1, 2. a) Ka uagu gayara lubéi wachoururuni luagu lagunfulirubei lan Larúeihan Bungiu sun le füramase lubéi Bungiu houn gürigia? b)Según Éfesuna 2:12, ka uagu léredagüdei daradu wafiñen luagu Larúeihan Bungiu? (Ariha huméi dibuhu le lídanbei lagumeseha arütíkulu.)

 KEI gefentiña luagu Heowá, súnwandan wariñagun luagu Larúeihanrügübei lan Bungiu gayara lagumuchun lau sun turóbuli, ani ítara liña warufudahani houn gürigia. Ligía emenigini le íchugubei gurasu woun lun wasigirun wabaruaguóun. Chouru wamuti san tídangiñe sun wanigi luagu liábinba lan Larúeihan Bungiu ani luagu lagunfulirubei lan lisuuni? Ka uagu gayara lubéi wafiñerun sunsuinagubei luagu Larúeihan Bungiu? (Ebü. 11:1.)

² Larúeihan Mesíasi layusurubei Bungiu suntigabafu lun lagunfuliruni le füramase lubéi houn gürigia. Liricha Heowá lun larúeihan lébunabei Larúeihan Mesíasi. Sun katei súdiniti luáguti Arúeihani ligía, kéiburi ka lan Urúeibei, kaba burí lan arúeiha luma ani kaba lan eredera lábugiñe harúeihan, fiú daradu lébunabei, daradu burí ligía Heowá o Hesukrístu, le Liráü, adügübalin. Ligíati, dan le wasaminarun luagun daradu burí ligía ábatima wachoururuni luagu lagunfuliruba lan lisuuni Bungiu ani aba lan arúeihani le derebuguti  Larúeihan (aliiha huméi Éfesuna 2:12).

3. Kaba wakutiha lidan arütíkulu le luma lidan le asigirubei?

³ Ayanuhatu Bíbülia luagu sisi daradu méiniti le úarati luma Larúeihan Mesíasi. Anihán súngubei 1) daradu luma Abüraámü, 2) daradu lánina Lúrudu, 3) daradu luma Dawidi, 4) daradu lun aban lan fádiri kei Melükisedekü, 5) iseri daradu luma 6) daradu lánina Arúeihani. Ariha waméi ida liña lan lúaradun daradu burí le luma Larúeihan Bungiu luma ida liña lan lídehan lun lagunfulirun lisuuni Bungiu lun Ubóu luma houn gürigia (ariha huméi rekuáduru “ Ida luba lagunfuliruni Bungiu lisuuni”).

4. Según abahüdaguni le lídanbei Agumesehani, ka ǘrüwa katei desidírü lubéi Heowá hawagu gürigia?

⁴ Lárigiñebei laranseruni Heowá Ubóu le lun hawinwandun gürigia lidan, aba desidírü lan ǘrüwa katei hawagu gürigia. Furumiñeti, ladügüni wügüri lun lenegebei lan. Libiaman, lun habuinchagüdüni gürigia ubóu hau hasaanigu ha richaguatiña. Ani le lǘrüwan, líchugun gumadi houn lun meigin hamanu furuda to lánina lasubudirúniwa le buídubei luma le wuribabei (Agu. 1:26, 28; 2:16, 17). Úati meha ni kata mégeiti lun lagunfulirun lisuuni Bungiu. Lárigiñebei ladügǘn wügüri, biámarügali meha katei lunti lagunfulirun. Kati uagu aba lubéi lemegeirun ladügǘn daradu?

5, 6. a) Ida liña louchun Satanási ladüraaguni lagunfulirun lisuuni Bungiu? b) Ida liña lóunabun Heowá lun sun duru le líchugubei Satanási luagun lidan fuluri-agei Edén?

⁵ Lidan láfaagun Satanási lun ladüraaguni lagunfulirun lisuuni Bungiu, adügati lun ñein lan aban ebedaaguni. Aba lagumeserun lau gumadi le ménrenguntimabei lun ladüraaguni: gumadi luagu mosu lan gaganbadi hamá gürigia. Ligía lóuchagunbarun Ewa, to furumiñetu würi, lun teigin tídangiñe furuda to uéiboun teweridirúa (Agu. 3:1-5; Aruf. 12:9). Ítara liña ladüga lun lasaminarúniwa luagu maricha lan Bungiu lun lagumadiruni sun le adüga láalibei. Dan lárigiñe, aba giñe lariñagun Satanási seriwi hamá gürigia lun Bungiu luagu sun le líchugubei houn (Hob. 1:9-11; 2:4, 5).

⁶ Ida liña lóunabun Heowá lun sun iyeeni le layanuhabei Satanási? Gayarati hamuga meha lagumuchun hau lun aba lan lagumuchun ebedaaguni, gama lumoun, magunfulirunti hamuga meha lisuuni lun labuinchagüdüni Ubóu hau ladügawagun Adán tuma Ewa. Ligíati, lubaragiñe meha lagumuchun hau ha ebedaagubaña lidan dan ligía, aba lóunabun Wabungiute le chubei aau lau aban profesía: füramasei le ladügübei Edén. Ítara liña lachoururuni luagu lagunfuliruba lan katei kei aubei lariñagei (aliiha huméi Agumesehani 3:15).

7. Ka ichouruni líchugubei füramasei le adügǘbei Edén tibügürü hewe luma tadügawagun?

⁷ Lau füramasei le ladügübei Edén, siadi lumutu Heowá hewe hama tadügawagun, lidan amu dimurei, siadi lumuti Satanási hama sun ha lúnbaña houdin luéigiñe lóubadina lidan luáguti liricha Bungiu lun larúeihan. Ani ruti giñe ubafu lun tadügawagun würi lun lagumuchun lau Satanási. Ligíati, lau füramasei ligía, chouru lumuti Bungiu luagu lagumuchuba lan lau le gadurunbei luagu ebedaaguni luma lau sun katei wuribati le lanügübei. Ani ligibuagun lira, ariñaga lumuti giñe kaba lan layusura lun ladügüni.

8. Ka gayarabei lariñawagún tuagu würi luma luagu tadügawagun?

⁸ Kaba meha san tadügawagun würi? Kei le mosu lan lachuinruni tichügü  hewe, lidan amu dimurei, lagumuchun lau Satanási, mosu meha ábanbei lan sífiri adügawaguni ligía (Ebü. 2:14). Ligíati, würi to lunboun tágurahani adügawaguni, ábanboun meha giñe sífiri. Íbini agibedagueina haña lan meha tadügawagun hewe, sügüti kéiburi gádürü-milu irumu lubá lafurangudun ka lan tadügawagunbei würi. Lidan dan ligía, adügati Heowá fiú daradu le afuranguagüdübalin ka lan adügawagunibei. Chouru lumuti giñe daradu ligía luagu adügawaguniba lan buga ligía layusura Bungiu lun laranseruni sun wuribati le adüga láalibei Satanási houn gürigia ubouagu.

9. a) Ka san mini lubéi lidaradun Bungiu luma Abüraámü? b) Ídabuga lagunfulira?

⁹ Kéiburi bián-milu irumu lárigiñe lasiadiruni Heowá Satanási, aba lariñagun lun Abüraámü lun lígirunu luban Uru lun lidin awinwanda Kanán (Adü. 7:2, 3). Aba lariñagun lun: “Ígirabei bufulasun, biduheñu tuma luban búguchi, ñüdün báamuga lidoun fulasu le lunbei narufuduni bun. Nadügüba aban óunwenbu néchani hau badügawagun; nabinirubadibu, naganbahagüdüba buagu, ábanbadibu abinirúni houn amu gürigia. Nabinirubaña ha abinirutibu, íñaraguanañame ha íñaragutibu, habinirúba gürigia ubouagu bídangiñe” (Agu. 12:1-3). Anihán furumiñeti wéiyaasu tadimurehan Bíbülia luagu daradu le ladügübei Bungiu luma Abüraámü. Le linarün katei, ibidiñeti woun ídabuga lan ladügei. Gama lumoun, subudi wamuti luagu gúnfuli lan lidan irumu 1943 lubaragiñe wadaani, dan le láfuridunbei Abüraámü Arangiñe ani hiñugualei duna Éufüratesi dan le 75 lubéi irumu lau.

10. a) Ida liña larufudun Abüraámü afiñe lan sunsuinagubei luagu lani Bungiu füramasei? b) Ka lafuranguagüdübei Heowá luagu tadügawagun würi?

¹⁰ Chouru lumuti meha Heowá lani  füramasei lun Abüraámü saragu wéiyaasu, ani sagü dan aba lafuranguagüdün amu burí katei lun (Agu. 13:15-17; 17:1-8, 16). Ani dan le larufudunbalin Abüraámü lafiñen luagu Heowá lau lánharun lederegeruni liráü lun, ábatima lachoururagüdüni Heowá daradu ligía lau aban áfiñuruni (aliiha huméi Agumesehani 22:15-18 luma Ebüréu 11:17, 18). Lárigiñebei lagunfulirun lidaradun Bungiu luma Abüraámü, aba lasigirun Heowá íchiga ariñahani súdiniti luagu tadügawagun würi. Hádangiñeba meha liduheñu Abüraámü láfurida adügawaguni ani gíbebaña meha arúeihatiña luma. Hagumuchuba giñe hau sun háganiñu ani ábanbaña abinirúni houn saragu gürigia.

11, 12. a) Ida liña tafuruduni Bíbülia luagu gani lan daradu luma Abüraámü aban agunfuliruni le wéiritimati? b) Ka mini lubéi le woun?

¹¹ Íbini gúnfuli lan daradu le ladügübei Bungiu luma Abüraámü dan le hibihinbalin ladügawagun Fulasu Füramasewati keisi alagan, arufudatu Bíbülia luagu aniheinbei lan aban agunfuliruni le wéiritimati (Gal. 4:22-25). Ariñagati apostolu Pábulu lau lídehan Bungiu luagu Kristu lan fánreinti le súdinitimabei lidan agunfuliruni wéiritimati ligía ani ha lan 144,000 kristiánugu anuadirúaaña hagía libiamanbei fánreinti (Gal. 3:16, 29; Aruf. 5:9, 10; 14:1, 4). “Herusalén [...] siéluna” tuguya würi to águrahabalin adügawaguni, ani ligía giñe fánreinti tani lóundarun Bungiu le siélubei, le ñein habéi saragu sífirigu úaraguatiña (Gal. 4:26, 31). Ítara kei lachoururuni daradu luma Abüraámü, lanügüba meha tadügawagun würi abinirúni houn gürigia.

¹² Ítara liña meha lidaradun Bungiu luma Abüraámü kei aban dugumedu to fidiwaali seyu tuagu le achoururagüdübalin luagu ábanbei lan Arúeihani inarüniti Larúeihan Bungiu. Seremei füramasei ligía libihibei meha Hesukrístu hama 144,000 arúeihani (Ebü. 6:13-18). Átiribei san dan ladurarun daradu ligía? Laduraruba darime lachülürün dan lun lagumuchun Larúeihan Mesíasi hau láganiñu Bungiu ani biniwa hagíame sun gürigia ubouagu (1 Ko. 15:23-26). Gama lumoun ariñagati Agumesehani 17:7 luagu laduraruba lan daradu ligía “lun sun dan”. Ka uagu? Lugundun sun ha lúnbaña hawinwandun ubouagu lídanme dan ligía habinirúba lun súnwandan. Kei aubei warihei, arufuda lumuti daradu luma Abüraámü desidírühali lan Heowá lagunfuliruni lisuuni lun ‘habuinchagüdüni gürigia’ ha richaguabaña Ubóu (Agu. 1:28).

13, 14. Ka lachoururubei daradu luma Dawidi luagu larúeihan Mesíasi?

¹³ Füramasei le adügǘbei Edén luma daradu luma Abüraámü arufudahati woun luagu lilurudun lan Heowá le richabei lébunabei larúeihan. Ani ligiaméme lúrudu richati ligía lébunabei Larúeihan Mesíasi (Sal. 89:14). Lachülürüba funa san dan lun lagadeirun ani lun mosu lanme lagidarúniwa? Anihein ábanya daradu le achoururagüdübalin masuseredunbei lan ítara.

¹⁴ Wayanuhaña luagu daradu le ladügübei Bungiu luma Dawidi (aliiha huméi 2 Samueli 7:12, 16). Lau daradu ligía lachoururei Heowá lun binadu lurúeite Ísüraeli ligía luagu hádangiñeba lan ladügawagun liabin Mesíasi (Luk. 1:30-33). Ítara liña larufuduni furangu halíagiñeba lan liabin adügawaguni. Ariñagati luagu gabafubei lan aban hádangiñe ladügawagun Dawidi lun “laguseragüdün” lidan Larúeihan Bungiu (Ese. 21:25-27). Layusurubei Heowá Hesusu lun lafidiruni larúeihan Dawidi lun “súnwandan”. Ani “harúeihaba ladügawagun [Dawidi]  leweñegua sun anihagua lanme weyu” (Sal. 89:34-37). Magadeirunbei larúeihan Mesíasi, ani sun le lunbei ladügüni laduraruba lun súnwandan.

15-17. a) Según daradu lun aban lan fádiri kei meha Melükisedekü, kaba meha amu luadigimari tadügawagun würi? b) Ka uagu mégeiwa lubéi lagunfulirun lau wadagimanu ligía?

¹⁵ Daradu le adügǘbei luma Abüraámü luma le adügǘbei luma Dawidi chóurugüda lumuti luagu larúeihaba lan tadügawagun würi. Gama lumoun, mégeigili meha ámuya katei lun gayara lan habinirún sun néchanigu ha ubouagubaña. Kei mosu lubéi meha halibürerúniwa gürigia lídangiñe figóu ani belú hagía hadoun lufamilian Heowá, mosu meha giñe ladügün tadügawagun würi aban wadagimanu lánina afadirihani. Lidan lichú lau, adügati Bungiu ábanya daradu, daradu lun ábanbei lan fádiri kei Melükisedekü Hesusu.

¹⁶ Afuranguagüdati Heowá liyumulugugiñe urúei Dawidi luagu ladügüba lan aban daradu luma Hesusu ani biámabei lan lébuna: 1) lun lañuurun luéigiñe ‘lóunwenren’ lun lagañeiruniña láganiñu luma 2) lun aban lan ‘fádiri lun súnwandan ítara kei Melükisedekü’ (aliiha huméi Sálumu 110:1, 2, 4). Ka uagu lariñaga lun ítara lan “kei Melükisedekü”? Lugundun saragu dan lubaragiñe heresibiruni ladügawagun Abüraámü Fulasu Füramasewati, “lufadirin [meha] giñe Bungiu le íñutimabei” Melükisedekü, le lurúeite Sálemü (Ebü. 7:1-3). Heowá íridubalin keisi urúei ani kei fádiri. Ligíarügüñein uáguti layanuhóua lidan Abürüdǘni Ebüréu le agunfulirubalin bián wadagimanu le. Ani kei le ua lubéi ariñahani luagu anihein lan meha somu gürigia agunfuliruti lau bián wadagimanu le lidan aban, ni lubaragiñe ni lárigiñe, gayarati wariñagun aban lan “fádiri lun sun dan”.

¹⁷ Lidan daradu ligía, írida lumuti Heowá Hesusu lun fádiri lan. Ligía fádiribei lubéi Hesusu lun súnwandan “ítara kei Melükisedekü”. (Ebü. 5:4-6). Arufuda lumuti daradu le furangu luagu füramase haali lan Heowá layusuruni Larúeihan Mesíasi lun lagunfuliruni lisuuni lun Ubóu luma houn gürigia lúmagiñe furumiñeti dan.

18, 19. a) Ka lánibei daradu burí le akutiha wamaalibei luma Larúeihan Bungiu? b) Kaba wariha lidan le aban arütíkulu?

¹⁸ Dan le wasaminarun luagu daradu burí le akutiha wamaalibei, ariha wamuti úaragua lan luma Larúeihan Mesíasi. Ariha wamuti giñe luagu fiú lan daradu richati lébunabei Larúeihan Bungiu. Lau füramasei le ladügübei lidan fuluri-agei Edén, füramaseti Heowá layusurubei lan tadügawagun würi lun lagunfuliruni lisuuni lun Ubóu luma houn gürigia. Arufuda lumuti daradu luma Abüraámü katei lan adügawaguni ligía ani kaba lan wadagimanu lagunfulira.

¹⁹ Arufuda lumuti meha daradu luma Dawidi furangu halíagiñeba lan liabin Hesusu, fánreinti le súdinitimabei lídangiñe tadügawagun würi, ani ruti daradu ligía ubafu lun lun larúeihani Ubóu, gayara láamuga ladurarun le lunbei ladügüni Arúeihani lun súnwandan. Daradu lun aban lan fádiri kei Melükisedekü chóurugüda lumuti leseriwiduba lan adügawaguni keisi aban fádiri. Gama lumoun, mámarügübei Hesusu anügaña gürigia lidoun aban ibagari sin figóu. Hanúadiruba meha giñe amu lun harúeihan luma ani lun heseriwidun kei fádirigu. Halíagiñeba meha san háfurida? Warihibei lidan le aban arütíkulu.