Kei wafurendeiruni lidan arütíkulu le lubaragiñebei le, yusu lumuti Hesusu libagari lun lapurichihani “uganu buiti luagu larúeihan Bungiu” (Lúkasi 8:1). Áfaaguati saragu ani aweiyasuhati saragu kilometuru lurageirugu Ísüraeli lun layanuhan luagu arúeihani le houn gürigia. Ani tidan gádürü Ewanhéliu, le ñein lubéi layanuhóua luagu lani Hesusu ministeriu, ayanuhóuati luagu Arúeihani ñein lóugiñe san wéiyaasu, ani libe-agei Hesusu íridubalin. Gama lumoun, arufudarügü lumuti le fiú lídangiñe katei le lariñagubei luagu arúeihani ligía (Huan 21:25).

Ka meha uagu súdini lubéi Arúeihani lun Hesusu? Furumiñe, ladüga anúadira laali lan meha Bungiu lun Urúei lan lidan Arúeihani ligía (Isaíasi 9:6; Lúkasi 22:28-30). Gama lumoun, mama meha libihin ubafu luma uéiriguni súdinitimabei lun (Matéu 11:29; Márükosu 10:17, 18). Anihein meha resun le súdinitimati lun lapurichihan luagu Larúeihan Bungiu. Subuditi meha lun —ani subuditi lun— ladügüba lan arúeihani ligía saragu katei buiti hawagu gürigia ha hínsiñetimabaña lun: Lúguchi hama lani disipulugu. *

Wéiriti línsiñe Lúguchi Hesusu lun (Ariñawagúni 8:30; Huan 14:31). Hínsiñeti lubuidun burí igaburi le luágubei lun, kéiburi ínsiñeni, gudemehabu luma irichaü (2 Lúrudu 32:4; Isaíasi 49:15; 1 Huan 4:8). Ligía iyereegu lubéi sun iyeeni le ariñawagúaalibei luagu lun. Kei hénpulu, ariñawagúaali meberesen lan Bungiu lau hasufurirun gürigia ani ligía lan gadurunbei. Ligía aban lídangiñe resun méinitimati le uágubei láfaagun Hesusu lun lapurichihani “uganu buiti luagu larúeihan Bungiu”: lugundun larumadahabei Arúeihani ligía liri Lúguchi (Matéu 4:23; 6:9, 10). Ida luba ladügüni?

Lau ladügün óunwenbu burí asansiruni luagu hafulesein gürigia. Lau Larúeihan, ‘laragahabei Heowá sun águiraü hágurugugiñe gürigia’. Lagidarubei sun le adiheridagüdübaliwa, ani “úaalime óunweni ni ayahuni ni íruni ni igarigu” (Arufudúni 21:3, 4). Seremei Larúeihan Bungiu, masufurirunhañame gürigia. *

Maweiriduntu wanigi luagu busén lan meha Hesusu lasubudiragüdüni Arúeihani ligía,  lugundun ligíaba meha arumadahei liri Lúguchi lau larufuduni luagu gudemehabu lan ani gabafu ligía (Santiagu 5:11). Gama lumoun mámarügübei luagu Bungiu ladüga Larúeihan katei buiti. Lanügüba giñe buiti houn gürigia ha hínsiñebaña lun Hesusu: lani disipulugu.

Lubaragiñebei liabin Hesusu ubouagun, wínwanti sielu luma Lúguchi luagu saragu dan. Íderagua lumuti lidan ladügǘn sun katei: lúmagiñe ladügǘn lubuidun sielu tau sun waruguma luma sun le ñeinbei darí lumoun ladügǘn Ubóu hau sun ha awinwandubaña ligibuagu (Kolosana 1:15, 16). Gama lumoun lídangiñe sun katei le adügǘbei, gúndaatimati Hesusu hau gürigia (Ariñawagúni 8:31).

Ínsiñeni ligía ligíatima ínchahabalin lun lapurichihan. Lúmagiñe furumiñeti dan ariñagati ligía lan lébunabei liabin ubouagun, ‘lapurichihani uganu buiti’ houn ha mégeibalin (Lúkasi 4:18). Gama lumoun, mama meha ayanuharügüti Hesusu, íderagua lumutiña giñe gürigia. Kei hénpulu, dan le hóundaragunbei fiú gürigia lun haganbuni, “aba hagudemedagun lun, aba lareidaguagüdüniña ha sándibaña hadan” (Matéu 14:14). Lidan amu ókaasion, ariñagati aban gürigia sánditi lun: “Nabureme, gayaraati bareidaguágüdünina ánhabu busén”. Aba lagudemedagun lun, aba lóunabun: “Busentina, areidaguabá”, aba lareidaguagüdüni (Lúkasi 5:12, 13). Ani dan le meha larihinbarun Hesusu María, to lumada, ayahua luagu lounwen tíbiri, “aba lírudagun tidan lanigi” ani “aba layahun” (Huan 11:32-36). Lárigiñe, aba ladügün aban óunwenbu milaguru: íbini barühali lan meha Lásaru gádürü weyu lúmagiñe lounwen, aba láguyuguagüdüni (Huan 11:38-44).

Subudi lumuti meha Hesusu madurabei lan lani milaguru burí ligía efekütu lun sun dan. Lachülürüba buga dan lun hasandirun ani hilagua hagía gürigia ha lareidaguagüdübaña hama ha láguyuguagüdübaña. Gama lumoun, subudi lumuti giñe laduraruba lan lani Larúeihan Bungiu efekütu lun súnwandan. Ligía mámarügüñein lubéi burí milaguru ladüga, subudigüda lumuti giñe “uganu buiti luáguti arúeihani le lánina sielu” lau ubebeni (Matéu 9:35). Arufudati milaguru burí le ladügübei murusun lídangiñe óunwenbu burí katei le lunbei ladügüni Larúeihan Bungiu yarafa madise ubouagu. Kaba san asusereda? Ru tumuti Bíbülia óunabagülei.

•  Úaalime sandi.

  “Ábameti haganbun ha maganbunbaña ariha hagíame ha marihinbaña; hachubahaba ha méibugunbaña kei usari, hagúarahaba ha mariñagadibaña. [...] Ani “mariñagunbei ni aban lílana fulasu: ‘Sándiñadina’”. (Isaíasi 33:24; 35:5, 6.)

• Úaalime óunweni.

  “Galangantehabei gürigia buítiña múa, haganóuba giñe lidan súnwandan.” (Sálumu 37:29.)

  “Lagünrinchagubei Wabureme óunweni lun súnwandan, laragahabei águiraü luéigiñe hagu sun gürigia.” (Isaíasi 25:8.)

• Háguyuguba hilaaña.

  “Lachülürüba dan lun haganbuni sun hilaguaaña numalali, ábame háfuridunga lídangiñe hamúaha.” (Huan 5:28, 29.)

  “Lásaaragüdübaña [Bungiu] hilaaña.” (Adügaü 24:15.)

• Súngubei gawadigimaribaña ani gábanbaña.

  “Hábunaguba gürigia haban ábame haganóun tidan, hábunaguba beibei ábame héiginu tin. Mábunagunbei gürigia muna laganóuame amu tidan, mábunagun ligíame mutu nadü, léigounme amu tin. [...] Harihubei numutuniña le hawadigimaribei lau háhabu.” (Isaíasi 65:21, 22.)

•  Úaalime wuribu.

  “Gumuguagüdalá wuribu chülǘ lumoun lagumuhóun larigeirugu ubóu.” (Sálumu 46:9.)

  “Mageindagunhalime aban néchani luma ábanya, mibihin hagíame arufudahani lun wuribu.” (Isaíasi 2:4.)

• Ñeinbei éigini houn sun gürigia.

  “Ru laali múa lin; biní láadiwa Wabungiute!” (Sálumu 67:6.)

  “Ñeinlá saragu türigu fulasurugu, gibelá türigu lábulugu burí wübü!” (Sálumu 72:16.)

• Úaalime gudemei.

  “Mabulieidunwabaña gudemetiña.” (Sálumu 9:18.)

  “Lesefurubaña gudemetiña ha ayumuragubaña, hama giñe ha míderawagunbaña. Gudemehabubei houn ha gudemebaña, lesefurubei habagari gudemetiña.” (Sálumu 72:12, 13.)

Lárigiñe wakutihani füramasei burí le, gunfuranda humaali san ka lan meha uagu súdini lubéi Larúeihan Bungiu lun Hesusu? Ayanuhati luagu Arúeihani ligía houn sun gürigia ha busenbaña haganbuni, lugundun subudi lumuti Larúeihanrügüñein lan Bungiu gayara lagumuchun lau sun waturóbulin.

Hínsiñeti san füramasei burí le hun? Anhein ítara liña lubéi, ida liña gayara lan haganwoundagüdüni hisubudin luagu Larúeihan Bungiu? Ka gayarabei hadügüni lun hibihin abinirúni? Lounabúba álügüdahani burí le lidan le aban arütíkulu.