Lidan meha burí bariu gádeiti le uburugubei Los Ángeles (Kalifórünia, Meriga) nagüriarúa, wéiriti meha laganbahóun luagu fulasu burí ligía ladüga hanarime lan léibaagun düroga ñein hama burí sétanu salufuritiña ǘmada. Au habiamanbei sisi isaanigu.

Dan meha ñǘraügidina, anaaha tumutiwa meha núguchu tidoun aban ligilisi hani banheliu. Danti le wéiriaraühadina, óuseratina meha lau aban igaburi ligilisirugu, nóusera lau amu ǘmada. Eremuhatina meha úara hama amu tidan ligilisi dimaasu, anhein méhati lidan le líbiri weyu ábaha nidin efeduha, ayusura düroga luma arounra hama würiña.

Fásitina meha ani ménrengunti meha nagañidun, lúnrügü meha nagañeiruni wuribu, agayuahatina meha hawagu amu lau furumiñeguarügü katei le nadarirun nubarua. Míderagun lumutina meha le nafurendeirubei ligilisirugu, wuribatimarügüti meha nóuserun. Ábaha nariñagun: “Aburemei afayeiragüdübaliña gürigia luagu hariban ani au layusurubei”. Dan le ayarafadeina lubéi irumu 1970 ani disiwídü meha irumu nau, achawaha lumutina meha ligaburi hasaminan lílana aban sétanu hani polítiku gíriti Pantera negra, subudiwati sétanu ligía ladüga ageindagua lan luagu haricha gürigia. Aba nóundarun hamoun aban sétanu aturiahatiña ha giñe ageindagubaña luagu ligiaméme. Anihein meha dan wóundaraguagüdüniña ha híbiri aturiahatiña lun warufuduni magundani le wasandirubei luagu somu katei, adügati méhati lira lun hadüraaguni máisturugu híchugun külase.

Úati meha buídurügü lan lira nun. Ínchaha lumutina meha iyereehabúni adüga damichi houn amu gürigia. Kéiburi dan le meha nidin sine hama numadagu ariha pikchá luáguti houserún idamuni áfürikana wuriba Meriga, adügati meha igañi le wasandirubei luagu marichaü ligía lun wábürühan hawagun nibureintiña harutiña ha ñéinbaña, ñüdün wagía lidan burí fulasu le ñein lubéi hawinwanda harutiña áluaha kaba lan uagu wíchaagua wewe.

Lúmounbei meha dan ligía, gíbeeli meha wadurun au hama níbirigu luma lúrudu. Lídanñein meha aban sétanu hani salufuritiña ha uágubei wuriba lan laganbahóun aban hádangiñe namulenu ani góundaradeitina meha hama. Aribadeinatima liña meha nanügüni nibagari.

Gefentiña meha luagu Heowá lagübürigu aban hádangiñe numadagu ani aba hamisurahanina lidoun hadamuridagun. Lúmagiñebei nidin luagu furumiñeti wéiyaasu, rúgubeitina fe amu hamá gürigia ha hawéi ha híbiri. Anuhein meha  Bíbülia hama súngubei ani yusu hamutu. Íbini meha ha nibureintimagiñabaña rútiña lirahüñü yanu. Wéiritu meha nanigi lau nasubudiruni Heowá lan líribei Bungiu ani yusu hamani dan le hayanuhan luagu (Sálumu 83:18, TNM). Íbini meha añahein lan lílana ámuñegueinarügü néchani ñein, furanguti meha larihíniwa ua lan iyereehabúni haganagua.

Máhatina meha lichugún aturiahani tídangiñeti Bíbülia nun dan nagumeserunbei adamuridagua, lau sun lira, hínsiñeti meha nun nidin. Aban guñoun, dan le lídanñadina lan adamuridaguni, aba houdin fiú numadagu ariha lafarún músika lidan aban fulasu, ñein híchaagua gufudein luagu aban nibureinti darí háfaruni hilagubei lúnrügü herederun tau labiite gueru. Laruganbei, aba hapantahan luagu le hadügübei. Barüméme hamuti áfarahani ligía kei siñagei íbini dan le haguserunbei ligibugiñe lúrudu. Siádiwatiña hiibe-agei lun herederun lun sun habagari furisunrugu. Ma meha lueirin nugundan midin nan hama! Aba desidírü nan nasansiruni nibagari, ábati nagumeserun aturiahoun Bíbülia.

Kei meha buin niña lubéi lau iyereehabúni houn lílana amu rasa, adügati fiú lídangiñe katei le narihibei haganagua gefentiña luagu Heowá lun taweiridun nanigi. Kéiburi dan le narihinbei lígiruniña aban haruti lirahüñü lábugiñe haríaahan iduheñu wuritiña sun aningira lan aweiyasuha lidan amu ageiraü, arihatina giñe habudagun iduheñu harutiña aban nibureinti wuriti le madaribei halíaba lan leredera. Adügati katei le lun narihini nungua gúnfuli hamá gefentiña luagu Heowá lau dimurei le lariñagubei Hesukrístu lidan Huan 13:35: “Anhaün hínsiñegua húmagua, hasubudirubei sun gürigia luagu nani humá disipulugu”. Chouru naali meha darihadina lan íbirigu inarünitiña.

Adügati naturiahanu Bíbülia lun níchugun fe mosu lan nasansiruni nigaburi. Mosu meha náfaagun mámarügü lun darangilu lan ligaburi nóuserun, áfaaguatina meha giñe lun darangilu nan lau sun ninarün (Rómana 12:2). Aba asansireina nan murusun murusun, lidan eneru irumu 1974, aba nabadiseirun kei gefenti luagu Heowá.

Íbini meha lárigiñe nabadiseirun, mosu meha nasigirun árügüdagua nungua luéi nígiraguagüdün nungua lun igañi. Kei dan le narihibei aban híweruti íweruhoun niradiun tídangiñe nikarün dan le wapurichihaña lubéi lidan aban fulasu. Aba néibaagun lárigi. Dan le ragümeme naali, aba lachüürünu radiu múarugun, aba lasigirun éibaagua. Dan le nabahüdagunbalin houn ha híbiri ida liña lan nesefurunu niradiun luéi tíweruhoun, aba lálügüdünina aban kristiánu le derebuguhali lidan lafiñen: “Kaba hamugati buga badüga lun hamuga ragübani?”. Adügati álügüdahani le lun níchugun fe masansirungidina lan sunsuinagubei.

Lidan diisi-hati, irumu 1974, gumesetina aban eseriwiduni lánina apurichihani. Sügütina meha kéiburi san oura lidan hati arufudaha houn amu tuagu Bíbülia. Lárigiñe, aba namisurahóun eseriwida tidan sukursáli to ídangiñeboun larihúa lau hawadigimari gefentiña luagu Heowá ha lídanbaña sun ubóu Brooklyn (Newayoru). Giributina uburugun Los Ángeles lidan irumu 1978 lun nóunigirunu núguchu ladüga sándiharu meha. Bián irumu lárigiñe, aba namarieidun tuma Aarhonda. Íderagua tumutina óunigiroun núguchu darí weyu le tóunwenbei. Lárigiñe, aba wamisurahóun tidoun Leskuela Galaadü to tani Watchtower. Dan le weresibihanbei, aba wounahóun eseriwida kei mísioneru Panamá, awanhamémegua eseriwida ñein.

Lúmagiñe nabadiseirun, gagibuguaadina luma turobuli le ídanbei gürewei lan nun nárügüdagun nungua luéi heniu. Dan le lasuseredun lira, ábagubeiha nidin nungua o nadügüni sun niyaraati lun lagalumadun nigañi. Gíbeeña gürigia ariñagutiña nun buidu lan nadüga, nani weiriou haganagua, íbini au wagatina. Mama nun yuu lan uéiriguni luagu sun asansiruni le adüga náalibei. Chouru numuti larufudarügüñein lan lira gabafu tan Bíbülia lun tasansiruniña gürigia (Ebüréu 4:12).

Adügaaru Bíbülia lun gasuuni lan nibagari arufudatéi nun ida luba lan darangilu nan. Míchaagunhadina wewe ni ka uagu, íderaguarügü naaña gürigia asubudirei Bungiu. Rútina giñe arufudahani tídangiñeti Bíbülia lun aban binadu nágani kolehiurugu. Lárigiñe labadiseirun, wínwantiwa úara luagu fiu dan ani gamadaguamémegidiwa. Darí guentó, dandu au kei nani weiriou, íderaguaadiwa hóugiñe 80 gürigia lun heseriwidun lun Heowá.

Wéiriti neteingiruni Heowá luagu líchugun aban ibagari gúndaati ani gasuuniti nun, geyegu hau íbirigu inarünitiña.