Ariñaga tumuti aban dimurei-agei le mini lubéi dimurei siensia ítara: “Saragu subudi luagu burí katei le ubouagubei o le asuseredubei ubouagu, le ibihúbei lídangiñe aturiahani luma laríawagun katei burí ligía”. Mosu háfaagun aturiahatiña saragu lun hibihini subudi ligía ani mama súnwandan hibihini resultóu le habusenrubei. Sügütiña aturiahatiña siensia saragu dimaasu, hati o íbini irumu aturiaha somu katei. Ani íbini anihein lan dan mibihin hamá ni kata lídangiñe wadagimanu ligía, anihein dan seriwi lan houn sun gürigia. Ariha wamá fiú hénpulu.

Adügatu aban kónpeni yuropana aba láseihagüle duna le lauti pülástiku le dereti lun larumadagüdüni duna. Yúsuati burí katei ligía lárigiñe somu chagaguaü lánina liñawan dan, kéiburi hárabaganali le asuseredubei Haití lidan irumu 2010.

Dise huáriñurugu anuhein saragu satélite to ídehaboun lun hasubudiruni gürigia halíañanu lan, subudiwati katei ligía kei GPS. Adügǘwati liraüraü máhina le furumiñe lun hayusuruni súdaragu, ani guentó íderagua lumutiña abugahatiña karü, awión, áfayahatiña baranaha, aweiyasuhatiña áraabu hama agaliruhatiña lun hasubudiruni halíañanu lan. Seremei houn aturiahatiña siensia ha adügübalin katei ligía, guentó ménrengunhali woun wachülürün ñeinhin lumuti wabusenra.

Yúsutün san gágamuru, konputadora o Internet? Anihein san somu iseri luwuyeri agaranihani le areidaguagüdübadün lídangiñe somu sandi? Aweiyasuhadün san tidan awión? Anhein ítara liña lubéi, húuhali fiú katei buiti le adüga táalibei siensia houn sun gürigia hun. Le linarün katei, ídehaaru siensia saragu lun buídutima lan wabagari.

Uguñe weyu, añaheingua aturiahatiña siensia aganwoundagüdei hasubudin. Eibu dan hulilitimati haturiahani luáguti ubóu luma luagu sun katei le ladügübei Bungiu ubouagu. Añahein aturiahatiña siensia ha akutihabalin katei burí le ñǘbüritimabei lun hadariruni katei burí le aramudaguati, ani ha aturiahabalin luáguti ubóu aba hakutihan luagu saragu míñunu irumu le sügühalibei lun hasubudiruni ida liña lan lagumeserun ubóu. Añahein giñe asaminarutiña lau lan lanarime lulilin aturiahani ligía lunti lan hamuga arufudúali lan furangu luagu inarüni lan anihein lan Bungiu le uágubei tayanuha Bíbülia.

Añahein aturiahatiña siensia ha subudiwatiña ani ha hulilitimabaña akutihan luagun katei le. Ariñagati aban abürühati gírigiti Amir Aczel, buruguagüda hamá aturiahatiña ha “aban saminaü tídangiñeti siensia ani le kóntürati luagu anihein lan Bungiu”. Ariñagati aban sásaamu le subudiwati “kei lan le ua lubéi saragu katei le arufudubalin luagu anihein lan aban Bungiu le súdinibei ubouagu, arufudati lan lira luagu ua lan bungiu”. Añahein amu ariñagutiña ítara liña lan lafiñerún luagu sun le ladügübei  Bungiu le uágubei tayanuha Bíbülia kei lafiñerún luagu “abiñarahani” o somu katei le aramudaguati. *

Guentó, lunti wálügüdagun woungua: ibihaaru san siensia ariñahani le buídurügüti luagu sun ubóu lun hariñaguni katei le? Uá. Íbini aniheinhali lan saragu awanseruni, gíbetiña aturiahatiña siensia ánharutiña luagu anihein lan saragu álügüdahani le móunabunwagili o le lunbei mounabúniwa lan. Ariñagati aban sásaamu gíriti Steven Weinberg: “Machülübadiwa lidoun lugudina sun katei”. Ariñagati giñe Martin Ress, ábanya aturiahati siensia: “Anihein katei le lunbei úabei lan gunfuranda wamani”. Le linarün katei, gíbegili lunti lasubudirúniwa luagu ubóu, túmagiñe sélula to ñǘraütimaboun darí lumoun óunwenbu ubóu. Anihán fiú hénpulu:

• Másuti gunfuranda hamani ha aturiahabalin ibagari kátima lan asuseredubei turageirugu aban sélula: ida liña lan tayusuruni erei, ida liña lan tasaliraguagüdüni proteína luma ida liña lan tafanreinhani. Mafuranguagüdün tágili siensia katei le buidu.

• Erei le adügübei lun lábürühan sun katei le huáriñurugubei múarugun gániti giñe efekütu lidan wabagari, ani íbini ítara mafurangudungili luáguti. Ibidiñegili houn aturiahatiña siensia ida liña lan lachawahaniwa erei le dan le wachubaahan o ida liña lan lakipurunu Hati lidan tufulasun geyegu lau Ubóu.

• Ariñagatiña ha aturiahabalin Ubóu luagu siñati lan larihín gádürü-wein-keinsi lídangiñe kada san katei le lídanbei ubóu ani siñati giñe lamisurahóun tau burí tulu to hámaboun aturiahatiña siensia.

Ani aniheingua katei le mafuranguagüdün hamagili aturiahatiña siensia. Ariñagati aban surusia: “Gíbetimati katei ibidiñeti woun sügǘ lau le wasubudirubei. Afiñetina dan le lan lakutihan aturiahati siensia somu katei, gíbetimati katei aweiridagüdütu lanigi sügǘ lau le lasubudirubei lau ichouruni”.

Ligíati, anhein samina hubéi aniheinhali lan sun óunabagülei tidan siensia, ani mámaali lan mosu hafiñerun luagu Bungiu luma tuagu Bíbülia, haritagua huméi íbini lan gibe tan tulu hama aturiahatiña siensia lun hakutihan, murusunrügügili katei hasubudirun luagu ubóu. Súdiniti giñe le tariñagubei Encyclopedia Britannica luagu katei le lidan lagumuhóun fánreinti lidan aban arütíkulu luáguti laturiahóun sun katei le huáriñurugubei: “Guentó, lárigiñe kéiburi gádürü milu irumu lánina aturiahani, úamemegili gunfuranda wamani ubóu ítara kei meha babilóniana lidan binadu dan”. Kati lunbei wadügüni lau katei burí le mafuranguagüdün tágilibei siensia? Lunti san wígiruni luagun aban oubaü?

Wagía, gefentiña luagu Heowá, inebehabutiwa lun liricha kada gürigia lun desidírü lan luagu katei le. Áfaaguatiwa lun wasigiruni adundehani tídangiñeti Bíbülia le: “Subudiwa humá kei gürigia areidatiña [o ‘richatiña’, TNM]” (Filipuna 4:5). Amisuraha wamutün lun hadaaruni hisaminan lun hakutihani puntu burí le ídanbei úara tan siensia tuma Bíbülia.