1. a) Ka hasubudirubei lubúeingu Bungiu lúmagiñe furumiñeti dan? b) Ka uagu súdini lubéi le woun? c) Kaba wariha lidan arütíkulu le?

LÚMAGIÑE furumiñeti dan subudi hamuti lubúeingu Heowá luagu buidu lan lasalirun sun katei dan le subudi lan hawadigimari gürigia houn. Kei hénpulu, dan le lageindagunbei Abüraámü hama láganiñu, yúsuti wügüriña ha aransetiña ani ítara liña lesefuruni Lotu (Agumesehani 14:14-16). Lidan lidaani Dawidi añahein meha gürigia aranserúatiña lun heremuhan lun Heowá (1 Krónikasi 25:7). Ka uagu súdini lubéi katei le woun uguñe weyu? Furumiñe, ladüga mosu wageindagun kóntüra Mafia hama lánigu (Éfesuna 6:11-13). Libiaman, ladüga mosu lan wáfaagun lun walawahani Heowá lau wayanuhan luagu houn amu (Ebüréu 13:15, 16). Ítara kei lubúeingu Heowá ha lánina binadu dan, mosu aranseñu wamá lun buidu lan lidin woun. Lidan damuriguaü, ruti Heowá buligasion houn wéiyaaña lidan afiñeni lun harufudahan houn amu íbirigu (2 Timotéu 2:2). Lidan arütíkulu le warihibei ka lan hayusurubei fiú wéiyaaña lidan afiñeni lun harufudahan houn amu.

2. Dan le busén lan aban wéiyaali lidan afiñeni larufudahan lun aban íbiri, ka gayarabei ladügüni, ani ka uagu?

² Ítara liña aban wéiyaali lidan afiñeni kei aban ábunaguti. Lubaragiñe lábununi ilaü, gayarati lagaranihan lun múa lun buidu lan táhüchün linadürigu. Ítarameme, lun larufudahan aban wéiyaali lidan afiñeni lun aban íbiri, gayarati layusurun fiú bérusu tídangiñe Bíbülia luma. Ka uagu? Lugundun ítara líderagubei lun ladügüni le lunbei lafurendeiruni lárigiñe (1 Timotéu 4:6).

3. a) Danme le layanuhan wéiyaali lidan afiñeni luma íbiri, ida luba gayara lan layusuruni Márükosu 12:29, 30? b) Ka gayarabei lasuseredun danme laganbuni íbiri lafurieidun wéiyaali lidan afiñeni luagu?

 ³ Anhein aban hubéi wéiyaali lidan afiñeni, súdiniti lun hasubudiruni ida liña lan asansireina lani inarüni lisaminan luma le lasandirubei íbiri ligía. Lun hasubudiruni, gayarati haliihani Márükosu 12:29, 30 (aliiha huméi). Ábameti hálügüdüni ka lan lánibei lederegeragun lungua lun Heowá efekütu lidan libagari. Gayarati hadügüni álügüdahani le lun hagumeserun ayanuha luagu ida luba lan heseriwidun lun Heowá tau sun hanigi. Gayarabei giñe hafurieidun luma íbiri lun hamuriahan luma Heowá lun líchuguni lani sífiri sandu lun, gayara láamuga lagunfulirun lau sun dasi le lunbei leresibiruni. Háfuga danme le laganbuni hafurieidun luagu, ábame busén lan laganwoundagüdüni leseriwidun lidan damuriguaü.

4. a) Ru humá hénpulu luáguti abahüdaguni tídangiñeti Bíbülia le gayarabei líderaguniña íbirigu lun hawanserun. b) Ka lunbei háluahani wéiyaaña lidan afiñeni dan le harufudahan lun somu íbiri?

⁴ Danme le hagumeserun arufudaha lun aban íbiri, ayanuha humá lun luagu abahüdaguni tídangiñeti Bíbülia kéiburi le lídanbei 1 Urúeigu 19:19-21, Neemíasi 7:2, Neemíasi 13:13 luma Adügaü 18:24-26. Dandu abahüdaguni burí le kei amu abahüdaguni leseriwiduba lun íbiri ligía lun larihini súdini lan ǘnabuguni, híderawagun amu luma gayara lan lafiñerúniwa luagu gürigia. Ítara liña igaburi burí le kei árani le líchugubei ábunaguti luagu múa. Íderagua lumuti igaburi burí le íbiri lun lawanserun furese. Ariñagati aban wéiyaali lidan afiñeni faransu dan le lan larufudahan lun aban íbiri, áfaagua lan líderaguni lun desidírü lan según le tariñagubei Bíbülia. Ariñagati áluaha lan chansi lun laliihan fiú bérusu lun le lunbei líderaguni lun gunfuranda lani “lubuidun [arufudahani]” le tídanbei Bíbülia (Sálumu 119:18). Ka amu igaburi ídanbei gayara lan híderaguniña wéiyaaña lidan afiñeni íbirigu lúntima línsiñedun Heowá houn?

5. a) Ka uagu súdini lubéi layanuhóun luma íbiri luagu le lasaminarubei ladügün lidan leseriwidun lun Heowá? b) Ka uagu súdini lubéi lun harufudahan wéiyaaña lidan afiñeni houn ha nibureintimagiñabaña? (Ariha huméi abürüdǘni.)

⁵ Álügüda huméi íbiri ligía ka lan labusenrubei ladügün lau libagari. Anhein masaminarungili lubéi ni kata, íderagua huméi lun lasaminarun luagun le labusenrubei ladügün. Ayanuha humá lau ugundani luagu somu katei le meha hasaminarubei hadügün ani abahüdagua huméi lun buidu lan hasandiragun hungua dan le hibihinbalin. Mérengunti ladügǘn katei le ani buiti giñe lani resultóu. Ariñaga lumuti aban wéiyaali lidan afiñeni ani prekursoru Áfürika ka lan uagu súdini lubéi wadügüni katei le. Ariñagati dan le lan nibureingili, aba lálügüdüni aban wéiyaali lidan afiñeni luagu ka lan labuserunbei ladügün lidan libagari ámuñegü. Íderagua lumuti katei le lun larihini leseriwidun lun Heowá kei aban katei sériuti. Ariñagatiña giñe íbirigu ha lǘhaña eseriwida kei wéiyaaña lidan afiñeni luagu buidu lan lun larufudahóun houn íbirigu dan le nibureintimagiña, kéiburi dan le 13 o 14 irumu hau. Gayarati lichugún wadagimanu houn lidan damuriguaü le gayara hamuti adüga según harumudiri. Ka uagu súdini lubéi katei le? Ladüga gayarati líderaguniña lun hetenirun lun le habusenrubei lidan habagari danme le haweinamudun ani lun masaminarun hamá luagun amu katei (aliiha huméi Sálumu 71:5, 17). *

6. Ka meha ladügübei Hesusu lun larufudahan houn amu?

⁶ Lun hínchahani íbiri ligía lun laganwoundagüdüni leseriwidun, mama ariñagarügü hubéi lun ka lan lunbei ladügüni. Mosu hafuranguagüdüni lun ka lan uagu mosu lubéi ladügüni. Ítara liña meha ladüga Hesusu lun líderagun amu. Óunaha lumutiña lani disipulugu lun hapurichihan. Gama lumoun furumiñe ariñaga lumuti houn ka lan uagu mosu lubéi gaganbadi hamá. Ariñagati: “Rúaali sun ubafu nun sielu luma ubouagu. Heiba lubeiti habügürü gürigia ha lílana sun fulasu, adüga humaña nánime disipulugu” (Matéu 28:18, 19). Ida luba háyeihani lani Hesusu hénpulu?

7, 8. a) Ida luba háyeihani wéiyaaña lidan afiñeni lani Hesusu hénpulu? b) Ka uagu súdini lubéi wariñagun lun aban íbiri buidu lan ladüga? c) Ka burí adundehani gayarabei líderaguniña wéiyaaña lidan afiñeni lun harufudahan houn amu? (Ariha huméi rekuáduru “ Le lunbei hadügüni lun harufudahan houn amu”.)

⁷ Danme le hariñagun lun aban íbiri lun ladügün  somu katei, afuranguagüda huméi lun tau Bíbülia ka lan uagu lunti lubéi ladügüni. Ítara luba harufudahan lun lun ladügüni katei ladüga Bíbülia lan ariñagubalin, mama lun lasigirun somu lúrudu. Kei hénpulu, ánhadün amuriaha luma aban íbiri lun lakipuruni ebelaagülei tidoun Luban Adamuridaguni harumañu ani mábeiñu, gayarati haliihani Titu 2:10 lun. Afuranguagüda huméi lun anhein lan lakipura ebelaagülei tidoun Luban Adamuridaguni harumañu buídutimabei lan harihini gürigia uganu luáguti Larúeihan Bungiu. Gayarati giñe hariñagun lun lun lasaminarun luagun ídemuei le líchugubei houn íbirigu ha wéiyougaña lau wadagimanu le ladügübei. Líderagubei yanu le lun lasaminarun saragu hawagun amu, mama lun lasaminarun luagun somu lúrudu. Danme le larihin hu lan luadigimari houn íbirigu, buídubei lasandiragun lungua.

⁸ Danme le lagunfuliruni íbiri ligía adundehani le híchugubei lun, ariñaga humá lun buidu lan ladüga. Ka uagu? Ladüga ítara luba híderaguni lun lawanserun. Wariñagun lun aban íbiri buidu lan ladüga, ítara liña kamá wáturaguña aban nadü (konparárü huméi luma Matéu 3:17).

9. a) Ka asuseredubei lidan fiú ageiraü rísiti? b) Ka uagu mama lubéi eseriwiduni lun Heowá súdinitimabei houn fiú nibureintiña?

⁹ Lidan fiú ageiraü rísiti, hénrenguti houn wéiyaaña lidan afiñeni hínchahaniña íbirigu ha nibureingiña lun haganwoundagüdüni heseriwidun lidan damuriguaü. Álügüdüwatiña fiú wéiyaaña lidan afiñeni ha lídangiñetiña 20 ageiraü ka lan uagu lasusereda katei ligía. Hibe-agei ariñagatiña dan le lan meha nibureingiña fiú íbirigu, mínchahan hamutiña hagübürigu lun haganwoundagüdüni heseriwidun lun Heowá. Dan le habusenrunbei fiú hádangiñe haganwoundagüdüni heseriwidun, ínchaha hamutiña hagübürigu lun haturiahan lun hagañeirun seinsu. Ítara liña, mama meha eseriwiduni lun Heowá súdinitimabei houn (Matéu 10:24).

10, 11. a) Ida liña gayara lan líderagun aban wéiyaali lidan afiñeni somu íbiri murusun murusun lun lasansiruni ligaburi? b) Ka bérusu tídangiñeti Bíbülia gayarabei laliihani wéiyaali lidan afiñeni lun íbiri ligía, ani ka uagu? (Ariha huméi abürüdǘni.)

¹⁰ Hénrenguti líderawagun aban íbiri le genegeti mabusenrun lan laganwoundagüdüni leseriwidun lidan damuriguaü. Mégeiwati saragu áfaaguni luma gurasu, gama lumoun, gayarati líderawagun. Samina wamá luagun lani ábunaguti hénpulu. Lun surú lan laweiridun nadü, aba lásururagüdüni ábunaguti murusun murusun. Ítarameme, gayarati híderagun aban íbiri lun lasansiruni lisaminan murusun murusun luma lun lasansiruni ligaburi. Ida?

¹¹ Áluaha humá dan lun hadügün umadaguaü luma íbiri ligía. Ariñaga humá lun luagu mégeiwa lan lidan damuriguaü. Ñurú humá luma ani arufuda huméi bérusu burí tídangiñeti Bíbülia lun le lunti líderaguni asaminara luagun lederegeragun lungua lun Heowá (Apurichihati 5:4; Isaíasi 6:8; Matéu 6:24, 33; Lúkasi 9:57-62; 1 Korintuna 15:58; 2 Korintuna 5:15; 13:5). Houcha humá lun hachülürün tidoun lanigi lau hadügün fiú álügüdahani kéiburi le lun: “Ka meha füramase bubéi lun Heowá dan le bederegeragunbei bungua lun? Según bisaminan, ida liña meha lasandiragun Heowá lungua dan le babadiseirunbei?” (Ariñawagúni 27:11). “Ida liña lasandiragun Satanási lungua?” (1 Féduru 5:8.) Ka uagu  súdini lubéi haliihan bérusu libe burí le? Ladüga gayarati lachülürün tidoun lanigi íbiri ligía (aliiha huméi Ebüréu 4:12). *

12, 13. a) Ka igaburi larufudubei Eliséu dan le larufudahanbei Elíasi lun? b) Ida liña líchugun Heowá lafayeiruaha Eliséu?

¹² Nibureinti, mégeiwatibu lidan damuriguaü. Kaba íderaguabu lun buidu lan lidin bun lidan beseriwidun lun Heowá? Lun wasubudiruni, ariha waméi lani aban lubúein Bungiu gíriti Eliséu hénpulu.

¹³ Kéiburi 3,000 irumu guentó, amisuraha lumuti profeta Elíasi nibureinti Eliséu lun líderaguni. Ánhati Eliséu lun amisurahóuni ligía. Úaraguati ani íderagua lumuti profeta ligía lau ladügün wadagimanu sensiyuti (2 Urúeigu 3:11). Arufudahati meha Elíasi lun Eliséu luagu sisi irumu. Dan le gumumemeeli luadigimari Elíasi Ísüraeli, aba lariñagun lun Eliséu gayarahali lan lígiruni leseriwidun lun. Ábati lariñagun Eliséu lun ǘrüwa wéiyaasu: “Mígirun nubadibu”. Desidírühali meha lerederun luma Elíasi. Aba líchugun Heowá lafayeiruaha ladüga úaragua lan. Ida? Aba lígirun Heowá lun larihini Eliséu lanügǘn Elíasi “lidan aban hiriri” (2 Urúeigu 2:1-12).

14. a) Ida luba háyeihani nibureintiña lani Eliséu hénpulu? b) Ka uagu súdini lubéi hagunfulirun nibureintiña lau dasi le ichugúbei houn?

¹⁴ Ida luba báyeihani Eliséu? Furumiñeguarügü wadagimanu le ichugúti bun gúnfulibei lau ugundani, íbini anhein sensiyu lubéi. Haritaguabá bumada lan wéiyaali lidan afiñeni le arufudahabei bun. Ariñagabá lun seremei biña lan lun luagu sun le ladügübei buagu ani busén ban basigirun afurendeira. Abanbá nibureinti  gafiñerúaditi luagu ani gúnfulibei sun dasi le ichugúbei bun. Ka uagu? Lugundun ítara luba hachoururuni wéiyaaña luagu busén lan Heowá lun bibihin lanwoun buligasion lidan damuriguaü (Sálumu 101:6; aliihabei 2 Timotéu 2:2).

15, 16 a) Ida liña meha larufuduni Eliséu inebe lan lumaisturun lun? (Ariha huméi dibuhu le lídanbei lagumesehan arütíkulu.) b) Ka meha uagu afiñe habéi ha híbiri profetagu luagu Eliséu?

¹⁵ Arufudati giñe abahüdaguni luáguti Eliséu súdini lan lun inebehabu ban houn íbirigu ha lǘhaña eseriwida kei wéiyaaña lidan afiñeni. Lárigiñe hebeluhan hamoun fiú profetagu uburugu Herikó, aba lidin Elíasi luma Eliséu lidan duna Hordán. “Ábati lanügünu Elíasi tidáü ladaüragun, aba lóuburagunu, aba labeichuni duna tau, aba lafanreinragun”. Ítara liña hánhiñuraguni biángubei hagía duna luéigiñe múa mábeiti. Dan le añangüra lan éibugeina, leteniruña meha Eliséu lun sun le lariñagubei Elíasi lun. Masaminarunti meha Eliséu subudi lan sun katei lun. Lárigiñebei lanügüni Heowá Elíasi lidan “aban hiriri”, aba lagiribudun Eliséu dúnarugun. Aba labeichuni duna tau ladaüragun Elíasi, ani aba lamuriahan ídemuei luma Heowá, “le Lubungiute Elíasi”. Ábaya lafareinragun duna (2 Urúeigu 2:8-14).

¹⁶ Kei barihini ya, le ladügübei Elíasi lidan lagumuhóun lani milaguru ligía ladügübei Eliséu lidan furumiñeti lani milaguru. Masaminarunti Eliséu gayara lan ladügüni katei kei auti labusenra ladüga ligíaali lan lau ubafu. Sigimemeti adügei katei kei meha ladügüni Elíasi. Ítara liña larufuduni inebe lan lumaisturun lun. Ani íderagua lumutiña katei le ha híbiri profetagu lun hafiñerun luagu Eliséu (2 Urúeigu 2:15). Seriwiti meha Eliséu kei profeta luagu 60 irumu, ani ruti Heowá ubafu lun lun ladügün saragu milaguru, lóugiñe le meha ladügübei Elíasi. Ka gayarabei bafurendeiruni lídangiñe katei le?

17. a) Ida liña gayara lan háyeihani nibureintiña lani Eliséu hénpulu? b) Lau lásügürün dan, ka gayarabei hadügüni nibureintiña?

¹⁷ Ánhabu ibiha saragu buligasion lidan damuriguaü, masaminarabá mosu lan bafuresehan asansirei ligaburi ladügǘn katei. Haritaguabá dánrügübei lan lemegeiruni damuriguaü gayara lan basansiruni katei o dan le tariñagun lóundarun Heowá lun badügüni. Moun lumuti badügüni ladügarügü busén ban badügüni. Haritaguabei sigí lan meha Eliséu adügei katei kei meha ladügüni Elíasi. Ítara liña larufuduni inebe lan lumaisturun lun. Ani ligía íderagubaliña ha híbiri profetagu lun hafiñerun luagu. Ítarameme, ánhabu asigira ayusurei adundehani tídangiñeti Bíbülia le híchugubei wéiyaaña lidan afiñeni ha arufudahabaña bun, barufudubei inebe hamá bun. Ani hafiñeruba sun lílana damuriguaü buagu (aliihabei 1 Korintuna 4:17). Danme le subudihadibu saragu, gayarabei badügün asansiruni le gayarabei líderaguni damuriguaü lun lasigirunu lóundarun Heowá to awanseruboun sin tararamagun. Ani éibu lásügürün dan, líderagubadibu Heowá ítara kei meha líderaguni Eliséu. Háfuga badügüba saragu katei lóugiñe le meha hadügübei ha arufudahabaña bun (Huan 14:12).

18. Ka uagu lunti lubéi larufudahóun houn íbirigu ha lídanbaña damuriguaü lau lóufudagun?

¹⁸ Agurabatiwa lun líderaguniña ariñahani le lídanbei bián arütíkulu le wéiyaaña lidan afiñeni lun hasagarun dan lun harufudahan houn amu íbirigu. Ani furíeitiwa lun ñein hamá íbirigu ha busentiña hafurendeirun óunigirei damuriguaü. Lídehaba katei le lun héretima lan damuriguaü lidan sun ubóu. Ani líderagubadiwa giñe sun wagía lun wakipurun úaraguni lidan dan le lunbei liabin.