Gebegilá wachansin lun wawadigimaridun luma Heowá woun
“Íbirigu wagía lidan wadagimanu eseriwida lun Bungiu.” (1 KO. 3:9)
1. a) Ida liña san larihini Heowá wadagimanu? b) Ka chansi ru láalibei houn lubúeingu?
SÚNWANDAN ladügüni Heowá luadigimari lau gundaü (Sal. 135:6; Huan 5:17). Busenti giñe lun gunda hamá ánheligu gunda hagíame gürigia, ligía líchugunbei wadagimanu houn le anügüti ugundani houn. Kei hénpulu, ruti chansi lun Liráü le ábanrügüti lun líderaguni adügei sun le líbiri katei (aliiha huméi Kolosana 1:15, 16). Ligía aba lubéi tariñagun Bíbülia anihein lan meha Hesusu luma Bungiu sielu kei aban “nadagimeinti le hemeniti” (Prov. 8:30, TNM).
2. Ida liña wasubudiruni súnwandan lan líchugun Heowá wadagimanu le súdiniti houn lani ánheligu ani gunda hamá lau?
2 Lúmagiñe tagumeseha Bíbülia darí tagumuha, arufudatu súnwandan lan líchugun Heowá wadagimanu houn ánheligu. Dan le hafigouhanbei Adán tuma Ewa ani aba habugún lídangiñe fuluri-agei Edén, “aba líchugun [Bungiu] átiri kátaña garünatiña luéigiñe oubaü le ñéingiñe lubéi laboucha weyu libiti Edén, tuma aban eféin durungu kei watu, agararahatu luagun sun oubaü lun ua lan ni aban achülürüti luagun tídibu wewe to lánina ibagari” (Agu. 3:24). Ani arufudati Arufudúni 22:6 luagu óunaha lani Heowá lani ánheli lun larufuduni “le lunbei lasuseredun houn lánigu madise”.
RUTI BUNGIU WADAGIMANU HOUN GÜRIGIA
3. Ida liña meha lasigiruni Hesusu lani Lúguchi hénpulu dan le ya lubéi ubouagu?
3 Dan le lawinwandunbei Hesusu ya ubouagu keisi wügüri mafigounti, adüga lumuti wadagimanu le líchugubei Lúguchi lun lau sun lugundan. Ani sigí lumuti meha lani Heowá hénpulu lau líchugun wadagimanu houn lani disipulugu. Aba ladügün lun habuinchun lau ubebeni lau hasubudiruni kaba lan hibiha. Ariñagati houn: “Le [...] afiñeti nuagu, ladügübei [...] katei le burí nadügübei; ani ladügüba burí katei wéinamutimati, ladüga au, néibuga le ñeinhin lubéi Núguchi” (Huan 14:12). Ani aba lafuranguagüdüni houn súdini lan wadagimanu le hadügübei, aba lariñagun houn: “Lunti wadügüni luadigimari le óunahabalina luagu wéyuagugili lan; gúñeeli ligíame, siñaame wadügüni” (Huan 9:4).
4-6. a) Ka uagu mosu lubéi geteingiradi wamá luagu gaganbadi lan meha Noé lun Heowá? b) Ka buiti wasagarubei lídangiñe lagunfuliruni Moisesi wadagimanu le líchugubei Heowá lun? c) Ida liña genegegua lan sun wadagimanu le líchugubei Bungiu houn gürigia?
4 Íbini lubaragiñe liabin Hesusu ubouagun, ruti Heowá wadagimanu houn gürigia le ruti ugundani houn. Íbini madügün hamani Adán tuma Ewa wadagimanu le meha líchugubei Bungiu houn, añahein amu adüga hamuti le lamuriahabei hámagiñe (Agu. 1:28). Kei hénpulu, ruti meha adundehani lun Noé lun ladügün aban árüka, gayara láamuga lesefurun hau sun liduheñu luéi Guran. Ani seremei gaganbadi lan Noé lun lilurudun Bungiu awanhein lubéi wínwanñu (Agu. 6:14-16, 22; 2 Fe. 2:5).
5 Luagu amu oubaü, sigí lumuti meha Moisesi sun ariñahani le líchugubei Heowá lun lun ladügünu tabernákulu luma lun laransehani sun katei lubá afadirihani (Afu. 39:32; 40:12-16). Ka buiti wibihibei lídangiñe lasigiruni Moisesi sun adundehani ligía lau úaraguni? Kei meha lariñaguni apostolu Pábulu, dandu tabernákulu luma afadirihani aban meha sínbolu lani katei buiti le lunbei liabin lárigiñe (Ebü. 9:1-5, 9; 10:1).
6 Asansireina liña wadagimanu le líchugubei Bungiu houn lubúeingu eibu lagunfulirun lisuuni; gama lumoun, súnwandan líchugun uéiriguni lun Heowá ani barǘ ligía buiti houn gürigia ha úaraguabaña. Chóuruti ligía lan asuseredubei lau sun le libihibei Hesusu, dandu lubaragiñe liabin ubouagu kei dan le ya lubéi (Huan 4:34; 17:4). Ani ligiaméme asuseredubei lau wadagimanu le wadügübei (Mat. 5:16; aliiha huméi 1 Korintuna 15:58). Ida liña líchugun wadagimanu le uéiriguni lun Heowá?
GUNDA WAMÁ LAU WADAGIMANU LE LÍCHUGUBEI BUNGIU WOUN
7, 8. a) Ariñaga huméi ida liña lan wadagimanu le hadügübei kristiánugu uguñe weyu? b) Ida luba wóunabun lun ladundehan Heowá?
7 Ma gúndaatiwa lau líchugun Heowá chansi houn gürigia gafigountiña lun hawadigimaridun lun? (1 Ko. 3:9.) Ha nadagimeinbaña lidan tábunawagun Luban Wadamuridagun, Luban Adamurini Wéiriti tuma burí sukursáli ídehatiña lidan aban wadagimanu libe le meha ídanbei hídeha Noé luma Moisesi. Háfuga wídehaña lan lidan aban lídangiñe wadagimanu ligía, kéiburi lidan taransehóuniwa aban Muna lánina Adamuridaguni o lidan tábunawagun iseri Beteli Warwick (Nueva York) (ariha huméi dibuhu le lídanbei lagumeseha arütíkulu). Anhein ítara liña lubéi, gebegilá wadagimanu ligía woun, lugundun sagüráuti. Gama lumoun, anihein aban programa espechaliti lánina arufudahani le ídanbei gayara lan hídehan sun kristiánugu. Wayanuhaña luagu apurichihani, le íchugubei uéiriguni lun Heowá ani adüga ligía lun buidu lan lidin houn ha gaganbadibaña lun (Adü. 13:47-49). Adundeha tumutiwa lóundarun Bungiu lun buídutima lan wadügüni wawadigimari. Ligía anihein lubéi dan weresibirun iseri wadagimanu.
8 Súnwandan hasigiruni kristiánugu ha úaraguabaña tadundehan lóundarun Heowá lau sun hagundan (aliiha huméi Ebüréu 13:7, 17). Háfuga úati gunfuranda wamani furumiñe ka lan uagu mosu lubéi wadügüni katei lidan somu manera. Gama lumoun, chouru wamuti dan le lan gaganbadi wamá lun furumiñeguarügü asansiruni le larihibei Heowá luagu buidu lan lun ladügǘn, buiti lidin woun.
9. Ka lubuidun hénpulu híchugubei wéiyaaña lidan afiñeni houn lílana damuriguaü?
9 Hénpulu le híchugubei wéiyaaña lidan afiñeni lun damuriguaü arufudati luagu weiri lan habusenrun hadügüni lugundan Bungiu (2 Ko. 1:24; 1 Tesa. 5:12, 13). Aranseñu haña lun hawadigimaridun lau erei luma lun héchudun luagu furumiñeguarügü asansiruni. Apurichiha hamuti uganu buiti luáguti Larúeihan Bungiu lidan ámuñegueinarügü igaburi. Íbini anihein lan meha machouruni hawagu fiú hádangiñe dan le hadügünbalin aransehani lun apurichihani luagu gágamuru, luagu burí wafu luma lidan fulasu burí le ñein lubéi gibe hamá gürigia, fureseti harihini lubuidun resultóu le lanügübei. Kei hénpulu, adügatiña 4 prekursorugu yámani aransehani lun habisidahan aban fulasu le ñein lubéi saragu bísinisi ani le lüha meteni hamá lun, hadan anihein aban wéiyaali lidan afiñeni gíriti Michael. Ariñagati Michael: “Lüha meha mapurichihan wamá ya, ligía hanufude wabéi. Ani kei le ariha lubalin Heowá sun katei, íderagua lumutiwa lun buidu lan lidin woun binaafin ligía. Ma wagundan ladüga wafiñerun luagu luma luagu wasigiruni adundehani le tídanbei Wani Ministeriu!”. Gayarati san wariñaguni ligiaméme? Wayumahaña san wabuiduragüdüni wapurichihan?
10. Ka asansiruni tadügübei lóundarun Heowá lidan lagumuhóun burí irumu?
10 Anihein dan mosu lan ladügǘn somu asansiruni tidan burí wani sukursáli. Lidan lagumuhóun burí irumu, daruharu fiú sukursáli ani sügügüdawaali wadagimanu tidoun amu sukursáli to wéinamutimatu. Íbini adüga hamá íbirigu ha meha nadagimeinbaña ñein saragu sákürifisiu, lidan murusun dan ariha hamaali lubuidun resultóu (Apur. 7:8). Ma lubuidun chansi le hámabei íbirigu ha lun hawadigimaridun lun Heowá lidan dan le!
11-13. Ka burí sákürifisiu adüga hamaalibei fiú íbirigu ladüga asansiruni le burí tadügübei óundaruni?
11 Gayarati wafurendeirun saragu hámagiñe íbirigu ha mósubei hadügün asansiruni ladüga tóundarawagun sukursáli. Fiú hádangiñe seriwihaaña meha lóugiñe diisi irumu tidan somu sukursáli. Amuriahóuati hama aban feru maríeitiña ha meha eseriwidubaña tidan aban Beteli to lídanboun Lamidan Meriga lun háguyun tidoun Beteli to Méhikuboun, to ñein lubéi gíbetima hamá gürigia nadagimeintiña. Ariñagati Rogelio: “Hénrenguti woun wígiruniña waduheñu hama wamadagu”. Ani ariñagati Huan, ábanya íbiri le águyugubei Méhikun: “Ítara liña kamá hamuga wagumeseruña; mosu wadügün iseri umadagu luma lun wéchudun luagu ligaburi saminaü le ñeinbei”.
12 Hénrenguti meha giñe houn íbirigu ha meha eseriwidubaña betelirugu lidan amu burí ageiraü Yuropa lun háguyun tidoun sukursáli Alemania. Sun ha hínsiñebei áraabu houn gayarati gunfuranda hamani hénrengu lan houn ha eseriwidubaña Suiza hígiruni lubuidun fulasu ligía labu áraabu le ñeinbei, le gíribei Alpes. Ani álugatiña meha íbirigu áustriana luagu ibagari darangilati le ñeinbei.
13 Ha águyubaña lidoun amu ageiraü mosu héchudun tuagu aban iseri muna, hawadigimaridun hama íbirigu ha meha ibidiñetiña houn, ani hibe-agei mosu hafurendeirun aban iseri wadagimanu. Lunti giñe héchudun luagu aban iseri damuriguaü, mosu hapurichihan lidan aban iseri fulasu le ibidiñeti houn, háfuga lidan amu iñeñein. Íbini hénrengu lan ladügǘniwa asansiruni ligía, saragu íbirigu ha eseriwidubaña Betelirugu ánhatiña lun asansiruni burí le. Ka uagu hadügei?
14, 15. a) Ida liña harufuduni saragu íbirigu luagu gebegi lan harihini chansi le hibihibei lúmagiñe Heowá lun hawadigimaridun lun meberesenga halía lan? b) Ida liña gayara lan wáyeihani hani hénpulu?
14 Ariñagatu Grethel: “Ánhatina lun agunbirahóuni ligía ladüga ítara liña narufuduni lun Heowá luagu hínsiñe lan nun, mámarügü lidan aban ageiraü, aban muna o somu luwuyeri chansi lánina eseriwiduni”. Ariñagatu Dayska: “Lúmagiñe Heowá liabin amisurahani, ligía nánharunbei lun lau ichouruni”. Ligiaméme hariñagubei André tuma Gabriela, ariñagatiña: “Ariha wamuti ábanya lan chansi lun weseriwidun lun Heowá lau wígiruni le hínsiñebei woun wárigiñegua. Aba wariñagun: ‘Dan le láfurun ligarabalin asansiruni le ladügübei Heowá, lunti wawanserun úara luma mama lun woudin lubaroun’”.
Gebegilá wachansin lun wawadigimaridun luma Heowá woun
15 Dan le tadourun sukursáli burí, añahein hádangiñe ha eseriwidubaña ñein amisurahóuatiña lun heseriwidun kei prekursoru. Ligía asuseredubei houn fiú dan le tadourunbei sukursáli Dinamarca, Noruega luma Suecia lun tadaarún aban Escandinavia. Hadan anihein meha Florian tuma Anja, ha ariñagubaña: “Ariha wamuti wachansin lúmagiñe Heowá kei aban wadagimanu buiti. Buiti layusuruniwa Heowá, meberesenga halía lan. Tídangiñe sun wanigi gayarati wariñagun resibihadiwa lan saragu abinirúni”. Íbini saragu lan wádangiñe háfuga madunragunbadiwa luma asansiruni libe le, gayarati wáyeihani lubuidun hagaburi íbirigu ha lau wíchuguni Larúeihan Bungiu lidan furumiñeti lúgaaru (Isa. 6:8). Biní lumutiña Heowá ha áfaagubaña lun hawadigimaridun lun ñein lumuti líchigaña.
SIGÍ WAMÁ AGUNDAARA LAU WAWADIGIMARIDUN LUN HEOWÁ
16. a) Ka adundehani líchugubei Galasiana 6:4 woun? b) Ka lubuidun chansi resibi wamaalibei?
16 Keisi gürigia gafigountiña hínsiñeti woun konparárügua wamá woungua hama amu. Gama lumoun, adundeha tumutiwa Lererun Bungiu lun wetenirun lun le wayarabei adüga (aliiha huméi Galasiana 6:4). Mama sun wagía lun gayara lan weseriwidun kei wéiyaali lidan afiñeni, kei prekursorugu, misioneru o tidan aban sukursáli. Gama lumoun, mabulieida waméi resibi wamaali lan chansi le espechalitimabei: wídehan luma Heowá lidan lapurichihóun uganu buiti. Ma aban lubuidun chansi lira?
17. a) Ka burí katei adarasahabadiwa lidan awanhagua lan awinwanda lidan ubóu le lani Satanási? b) Ka uagu moun lumuti lubéi weferidiruni waguraasun?
17 Lidan aniheingua lan ubóu le lani Satanási, háfuga siñabei wadügüni sun le wabusenrubei lidan weseriwidun lun Heowá. Gama lumoun, moun lumuti weferidiruni waguraasun luagu lira. Íbini anihein lan katei adarasahatiwa, kéiburi wani buligasion hama waduheñu, luriban átuadi luma amu burí katei, gayarati wawadigimaridun luma Bungiu lau wasubudiragüdüni liri luma Larúeihan súnwandan. Manüga waméi kei ni kata! Le súdinitimabei wadügüni sun wayaraati. Ani amuriaha wamá luma Heowá lun labiniruniña íbirigu ha gayarabei heseriwidun lun lidan dan dayarüti. Haritagua waméi luagu hínsiñe hamá gürigia ha alawahabalin liri Heowá lun.
18. Kaba wadüga anhein gunda wabéi lau wawadigimaridun luma Heowá, ani ka uagu?
18 Lau sun wadebilin luma igaburi wuribati le wawagubei, gúndaati Heowá lau wawadigimaridun luma. Wéiriti san wagundan lau chansi le wibihibei lun wawadigimaridun lun lidan lagumuhóun dan le? Anhein ítara liña lubéi, wagurabahaba lachülürün iseri ubóu lun wadügüni le wayumahabei. Danme le lachülürün dan ligía, wagundaaruba lau ibagari le inarüniti, ibagari magumuchaditi lidan darangilaü luma ugundani (1 Tim. 6:18, 19).
Gúndaatün san lau chansi le ibiha humaalibei lun hídehan? (Ariha huméi párafu 16 darí 18)
19. Ka laransehabei Heowá wabá lubá ámuñegü?
19 Kei le yarafatimahadiwa lubéi lun iseri ubóu, samina wamá luagu le lariñagubei Moisesi houn ísüraelina murusun dan lubaragiñe hebelurun lidoun Fulasu Füramasewati: “Ábameti lawanseragüdünün Bungiu lidan sun le hadüga” (2 Lúrudu 30:9). Lárigiñeme Arümahedón, lagunfulirubei Heowá lani füramasei lun líchuguni Ubóu woun, wagía le ayabuhabei luma. Ábame weresibirun aban iseri wadagimanu: wadügüni Ubóu ábanme paraísu.