TÍTULU LE LUÁGUBEI TIDÁÜ: KABA SAN LADÜGA LARÚEIHAN BUNGIU HUAGU?
Ka uagu lunti lubéi súdini lan Larúeihan Bungiu hun?
Ru hamuti besafu gürigia hemenigin luagun Larúeihan Bungiu. Sigí hamuti adundehani le líchugubei Hesusu houn lani disipulugu lun hamuriahan: “Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:10).
Íbini gibe hamá gürigia busentiña hasubudirun luagu Larúeihan Bungiu, libe-agei relihión marufudahantiña luagu. Wéiritu meha lanigi aban sásaamu gíriti H. G. Wells luagu weiri lan “larufudahan Hesusu luagu aban katei le unbei lagúara Arúeihani Siéluna”, ani manarimeti layanuhóun luagu Arúeihani ligía “lidan tarufudahan tibe-agei ligilisi kristiánu”.
Ánhañati gefentiña luagu Heowá súnwandan wayanuhan luagu Larúeihan Bungiu. Kéiburi wani garüdia to subudiwatimaboun, tuguya to húhaburuguboun oura le, adügǘwatu lidan 220 iñeñein. Ani tuguya garüdia to wéiritimabei tafanreinhóun ubouagu, lugundun imprimíruatu kéiburi 46 míñunu tídangiñe garüdia to sagü hati. Ani kátima san uagu tayanuha? Buídurügüti lau warihini títulu le luágubei tidáü: Garüdia Atalaya. Tasubudiragüdüñein Larúeihan Heowá. *
Ka san uagu wáfaagua saragu lun wayanuhan luagu Larúeihan Bungiu? Ladüga ligía lan tema le méinitimabei tidan Bíbülia, líburu to súdinitimaboun ubouagu. Ani chouru wamuti Larúeihanrügüñein lan Bungiu gayara lagumuchun lau haturóbulin gürigia.
Le linarün katei wáfaaguarügüña lun wasigiruni lani Hesusu hénpulu. Larúeihan meha Bungiu súdinitimabei lun; ani luágutima layanuha lidan lani ministeriu (Lúkasi 4:43). Ka meha san uagu luéirinbei lisudinin Larúeihan Bungiu lun? Ka gayarabei ladügüni Larúeihan Bungiu huagu? Amisuraha wamutün lun hakutihani óunabagülei le tíchugubei Bíbülia lidan arütíkulu burí le asigirubei.
^ par. 5 Ariñagatu Bíbülia Heowá lan líribei Bungiu.