Lidan aban uburugu Hungría nasirua nan. Székesfehérvár liri uburugu ligía ani gíbeti lun lasubudirúniwa luagu, lugundun barühali lóugiñe milu irumu. Híruti siñati lan nabulieiduni katei burí le asuseredubei ñein lidan Libiaman Wuribu Wéiriti.

Hama nárugutinu naweirida. Súnwandan naritagun hawagun lau ínsiñeni, tuáguntima nagütü, Elisabeth. Tuguya arufudahaboun nun lun nafiñerun luagu Bungiu. Lúmagiñe ǘrüwa irumu nau aba téchudagüdünina águyuguagüdei furíei le gíribei Wáguchi Bungiu sagü guñoun. Gama lumoun, kéiburi 30 irumu nau ligía gunfuranda nani ka lan mini lubéi furíei le.

Nárugutinu óunigirubadina dan le ñǘraügidina, lugundun hawadigimariduña meha nagübürigu wéyuagu áriebu lun hareidahan seinsu lun hagañeihan aban muna to gadünamatu. Gama lumoun, sagü bián samudi óundaraguatiña meha sun iduheñu lun heigin úara. Haritagua nágili dan ligía lau ínsiñeni.

Lidan irumu 1958, aba gayara lan hagañeinhanu nagübürigu muna to uáguboun háfaagua. Gayarahali meha nawinwandun hama. Ma meha nugundan! Gama lumoun, madurati ugundani ligía saragu, lugundun sisi-hati lárigiñe, aba lounwen núguchi lau kánserü.

Wéiriti meha nigarigu. Haritagua nágili ariñaga nan meha lun Bungiu: “Ayumuraguatina bun lun bareidaguagüdüni núguchi. Megei numuti! Ka san uagu maganbun bubalina?”. Busentina meha nasubudiruni halíañein lan núguchi. Ábatiha nálügüdagun nungua: “Ñǘdünha san sielun? Marihindigia wamaali funa san?”. Gimugatina meha houn irahüñü ha wínwangiñabaña hagübürigu.

Barütina saragu irumu abasiiha ganbusandun, anihein dan, sagü weyu. Ábaha náhuduragun ligibugiñe lumúaha núguchi, ábaha nafurieidun: “Lau fulesei, Bungiu, busentina nasubudiruni halíañein lan núguchi”. Amuriahatina meha giñe luma lun líderagunina lun gunfuranda nani ka lan un ladügawa.

Dan le meha 13 lubéi irumu nau aban desidírü nan nafurendeirun ayanuha yámani lugundun saminatina meha gayarabei  lan nadariruni lóunabagüle nálügüdahan tidan burí saragu líburu yámani. Lidan irumu 1967 aba nidin aturiaha lidan aban uburugu yámani gíriti Jena. Aliiha numutu sun haliburun yámani ha aturiahabaña filosofía, tótima burí ayanuhaboun luagu lébuna habagari gürigia. Íbini darí nan fiú saminaü súdiniti, úatu ni aban íchugutu óunabagülei le náluahabei nun. Sigitina meha amuriaha luma Bungiu lun lóunabunina.

Lidan irumu 1970 aba nagiribudun Hungría, ñein nasubudiroun Rose, to meha lunboun nániboun lan weiriou. Lidan dan ligía lábugiñeñein meha aban luwuyeri agumadihani le subudiwabei kei comunismo Hungría. Ligía aba lubéi wanurahan Áustrioun murusun dan lárigiñe wamarieidun. Saminatiwa yebe meha woudin awinwanda Sydney, Australia, le ñein lubéi meha leredera aban niyaurite.

Murusun dan lárigiñe, aba nadarirun wadagimanu Austria. Aban weyu, aba lariñagun aban nupaaná lidan wadagimanu luagu gayarabei lan tóunabuni Bíbülia sun nálügüdahan ani aba líchugun bián líburu nun to ayanuhaboun tuagu Bíbülia. Aliiha numutu lidan ábanrügü weyu, gama lumoun, busengidina meha naganwoundagüdüni nisubudin, ligía aba lubéi nabürühan houn ha adügübarün líburu tugía: gefentiña luagu Heowá. Ani aba namuriahan tanwoun agumeiraguagüdüni hama.

Le weyu le wagunfulirunbei aban irumu lárigiñe wamarieidun aba lachülürün aban nibureinti gefenti luagu Heowá wábiñoun. Barǘ lumutu agumeiraguagüdüni burí to namuriahaboun, ani aba lálügüdünina anhein busén nubéi naturiahanu Bíbülia. Ánhatina. Busentina meha nafurendeirun saragu katei, ligía aba lubéi naturiahan bián wéiyaasu lidan dimaasu. Ani kada aturiahani durati gádürü oura!

Wéiriti meha nugundan luagu le harufudahabei Gefentiña nun tau Bíbülia. Dan le harufudunbalin liri Bungiu nun tidan nibibülian lidan niñeñe, mafiñentina yebe. Barühadina meha 27 irumu abasiiha ligilisirugun ani maganbun nágili meha iri ligía ni aban wéiyaasu. Aba meha taweiridun nanigi lau óunabagülei furanguti le tíchugubei Bíbülia. Aban katei le nafurendeirubei luagu masandi hamá hilaaña ni kata (Apurichihati 9:5, 10; Huan 11:11-15). Aba giñe nasubudiruni luagu füramase lan Bungiu ñeinbei lan aban iseri ubóu le ídanbei úaali lanme “óunweni” (Arufudúni 21:3, 4). Guentó afiñetina “lásaaragüdübaña lan [Bungiu] hilaaña” lidan iseri ubóu ani narihayabei lan núguchi (Adügaü 24:15).

Íderagua tumutina Rose buidu. Fureseti wawanserun ani gumú wamuti waturiahan lidan bián hati. Abasiihatiwa lidoun sun hadamuridagun gefentiña luagu Heowá. Wéiritu meha wanigi lau hínsiñehabu, hareidun luma luagu úarani le hádanbei (Huan 13:34, 35).

Lidan irumu 1976 aba wibihin üma lun wáguyun Australioun. Kei wachülürün ñeinhin, aba wáluahaniña Gefentiña ani adügatiña lun wasandiragun woungua kamá wábiñeñadiwa. Lidan irumu 1978 aba wabadiseirun kei gefentiña luagu Heowá.

Chülüdüga meha oura lun nadariruni óunabagülei lun álügüdahani le adiheridagüdübadina luagu saragu dan. Ani darí numuti giñe Úguchili le buídutimabei: Heowá (Santiagu 4:8). Ani ligibuagun lira, hemenigihadina luagu narihayabei lan núguchi lidan paraísu le füramase lubéi Bungiu (Huan 5:28, 29).

Lidan irumu 1989 aba wagiribudun Hungríoun lun wayanuhan luagu wafiñen houn waduheñu, wamadagu luma houn amu gürigia. Arufudahaadiwa houn saragu gürigia. Hóugiñe 70 hádangiñe gefenhaña luagu Heowá, haganagua anuhein núguchu.

Disedüñein irumu nau afurieida lun Bungiu luma áluaha óunabagülei lun álügüdahani le burí lídanbei nichügü, ani sügühali 39 irumu lúmagiñe nadariruni. Anahamémegua afurieida, gama lumoun guentó nadügüñein lun nariñagun lun: “Seremei, Núguchi Bungiu le siélubei, luagu bóunabuni furíei le nadügübei dan meha le nibureingidina”.