Ka wafurendeirubei lídangiñe abahüdaguni luáguti seinsu
“Ruti kei burí seingü-milu fiádürü lun aban hádangiñe, kei burí bián-milu lun aban, kei burí milu lun aban.” (MATÉU 25:15)
1, 2. Ka meha uagu labahüdaguei Hesusu abahüdaguni luáguti seinsu?
ABAHÜDAGUATI Hesusu aban abahüdaguni luáguti seinsu lun hasubudiruni lani disipulugu ha anuadirúaañabaña ka lan lagurabubei hámagiñe. Gama lumoun, dandu anhein hemenigi wabéi lun wawinwandun sielu o ubouagu gayarati líderaguniwa abahüdaguni le. Ani lun ítara lan mosu gunfuranda wamani ka lan mini lubéi abahüdaguni le.
2 Ídabuga labahüdaguei Hesusu abahüdaguni ligía houn lani disipulugu? Dan le meha líchuguña lan aban profesía le lunbei lagunfulirun danme le lagumeserun arúeiha ani gumese ligíame lagumuhóun dan (Matéu 24:3). Ligía subudi wabalin lídangiñeti lan profesía ligía abahüdaguni luáguti seinsu ani lagunfuliruba lan lidan lagumuhóun dan.
3. Ka wafurendeirubei lídangiñe kada aban lídangiñe abahüdaguni le lídanbei Matéu 24 luma 25?
3 Dan le líchugunbalin Hesusu profesía luáguti lagumuhóun dan, abahüdaguati gádürü abahüdaguni lun larufuduni ka lan lagurabahabei hámagiñe kristiánugu lidan dan ligía. Gayarati waliihani abahüdaguni burí ligía lúmagiñe Matéu 24:45 darí 25:46. Le furumiñeti abahüdaguni ayanuhati luagu musu úaraguati, lidan amu dimurei, luagu sétanu hani kristiánugu anuadirúaaña ha lúnbaña harufudahan houn lubúeingu Bungiu. Abahüdagua lumuti lun larufuduni houn fiú kristiánugu anuadirúaaña mosu lan úaragua hamá ani duari hagíame. * (Ariha huméi furumiñeti abürüdǘni.) Le libiaman abahüdaguni, hawaguti diisi nibureintiña. Lau abahüdaguni le, wéridi lumutiña Hesusu sun kristiánugu anuadirúaaña mosu lan aranseñu hamá ani agagudúañu hagíame lugundun ibidiñebei lan houn ídaba lan lachülüra. * (Ariha huméi libiaman abürüdǘni.) Le lǘrüwan, luáguti seinsu. Abahüdagua lumuti Hesusu lun larufuduni houn kristiánugu anuadirúaaña mosu lan háfaagun ani mosu lan hawadigimaridun saragu lun hagunfuliruni le lariñagubei houn. Le ligadürün, hawaguti mudún hama gábara. Arufudahati abahüdaguni le houn ha lúnbaña hawinwandun ubouagu mosu lan úaragua hamá ani íderagua hamañame kristiánugu anuadirúaaña. * (Ariha huméi lǘrüwan abürüdǘni.) Lidan arütíkulu le wayanuhaba luagu abahüdaguni luáguti seinsu.
RUTI ABAN WÜGÜRI SARAGU SEINSU HOUN LUMUSUNIGU
4, 5. a) Ka san mini lubéi wügüri le uágubei layanuhóua lidan abahüdaguni? b) Ka meha san ábanbei talentu? (Ariha huméi abürüdǘni.)
4 (Aliiha huméi Matéu 25:14-30.) Lidan abahüdaguni luáguti seinsu, ayanuhati Hesusu luagu aban wügüri le ñǘdünbei adüga aban wéiyaasu. Lidan amu ókaasion, abahüdaguati Hesusu aban abahüdaguni luagu aban wügüri le aweiyasuhabei lun ladügagun lungua urúeime (Lúkasi 19:12). * (Ariha huméi furumiñeti abürüdǘni.) Luagu saragu dan afuranguagüdatu wani agumeiraguagüdüni luagu lan Hesusu layanuha biángubei abahüdaguni le ani ñüdün lan sielun lidan irumu 33. Gama lumoun, marúeihanti Hesusu lidan dan ligía. Mosu meha lagurabahan darí irumu 1914, dan le hichugúnbei “láganiñu lábugiñoun lugudi” (Ebüréu 10:12, 13).
5 Lubaragiñebei lidin wügüri le uágubei layanuhóua lidan abahüdaguni, aba líchugun widü talentu houn lidamun. Gíbeti meha seinsu ligía. * (Aliiha huméi libiaman abürüdǘni.) Aba lariñagun houn lun hayusuruni lun hagañeirun lanwoun seinsu ligía lubá. Wéiriti meha lebegi seinsu ligía lun. Ani lun Hesusu, anihein meha giñe aban katei wéiriti lebegi. Katei san katei ligía? Wadagimanu le ladügübei dan le ya lubéi ubouagu.
6, 7. Ka mini lubéi seinsu?
6 Wéiriti meha lebegi apurichihani lun Hesusu. Lau lapurichihan adügati meha lun hagibedun lani disipulugu (aliiha huméi Lúkasi 4:43). Gama lumoun, subudi lumuti meha mosu lan lasigirun apurichihani. Ligía lariñagunbei houn lani disipulugu: “Ariha huméi nadü, lidaanihali lalubahóun” (Huan 4:35-38). Konparárü lumuti meha Hesusu apurichihani luma alubahani. Ani ítara liña Hesusu keisi aban ábunaguti le achoururubalin lalubahóun lichari. Ligíati, lubaragiñe lidin sielun, aba líchuguni wadagimanu lánina apurichihani houn lani disipulugu (2 Korintuna 4:7). Aba lariñagun houn: “Heiba lubeiti habügürü gürigia ha lílana sun fulasu, adüga humaña nánime disipulugu” (Matéu 28:18-20).
7 Ítara kei lígiruni wügüri ligía seinsu houn lumusunigu lun hóunigiruni, ítara liña lariñagun Hesusu houn kristiánugu anuadirúaaña lun hasigirun lau apurichihani (Matéu 25:14). Ligíati, buligasion lánina apurichihani luma hadügǘn disipulugu mini lubéi seinsu.
8. Íbini añahein lan meha musu ibihitiña bandi seinsu, añahein ibihitiña murusun, ka meha lagurabahabei hayubudiri?
8 Ruti wügüri le uágubei layanuhóua lidan abahüdaguni 5 talentu lun furumiñeti musu, biama lun libiaman luma aban lun lǘrüwan (Matéu 25:15). Kei aubei warihei, añahein musu ibihitiña bandi seinsu, añahein ibihitiña murusun. Gama lumoun, agurabati meha wügüri ligía lun hadügüni ǘrüwagubei hagía sun hayaraati lun hagañeirun lanwoun seinsu ligía lubá. Agurabati meha giñe Hesusu lun hadügüni kristiánugu anuadirúaaña sun le hayaraati lidan apurichihani (Matéu 22:37; Kolosana 3:23). Lidan hafedun huríu le gíribei Pentekosutési lidan irumu 33, gumesetiña disipulugu apurichiha houn gürigia ha lídangiñetiña saragu ageiraü. Ani ariñagatu líburu to gíriboun Adügaü nadagimein hamá saragu (Adügaü 6:7; 12:24; 19:20). * (Aliiha huméi abürüdǘni.)
HAYUSURUNI MÚSUGU SEINSU
9. a) Ka hadügübei bián musu ha úaraguabaña? b) Ka lafurudahabei le woun? c) Ka lunbei hadügüni ha agurabubaña hawinwandun lidan Paraísu?
9 Biángubei musu ha agañeirubaña lanwoun seinsu aban meha sínbolu hani kristiánugu anuadirúaaña ha úaraguabaña lidan lagumuhóun dan. Nadagimeinhaña saragu lidan apurichihani, lúmagiñetima irumu 1919. Lidan abahüdaguni le labahüdagubei Hesusu, gíbetimati talentu libihin furumiñeti musu luéi le libiaman. Gama lumoun, mama larufuduña le luagu biámañein lan sétanu hau kristiánugu anuadirúaaña. Haritagua waméi nadagimein hamá biángubei musu ha úaraguabaña saragu ani dan le lachülürün hayubudiri dóbuli hamaali seinsu le lígirubei houn. Kristiánugurügüñanu san anuadirúaaña lun hawadigimaridun lidan apurichihani? Uá. Arufudahati abahüdaguni hawaguti mudún hama gábara woun luagu sun lan ha lúnbaña hawinwandun lidan Paraísu mosu úaragua hamá houn kristiánugu anuadirúaaña ani íderagua hamañame lidan apurichihani. Ariha hamuti katei le kei aban óunwenbu chansi. Ítara haña súngubei lidan aban kei “aban fárüga” lábugiñe ladundehan “aban óunigiruti” (Huan 10:16).
10. Ka fánreinti súdinibei lidan lani Hesusu profesía luáguti lagumuhóun dan?
10 Agurabati Hesusu lun hawadigimaridun sun lánigu saragu lun haganwoundun disipulugu. Ligía meha hadügübei kristiánugu ha lánina furumiñeti sígulu. Agia guentó, hawadigimariduña san kristiánugu lubarügü lachülürün dan lun lagunfulirun abahüdaguni luáguti seinsu? Anha. Le linarün katei, mapurichihounwañahagili saragu lidan amu dan. Seremei wadagimanu le hadügübei súngubei, sagü irumu habadiseirun saragu milu gürigia. Ani aba hóundarun hanwoun apurichihatiña. Chóuruti gunda lan Hesusu! Sun le arufudati luagu aban lan fánreinti lídangiñe liseinin lagumuhóun dan apurichihani le.
Ruti Hesusu aban katei wéiriti lebegi houn lubúeingu, wadagimanu lánina apurichihani (Ariha huméi párafu 10)
ANITÉN WÜGÜRI
11. Ida liña wasubudiruni liábinba lan Hesusu lidan lidaani óunwenbu asufuriruni?
11 Ariñagati Hesusu: “Saragu dan lárigiñe, aba lagiribudun iyubudiri, aba lagumeserun aranseha hama luagu seinsu” (Matéu 25:19). Ídaba san liabin iyubudiri? Lídanme lagumuha óunwenbu asufuriruni. Ida liña wasubudiruni? Lidan profesía le lídanbei Matéu 24 luma 25, ayanuhati Hesusu saragu wéiyaasu luagu lidaani liabin. Kei hénpulu, ariñagati harihibei lan gürigia liabin “Wügüri Garaüwarügüti, lidan huánriñu siélugiñe”. Lagunfuliruba le lidan lidaani óunwenbu asufuriruni, danme le liabin Hesusu aguseragüdaña gürigia. Ariñagati giñe Hesusu houn kristiánugu ha lánina lagumuhóun dan lun agagudúañu hamá. Ariñagati: “Ladüga ibidiñeti hun kaba lan oura niabin”. Ariñagati giñe: “Leme oura magaradahan humá, ligíaba niabin, au le Wügüri Garaüwarügüti” (Matéu 24:30, 42, 44.) Ligíati, lidan abahüdaguni luáguti seinsu, layanuhaña meha Hesusu luagu lidaani liabin lun laguseragüdüniña gürigia luma lun lagünrinchaguni ubóu le lani Satanási * (Ariha huméi abürüdǘni.)
12, 13. a) Ka lariñagubei iyubudiri houn kada aban hádangiñe bián furumiñetiña lidamun? b) Ka uagu lariñagei katei ligía houn? c) Ídaba san heresibirei kristiánugu anuadirúaaña lagumuhóun seyu? (Ariha huméi rekuáduru “ Resibi hamuti hafayeiruaha dan le hounwen”.) d) Kaba afayeiruahaü líchiga Hesusu houn ha íderagubaliña kristiánugu anuadirúaaña apurichiha?
12 Dan le lachülürünbei wügüri le uágubei layanuhóua lidan abahüdaguni lídangiñe luéiyasun, aba lariñagun lun kada aban hádangiñe bián furumiñetiña lidamun: “Buiti, aban musu buiti ani úaraguati buguya; kei úaragua bubéi lidan le murusunrügüti, níchiga gíbetimati lábugiñoun baríaahan” (Matéu 25:21, 23). Ka uagu lariñaga houn ítara? Ladüga gáñeinti le furumiñeti lidamun seingü talentu lanwoun le libihibei ani le libiaman gáñeinti giñe biama ligibuagun le libihibei. Ka mini lubéi le? Lidan amu dimurei, kaba ladüga Hesusu danme le liabin?
13 Lubaragiñeraü óunwenbu asufuriruni, líchugubei Heowá lagumuhóun seyu hawagu kristiánugu anuadirúaaña ha lúnbaña añaheingua lanme ubouagu. Mini lan le gunda lan Heowá hau sunsuinagubei (Arufudúni 7:1-3). Ligíati, lubaragiñe lagumeserun Arümahedón, lanügübaña Hesusu sielun. Kábati asusereda houn ha agurabubaña hawinwandun lidan Paraísu, ha íderagubaliña kristiánugu anuadirúaaña apurichiha? Leteniruba Hesusu houn lun larihini ítara haña lan kei mudún. Mini lan le líchugubei lan Hesusu hafayeiruaha houn lun hawinwandun lidan Paraísu lábugiñe Larúeihan Bungiu (Matéu 25:34).
IDAMUNI LE WURIBABEI
14, 15. Ida liña wasubudiruni mama lan lariñaguña Hesusu luagu wuribabaña lan saragu kristiánugu anuadirúaaña?
14 Haritagua waméi ayanuhóua lan luagu aban lǘrüwan idamuni lidan abahüdaguni ligía. Ka asuseredubei lun? Afuranguagüdati Hesusu mayusurun lani musu ligía seinsu lun lagañeinrun lanwoun. Ani mareidun lumuti giñe bánkurugu lun libihin murusunraü ligibuagun. Bunarügü lumuti. Aba lariñagun wügüri le uágubei layanuhóua lidan abahüdaguni lun idamuni ligía luagu salufuri lan ani móuniti lan. Aba lagidaruni talentu ligía luéi aba líchuguni lun furumiñeti idamuni. Lárigiñe, aba labuguni idamuni ligía lúbiñegiñe “lidoun luburiga le bóugudibei”. Aba lerederun idamuni ligía ñein ayahuaha (Matéu 25:24-30; Lúkasi 19:22, 23).
15 Dan le lariñagunbei Hesusu wuriba lan aban hádangiñe ǘrüwa musu hagía, mini lan san luagu wuribabei lan 1 hádangiñe kada 3 kristiánugu anudirúaaña? Uá. Ida liña wasubudiruni? Subudi wamuti dan le konparárü wamani abahüdaguni le luma le luáguti musu úaraguati luma le hawaguti diisi nibureintiña. Lidan abahüdaguni luáguti musu le úaraguabei, ayanuhati Hesusu luagu aban musu wuribati le éibaahabaliña híbiri musu. Mama meha lariñaguña Hesusu haribaduba lan kristiánugu anuadirúaaña ha anügübalin ubaraü keisi musu úaraguati. Leweridiruñanu meha lun móuserun hamá kei musu le wuribabei. Ani adügati giñe Hesusu aban katei ítarati lidan abahüdaguni hawaguti diisi nibureintiña. Ariñagati maranserun hamá seingü hádangiñe. Gama lumoun, mariñagunti lau lira maranserunbaña lan hamidan kristiánugu anuadirúaaña. Busenrügüti meha leweridiruniña sun anuadirúaaña lun aranseñu hamá ani agagudúañu hagíame. * (Ariha huméi abürüdǘni.) Ligiaméme asuseredubei lau abahüdaguni luáguti seinsu. Mama meha lariñaguña Hesusu wuribabaña lan saragu kristiánugu anuadirúaaña lidan lagumuhóun dan. Busenrügüti meha leweridiruniña lun hawadigimaridun saragu ani lun móuserun hamá kei musu le wuribabei (Matéu 25:16).
16. a) Ka wafurendeirubei lídangiñe abahüdaguni luáguti seinsu? b) Lárigiñe waliihani arütíkulu le, ida luba hamuga hafuranguagüdüni abahüdaguni luáguti seinsu? (Ariha huméi rekuáduru “ Ka mini lubéi abahüdaguni luáguti seinsu?”.)
16 Ka wafurendeirubei lídangiñe abahüdaguni luáguti seinsu? Furumiñe, luagu weiri lan lebegi wadagimanu le líchugubei Hesusu houn kristiánugu anudirúaaña. Katei san wadagimanu ligía? Apurichihani luma hadügǘn disipulugu. Libiaman, agurabati lan Hesusu lun wawadigimaridun sun wagía saragu lidan apurichihani. Ánhawa apurichiha lau úaraguni ani adüga wameime sun le lariñagubei Hesusu woun, líchuguba wafayeiruaha (Matéu 25:21, 23, 34).
^ par. 3 Lun hasubudiruni ka lan musu úaraguatibei, aliiha humóun Garüdia Atalaya to lánina 1 lidan sedü-hati irumu 2013, páhina 27 luma 28, párafu 8 darí 10.
^ par. 3 Lun hasubudiruni kátaña lan nibureintiña hagía, aliiha huméi arütíkulu “Gayarabei san herederun agagudúañu?” tidan garüdia to.
^ par. 3 Lun gunfuranda humani abahüdaguni hawaguti mudún hama gábara, aliiha huméi arütíkulu “Íderagua wamaña líbirigu Kristu” tidan garüdia to tuma La Atalaya to lánina 15 lidan diisi-hati irumu 1995, páhina 23 darí 28.
^ par. 4 Ariha huméi rekuáduru “ Ka idan genegegua lan bián abahüdaguni luáguti seinsu le labahüdagubei Hesusu?”
^ par. 5 Íbini ariñaga tan Bíbülia garifuna 5,000 fiádürü, 2,000 fiádürü luma 1,000 fiádürü, tidan furumiñetu Bíbülia to abürüdǘboun lidan güriegu ariñagati: 5 talentu, 2 talentu luma 1 talentu. Lidan lidaani Hesusu, mosu meha lawadigimaridun aban gürigia 20 irumu lun lagañeirun aban talentu.
^ par. 8 Murusun dan lubaragiñe hóunwegun apostolugu, gíbetiña gürigia ebedaagutiña ani aba maganbadi hamá, aba giñe hagumeserun arufudaha iyeeni lidan damuriguaü. Ani luagu saragu irumu, murusunrügüñanu apurichihatiña. Gama lumoun, ariñagati Hesusu lidan aban profesía hagumeserayaba lan kristiánugu apurichiha lidan lagumuhóun dan (Matéu 13:24-30, 36-43). Afuranguagüdawati katei le tidan Garüdia Atalaya to lánina 1 lidan sedü-hati irumu 2013, páhina 15 darí 17.
