Abürühati Dawidi: “Marihingidina láguruniña Bungiu gürigia ha buídubaña, marihin naña hasaanigu arihadiha” (Sal. 37:25). Layanuhaña meha luagu sun le asuseredubei lidan libagari. Gama lumoun, marufudunti dimurei le luagu másügürüngili lan o másügürünbei lan ni aban lubúein Heowá ilamaü.

Íbini Dawidi anihein meha dan lásügürün lídangiñe lénrengunga. Kéiburi dan le meha lanurahanbei luéi Saulu. Kei le lagumuchuña lan meha éigini le lanügübei, aba lamuriahan fein lungua luma houn luwügüriñanigu (1 Sam. 21:1-6). Ligíati, lidan dan hénrenguti ligía, áluahati éigini, gama lumoun, maliihantiwa luagu “arihadiha” lan lun leigin. Ariha lumuti Dawidi luagu mágurun lani Heowá.

Lidan Matéu 6:33 ruti Hesusu ichouruni luagu sun lan ha íchuguti Larúeihan Bungiu lidan furumiñeti lúgaaru, líchugubei lan Bungiu sun le hemegeirubei houn. Ariñagati Hesusu: “Áluaha huméi larúeihan luma liricha Bungiu furumiñe ábame líchuguni sun le hemegeirubei hun”, kéiburi éigini, uniñein tuma daüguaü. Gama lumoun, lidan amu ókaasion ariñagati meha gayara lan hasufurirun ‘lamulenu’ ilamaü (Mat. 25:35, 37, 40). Ítara liña lasuseredun lun apostolu Pábulu; anihein meha dan lásügürün ilamaü luma mágürabu (2 Ko. 11:27).

Ariñagati Heowá woun luagu ámuñegueinarügübei lan luwuyeri weibaahóun. Le linarün katei, gayarati lígirun lun wasufurirun ladüga siñá lan wibihini sun le wemegeirubei lidan awanha lan ídeha lun larufudún luagu ye lan Mafia (Hob. 2:3-5). Kei hénpulu, samina wamá hawagun wíbirigu ha adaürawagubaña lábugiñe hagumadihan nazis. Lilouguan éigini aban lídangiñe katei le layusurubei Satanási lun louchun ladügün lun hadüraaguni úaraguni le hawagubei. Gama lumoun sigitiña Gefentiña úaraguatiña hagía arufuda úaraguni lun Heowá, ani mígirun lumutiña. Inarüni ígira lan lun hasufuriruni óuchawaguni ligía, ítara kei lígirun lun hagagibudagun sun kristiánugu luma sun luwuyeri óuchawaguni. Gama lumoun, chóuruti íderagua lániña sun ha asufurirubaña luagu liri (1 Ko. 10:13). Samina wamá luagu le lariñagubei Filipuna 1:29: “Ladüga Kristu, gayaraati mámarügü lun hafiñerun luagu, gayaraati giñe hasufurirun luéigiñe”.

Füramaseti Heowá mígirun lubaña lan lubúeingu. Kéiburi lidan Isaíasi 54:17 ariñagati lau ichouruni: “Úagili ni aban adügütu áruma to lunboun tagünrinchagunibu”. Füramasei le luma burí amu ruti ichouruni luagu lóunigirubaña lan Bungiu lumutuniña keisi sétanu. Gama lumoun, gayarati lasufurirun aban kristiánu óuchawaguni, gayarati íbini lounwen.