Linda: Lucía, ida biña? Gúndaatina narihinibu lidan aritaguagülei lánina lounwen Hesusu ligirabuga. * Ida liña barihin lun adamuridaguni ligía?

Lucía: Hínsiñeti nun. Gama lumoun úati gunfuranda nani fiú lídangiñe katei le ariñawagúbei ñein. Aganbaadina luagu lefeduhóun luéyuri nasirua lan Hesusu fédurugu luma láguyugun lidan Semana Santa, gama lumoun, maganbungidina yebe luagu laritawagún lounwen.

Linda: Binarün. Anihántima bián katei le hefeduhabei gürigia. Ánheinti wagía, gefentiña luagu Heowá, afiñetiwa súdini lan waritaguni lounwen Hesusu irumu luagu irumu. Gayarati nafuranguagüdüni bun ka lan uagu lidan fiú minutu, anhein gadaani bubéi.

Lucía: Anha, gadaaniraügidina.

Linda: Waritagunbalin lounwen Hesusu ladüga ligía guánarügü lan íchugubei gumadi lun wadügüni. Ariha waméi le asuseredubei guñoun lubaragiñe lounwen. Haritagua bágili san adüga lan Hesusu aban adineruni espechaliti hama lani disipulugu?

Lucía: Anha, le lagumuhóun adineruni.

Linda: Anha, wáwati giñe lun Ladinerun Aburemei. Lidan adineruni ligía, ruti Hesusu adundehani le furanguti houn lani disipulugu. Darí wamuti ya lidan Lúkasi 22:19. Hínsiñeti hamuga bun baliihani?

Lucía: Anha, lariñaga ya: “Lárigiñe, aba lanügünu fein lúhaburugu, aba leteingiruni Bungiu tuagu, aba lagubachagunu, aba líchugunu houn, ariñageina: ‘Núgubu le, le lunbei lederegerún huagu. Lúmagiñe guentó, adüga huméi le, haritaguagüleme nuagun’”.

Linda: Seremei. Ariha bumuti le lariñagubei Hesusu lidan lagumuha bérusu le: “Adüga huméi le, haritaguagüleme nuagun”. Ani lubaragiñe, ariñaga lumuti Hesusu houn ka lan lunbei haritaguni. Ariñagati houn lederegerubei lan lúgubu, o libagari lidan sákürifisiu, luagu hafulesein lani disipulugu. Lidan Matéu 20:28, ariñagati Hesusu fiú dimurei lenege le. Arihabei le lariñagubei: “Mama [...] niábiña, au le Wügüri Garaüwarügüti, lun neseriwidúniwa, niábiña lun neseriwidun luma lun níchuguni nibagari lebegime hasalbarun saragu”. Lidan fiú dimurei, haritagua wamuti lagunfulirun Hesusu ábanya irumu lúmagiñe lounwen lun waritaguni sákürifisiu le ladügübei lun lesefuruniwa. Ladüga lounwen Hesusu wawagu ligía gayara lubéi wesefurun ánhawa gaganbadi.

Lucía: Aganbaadina hilá lan Hesusu lun lesefuruniwa. Ani le linarün aban katei, úati  gunfuranda nani ida liña lan lesefuruniwa lounwen.

Linda: Gunfuranda numutibu. Hénrenguti gunfurandawa lan luáguti lani Hesusu sákürifisiu. Gama lumoun, ligía aban lídangiñe arufudahani le buídutimabei tidan Bíbülia. Gayarati wayanuhan murusunraüya?

Lucía: Anha, gadaaniraügidina.

Linda: Málügili naturiahan luagu katei le ani náfaagua lun sensiyu lan nafuranguagüdüni bun lun gunfuranda bani.

Lucía: Ok.

Linda: Furumiñe, mosu gunfuranda wamani le asuseredubei dan le hafigouhanbei Adán tuma Ewa lidan fuluri-agei Edén. Lun lira aliiha waméi le lariñagubei Rómana 6:23. Busentibu baliihani?

Lucía: Anha. Lariñaga: “Lugundun óunweni lafayeihabei figóu; ánheinti edewehani le líchugubei Bungiu woun, ibagari le magumuchaditi lidan Wabureme Hesukrístu”.

Linda: Seremei. Akutiha waméi bérusu le. Arihabei gumese lan bérusu le ariñaga: “Lugundun óunweni lafayeihabei figóu”. Ligía aban lúrudu le líchugubei Bungiu dan le lagumeserunbei sun katei: óunweni lafayeihanbei figóu. Furanguti úati lan meha figóu furumiñe. Mafigountiña Adán tuma Ewa dan le ladügünbaliña Bungiu, lidan amu dimurei, sin ni murusun charati. Ani mafigounbaña yebe giñe hasaanigu. Ligía ua lubéi meha resun lun hóunweguba lan gürigia. Dandu Adán, Ewa hama hasaanigu gayarabei yebe hawinwandun lidan ugundani lun súnwandan. Gama lumoun, kei basubudiruni, aba lasuseredun aban katei le agadeirubalin sun katei. Haritagua bágili ka lan asuseredubei?

Lucía: Anha, aba heigin Adán tuma Ewa tídangiñe furuda to uéiboun leweridiraña Bungiu.

Linda: Anha. Ítara liña hafigouhan; aba desidírü lan Adán tuma Ewa lun maganbadi hamá lun Bungiu. Aba hachararun, ani aba hafigounhan. Barüti katei ligía luriban resultóu houn luma houn hadügawagun.

Lucía: Kati uagu íbini lubéi wagía? Maduruntiwagu lidan lira.

Linda: Runa aban hénpulu bun. Ásürahadibu san fein lidan aban ágeidinaü?

Lucía: Anha, anihein aban numa.

Linda: Saminabá aba lan bagañeinhan aban tásüraagüle fein le iserigili, ani lubaragiñe bayusuruni, aba léiguadun buéi ani aba laburechagun murusunraü. Kaba asusereda tun sun fein to lunboun básürahanu lidan? Ma larihíba giñe duneti ligía tuagu?

Lucía: Anha.

Linda: Ítarameme, dan le desidírü lubéi Adán tuma Ewa lun maganbadi hamá lun Bungiu aba giñe lamakürüniña figóu. Ani kei le masaanigugiña lubéi dan le hafigouhanbei, súngubei hasaanigu lau figóu hagurahóua. Dan le tayanuhan Bíbülia luagu figóu mama tayanuhaña luágurügü katei wuribati le hadügübei gürigia, tayanuhaña giñe luagu figóu le galagante wamaalibei. Ligíati, íbini madurun wamá luagu le hadügübei Adán tuma Ewa, súngubei wagía galagante wamuti figóu hámagiñe ani ligía wafigouhanbei. Ani kei waliihani lidan Rómana 6:23, “óunweni lafayeihabei figóu”.

Lucía: Mabuidunti katei le. Ka uagu wasiadirúa lun sun dan luagu aban figóu le ladügübei Adán tuma Ewa?

Linda: Binarün, marichati hamuga katei le. Gama lumoun, mosu gunfuranda wamani sun katei le buidu. Kei le richá lubéi Bungiu ligía mosu lubéi meha hóunwegun Adán tuma Ewa luagu hafigoun. Gama lumoun, mígirun lumutiña Bungiu hadügawagun memeniginga. Adügati aransehani lun lesefuruniwa lídangiñe lirun sügǘ le. Ñein liabin lani Hesusu sákürifisiu. Aliihaya waméi Rómana 6:23. Larigiñe lariñagun ñein “óunweni lafayeihabei figóu”, aba lariñagun “ánheinti edewehani le líchugubei Bungiu woun, ibagari  le magumuchaditi lidan Wabureme Hesukrístu”. Lounwen lubeiti Hesusu adaarubalin üma lun wesefurun lídangiñe figóu luma óunweni. *

Linda: Anihein ámuya katei lidan bérusu le ani hínsiñeti hamuga giñe nun nakutihani buma.

Lucía: Ka katei ligía?

Linda: Arihabei le lariñagubei ya: “Ánheinti edewehani le líchugubei Bungiu woun, ibagari le magumuchaditi lidan Wabureme Hesukrístu”. Anhein Hesusu lubéi asufurirubei ani hilá ligía lun lesefuruniwa, ka uagu mariñagun lubéi ya “edewehani le líchugubei Hesusu”? *

Lucía: Mmm... ibidiñeti nun.

Linda: Lau maganbadi hamá Adán tuma Ewa lun Bungiu lidan fuluri-agei Edén, aba hafigouhan. Chóuruti gari lan ebedaaguni ligía lun Bungiu. Gama lumoun, áluahati Heowá ida luba lan laransehani katei ligía lau lóufudagun: mosu meha liabin aban hádangiñe sífirigu ha lúmabaña sielu ya ubouagun, lun lawinwandun kei aban gürigia mafigounti ani lun líchuguni libagari lun lesefuruniña sun gürigia. * Aban lubeiti idewesei lúmagiñeti Bungiu lebegi asalbaruni. Aban giñe idewesei lúmagiñeti Bungiu lidan amu manera. Saminadibu san ida liña lan funa lasandiragun Bungiu lungua dan le lafarúnbei Hesusu?

Lucía: Masaminarungidina luagun katei le.

Linda: Arihatina fiú adibiri ya. Gasaanigutibu san?

Lucía: Anha, añahein biama numa, aban hiñaru luma aban eyeri.

Linda: Kei le úguchuru ban, háfuga subudi bumuti ida liña lan lasandiragun Heowá lungua sielu dan le larihinbalin lounwen liráü. Ida liña funa san lasandiragun lungua dan le lárügüdünwabei Hesusu, dan le ladügǘn bula lau ani buleseiwa ligía? Saminabá luagun igarigu le lasandirubei dan le larihini Liráü asufurira aban óunweni hámaruti ani gáriti luagu aban wagabu.

Lucía: Masaminarungidina yebe luagun katei le. Ma lirun!

Linda: Ibidiñeti woun ídatima liña lan lasandiragun Bungiu lungua. Gama lumoun, afuranguagüda tumuti Bíbülia ka lan adügübei lun lígirun lun lasufurirun Liráü. Afuranguagüdawati lidan Huan 3:16 lau dimurei buíduburiti le. Busentibu baliihani?

Lucía: Anha. Lariñaga ñein: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi”.

Linda: Seremei. Giribubá lidoun lagumeseha bérusu. Ariñagati ñein: “Ladüga wéiriti hínsiñe gürigia ha ubouagubaña lun Bungiu”. Anihán dimurei le súdinitimabei ya: ínsiñeni. Ligía ínchahabalin Bungiu lun lóunahani Liráü ubouagun lun lounwen wawagu. Anihán luwuyeri ínsiñeni le wéiritimabei. Ani ligía waritagubei sagü irumu lidan luéyuri lagunfulirun Hesusu ábanya irumu lúmagiñe lounwen. Agia guenlé, gunfuranda baali buidu?

Lucía: Anha gunfuranda naali. Seremei luagu bayusuruni bidaani lun bafuranguagüdüni katei le nun.