Luagu saragu dan afuranguagüdaru wani agumeiraguagüdüni dan le lan láfuachun iri Gogu magoguna tidan Bíbülia tayanuhaña lan luagu Satanási lárigiñebei labugún siélugiñe. Ka uagu tariñagei wani agumeiraguagüdüni katei le? Lugundun ariñagatu líburu Arufudúni lalidihaba lan Satanási aban wuribu kóntüra lumutuniña Heowá (Arufudúni 12:1-17). Ligía gunfuranda wabéi ámuya lan iri le ayusurúbei lun Satanási Gogu.

Gama lumoun, lasansiruba gunfurandaü le. Ariha waméi ka lan uagu. Furumiñe, dan le tayanuhan Bíbülia luagu lagumuchún lau Gogu, ariñagatu ladügüba lan Heowá lun héigini dunuru hama animaalu áraabuna (Esekiéli 39:4). Ariñagatu giñe luagu líchuguba lan Heowá ‘aban ubaraü lun Gogu Ísüraeli lun labunún ñein’ (Esekiéli 39:11). Ani aban sífiri Satanási, siñati lubeiti héigini animaalu ani siñati giñe labunún ya ubouagu. Ariñagatu giñe Bíbülia furangu lagurúba lan Satanási lidoun aban fusu mébehati luagu 1,000 irumu. Ligía meigin habéi lubéi animaalugu, mabunún ligíame (Arufudúni 20:1, 2).

Libiaman, ariñagatu Bíbülia lárigiñe lanme 1,000 irumu aba lanme láfuridun Satanási lídangiñe fusu mébehati ani ábame leyeeduniña “néchanigu lidan sun ubóu. Láfuriduba eyeedaña ubafu burí le Gogu luma Magogu; ábame lóundaraguniña hánigu lun wuribu” (Arufudúni 20:8). Lun hamuga Satanási lan Gógubei, leyeedaguña hamuga lungua. Ani siñati lasuseredun le. Ligíati, dan le tayanuhan liliburun Esekiéli luma Arufudúni luagu Gogu, mama tayanuhaña luagu Satanási.

Káteiti Gogu luma Magogu? Lun wasubudiruni, mosu waturiahanu Bíbülia ani akutiha wameime kaba lan agayuaha hawagu lumutuniña Bungiu. Ayanuhatu Bíbülia luagu lagayuahan Gogu, lagayuahan “lurúeite nórute” luma hagayuahan “lurúeitegu ubóu” (Esekiéli 38:2, 10-13; Danieli 11:40, TNM; Danieli 11:44, 45; Arufudúni 17:14; 19:19). Genegeti mama lan ámuñegueinarügüti sügǘ burí le, genegeti ligiaméme lan sügǘ lau ámuñegueinarügü iri. Ka uagu wariñagei le? Ladüga ariñaga tan Bíbülia gadan lubaña lan lagumuhóun wuribu ligía sun néchanigu ha ubouagubaña, ani ligíaba lan lagumeseha wuribu le gíribei Arümahedón (Arufudúni 16:14, 16).

LAGAYUAHAN GOGU LE MAGOGUNA (ESEKIÉLI 38:2, 10-13)LAGUMESEHA ÓUNWENBU ASUFURIRUNIGOGU LE MAGOGUNA:Saragu néchani ha lúnbaña hábürühan hawagun lumutuniña Bungiu lun hagumuchun hauARÜMAHEDÓN:▪ Lesefuruniña Hesusu lumutuniña Bungiu▪ Lagumuchún lau Gogu le magoguna (Arufudúni 16:14, 16)▪ Lagurún Satanási hama lumafianu lidoun fusu mébehati (Arufudúni 20:1-3)LAGUMESERUN LARÚEIHAN KRISTU LE LÁNINA 1,000 IRUMU

Dan le waliihani sun bérusu le ayanuhabei luagu lagumuhóun wuribu kóntüra lumutuniña Bungiu,  aba gunfuranda wamani mama lan Satanási Gogu magogubei. Saragu néchanigu lidan aban Gógubei. Lurúeiteba san nórute alidihaña néchanigu ha? Machourun wamuti. Gama lumoun, gayarati ítara luba lan lugundun ariñagati Heowá lun Gogu: “[Biábinba] bageiragiñe hau súdaragu héretiña ani gíbetiña, hama agalufehatiña gabayu” (Esekiéli 38:6, 15).

Ariñagati meha profeta Danieli aban katei ítarati luagu lurúeite nórute: “Libihuba uganu lídangiñe oubaü le ñéingiñe lubéi laboucha weyu luma luéigiñe nórute le lunti lalouchagüdüni; ábameti láfuridun lau igañi, lau aritaguni lun láfaragun saragu gürigia, ábame líchugunu likianpun-agei labadinagua barana luma wübü wéiriguti ani sánduti. Gama lumoun ñein guánarügüba lachülüra lóurate lounwen, ani úabei ni aban lun líderaguni” (Danieli 11:44, 45). Genegeguati lererun Danieli le luma le lariñagubei Esekiéli luagu Gogu (Esekiéli 38:8-12, 16).

Kaba asusereda lárigiñeme lagumuhóun agayuahani kóntüra lumutuniña Bungiu? Ariñagati Danieli 12:1: “Lídanme oura ligía, ábame lachülaagun Migeli, ánheli le óunigirubaliña lumutuniña Wabungiute”. Ani ariñagati giñe: “Ábanbei dan lánina idiheri dan ligía, aban dan le úagili libe lúmagiñe ñein hamá gürigia ubouagu”. Layanuhaña bérusu le luagu óunwenbu asufuriruni. Ani lagumuhóun, ariñagati hesefuruba lan lumutuniña Bungiu hama “sun lílana ageiraü ha bürüwañubei hiri tidan líburu” (Danieli 12: 1). Ka mini lubéi bérusu le? Lageindaguba lan Hesukrístu, le gumeseelibei arúeiha lúmagiñe irumu 1914, luagu wafulesein lidan Arümahedón. Anihein aban ariñahani ítarati lidan Arufudúni 19:11-21 luagu le lunbei ladügüni Hesukrístu lárigiñeme lagumuhóun agayuahani.

Katei san Gogu luma Magogu le uágubei layanuhóua lidan Arufudúni 20:8? Sun gürigia ha lúnbaña hebedaagun lun Heowá ani ha lúnbaña hábürühan hawagun lubúeingu Heowá lidan lagumuhóun óuchawaguni danme le lagumuchun 1,000 irumu. Hayereeguduba lumutuniña Bungiu houn gürigia hagía ítara kei lun Gogu le magoguna. Gama lumoun, ítara kei lagumuchuba lan Bungiu lau Gogu lidan Arümahedón, ítara luba giñe lagumuchun hau sun gürigia wuribatiña hagía (Arufudúni 19:20, 21; 20:9). Ligía Gogu luma Magogu liña lubéi tagúarun Bíbülia houn sun ha lúnbaña hebedaagun lun Bungiu lídanme lagumuchun 1,000 irumu.

Wagía gefentiña luagu Heowá beresetiwa lau taturiahóun Bíbülia. Ligía busén wabéi gunfuranda wamani kaba lan “lurúeite nórute” yarafa madise. Meberesenga kaba lan adundehaña néchanigu lun hageindagun wama, chouru wamuti lasusereduba lan bián katei. Furumiñe, magañeirunbei lan Gogu le magoguna ani lagünrinchawagúba lan sunsuinagubei hau sun lánigu. Ani libiaman, lesefurubadiwa lan warúeite Hesukrístu ani ladügüba lun wawinwandun lidan aban iseri ubóu lidan ugundani luma ichouruni le inarüniti (Arufudúni 7:14-17).