Buin liña ubóu le lau turobuli. Hénrenguti katei lidan “lagumuhóun dan” le (2 Timotéu 3:1). Gíbetiña gürigia nidiheritiña ladüga turobuli lánina seinsu, wuribu, sandi luma günringuaü, le lan yebe hadügün amu o le lanügübei hárabaganali, herigini o katei líbeina lira. Ligibuagun lira, kada gürigia lau lidiheri. Añahein, hanufudetiña lariñagun surusia houn anihein lan kánserü hawagu. Añahein amu, nidiherigüda lumutiña ida luba lanme habagari harahüñü o habañan ámuñegü lidan ubóu le.

Maribanti sun idiheri. Kéiburi hamuga lubaragiñe wadügün aban egüsámini, másiñati wadadagaruba lan murusun o dan le wayanuha lan hagibugiñe saragu gürigia o lálügüdaguaadiwa lan gürigia le úmati wáluaha wadagimanu. Ídehati giñe murusun idiheri lun mábürühan wamá lidoun denchaü. Idiheri le wéiriyabei ani magidaraditi gayaraabei ladügün damichi. Arufudati aban aturiahani, le adügǘbei houn hóugiñe 68,000 gürigia wéinamugaaña, íbini lan idiheri le maweirindigiati adügüti lun hilagia lan gürigia. Ligía meha lálügüdahanbei Hesusu: “Kagia hídangiñe gayaraabei líchugun bián ugudi lanwoun [libagari], ka lan yebe lanarimebei láfaagun luagu?”. Ítara liña, madügünbei idiheri lun lamigifedun wabagari. Ligía lariñagubei Hesusu: “Madiheri[da] humá” (Matéu 6:25, 27). Gayaraati funati wibihin lun manügün lan saragu idiheri ubafu wawagu?

Anha, gayaraati. Ani lun wibihini mosu wánhingichun, wamuriahan ídemuei luma Bungiu, afiñe wagíame luagu füramasei le adüga láalibei. Warihaali ida liña lan ladügüni Paul, Janet tuma Alona katei le ani ida liña lan meha líderaguniña adarira awalidaguni lídangiñe hadiheri. Buídubei wakutihani ariñahani le, lugundun íbini mama lan wásügürüña lídangiñe lénrengunga guentó, siñati wariñagun ítarameme luba lan gumugua dan.