1. Ka uagu mosu lubéi wéredagüdüni wamadagua luma Heowá?

ANIHEIN aban katei wéiriti lebegi wama, wagía gefentiña luagu Heowá, wamadagua luma Heowá. Súdiniti lun wadügüni sun wayaraati lun wéredagüdüni umadaguaü ligía. Ka uagu? Ladüga dandu ubóu le lani Satanási kei wachara guánarügü gayarati ladügün lun ledebilidun.

2. a) Ka mini lubéi umadaguaü? (Ariha huméi abürüdǘni) b) Kaba wadüga lun héretima lan wamadagua luma Heowá?

² Ariha humuti san Heowá kei aban umadaü le inarüniti? Hínsiñeti hamuga san hun lúntima héredagüdüni humadagua luma? Ariñaga lumuti Santiagu 4:8 woun ida luba lan wibihini: “Yarafa humá lun Bungiu, ábame giñe layarafadun hun”. Kei aubei warihei, lun gamadagua humá luma Heowá, biángubei hugía lunti hadügün somu katei. * Ánhadün ayarafada lun Heowá, layarafaduba giñe hun. Eibu hayarafadun lun Heowá, buídutimabei humadagua luma. Hasandiraguba hungua kei meha Hesusu dan le lariñagun: “[Bungiu] le inarünibei [...] ligía  óunahabalina”. Ani ariñagati giñe: “Subudi numuti” (Huan 7:28, 29). Ariha waméi ka lan lunbei wadügüni lun wayarafadun lun Heowá.

3. Ida liña gayara lan wayanuhan luma Heowá?

³ Anhein busén wabéi wayarafadun lun Heowá, súdiniti lun wayanuhan luma. Ida luba wadügüni? Ru wamá aban hénpulu. Anhein busén habéi bián umadagu ha díseguati herederun hayanuhan hámagua, ka lunbei hadügüni? Mosu habürühan hóuniwagua ani ayanuha hagía luagu gágamuru. Ítara liña giñe lasuseredun lidan wamadagua luma Heowá. Ayanuhatiwa luma Heowá dan le wafurieidun lun gabügürügua (aliiha huméi Sálumu 142:2). Ani ayanuhati Heowá woun tau Bíbülia. Ligíati, lun waganbuni le lariñagubei woun, mosu waliihanu Bíbülia súnwandan ani samina wagíame luagun le waliihabei (aliiha huméi Isaíasi 30:20, 21). Warihibei lidan arütíkulu le ánhawa lan asigira ayanuha luma Heowá, inarünibei wamadagua luma.

4, 5. a) Ida liña layanuhan Heowá woun tau Bíbülia? b) Afuranguagüda huméi lau aban hénpulu.

⁴ Subudi wamuti gayara lan líderaguniña uganu le tídanbei Bíbülia sun gürigia. Gama lumoun, gayarati giñe tíderaguniwa kada aban wádangiñe lun wayarafadun lun Bungiu. Ligía lunti lubéi wetenirun lun ligaburi wasandiragun woungua lidan awanha lan aliihoun o aturiahoun Bíbülia. Lunti giñe wasaminarun wadügüni le wafurendeirubei lídangiñe le waliihabei tidan. Dan le wadügüni lira, ítara liña kamá le layanuhaña Heowá woun tídangiñe Bíbülia. Ani dan le warihini íderagua lániwa, ábatima labuidurun wamadagua luma (Ebüréu 4:12; Santiagu 1:23-25).

⁵ Kei hénpulu, lidan Matéu 6:19, 20, ariñagati Hesusu: “Móundaragua humá irisini ya ubouagu”. Mini lan le mosu lan Heowá lan súdinitima lidan wabagari. Ida liña wasandiragun woungua dan le waliihani dimurei burí le? Anhein gumeseediwa lubéi afalarei adundehani le lidan wabagari, wasandiruba luagu gunda lan Heowá wau. Ani ánhawa ariha mosu lan sensiyutima lan wabagari lun buídutima lan weseriwidun lun Bungiu, ábame gunfuranda wamani líderaguñadiwa lan Heowá lun warihini ka lan lunbei wadügüni lúntima wayarafadun lun.

6, 7. a) Dan le waturiahanu Bíbülia, ka asuseredubei lun wamadagua luma Heowá? b) Ka wáluahabei dan le waturiahanu Bíbülia?

⁶ Inarüni dan le lan waliihanu Bíbülia, ariha wamuti asansiruni le lunbei wadügüni lun buídutima lan weseriwidun lun Bungiu. Gama lumoun, ariha wamuti giñe lubuidun burí ligaburi luma katei le ladügübei ladüga línsiñehabu. Lau wafurendeiruni sun lira, ábatima línsiñedun woun. Ani aba giñe wínsiñedun lun. Ani kei resultóu, ábatima léredun wamadagua luma (aliiha huméi 1 Korintuna 8:3).

 ⁷ Anhein busén wabéi wayarafadun lun Heowá, mosu waturiahanu Bíbülia lau aban igaburi richati. Ariñagati Hesusu mosu lan wasubudiruni Heowá buidu lun wawinwandun lun súnwandan (Huan 17:3). Inarüni furendei wamá saragu katei súdiniti tidan Bíbülia. Gama lumoun mámatima ligía wáluahabei. Dan le waturiahanu Bíbülia, wáluahaña wasubudiruni Heowá buidu (aliiha huméi Áfuriduni 33:13; Sálumu 25:4).

8. a) Dan le haliihani fiú gürigia le ladügübei Heowá lun urúei Asaríasi, ka gayarabei hasaminaruni? b) Kei le subudi wabalin Heowá buidu, ka ichouruni wawagubei?

⁸ Anhein wariha Heowá kei aban umadaü le inarüniti, madiheridunbadiwa anhein mariñagun tan Bíbülia ka lan uagu lóusera lidan somu manera. Kei hénpulu, samina wamá luagun lásügürün aban lurúeite Hudá gíriti Asaríasi. Lidan dan le urúei lubéi, huduguatiña meha ísüraelina houn búngiugu mama inarünitiña. Ánheinti ligía, ariñagatu Bíbülia “buiti [lan] ligaburi [...] ligibugiñe Bungiu” (2 Urúeigu 15:1-5). Íbini ítara, óunahati Bungiu aban lanarime sandi luagun. Ka uagu? Lidan fánreinti le, mafuranguagüdün tumuti Bíbülia. Gayarati hamuga hasaminarun fiú maricha lan Heowá ani aba lan labeichuni madurunga. Gama lumoun, subudi wamuti Heowá buidu ani chouru wamuti súnwandan lan lóuserun lau irichaü (Heremíasi 30:11). Ligíati, íbini ibidiñe lan woun ka lan uagu lóunahei Bungiu sandi ligía luagun urúei, chouru wamuti adüga lani le richabei.

9. Ka uagu labeichei Heowá urúei Asaríasi?

⁹ Lidan amu burí fánreinti tidan Bíbülia daritiwa lanwoun ariñahani luáguti libagari urúei Asaríasi, le giñe subudiwabei kei Osiasi (2 Urúeigu 15:7, 32). Lidan 2 Krónikasi 26:3-5, 16-21 ariñagati: “Buiti bugaha lóuserun Osiasi ligibugiñe Wabungiute”. Gama lumoun, ariñagatu giñe aba lan lagumeserun anaagua lungua lau lásügürün dan. Luagu aban weyu, aba ladügün aban katei le lunti fádirigurügüba lan adügei. Ariñagatiña 81 fádirigu lun luagu mabuidun lan le ladügübei ani álugatiña yebe hararamuni. Gama lumoun, wéiriti meha líñugun, ligía aba lubéi lasafaragun ani madügünti gasu hau. Chóuruti íderagua lániwa katei le lun wasubudiruni ka lan uagu labeichei Heowá.

10. a) Ka uagu memegeirun wabéi lun wasubudiruni ka lan uagu ladügei Heowá le ladügübei? b) Kaba íderaguawa lun wafiñerun luagu súnwandan lan lóuserun Heowá lau irichaü?

¹⁰ Arufudahati abahüdaguni le aban katei súdiniti woun. Lidan abahüdaguni luáguti urúei Asaríasi anihein ariñahani le buídurügüti lun wasubudiruni ka lan uagu labeichei Bungiu. Gama lumoun, anihein saragu ariñahani tidan Bíbülia le mafuranguagüdün lumuti katei burí le. Lidan burí kesi le, wasaminaruba san móuserun lan Heowá lau irichaü? O wafiñeruba luagu óusera lan lau irichaü súnwandan? (2 Lúrudu 32:4.) Anihein saragu ariñahani tidan Bíbülia lun wasubudiruni Bungiu buidu luma lun wafiñerun luagu. Anhein subudi wabalin ani hínsiñe ligía woun, memegeiruntiwa wasubudiruni ka lan uagu ladügei sun le ladügübei. Kábati íderaguawa lun wafiñerun súnwandan lan lóuserun Bungiu lau irichaü? Mosu waturiahanu Bíbülia. Ítara luba lumadagu wamá Heowá ha inarünitiña (Sálumu 77:12, 13).

11-13. Ka uagu subudi wabalin aganba lániwa Bungiu dan le wafurieidun lun? (Ariha huméi dibuhu le lídanbei lagumesehan arütíkulu.)

¹¹ Dan le wafurieidun, rútiwa uéiriguni luma seremei lun Bungiu, ani amuriahatiwa ídemuei luma. Yarafagüda lumutiwa katei le lun Heowá (Sálumu 32:8). Gama lumoun, anhein busén  wabéi lumadagu wamá Heowá ha tímatimatiña, mosu wachoururuni luagu aganba lániwa dan le wafurieidun lun.

¹² Añahein ariñagutiña maganbun lani Bungiu furíei. Aba hariñagun lúnrügüñein lan wasandiragun woungua buidu leseriwida furíei. Ariñagatiña íderagua lániwa furíei lun wasaminarun luagun waturobulin luma lun wadarirun ida luba lan waransehani wagía woungua. Inarüni gayara lan líderaguniwa furíei lidan katei le. Gama lumoun dan le wafurieidun lun Heowá, aganba lumutiwa. Ida liña wasubudiruni?

¹³ Samina wamá luagun Hesusu. Lubaragiñebei liabin ubouagun, ariha lumuti ida liña lan lóunabuni Heowá hafurieidun gürigia. Ani dan le ya lubéi ubouagu, furíeiti Hesusu lun Bungiu ani abahüdagua lumuti le lasaminarubei lun. Luagu aban weyu aba lafurieidun sun áriebu (Lúkasi 6:12; 22:40-46). Arufudahati giñe houn lani disipulugu ida luba lan hafurieidun. Ladügüñein hamuga san Hesusu sun katei le lun hamuga subudi lani maganbun lani Heowá furíei? Uá. Chóuruti subudi lani meha Hesusu aganba lani Bungiu furíei. Ligía lariñagunbei: “Núguchi, teinki numutibu luagu baganbunina. Subudi numuti luagu aganba bánina súnwandan” (Huan 11:41, 42). Ani chouru wamuti giñe aganba lániwa Heowá dan le wafurieidun (Sálumu 65:2).

14, 15. a) Ka uagu súdini lubéi wariñaguni lun Heowá lidan furíei ka lan wabusenrubei? b) Ida liña líderagunu furíei aban íbiri?

¹⁴ Háfuga marihin wamani furangu ida liña lan lóunabuni Heowá wafurieidun. Gama lumoun, ánhawa ayanuha lun luagu somu katei, gayarabei warihini lóunabagüle furangu. Ani ábanbei umadaü buiti woun. Anhein wabahüdagua sun wadiheri lun tídangiñe sun wanigi, ábatimame layarafadun woun.

¹⁵ Ariha waméi hénpulu tani aban íbiri gíritu Carmen. * Ariñagatu lubaragiñe lan meha tagunfuliruni tirumudiri lun mawadigimaridunharu lan furitu lan meha apurichiha, gama lumoun, mínsiñeti meha apurichihani tun. Dan le lachülürünbei oura lun mawadigimaridunharu lan, aba línchahanu aban wéiyaali lidan afiñeni lun teseriwidun kei prekursora. Ariñagatu: “Aba nadügüni le lariñagubei nun ani aba giñe nagumeserun amuriaha luma Heowá sagü weyu lun líderagunina lun nadarirun ugundani lidan apurichihani. Aganba lumuti san Bungiu tafurieidun? Guentó barüharu Carmen ǘrüwa irumu eseriwida kei prekursora. Ariñagatu seremei lan dan le tásügürübei apurichiha luma hídehan íbirigu,  buídutimahali ligaburi tapurichihan. Guentó hínsiñehali apurichihani tun! Ani le súdinitimabei ariñaga tan buídutimahali lan tumadagua luma Heowá. Kei le aubei warihei, íderagua lumutu furíei íbiri to lun buídutima lan tumadagua luma Heowá.

16, 17. a) Ka lunbei wadügüni lun buídutima lan wamadagua luma Heowá eibu dan? b) Kaba wariha lidan le aban arütíkulu?

¹⁶ Gayarati wasigirun ayarafada lun Heowá lun súnwandan. Ligíati, sigí wamá aganbei lau waturiahanu Bíbülia sagü weyu, ani sigí wamá ayanuha luma lidan furíei. Anhein wadüga, labuiduratimaba wamadagua luma eibu dan. Ani lau lídehan, gayarabei wawandun furumiñeguarügü turóbuli.

¹⁷ Furanguti íbini lan wafurieidun lun Heowá súnwandan, wasufuriramémeba ladüga somu turóbuli. Ani gayarabei wígiruni wafiñen luagu. Gayarabei wasaminarun maganbun lani wafurieidun ani ábame wálügüdagun woungua anhein lumadagugidiwa lubéi. Ánhawa asandiragua woungua ítara, ka lunbei wadügüni? Warihibei lidan le aban arütíkulu.