1. Ka uagu ábatima lubéi wayarafadun lun Heowá dan le wáyeihani Hesusu?

DAN le hínsiñe lan ligaburi aban gürigia woun, busentiwa wáyeihani. Ani Hesusu gürigia létima wabusenrubei wáyeihan. Ka uagu? Ariñagati: “Le arihitina, larihiñein giñe Bungiu Úguchili” (Huan 14:9). Lariñagunbalin Hesusu dimurei le ladüga áyeiha lani ligaburi Heowá buidu. Dan le wasubudiruni ligaburi Hesusu buidu, aba giñe wasubudiruni ligaburi Heowá. Ligíati, dan le wáyeihani Hesusu, ábatima wayarafadun lun Heowá, Bungiu le suntigabafu. Ma lubuidun chansi!

2, 3. a) Ka uagu tayanuha Bíbülia saragu luagu libagari Hesusu? b) Ka labusenrubei Heowá lun wadügüni? c) Kaba wakutiha lidan arütíkulu le luma lidan le aban?

² Daritiwa saragu ariñahani luáguti Hesusu tidan Bíbülia. Ka uagu? Ladüga busenti Heowá lun wasubudiruni Hesusu buidu lun gayara lan wáyeihani (aliiha huméi 1 Féduru 2:21). Ariñagatu Bíbülia mosu lan wáyeihani Hesusu. Ka mini lubéi le? Mini lan mosu lan wáyeihani lidan sun le ladügübei. Inarüni mafigounti lan Hesusu. Gama lumoun, magurabunti Heowá wáyeihabei lan Hesusu sin ni murusun charati. Busenrügüti lun wadügüni sun wayaraati lun wáyeihani.

 ³ Akutiha wamá fiú lídangiñe ligaburi Hesusu le lunbei wáyeihani. Lidan arütíkulu le warihibei ida liña lan larufudun Hesusu ǘnabuguni luma gudemehabu. Lidan le aban warihibei ida liña lan larufudun ganigi luma ida liña lan desidírü lan buidu. Wóunabuba ǘrüwa álügüdahani luagu kada aban lídangiñe igaburi le: Ka mini lubéi? Ida liña meha larufuduni Hesusu? Ani ida luba giñe warufuduni?

4. Ka mini lubéi ǘnabuguni?

⁴ Gürigia ha pántabaña saminatiña débili hamá ha ǘnabugubaña ani machourun hamá hawougua. Inarüni san katei le? Uá. Lun ǘnabugu lan aban gürigia lunti ganigi lan ani here ligía. Ka mini lubéi ǘnabugu lan gürigia? Mini lan manaagun lan lungua. Lun ǘnabugu wamá, furumiñe mosu waríagun woungua keisi lubudubu. Según aban dimurei-agei mini lan ǘnabuguni, wasubudiruni ñǘbüri wamá dan le konparárua wamá luma Bungiu. Ani anhein ǘnabugu wabéi, masaminarunbadiwa buidu wamá hawéi amu (Rómana 12:3; Filipuna 2:3). Kei le gafigoun wabéi anihein dan hénrengu lan woun warufudun ǘnabuguni. Gama lumoun, gayarati warufuduni igaburi le ánhawa asaminara luagun luéirigun Heowá luma luagun lani Hesusu hénpulu.

5, 6. a) Katei san arükánheli Migelibei? b) Ida liña meha larufuduni Migeli ǘnabugu lan?

⁵ Súnwandan ǘnabugu lan Liráü Bungiu. Ǘnabuguti meha dan le aban lubéi ánheli gabafuti sielu luma dan le ya lubéi ubouagu kei aban wügüri mafigounti. Ida liña meha san larufuduni ǘnabugu lan? Ariha wamá fiú hénpulu.

⁶ Arufuda lumuti meha Hesusu ǘnabugu lan lau ligaburi lóuserun. Lubaragiñebei liabin ubouagun, Hesusu meha hábutibei ánheligu. Migeli liña laguahóun lun tidan Bíbülia. Tidan liliburun Húdasi ariñagati luagu asigeneha lan Migeli luma Satanási (aliiha huméi Húdasi 9). Ka uagu hasigeneha? Aba meha lábununi Heowá Moisesi lidan aban fulasu le ibidiñeti lun ni aban gürigia (2 Lúrudu 34:5, 6). Ani busenti meha Satanási lanügüni lúgubu Moisesi, háfuga lun ladügün lun háhuduragun ísüraelina lun. Ariñagatu aban líburu háfuga lan ariñaga lan Hesusu lun Satanási luagu úati lan yu lan lun lanügüni lúgubu Moisesi. Íbini rárama lani Hesusu Satanási lau ganigi, ǘnabuguti meha ani aba lígirun lun Heowá lan aguseragüdei. Ka uagu? Ladüga subudi lumuti meha Heowarügüñein lan garicha lun ladügüni.

7. Ida liña meha larufuduni Hesusu ǘnabugu lan lau ligaburi layanuhan luma lau le ladügübei?

⁷ Dan le meha ya lubéi Hesusu ubouagu, arufuda lumuti ǘnabugu lan lau ligaburi layanuhan. Mabusenrungubeiti lun híchugun gürigia uéiriguni lun. Busenti meha lun lichugún sun uéiriguni lun Heowá (Márükosu 10:17, 18; Huan 7:16). Mariñagunti giñe Hesusu ni kata houn lani disipulugu le adügüti lun hasandiragun houngua kamá mebegitiña ni kata. Óusera lumutiña lau inebesei ani ariñagati meha houn buidu lan hadüga. Ítara liña meha larufuduni houn afiñe lan hawagu (Lúkasi 22:31, 32; Huan 1:47). Arufuda lumuti giñe Hesusu ǘnabugu lan lau katei le ladügübei. Desidírüti meha lun mibe lan lumegen lun lakipurun aban ibagari sensiyuti (Matéu 8:20). Aranseñu liña meha giñe lun ladügün wadagimanu le mabuserun habéi ha híbiri hadügün (Huan 13:3-15). Gaganbaditi meha giñe (aliiha huméi Filipuna 2:5-8). Gürigia ha pántabaña mínsiñeti houn gaganbadi hamá houn amu. Mítaranti meha Hesusu. Ǘnabuguti ani gaganbaditi meha lun Heowá lidan sun katei. Darí lun lígiraguagüdün  lungua lun lafarún hilagubei! Furanguti ǘnabugu lan meha Hesusu (Matéu 11:29).

8, 9. Ida liña warufuduni ǘnabugu wamá?

⁸ Ida luba wáyeihani ǘnabuguni le larufudubei Hesusu? Dan le ǘnabugu wamá, subudi wamuti gébeha lan walurudun. Úati yu lan woun waguseragüdün aban gürigia. Ligía machuragun wabaliña ani masaminarun wagía wuriba hawagun (Lúkasi 6:37; Santiagu 4:12). Masaminaruntiwa giñe buidu wamá hawéi amu ladügarügü gayaragua wamá woungua o luagu somu wadagimanu le wadügübei (Apurichihati 7:16). Wéiyaaña lidan afiñeni ha ǘnabugubaña masaminaruntiña giñe buidu hamá hawéi íbirigu. Lubaragiñe lira, saminatiña luagu buidu hamá ha híbiri hawéi (Lúkasi 9:48; Filipuna 2:3).

⁹ Ariha waméi lani íbiri Walter Thorn hénpulu. Gumeseti eseriwida kei óunigiruti sirkuitu lidan irumu 1894. Ani lárigiñe saragu irumu, aba lounahóun óunigiraña gayu ha hámabaña gefentiña luagu Heowá tidan aban sukursáli Nueva York. Dan le lasaminarun anihein lan hamuga adüga amu wadagimanu le súdinitimati luéi hounigirún gayu, ábaha lariñagun lúniwagua: “Murusun kaliki buguya le, íñuha lubéi bigarabalin” (aliiha huméi Isaíasi 40:12-15). Ma lubuidun hénpulu lánina ǘnabuguni!

10. Ida liña warufuduni ǘnabugu wamá lau ligaburi wayanuhan luma lau katei le wadügübei?

¹⁰ Ánhawa ǘnabugu, warufudubei lau ligaburi wayanuhan (Lúkasi 6:45). Dan le wayanuhan hama wíbirigu, mayanuhantiwa lau pantaü luagu le ibiha wamaalibei o luagu lubuidun wadügüni katei (Ariñawagúni 27:2). Lubaragiñe lira, ayanuhatiwa houn luagu katei buiti le hadügübei luma luagu hagaburi (Ariñawagúni 15:23). Arufuda wamuti giñe ǘnabugu wamá lau katei le wadügübei. Máluguntiwa wibihin aban ubaraü súdiniti lidan ubóu le. Himei wamuti wanügün aban  ibagari sensiyuti lun wadügüni lugundan Heowá. Aranseñu waña giñe lun wadügün wadagimanu le sensiyuti (1 Timotéu 6:6, 8). Ani le súdinitimabei, arufuda wamuti ǘnabugu wamá dan le gaganbadi wamá. Ligía aba lubéi gaganbadi wamá tun lóundarun Bungiu luma houn wéiyaaña lidan afiñeni (Ebüréu 13:17).

11. Ka mini lubéi gudemehabu?

¹¹ Ka mini lubéi gudemehabu? Anhein gudemehabu wabéi, hínsiñebaña híbiri gürigia woun ani beresebadiwa hau. Ínsiñeni ínchahabaliwa lun gudemehabu wamá. Ariñagatu Bíbülia arufuda lan Heowá luma Hesusu ‘ínsiñeni’ luma ‘gudemehabu (Lúkasi 1:78; 2 Korintuna 1:3; Filipuna 1:8). Ariñagatu aban líburu dan le lan tariñagun Bíbülia lun gudemehabu wamá, mama tariñaguña lun gudemerügü hamá gürigia ha asufurirubaña woun. Afuranguagüdatu líburu to ínchaha lumutiwa lan gudemehabu lun wídehan. Ligíati, anhein gudemehabu wabéi, wóuchuba wadügün lun buídutima lan gádantiña gürigia.

12. a) Ida liña meha larufuduni Hesusu gudemehabu lan lau le lasandirubei? b) Ida liña meha larufuduni Hesusu gudemehabu lan lau katei le ladügübei?

¹² Ida liña meha larufuduni Hesusu gudemehabu lan? Ariha waméi. Furumiñe, arufuda lumuti lau le lasandirubei. Dan le larihinbarun María to lumada hama amu gürigia ayahuaha lárigiñe lounwen Lásaru, aba giñe layahun (aliiha huméi Huan 11:32-35). Ariñagatu giñe Bíbülia  sandí lan meha Hesusu gudemehabu hawagu fiú gürigia ha ñǘdünbaña le ñein lubéi (Márükosu 6:34). Libiaman, arufuda lumuti meha Hesusu gudemehabu lan lau katei le ladügübei. Kei hénpulu, saragüda lumuti tiráü aban würi to hilaali tani weiriei ani saragüdalei giñe Lásaru (Lúkasi 7:11-15; Huan 11:38-44). Ítara liña meha líchugun chansi lun Lásaru lun lidin sielun. Ani dan le hóudinbei gürigia hagía le ñein lubéi Hesusu, adügati lugudemehabu lun “[larufudahan] saragu katei houn”. Sansi lumuti meha katei ligía habagari ha aganbubalin. Kei aubei warihei, arufuda lumuti Hesusu lugudemehabu lau katei buiti le ladügübei. Ínchaha lumuti meha lun líderaguniña ha mégeibaña ídemuei (Matéu 15:32-38; 20:29-34; Márükosu 1:40-42).

13. Ida liña meha larufuduni Hesusu gudemehabu lan lau lererun? (Ariha huméi dibuhu le lídanbei lagumeseha arütíkulu.)

¹³ Arufuda lumuti giñe Hesusu gudemehabu lan lau lererun. Adügati lugudemehabu lun layanuhan lau ínsiñeni, hóuntima gürigia ha asufurirubaña ladüga luriban housan amu. Yusu lumuti Matéu dimurei le lariñagubei profeta Isaíasi lun layanuhan luagu Hesusu, ariñagati: “Máhalachagun lubéi maburu le halamémeelibei méñeguchunleime lanpu le ñegumémeelibei” (Isaíasi 42:3; Matéu 12:20). Ka mini lubéi dimurei burí le? Mini lan móuserun lan Hesusu ni aban gürigia wuriba. Dan le layanuhan, adügati meha lun hasandiragun sun gürigia houngua buidu. Ruti meha giñe aban uganu lánina emenigini houn ha “nidiheribaña” (Isaíasi 61:1). Ruti meha awalidaguni houn ha asufurirubaña (Matéu 11:28-30). Chóurugüda lumuti meha houn lani disipulugu luagu berese lan Heowá hau, íbini hau ha gudemebaña (Matéu 18:12-14; Lúkasi 12:6, 7).

14. Ida luba warufuduni lau le wasandirubei luagu gudemehabu wamá?

¹⁴ Anhein busén wabéi gudemehabu wamá kei Hesusu, warufudubei lau le wasandirubei. Gayarati hénrengu lan woun wariñaguni houn amu hínsiñe hamá woun, gama lumoun, ariñagatu Bíbülia mosu lan wáfaagun lun wadügüni. Ligía aban lídangiñe iseri igaburi le lunbei gawagu wamani keisi kristiánugu (aliiha huméi Kolosana 3:9, 10, 12). Ida liña gayara lan warufudun ínsiñeni? Ariñagatu Bíbülia mosu lan wariñaguni houn amu ka lan wasandirubei hawagu (2 Korintuna 6:11-13). Dan le labahüdahani aban gürigia woun ida liña lan lasandiragun lungua luma ka lan lidiheribei lunti waganbuni (Santiagu 1:19). Ani lárigiñe, lunti wálügüdagun woungua: “Lun hamuga au lan gürigia le, ida luba hamuga san nasandiragun nungua? Kaba hamuga san nemegeira?” (1 Féduru 3:8).

15. Ka gayarabei wadügüni lun wíderaguniña ha asufurirubaña o ha eferidirubaña somu haduhe lidan óunweni?

 ¹⁵ Arufuda wamuti giñe wagudemehabu lau katei le wadügübei. Ínchaha lumutiwa gudemehabu lun wíderaguniña ha asufurirubaña o ha hilaañabaña iduheñu. Ida liña gayara lan wíderaguniña? Ariñagati Rómana 12:15: “Hayahua hama ha ayahubaña”. Liibe-agei dan mégeitiña gürigia wíchugun gurasu houn, mama lun wariñaguni houn ida luba lan haransehani haturobulin. Mégeitiña lun ñein lan somu gürigia le bereseti hau ani aganba láñame. Ariñagatu aban íbiri dan le lan tóunwenbei tisaani ñüdün hamá íbirigu túbiñe ani ayahuaha hagía tuma. Seremei tumutiña íbirigu luagu dǘgüdaguaü le híchugubei tun. Arufuda wamuti giñe gudemehabu wamá dan le wíderagun amu. Háfuga mégeitu somu íbiri to tábuguarügaru lun laranserún somu katei tun túbiñe. O háfuga busenti somu íbiri le derebuguhali lun lanügǘn lidoun adamuridaguni, apurichiha o lun surusia. Gayarati wíderaguniña amu saragu lau wadügün somu katei luagu hafulesein (1 Huan 3:17, 18). Le súdinitimabei, arufuda wamuti wagudemehabu lau wapurichihani uganu buiti. Ligía buídutimabei lídangiñe le gayarabei wadügüni lun wíderaguniña gürigia haruma tanigi.

16. Ka gayarabei wariñaguni houn ha nidiheribaña?

¹⁶ Arufudatiwa giñe lau ligaburi wayanuhan luagu gudemehabu wamá. Ariñagatu Bíbülia lunti lan wíchugun dǘgüdaguaü houn ha hírubaña hama ha maguraasunbaña (1 Tesalónikana 5:14). Ka gayarabei wariñaguni houn? Gayarati wariñagun houn luagu weiri lan hínsiñe woun. Gayarati giñe wíderaguniña arihei anihein lan igaburi buiti hawagu ani ayanuha wagíame houn luagu katei buiti le hadügübei. Gayarati wariñagun houn añaheinhaña ligía lan lidan damuriguaü, gebegirügühaña lan lun Heowá (Huan 6:44). Gayarati giñe wariñagun houn berese lan Heowá hau lubúeingu ha nidiheribaña (Sálumu 34:18). Gayarati wíderaguniña ha nidiheribaña lau le wariñagubei (Ariñawagúni 16:24).

17, 18. a) Ida liña labusenrun Heowá lun hóuseruniña wéiyaaña lidan afiñeni íbirigu? b) Kaba wariha lidan le aban arütíkulu?

¹⁷ Busenti Heowá lun hóuseruniña wéiyaaña lidan afiñeni íbirigu lau gudemehabu (Adügaü 20:28, 29). Mosu harufudahan houn, ani lunti giñe híchugun gurasu luma erei houn (Isaíasi 32:1, 2; 1 Féduru 5:2-4). Mafosurun hamutiña lau saragu lúrudu. Madügüntiña giñe lun hasandirun duru lúnrügü hadügün lóugiñe le hayarabei adüga. Busenrügütiña wéiyaaña lidan afiñeni lun gunda hamá íbirigu. Afiñetiña hínsiñe lan Heowá houn ani luagu adüga hamani sun hayaraati lun heseriwidun lun (Matéu 22:37).

¹⁸ Dan le wasaminarun luagun ǘnabuguni luma gudemehabu le larufudubei Hesusu, aba busén wamá wáyeihani. Lidan le aban arütíkulu warihibei ida luba lan warufudun ganigi luma ida luba lan desidírü wamá buidu kei Hesusu.