeri eseriwiduni lidan dan dayarüti”). Ida liña san harihini íbirigu ha ibagari le hanúadirubei? Ka uagu málügüdün hubaliña? Chóuruti líchuguba lan hóunabagüle dǘgüdaguaü hun. Ariha waméi le lariñagubei aban íbiri le seriwihali kei prekursoru le adügüti 70 oura luagu hati, kei prekursoru espechaliti, kei misioneru ani guentó leseriwiduña Betelirugu lidan amu ageiraü: “Nagumeserun eseriwida lidan dan dayarüti ligía katei buídutimati le adüga náalibei lidan nibagari. Dan le meha nagunfulirunbei 18 irumu, ibidiñeti meha nun anhein lun lubéi nidin aturiaha tidan luban furendei íñuti, nawadigimaridun dan dayarüti o neseriwidun kei prekursoru. Hénrenguti meha nun desidírü nan kaba lan nadüga. Guentó ariha naali nungua mabulieidun lani Heowá sákürifisiu le wadügübei lun weseriwidun lun lidan dan dayarüti. Yusu naali sun iyaraani le líchugubei Heowá nun buidu. Ani masuseredunti hamuga le lun hamuga houcha nan nadarirun uéiriguni lidan ubóu le”. Ariñagatu lani weiriou: “Sagü wasansirúniwa lídangiñe aban luwuyeri eseriwiduni lidoun amu, íderagua lumutina lun nawanserun. Gíbeti wéiyaasu wasandirun luagu Heowá lan adundehabaliwa ani góunigi lawa. Sun le mibihin wabéi yebe lun hamuga madügüntiwa sákürifisiu. Sagü weyu neteingiruni Heowá luagu wabagari lidan dan dayarüti”. Hínsiñeti hamuga san hun hariñaguni ligiaméme luagu hibagari?
6. Ka gayarabei lachoururuni kada aban wádangiñe?
6 Furanguti siñati lan weseriwidun sun wagía lidan dan dayarüti. Hugía, háfuga siñati hadügüni guentó. íbini ítara, gayarati hachoururuni luagu mabulieidun lani Heowá sákürifisiu burí le hadügübei. Ariha huméi luagu óunaha lan meha Pábulu mábuigaü houn sun íbirigu ha lídanbaña damuriguaü le Kolosabei, ani írida lumuti hiri fiú hádangiñe (aliiha huméi Filemón 1-3). Furanguti weiri lan meha lebegi hawadigimari lun Pábulu. Ani wéiriti meha giñe lebegi lun Heowá. Ítarameme, gebegiti giñe wadagimanu le hadügübei lun Heowá. Guentó, ida liña san gayara lan wíderaguniña ha eseriwidubaña lidan dan dayarüti uguñe weyu?
IDA LUBA WÍDERAGUNIÑA PREKURSORUGU
7, 8. a)Ka san hawadigimaribei prekursorugu? b)Ida liña san gayara lan wíderaguniña prekursorugu?
7 Ítara kei meha lidan furumiñeti sígulu, rútiña giñe prekursorugu erei lun damuriguaü uguñe weyu. Gíbetiña apurichihatiña 70 oura luagu hati. Ida liña san gayara lan wíderaguniña?
8 Ariñagatu aban prekursora gíritu Shari: “Kei le furí wabéi apurichiha sagü weyu, genegeti here wamá. Gama lumoun, mégeitiwa lichugún dǘgüdaguaü woun” (Rom. 1:11, 12). Ábanya íbiri to meha eseriwiduboun kei prekursora luagu saragu irumu, ariñagatu hawagu prekursorugu ha lídanbaña damuriguaü le ñein tubéi: “Hanarimeti hawadigimaridun ani mararamaguntiña. Gúndaatiña dan le lanügünu somu íbiri likarün lubá apurichihani, o dan le hamisurahóun eiga o dan le lichugún murusun seinsu houn lun gasolina o lun amu katei. Ariha hamuti ítara luagu samina wamá hawagun”.
9, 10. Ka san adüga hamaalibei fiú íbirigu lun híderaguniña prekursorugu ha lídanbaña hani damuriguaü?
9 Dan le wáfuridun hama prekursorugu apurichiha wíderaguñanu giñe. Ariñagatu aban prekursora gíritu Bobbi lau idiheri: “Mégeitiwa lanwoun ídemuei labadinagua dimaasu”. Ariñagatu giñe amu prekursora lídangiñetu ligiaméme damuriguaü: “Hénrenguti wadarirun wapaaná rábounweyu”. Abahüdaguatu aban íbiri to eseriwiduboun Betelirugu Meriga guentó luagu dan le meha prekursora tubéi: “Haritagua nágili tariñagun aban íbiri to gakarüntu nun: ‘Danme le madari ban kaba lan uma báfurida, bagúarame nun, nídinba buma’. Tuguya íderagubalina lun nasigirun kei prekursora!”. Ariha waméi giñe adundehani le tíchugubei Shari: “Lárigiñe apurichihani, aba herederun prekursorugu ha mamarieidungiñabaña hábuguarügü. Ka san uagu mamisurahan wabaliña lidoun wáhuduragun kei familia? Gayarati giñe wamisurahaniña lidoun amu katei, buídubei hasandiragun houngua ítara”.
10 Dan le taritagun luagun dan le meha teseriwidunbei hama amu würiña prekursorugu ha mamarieidungiña, ariñagatu aban íbiri to barüharu kéiburi 50 irumu eseriwida lidan dan dayarüti: “Ñǘdüntiña meha wéiyaaña lidan afiñeni abisidahaña prekursorugu saragu wéiyaasu lidan irumu. Álügüda hamutiña meha ida liña lan hátuadi luma ida liña lan lidin houn lidan hawadigimari, ani busentiña meha hasubudiruni anhein anihein lubéi somu katei le adiheridagüdütiña. Beresetiña meha hau tau sun hanigi. Ñǘdüntiña meha wábiñe lun harihini anhein megei wabéi ídemuei lidan somu katei”. Háfuga laritaguagüdüniwa le luagun dimurei burí lánina eteingiruni le labürühabei Pábulu hawagu kristiánugu Éfesuna ha meha etenirubaña lun apostolu le íbini gibe lan hani buligasion (2 Tim. 1:18).
11. Ka hawadigimaribei prekursorugu espechalitiña?
11 Anihein fiú damuriguaü biniwati hau prekursorugu espechalitiña. Saragu hádangiñe íbirigu ha sügütiña 130 oura sagü hati lidan ministeriu, ani íderagua hamuti damuriguaü lidan amu burí manera. Sun le adügati lun madaani hamá lun hawadigimaridun lun hagañeirun seinsu. Ligíati, lun gayara lan hetenirun lun apurichihani, rutu sukursáli murusun seinsu houn sagü hati lun híderagun houngua.
12. Ida liña gayara lan híderaguniña wéiyaaña lidan afiñeni hama ha híbiri íbirigu prekursorugu espechalitiña?
12 Ida luba san gayara lan wíderaguniña prekursoru espechalitiña? Aban wéiyaali lidan afiñeni le eseriwidubei Betelirugu ani gamadaguati hama prekursorugu ariñagati: “Súdiniti lun hadimurehan wéiyaaña lidan afiñeni hama prekursorugu espechalitiña, lun hasubudiruni ka lan haturobulinbei ani samina hagía ida luba lan híderaguniña. Añahein íbirigu saminatiña kei lan le resibi habéi prekursorugu ha seinsu túmagiñe sukursáli, memegeirunhaña lan ni kata. Ani le linarün katei, gíbeti gayarati hadügüni hawagu”. Ítara kei prekursorugu ha adügübaña 70 oura luagu hati, mégeitiña giñe prekursorugu espechalitiña íbirigu ha aransetiña lun háfuridun hama apurichiha dan le megei hamani. Gayarati san hadügüni katei le?
IDA LUBA HÍDERAWAGUN ÓUNIGIRUTIÑA SIRKUITU
13, 14. a) Ka uagu lunti lubéi lidan hamá waritagun óunigirutiña sirkuitu tuma hani weiriou? b) Ka gayarabei hadügüni lun híderaguniña íbirigu ha?
13 Héretiña óunigirutiña sirkuitu tau sun hani weiriou ani genegeti luagu awanda hamani sun katei. Gama lumoun, mégeitiña giñe lichugún dǘgüdaguaü houn luma lun ñein hamá áfuridutiña hama apurichiha. Hínsiñeti giñe houn lun hásügürün dan hama íbirigu. Anihein dan hasandirun ani mosu hanügǘn haspitalirugun. Ka uagu midin wabéi ebeluha hamoun ani arufuda waméi houn luagu berese wamá hau? Gayarati wasaminarun luagun ínsiñeni le larufudubei Lúkasi, ‘surusia le hínsiñewabei’ ani le abürüdübalin Adügaü, dan le lóunigirunbalin Pábulu hama lánigu paaná lidan wéiyaasu (Kol. 4:14; Adü. 20:5–21:18).
14 Luagu amu oubaü, mégeitiña giñe óunigirutiña sirkuitu tuma hani weiriou umadagu buítiña. Abürühati aban óunigiruti sirkuitu: “Genegeti subudi lan houn numadagu dan le megei nan híchugun dǘgüdaguaü nun. Adügatiña álügüdahani nun le adügati lun nabahüdaguni nidiheri houn. Láurügü haganbunina, buiti nasandiragun nungua”. Furanguti luagu gunda hamá íbirigu ha dan le wetenirun houn.
IDA LUBA HÍDERAGUNIÑA HA ESERIWIDÚBAÑA BETELIRUGU
15, 16. a) Ka wadagimanu hadügübei ha eseriwidubaña Betelirugu luma tidan Luban Adamurini Wéinamuti? b) Ida luba gayara lan wíderaguniña íbirigu ha?
15 Lidan sun ubóu adügatiña íbirigu ha eseriwidubaña Betelirugu luma tidan Luban Adamurini Wéinamuti wadagimanu le ídehati lun lawanserun Larúeihan Bungiu. Anhein añahein lubéi íbirigu ha eseriwidutiña Betelirugu lidan damuriguaü o sirkuitu le ñein wabéi, ida luba wíderaguniña?
16 Dan le hachülürün Betelirugun, háfuga álugatiña hawagu haduheñu hama hamadagu. Ligía gunda habéi dan le hadügün íbirigu ha betelirugubaña hama ha lídanbaña iseri damuriguaü le ñein habéi lun hasandiragun houngua buidu ani adüga hagía umadaguaü hama (Mar. 10:29, 30). Wadagimanu le hadügübei ruti dan houn lun gayara lan houdin adamuridagua luma lun háfuridun apurichiha sagü dimaasu. Gama lumoun, aniheinbei dan mosu lan hawadigimaridun guñoun o samudi luma dimaasu. Súdiniti lun gunfuranda hamani lílana damuriguaü katei le ani arufuda hameime houn luagu gebegi hamá houn ani gebegi lan giñe wadagimanu le hadügübei houn (aliiha huméi 1 Tesalónikana 2:9).
IDA LUBA HÍDERAWAGUN HA ESERIWIDUBAÑA LIDAN AMU AGEIRAÜ
17, 18. Ka san wadagimanu hadügübei fiú eseriwidutiña lidan dan dayarüti lidan amu ageiraü?
17 Gíbetiña íbirigu ha eseriwidutiña lidan dan dayarüti ígira hamuti hageira lun háguyun lidoun amu ageiraü. Dan le hachülürün ñein, háfuga mosu hafurendeirun amu iñeñein, amu échuni, héchudun luagu amu éigini luma luagu aban luwuyeri ibagari le uágubei mechun hamá. Ka san uagu desidírü habéi háguyun? Ka wadagimanu hadügübei lidan ageiraü ligía?
18 Fiú hádangiñe heseriwiduña kei misioneru ani sügǘ hamuti libe-agei hadaani apurichiha. Íderagua hamuti damuriguaü saragu lau sun arufudahani le ibiha hamaalibei. Rutu sukursáli aban muna sensiyutu houn ani íderagua taña lau seinsu lun hagañeinhani le hemegeirubei. Añahein amu íbirigu eseriwidutiña lidan dan dayarüti águyatiña lidoun amu ageiraü lun heseriwidun Betelirugu o lun hídehan lidan tábunawagun sukursáli, muna lun lásügürawagüdün ariñahani lidoun amu iñeñein, muna lun adamurini wéinamuti o Luban Adamuridaguni. Ténitu sukursáli to lídanboun ageiraü o damuriguaü le yarafabei ñein lun hemegeirun lau híchugun halíaba lan heredera, heigin luma amu burí katei. Ítara kei eseriwidutiña Betelirugu, ñǘdüntiña adamuridagua ani furí hagía apurichiha luma damuriguaü, ani gúndaatiña lílana damuriguaü lau ñein hamá hama.
19. Ida luba mabulieidagun wamá hawéi íbirigu ha ñǘbuinbaña eseriwida wageira?
19 Ida luba san wakipuruniña íbirigu ha lidan wasaminan? Háfuga méchuntiña luagu somu éigini, dántima le málügili hachülürün. Gabaroun waméi katei le danme le wamisurahaniña eiga. Ka uagu málügüdün wabaliña anhein busén habéi houchun somu éigini iseriti o anhein anihein lubéi somu katei le mínsiñeti houn? Gaguraasun wamá giñe habá lidan hafurendeiruñein lan iñeñein o dan le méchungiña luagu iseri échuni. Mégeibaña saragu dan lubá gayara lan gunfuranda hamani sun le lunbei wariñaguni, gama lumoun, gayarabei wíderaguniña arufudahei houn ida liña lan lariñawagún. Haritagua waméi busén hamá hafurendeirun.
20. Ida liña gayara lan wíderaguniña íbirigu ha eseriwidubaña lidan dan dayarüti ani íderagua wamañame hagübürigu?
20 Lau lásügürün dan, mosu hasaminarun fiú íbirigu ha eseriwidutiña lidan dan dayarüti ida luba lan hadüga lun hetenirun houn hagübürigu. Anhein gefén habéi hagübürigu luagu Heowá, háfuga mabusenrunbaña lun hígiruni hasaanigu heseriwidun (3 Huan 4). Furanguti hadügübei lan hasaanigu sun hayaraati lun hetenirun houn ani ñüdün hagíame arihaña dan le gayara lan. Gama lumoun, íbirigu ha erederubaña yarafa houn agübürigu ha, gayarati híderaguniña dan le megei hamani. Mabulieida waméi luagu weiri lan hani íbirigu ha eseriwidubaña lidan dan dayarüti buligasion lidan wadagimanu le súdinitimabei (Mat. 28:19, 20). Gayarati san híderaguniña íbirigu ha sándibaña agübürigu o ha wéiyougaañabaña agübürigu o líderaguniña lan damuriguaü le ñein hubéi?
21. Ida liña hasandiragun eseriwidutiña lidan dan dayarüti houngua dan le híderaguniña íbirigu ani ru hagía gurasu houn?
21 Íbirigu ha desidírübaña heseriwidun lidan dan dayarüti madügün hamuti lun hibihin seinsu o amu katei, adüga hamuti ladüga busén hamá híchuguni le buídutimabei lun Heowá luma houn gürigia háledigu. Geteingiraditiña luagu furumiñeguarügü ídemuei le gayarabei wíchuguni houn. Ariñagatu aban íbiri eseriwidutu lidan amu ageiraü: “Ábanrügü tiraüraü gárada buídurügütu lun bachoururuni luagu mabulieidun hamanibu ani gebegi lan buadigimari houn”.
22. Ida liña san harihini eseriwiduni lidan dan dayarüti?
22 Anúadira hamaali eseriwidutiña lidan dan dayarüti ibagari le buídutimabei. Barüti saragu ugundani, ani ítara liña kei aban leskuela to íderagubaliña lubá ibagari lábugiñe Larúeihan Bungiu, danme le sun lan wagía eseriwida lun weyu luagu weyu. Ligíati, íderagua wamaña ha eseriwidubaña lidan dan dayarüti ani arufuda waméi luagu mabulieidun wamani “lubuidun heseriwidun” (1 Tesa. 1:3).