Siéluñein Larúeihan Bungiu. Arufudahati Hesusu houn lani disipulugu lun hafurieidun lun liabin Arúeihani ligía ubouagun, lugundun ligíaba adüga lun ñein lan irichaü luma darangilaü ubouagu. Úati arúeihani ubouaguna lunti lagumuchun lau wuribani, marichaü luma sandi, ánheinti Larúeihan Bungiu, gayarati lagidaruni ani ladügübei. Írida laali Bungiu Hesukrístu, le Liráü, lun ligía lan agumadiha lidan Arúeihani ligía ani anúadiraali aban sétanu kristiánu lun harúeihan luma. (Aliiha huméi Lúkasi 11:2 luma 22:28-30.)

Málühali Larúeihan Bungiu agumucha hau sun láganiñu Heowá. Ligíati, dan le wafurieidun lun liabin Arúeihani ligía, wamuriahaña luma Bungiu lun lagidaruni arúeihani ubouaguna lun lanügüni Larúeihan. (Aliiha huméi Danieli 7:13, 14 luma Arufudúni 11:15, 18.)

Gudemehabu le lasandirubei Hesusu hawagu gürigia adügati lun aban lan urúei buiti. Ani kei le Liráü lubéi Bungiu, gabafuti lun líderaguniña ha amuriahabaña ídemuei luma Lúguchi. (Aliiha huméi Sálumu 72:8, 12-14.)

Sun le awinwandubei según lilurudun Bungiu ani amuriaha ligía tídangiñe sun lanigi lun liabin Larúeihan Bungiu libihiba saragu abinirúni. Furendei huméi le tarufudahabei Bíbülia luagu arúeihani ligía. Maweiyasunbadün asaküriha. (Aliiha huméi Lúkasi 18:16, 17 luma Huan 4:23.)