‘Fádirigubadün ani harúeihaba giñe’
“Fádirigubadün nun, gürigia deregeguatiña houngua nun.” (AFU. 19:6)
1, 2. Ka meha uagu mosu lubéi lounigirún tadügawagun würi?
SÚDINITI furumiñeti profesía le tídanbei Bíbülia lidan lagunfulirun lisuuni Heowá. Lidan füramasei le ladügübei Edén, ariñagati Bungiu le inarünibei: “Níchuguba gáganiguaü bidoun [Satanási] tuma würi, hadoun badügawagun hama tadügawagun”. Halíaba meha san lébeda gáganiguaü ligía? Ariñagati meha Heowá luagu ‘lachuinrubei lan adügawaguni’ lábulugu Satanási ani luagu, tágürubei lan hewe, o Satanási, lihilin lugudi tadügawagun würi (Agu. 3:15). Wéiribei meha lagaganidagun Satanási tuma würi darí lun ladügübei lan sun liyaraati lun lagumuchun lau tadügawagun.
2 Ligía aba lubéi lariñagun abürühati sálumu: “Arihabáña báganiñu, ha iyereehabúbaña bun: Chagaguatiña iñuragua hagía houngua buagun. Eledeguatiña lun hadügün wuribati houn bánigu, lun hadügün wuribati houn ha bóunigirubaña! Haritaguaaña hayabin agünrinchaguawa lun wagumuchagun ligibuagugiñe ubóu keisi néchani” (Sal. 83:2-4). Busenti meha Satanási lawiyeduniña ani gumú ligíame hau ha lubaragiñebaña tadügawagun würi. Lun lóunigiruni Heowá tadügawagun würi ani lun lachoururuni libihibei lan Larúeihan Mesíasi le labusenrubei, aba ladügün amu burí daradu.
ABAN DARADU LE ÓUNIGIRUBALIN TADÜGAWAGUN WÜRI
3, 4. a) Ídabuga lagunfulira daradu lánina Lúrudu? b) Ka meha hariñagubei ísüraelina hadügübei lan? c) Ka meha un leseriwida daradu lánina Lúrudu?
3 Dan le hóustarunbei ladügawagun Abüraámü, Isaakü luma Hakobu saragu míñunu, aba lóundaraguniña Heowá lidan ábanrügü néchani: le binadu néchani Ísüraeli. Yusu lumuti Heowá Moisesi lun ladügün aban daradu hama ísüraelina, daradu le subudiwabei kei daradu lánina Lúrudu. Aba líchugun Lúrudu houn, ani aba hánharun lun lúrudu ligía. Ariñagatu Bíbülia: “Aba lanügünu [Moisesi] líburu to lánina daradu, aba laliihanu houn gürigia, aba hariñagun: ‘Wíchaaguba woungua lun wadügüni sun le ariñaga láalibei Wabureme’. Ábati lanügüni Moisesi [hata bágasu güdawarügütiña], aba labahichaguni hawagun gürigia, lariñaga: ‘Anihán hitaü le añuuragüdübalin daradu le ladügübei Wabureme huma, danbei líchuguni sun gumadi le’” (Afu. 24:3-8).
4 Gúnfuliti daradu lánina Lúrudu luagu wübü Sinaí lidan irumu 1513 lubaragiñe wadaani. Lau daradu ligía aba lanúadiruniña Bungiu ísüraelina lánigume. Lúmagiñe oura ligía, aba ligíaali lan hani Aguseragüdüti, ligía íchiga lúrudu houn ani ligía Harúeite (Isa. 33:22). Le meha asuseredubei houn ísüraelina arufuda lumuti ka lan asuseredubei dan le gaganbadi hamá gürigia lun lilurudun Bungiu luma dan le maganbadi hamá. Ariñawagúati meha lidan Lúrudu ligía moun lumuti lan hamarieidun hama gürigia ha máhuduraguntiña lun Bungiu ni lun háhuduragun houn amu búngiugu. Lúrudu le seriwiti meha lun mawiyedúniwa lan ladügawagun Abüraámü (Afu. 20:4-6; 34:12-16).
5. a) Ka meha chansi líchugubei daradu lánina Lúrudu houn ísüraelina? b) Ka uagu aba lubéi lamahadun Heowá houn ísüraelina?
5 Lábugiñe Lúrudu anihein meha giñe aransehani lun ñein hamá fádirigu, ani aransehani ligía arufudati meha luagu ñeinbei lan aban le wéiritimati ámuñegü (Ebü. 7:11; 10:1). Le linarün katei, ruti meha aban óunwenbu chansi houn ísüraelina lun ‘fádirigu’ hamá ánhaña gaganbadi lun lilurudun Heowá (aliiha huméi Áfuriduni 19:5, 6). Gama lumoun, magunfulirun lumuti meha Ísüraeli gumadi ligía, ani lubaragiñe líchugun lubuidun achülürüni lun Mesíasi —fánreinti le méinitimabei hádangiñe ladügawagun Abüraámü—, aba hamahadun lun. Aba giñeti lamahadun Bungiu houn keisi néchani.
Marufudunti maganbadi hamá ísüraelina mahuudunti lan meha Daradu lánina Lúrudu (Ariha huméi párafu 3-6)
6. Ka meha isuuni lagunfulirubei daradu lánina Lúrudu?
6 Kei le aban lubéi híchuguni ísüraelina hanagan luagun Heowá, siñati meha lóustarun hanumerun ha lúnbaña fádirigu hamá. Mini lan san lira meseriwinhali lan meha Lúrudu? Uá. Le meha lisuunibei Lúrudu lóunigiruni tadügawagun würi luma lun líderaguniña gürigia asubudirei Mesíasi. Ani gúnfuliti isuuni ligía dan le meha liábinbei Kristu ubouagu ani subudi haméi amu. Ligía aba lubéi tariñagun Bíbülia Kristu lan “lébehabei lagunfulirúniwa lilurudun Moisesi” (Rom. 10:4). Gama lumoun, kátaña meha san lúnbaña hafadirihan lidan Larúeihan Bungiu ani seriwi hagía kei urúeigu lidan? Adügati Heowá ábanya daradu lun lóundaragun aban iseri néchani.
LÓUNDARAWAGUN ABAN ISERI NÉCHANI
7. Ka meha lariñagubei Heowá liyumulugugiñe Heremíasi?
7 Saragu dan lubaragiñe lararamun lagunfulirúniwa lilurudun Moisesi, ariñagati meha Heowá liyumulugugiñe profeta Heremíasi ladügüba lan aban “iseri daradu” hama ísüraelina (aliiha huméi Heremíasi 31:31-33). Ámubei meha daradu ligía luéi daradu le lánina Lúrudu lugundun gayarabei ferudunawa lan figóu memegeirunga hadagaragüdün animaalugu kei sákürifisiu. Ida luba meha san katei le?
8, 9. a) Ka ibihúbei lídangiñe lawiyurún lita Hesusu? b) Ka chansi hibihibei ha lídanbaña iseri daradu? (Ariha huméi dibuhu le lídanbei lagumeseha arütíkulu.)
8 Saragu sígulu lárigiñe, weyu 14 lidan nisán irumu 33 lidan wadaani, aba ladügüni Hesusu Ladinerun Aburemei. Ariñagati houn 11 lani disipulugu ha úaraguabaña tuagu diwéin: “Anihán nita le lunbei láwiyurun lídangiñe núgubu huagu, lun lagunfulirun iseri daradu” (Luk. 22:20). Según Matéu, ariñagati Hesusu: “Nita le, le añuuragüdübalin iseri daradu, le giñe áwiyurubei hawagu saragu gürigia lun ferudunawa lan hafigoun” (Mat. 26:27, 28).
9 Hitaü le meha láwiyurubei Hesusu ligía añuuragüdübalin iseri daradu. Seremei giñe lita Kristu gayara lubéi ferudunawa lan wafigoun sunsuinagubei. Mama Hesusu aban lídangiñe fánreinti lidan iseri daradu. Mafigounti meha Hesusu, ligía siñá lubéi lamuriahan ferudun luagu ni kata. Gama lumoun, gayarati meha layusuruni Bungiu lani Hesusu sákürifisiu lun lesefuruniña ladügawagun Adán. Ani lau lani sífiri sandu gayarati meha giñe lanúadirun fiú gürigia lun ‘lisaanigubaña lan’ (aliiha huméi Rómana 8:14-17). Keiti le meha mafigounbaña lubéi ligibugiñe Bungiu, ítara haba kei Hesusu, le Liráü Bungiu. ‘Gafanranbaña luma Kristu’ ani hibihibei chansi le leferidirubei binadu Ísüraeli, lun ‘harúeihan luma ani lun heseriwidun kei fádirigu’ lidan Larúeihan Bungiu. Ariñagati apostolu Féduru hawagu kristiánugu ha: “Aban rasa anuadahóuatiña huguya, fádirigu ha eseriwidutiña lun urúei le Bungiu, néchani ha deregeguaaña houngua lun Bungiu, lumutuniña Bungiu. Anuadirúaadün lun hadimurehan luagu burí katei buiti le ladügübei Bungiu, le agúarubei hun lídangiñe luburiga lun lidoun lueirin larugounga le líchugubei” (1 Fe. 2:9). Ma lanarime lisudinin iseri daradu ligía! Ruti chansi houn fiú hádangiñe lani Hesusu disipulugu lun lidan hamá libiaman fánreinti lánina ladügawagun Abüraámü.
LAGUNFULIRUN ISERI DARADU
10. a) Ídabuga lagunfulira iseri daradu? b) Ka uagu siñá lubéi lagunfulirun lubaragiñe dan ligía?
10 Ídabuga lagunfulira iseri daradu? Mama meha dan le layanuhanbei Hesusu luagu daradu ligía lagumuhóun guñoun le ya lubéi ubouagu. Lun gayara lan lañuurun daradu, lunti meha lawiyurún lita Hesusu ani mosu meha larufudún lebegi hitaü ligía lun Heowá sielu. Mosu meha giñe hanuadirúniwa ha lúnbaña ‘harúeihan luma Kristu’ lau sífiri sandu. Ligíati, gúnfuliti iseri daradu lidan Pentekosutesi irumu 33 lidan wadaani, dan le hanúadirubei fiú hádangiñe lánigu Hesusu disipulu lau sífiri sandu.
11. a) Ida liña ladügün iseri daradu lun lídangiñe hamá Ísüraeli le lani Bungiu dandu huríu kei mama huríu? b) Átiribaña san gürigia lidan iseri daradu?
11 Íbini gayara lan wariñagun aba lan binaduhali lan daradu lánina Lúrudu dan le lawisahanbei Heowá liyumulugugiñe Heremíasi luagu ladügüba lan meha aban iseri daradu luma Ísüraeli, le linarün aban katei, magumuchunti lidaradun hama binadu ísüraelina darí lagunfulirun iseri daradu (Ebü. 8:13). Dan le lasuseredunbei katei ligía, gayaraahali meha lánharun Bungiu dandu houn huríu kei houn ha mámabaña huríu, ladüga “resibi hamaali seini tuagu hanigi, ani lánirügüñein Bungiu Sífiri adügei lira, siñá lumuti lúrudu” adüga (Rom. 2:29). Seremei iseri daradu, ligía líchugubei lubéi Heowá lilurudun “lidoun hasaminan, ábame [l]abürühani tidan hanigi” (Ebü. 8:10). Ñéinbaña meha 144,000 gürigia lidan iseri daradu ligía. Ábanbaña meha iseri néchani: “Ísüraeli lani Bungiu” (Gál. 6:16, TNM; Aruf. 14:1, 4).
12. Ka idan genegegua lan daradu lánina Lúrudu luma iseri daradu?
12 Ka idan genegegua lan daradu lánina Lúrudu luma iseri daradu? Adüga lumuti Heowá daradu lánina Lúrudu hama binadu ísüraelina, ani adüga lumuti iseri daradu hama kristiánugu anuadirúaaña. Lidan biángubei daradu ligía yúsuati aban gürigia. Yusu lumuti Bungiu Moisesi lun ladügüni daradu lánina Lúrudu, ani Hesusu lun ladügüni iseri daradu. Biángubei lau hitaü gebegigüdawa lan: lun daradu lánina Lúrudu, yúsuati meha hata animaalu, ani lun iseri daradu, yúsuati lita Hesusu. Lábugiñe daradu lánina Lúrudu, Moisesi adundehabaliña Ísüraelina, ani lidan iseri daradu, Hesusu adundehabalin damuriguaü kristiánu keisi Ichügüdinaü (Efe. 1:22).
13, 14. a) Ida liña úara lan iseri daradu luma Larúeihan Bungiu? b) Ka emegeirúbei lun harúeihan kristiánugu anuadirúaaña luma Kristu sielu?
13 Úarati iseri daradu luma Larúeihan Bungiu ladüga adügati iseri daradu lun ñein lan aban néchani hani kristiánugu sándutiña ha ibihibalin chansi lun urúeigu hamá ani fádirigu lidan Larúeihan sielu. Hagía libiaman fánreinti hádangiñe ladügawagun Abüraámü (Gal. 3:29). Ligíati, chóurugüda lumuti iseri daradu lidaradun Bungiu luma Abüraámü.
14 Kei aubei warihei, lídangiñe iseri daradu láfurida Ísüraeli le lani Bungiu ani ligía giñe adügübei lun ‘harúeihan’ lílana luma Kristu. Gama lumoun, mégeiwati aban katei le lunbei líchuguni chansi houn kristiánugu anuadirúaaña lun hóundarun luma Kristu lidan Larúeihan ani lun heseriwidun kei urúeigu ani kei fádirigu.
ABAN DARADU LE ADÜGÜBEI LUN HARÚEIHAN AMU LUMA KRISTU
15. Ka daradu ladügübei Hesusu hama lani apostolugu ha úaraguabaña?
15 Lárigiñebei ladügüni Hesusu Ladinerun Aburemei, adügati aban daradu hama 11 lani apostolugu ha úaraguabaña. Liibe-agei dan wáwati lun aransehani ligía daradu lánina Arúeihani (aliiha huméi Lúkasi 22:28-30). Ámuti daradu le luéi le líbiri daradu le ídanbei Heowá lan aban lídangiñe fánreinti, ánheinti le, Hesusu adügübalin hama lani disipulugu ha anuadirúaañabaña. Dan le meha lariñagunbei Hesusu “níchugunbadün lun harúeihan kei líchugunina Núguchi lun narúeihan”, genegeti layanuhaña lan meha Kristu luagu daradu le meha ladügübei Heowá luma lun aban lan “fádiri lun sun dan, ítara kei Melükisedekü” (Ebü. 5:5, 6).
16. Ka ladügübei daradu lánina Arúeihani luagu hafulesein kristiánugu anuadirúaaña?
16 Arufuda hamaali meha 11 apostolugu úaragua hamá lun Hesusu lidan sun óuchawaguni le lásügürübei. Chóurugüda lumuti daradu lánina Arúeihani houn luagu lúmabaña lan sielu, le ñeinba lubéi hañuura luagu lálana arúeihani lun harúeihan ani seriwi hagía kei fádirigu. Gama lumoun, mámarügüñanu meha 11 apostolugu hagía ibihei lubuidun chansi ligía. Arufudaguati Hesusu lungua lun apostolu Huan lidan aban arufudúni, aba lariñagun lun: “Ha agañeirutiña, níchuguba ubaraü houn númagua luagu lálana narúeihan, ítara kei nagañeirun, aba nañuurun luma Núguchi luagu lala” (Aruf. 3:21). Ligíati, lidan daradu lánina Arúeihani añahein 144,000 kristiánugu anuadirúaaña (Aruf. 5:9, 10; 7:4). Anihán daradu le íchugubei chansi houn lun harúeihan luma sielu. Ítara kei dan le tanuadirún aban adari lun tamarieidun luma aban urúei aba giñe tarúeihan luma. Ani tidan Bíbülia wáwati houn kristiánugu anúadirutiña “ladari” Kristu, ani ariñawagúati ítara haña lan “kei aban würi gañüngiru ani haruma tuguya” to lunboun tamarieidun (Aruf. 19:7, 8; 21:9; 2 Ko. 11:2).
AFIÑE HUMÁ SUNSUINAGUBEI LUAGU LARÚEIHAN BUNGIU
17, 18. a) Afuranguagüda huméi ida liña lan úara lan sisi daradu le akutiha wamaalibei luma Larúeihan Bungiu. b) Ka uagu gayara lubéi wafiñerun sunsuinagubei luagu Larúeihan Bungiu?
17 Kada aban lídangiñe daradu le akutiha wamaalibei lidan bián arütíkulu le úarati luma aban o lóugiñe aban katei súdiniti luáguti Larúeihan Bungiu (ariha huméi rekuáduru Ida luba lagunfuliruni Bungiu lisuuni” lidan arütíkulu le lubaragiñebei le). Afuranguagüda lumuti katei le richati lan lébuna Larúeihan Bungiu. Ligía anihein lubéi saragu resun wama lun wafiñerun sunsuinagubei luagu Larúeihan Mesíasi. Furanguti ligíaba lan layusura Bungiu lun lagunfuliruni lisuuni lun Ubóu luma houn gürigia (Aruf. 11:15).
Lau lídehan Larúeihan Mesíasi, lagunfulirubei Heowá le füramase láalibei lun ubóu (Ariha huméi párafu 15 darí 18)
18 Gayarati san lasaminarun somu gürigia luagu manügünbei lan Larúeihan Bungiu abinirúni le lunti súnwandan houn gürigia? Chouru wamuti luagu larúeihan lan Bungiu lunbei lagumuchun lau sun waturóbulin lun súnwandan. Ligíati, barǘ waméi uganu le houn gürigia lau ubebeni! (Mat. 24:14.)