1, 2. a) Ka meha uagu heferidirei 24,000 ísüraelina alagan le füramase lubéi Heowá houn? b) Ka larufudahabei le woun?

MURUSUN dan lubaragiñe hebelurun ísüraelina lidoun Fulasu Füramasewati, gíbetiña hádangiñe ádaragutiña houngua “hamoun würiña Moábüna”. Ligía aba lubéi láfaragun Heowá 24,000 hádangiñe. Ma lirun! Lǘhaña meha agurabaha heresibiruni halagante, ani dan le ibihaméme hamaali, aba heferidiruni. Ma liserun hafayeihan luagu hábürühan lidoun óuchawaguni! (1 Lúrudu 25:1-5, 9.)

² Huuti eweridihani le woun “keisi arufudahani [...], wagía le wínwanbei lidan lagumuhóun dan le” (1 Korintuna 10:6-11). Guentó wawinwanduña lidan “lagumuhóun dan”, ani keisi lubúeingu Bungiu yarafatimahali dan lun webelurun lidoun iseri ubóu (2 Timotéu 3:1; 2 Féduru 3:13). Híruti añahein lan fiú móunigiraguntiña houngua ani aba hábürühan lidoun luwuyeri agamariduni le múaranti luma lilurudun Bungiu. Guentó hasufuriruñein lani le hadügübei resultóu, ani ánhaña masakürihan, gayarati mibihin hamani ibagari le füramase lubéi Heowá lubá ámuñegü.

3. Ka uagu megei habalin maríeitiña ladundehan Heowá? (Ariha huméi dibuhu le lídanbei lagumeseha arütíkulu.)

³ Lidan ubóu le, le ídanbei weiri lan hasaminarun gürigia luagun  agamariduni, megei hamuti kristiánugu ha maríeihañabaña lídehan Heowá lun hesefuruni hamarieidun (aliiha huméi Sálumu 127:1). Lidan arütíkulu le warihibei ka lan lunbei hadügüni 1) mosu hóunigiruni hanigi, 2) hayarafadun lun Bungiu, 3) háyeihan iseri igaburi, 4) hayanuhan buidu hámagua luma 5) híchuguni le hemegeirubei hóuniwagua keisi maríeitiña.

4. Ka burí katei adügübei lun héiguadun fiú íbirigu lidoun agamariduni le múaranti luma lilurudun Bungiu?

⁴ Ka san adügübei lun héiguadun fiú kristiánugu lidoun agamariduni le múaranti luma lilurudun Bungiu? Sun katei gumeseti lídangiñe le waríagubei. Ariñagati Hesusu “furumiñeguarügü lan le awamadirutu aban würi, agabarahaali tuma tidan lanigi” (Matéu 5:27, 28; 2 Féduru 2:14). Saragu hádangiñe íbirigu ha éiguadubaña lidoun agamariduni le múaranti luma lilurudun Bungiu, furumiñe gumesetiña adüga katei burí le edebilidagüdübalin hafiñen. Añahein aríaguatiña meha pornografía, aliihatiña garüdia burí to adimurehatu luagu agamariduni o híbiri belutiña aríagua katei wíyeti lidan Internet. Híbiri aríaguatiña pelíkula, programa burí tidan tiáturu o tidan bigibigitu le ñein lubéi larufudúa agamariduni furangu. Añahein ñǘdüntiña tidan burí átagülei o abinaagülei áriebu, le ñein hamuti würiña hama wügüriña abinaha surusu o houdin lidan fulasu le ñein lumuti hasupahóua gürigia lun laganwoundun hayumahan agamariduni.

5. Ka uagu mosu lubéi wóunigirunu wanigi?

⁵ Añahein hagía aba houdin áluaha hama amu le yebe lunbei túmarügü lan hani weiriou háluahei. Lidan ubóu le ánhatiña gürigia lun furumiñeguarügü katei ani adüga hamuti sun le habusenrun lidan luáguti agamariduni, ani gayarati ladügün le lun ménrengun lan wígiraguagüdün woungua lun teyeeduniwa wanigi ani lun wagumeserun asandira somu katei tuagu amu gürigia tuéi wani weiriou (aliiha huméi Heremíasi 17:9, 10). Eweridihati Hesusu: “Ladüga tídangiñe anigi láfurida saminaü wuribati, áfarahani, agabarahani, agamariduni mamarieidunga” (Matéu 15:19).

6, 7. a) Ka gayarabei lasuseredun ánhawa ígira lun lebelurun luriban ayumahani tidoun wanigi? b) Kaba hadüga maríeitiña lun méiguadun hamá lidoun agamariduni le múaranti luma lilurudun Bungiu?

⁶ Dan le beluhali luriban ayumahani tidoun hanigi bián gürigia ha hínsiñeguatiña houngua, háfuga hagumeserun ayanuha luagu katei burí le yebe lunti lúmarügü lan hani weiriei o tuma hani weiriou hayanuhei. Lárigiñe, aba háluahan chansi lun haríagun houngua ani aba yarafaguatima lan háluahan chansi lun hadunragun. Gayara íbini heyeedagun houngua lau hasaminarun ua lan ni kata wuribati luagu hadunragun. Gama lumoun, eibu lásügürün dan ábame aweiridagueinatima lan ayumahani ligía tidan hanigi ani ábame ledebilidun hafiñen. Eibu hálüdün adügei katei le, hénrengutimahalime houn hararamuni, íbini subudi hamani luagu mabuidun lan (Ariñawagúni 7:21, 22).

⁷ Aban katei le agumeserubei lídangiñe somu yanu guentó wéiriguaali: ragügua hamaali háhabu, asupagua hagía houngua, ínchuaha hagía, óuburagua hagía houngua íbini lun hagurugun houngua kamá úmarigu. Túmarügüñein hamuga hani weiriou o luma hani weiriei gayara lan hadügüni katei le. Gama lumoun, aba laweiridagun hayumahan darí lun hagamaridagun houngua, aba katei le kóntürati luagu lilurudun Bungiu. Kada aban hádangiñe achawaha lumutiña “luriban hayumahan”. Ani dan le laweiridagun luriban ayumahani ligía, aba “liabin figóu” (Santiagu 1:14, 15). Ma lirun! Ani gayarati hamuga masuseredun lan le lun hamuga ígiratiña lun lóunigiruni Heowá hamarieidun! Arufudahati woun lun inebe lan maríei woun keisi aban óundaraguni le sánduti. Ida luba san wadüga lun warufuduni inebesei ligía?

8. Ida liña lóunigiruniwa wamadagua luma Heowá?

⁸ (Aliiha huméi Sálumu 97:10.) Góunigi lumutiwa wamadagua luma Heowá lun méiguadun wamá lidoun magíaguni. Éibume wasubudiruni lubuidun burí ligaburi ani áfaagua wagíame lun wáyeihani “kei lirahüñü” ani ‘hínsiñegua wagíame wóuniwagua’, ménrenguntimabei woun wadisedun luéi ‘salufuri luma luéi amu luwuyeri  iwiyei’ (Éfesuna 5:1-4). Kei subudi wabalin “laguseragüdübaña [lan] giñe Bungiu ha agamaridubaña mamarieidunga hama ha agabarahabaña”, mosu háfaagun maríeitiña lun úaragua hamá hóuniwagua (Ebüréu 13:4).

9. a) Ka meha uagu gayara lubéi lawanduni Hosé óuchawaguni? b) Ka wafurendeirubei lídangiñe lani Hosé hénpulu?

⁹ Añahein kristiánugu aba magunfulirun hamaali lan sun adundehani le líchugubei Heowá luagu ibagari ladüga hásügürün saragu dan hama hánigu paaná lidan wadagimanu lárigiñe hawadigimaridun. Añahein hagía houchawagúatiña lidan fulasu le ñein lubéi hawadigimarida. Ligía meha asuseredubei lun aban nibureinti gíriti Hosé. Dan le meha aniha lan nadagimein, aba líchugun fe luagu hínsiñe lan tun lani liyubudiri weiriou. Súnwandan meha tálugun tafosuruni lun larounrun tuma. Lagumuhóun oura, “aba tárügüdüni tuéigiñe ladaüragun, tariñaga lun: ‘Rounba numa’”. Aba láfuridun Hosé éibaagueina. Ka meha íderagubalin lun madüraagun lani lilurudun Bungiu? Desidírühali meha lun magünrinchagun lani lumadagua luma Heowá. Féridi lumuti luadigimari ani daüwa ligía, gama lumoun, biní lumuti Heowá (Agumesehani 39:1-12; 41:38-43). Dandu lidan wadagimanu kei lidan furumiñeguarügü fulasu, lunti hadisedun kristiánugu luéi katei le gayarabei ladügün lun hafigounhan.

10. Ida liña lóunigiruniwa wáyeihan iseri igaburi?

¹⁰ Mégeiwati iseri igaburi “le ladügübei Bungiu kei ligaburi guánarügü, lidan irichaü le tímatimaati luma arumani” lun hóunigiragun maríeitiña hóuniwagua (Éfesuna 4:24). Ha gawagubalin igaburi ligía, gidá hamuti “lumegegun hágubu”. Ida? Ladüga mosu háfaagun lun méiguadun hamá lidoun katei mabuidunti kéiburi ‘agamariduni mamarieidunga, katei wíyeti luma igaaduaü’ (aliiha huméi Kolosana 3:5, 6). Dimurei burí le lídanbei bérusu le arufudati mosu lan hadügün furumiñeguarügü katei lun méiguadun hamá lidoun luriban ayumahani. Kéiburi hadisedun luéi katei le gayarabei ladügün lun hasandirun ínsiñeni tuagu amu gürigia to mama hani weiriou (Hobu 31:1). Dan le wawinwandun úara luma lilurudun Heowá, furendeitiwa lun liyereegudun le wuribabei woun ani lun wabadülerun luagu le buídubei (Rómana 12:2, 9).

11. Ida liña lídehan iseri igaburi lun buidu lan hanaagun maríeitiña houngua?

¹¹ Arufuda lumuti iseri igaburi le “ligaburi Bungiu guánarügü le adügübalin” (Kolosana 3:10). Dan le larufudun wügüri tuma würi maríeitiña “gudemehabu, areiduni, ǘnabuguni, gaganbadi, luma gaguraasuni”, buídutimati hanaagun houngua keisi maríeitiña ani biní lumutiña Heowá (Kolosana 3:12). Ani ánhaña ígira lun larúeihan “lidarangilan Kristu tidan hanigi”, hawinwanduba lidan darangilaü (Kolosana 3:15). Dan le ‘hínsiñegua hamá’ maríeitiña hóuniwagua, adügati ínsiñeni ligía lun ‘inebegua hamá hóuniwagua’ (Rómana 12:10).

12. Según hisaminan, ka burí igaburi súdinibei lun ñein lan ugundani hadan maríeitiña?

¹² Dan le halügüdǘnwabei aban feru maríeitiña ka burí lan igaburi íderagubaliña lun gunda hamá lidan hamarieidun, aba lariñagun Sid, le wügüri: “Ínsiñeni igaburi súdinitimati le uágubei wáfaagua lun warufuduni súnwandan. Ani súdiniti giñe gaguraasuni”. Úarati tisaminan Sonja, to lani weiriou, luma ani ábaya tariñagun: “Súdiniti lun hayanuhan maríeitiña hámagua lau ínsiñeni. Ani áfaaguatiwa giñe lun ǘnabugu wamá, íbini anihein lan dan hénrengu lan”.

13. Ka súdinibei lun here lan aban maríei? b) Ka uagu súdini lubéi katei le?

¹³ Súdiniti hayanuhan maríeitiña hámagua lau ínsiñeni lun derebugu lan hamarieidun (Éfesuna 4:32). Híruti añahein lan ayanuhatiña lau inebesei  houn gürigia ha ibidiñetiña houn sügǘ lau dan le hayanuhan hámagua keisi maríeitiña. Añahein hagía buítimati hóuseruniña habiñanigu sügǘ tau hani weiriou o hani weiriei. Ánhaña ayanuha hóuniwagua lau ‘magundani, iyereehabúni, agúaraguni lánina igañi, anabahani luma wuribani’ débiligüdarügü hamuti maríei ligía (Éfesuna 4:31). Lubaragiñe hagadeiruni hamadagua keisi maríeitiña lau hayanuhan wuriba hawougua, lunti habuíduragüdünitima lau hayanuhan hóuniwagua lau ínsiñeni, ani sin hariñagun katei le gáriti lun le aban.

14. Ka burí katei lunbei madügün hamani maríeitiña?

¹⁴ Súdiniti lun hayanuhan maríeitiña hámagua buidu. Inarüni ariñaga tan Bíbülia anihein lan dan lun “ámanichuni”, gama lumoun, mama tariñaguña lau lira luagu buidu lan lun herederun gürigia mereregunga (Apurichihati 3:7). Ariñagatu aban íbiri yámanina: “Dan le lasuseredun lira, gayarati ladügün ámanichuni ligía lun tagaridun lanigi le aban”. Ani ábaya tariñagun: “Gama lumoun, íbini hénrengu lan darangilu lan gürigia dan le gibe lan katei lidan lichügü, mabuidunti giñe lun hariñaguni sun le hasandirubei. Lugundun gayarabei wariñagun somu katei le gayarati ladügün dañu lun wani weiriei. Ábatimameti laweiridagun turóbuli”. Maranserun habéi maríeitiña haturóbulin lau hagúarahan hóuniwagua o lau herederun mereregunga. Luagu amu oubaü, ánhaña áfaagua lun ua lan saragu magundani hadan o lun masigenehan hamá saragu, buídutimabei hanaagun houngua lidan hamarieidun.

15. Ida liña gayara lan lídehan lubuidun ayanuhani lun buidu lan hanaagun maríeitiña houngua?

¹⁵ Buídutimati hanaagun maríeitiña houngua dan le hasagarun dan lun hayanuhan hámagua luagu le hasandirubei luma le hasaminarubei. Gama lumoun, lunti mabulieidun wamani luagu súdini lan ka lan wariñagubei luma ligaburi wariñaguni. Ligíati, íbini lidan lidaani lénrengunga, mosu wayanuhan lau ínsiñeni. Ítara, ménrenguntimabei lun taganbuniwa wani paaná (aliiha huméi Kolosana 4:6). Dimureirügülá buiti wayanuha, ‘le íderagutiña ha híbiri lidan hafiñen, abinirúni ligíame houn ha aganbubaliwa’ (Éfesuna 4:29).

16, 17. Ka uagu súdini lubéi lun hasubudiruni maríeitiña ka lan lemegeirubei hani paaná ani ru hameime le hemegeirubei hóuniwagua?

¹⁶ Gayarati giñe buídutima lan hanaagun maríeitiña houngua dan le hasaminarun luagun le lemegeirubei hani paaná sügǘ lau luagu hemegeirun  guánarügü (Filipuna 2:3, 4). Dandu wügüriña kei würiña maríeitiña lunti aranseñu hamá lun híchuguni le hemegeirubei hóuniwagua, mámarügü lidan agamariduni, íbini giñe lidan amu burí katei (aliiha huméi 1 Korintuna 7:3, 4).

¹⁷ Híruti añahein lan maríeitiña móuseraguntiña houngua lau ínsiñeni ani mariñagun hagía dimurei lánina ínsiñeni hóuniwagua dan le harounrun hámagua. Añahein wügüriña saminatiña harihíba lan kamá débilitiña anhoun hóusera hani weiriou lau ínsiñeni. Gama lumoun, ariñagatu Bíbülia: “Huguya giñe wügüriña, áfaagua humá lun gunfuranda humaniña húmarigu” (1 Féduru 3:7). Lunti gunfuranda hamani wügüriña maríeitiña luagu lun lan tasandiragun hani weiriou tungua buidu úati lan buídurügü lan harumugun tuma. Chóuruti gúndaatimaboun lan hani weiriou lidan gabanarugu hamá anhein larufuda tun hínsiñe tan lun lidan amu burí ókaasion. Dan le hasaminarun biángubei hagía hawouguoun ani arufuda hagía ínsiñeni hóuniwagua, ménrenguntimabei houn híchuguni le hemegeirubei hóuniwagua.

18. Ka lunbei hadügüni maríeitiña lun héredagüdüni hamarieidun?

¹⁸ Siñati hariñagun maríeitiña tadüga nani weiriou nídinbei tuma amu o ladüga nani weiriei nídinbei luma amu. Gama lumoun, dan le ua lan ínsiñeni gayarati lidin aban hádangiñe áluahei ínsiñeni ligía hama amu gürigia (Ariñawagúni 5:18; Apurichihati 9:9). Ligía teweridirunbaliña Bíbülia maríeitiña: “Mamahada humá húniwagua, ánhaüngubeirügü adüga daradu lun mayusuragun humá hungua luagu átiri dan”. Ka uagu? “Afigougüda liñalün Mafia” (1 Korintuna 7:5). Anhein ásiñara hárügüdagun houngua, gayarabei layusuruni Satanási chansi ligía lun léiguadun aban hádangiñe lidoun agabarahani. Moun lumuti háluahani maríeitiña lérügü buídubei houngua, mosu háluahani “le buídubei” lun hani paaná, ani mosu giñe híchuguni le hemegeirubei hóuniwagua íbini lidan agamariduni ladüga hínsiñegua hamá houngua, mámarügü ladüga mosu lan hadügüni. Anhein hadüga ítara, gúndaabaña (1 Korintuna 10:24).

19. a) Ka lunbei wadügüni lun wéredagüdüni wamarieidun? b) Ka uagu súdini lubéi lun wóunigiruni wamarieidun?

¹⁹ Yarafatimahali iseri ubóu. Mámaali dan lun wéiguadun lidoun óuchawaguni kei meha lasuseredun houn 24,000 ísüraelina Moabü. Lárigiñe tafuranguagüdüni Bíbülia le asuseredubei, aba teweridihan: “Le lubeiti haritaguabei luagu deregüdagua lan léibugun luma Bungiu, góunigila, ábürühadügüliñein” (1 Korintuna 10:12). Súdiniti lubeiti lun wóunigiruni wamarieidun ani lun úaragua wamá tun wani weiriou o lun wani weiriei luma lun Heowá (Matéu 19:5, 6). Guentotima lunti wáfaagun lun ladariruniwa Bungiu “lidan darangilaü ligibugiñe, harumañu, madurunga” (2 Féduru 3:13, 14).