“Murusun dan lárigiñe lounwen núguchi, aba lariñagun nani weiriei nun anuheinharu lan amu hiñaru luma. Aban weyu, aba labudahani sun lísuge, aba lidin mayouragunga, ígiralana nábugua habu bián warahüñü.” Íbini meha darí tan Janet wadagimanu, móustarunti meha seinsu le tagañeirubei lun tafayeiruni sun hemegeirun. Ani mámarügüñein meha lilouguan seinsu tituróbulin. Ariñagatu: “Ma meha lueirin luriban nasandiragun nungua ladüga nábuguarügaadina lan lau iseri lihürü nanügün. Sandiguatina meha nungua lau duru ladüga siñagua nan nungua lun níchuguni le hayaraabei amu agübürigu íchiga houn hasaanigu houn nirahüñü. Nidiherigüdaméme lágidina le gayaraabei hasaminaruni amu nuagu luma hawagu nirahüñü. Saminatiña funa san gürigia madügünrügü niñalin lan sun niyaraati lun magadeirun lan nibagari luma nani weiriei?”.

Furíei íderagubarun Janet lun manügün lan luriban saminaü ubafu tuagu luma lun yarafatima lan tasandiragun tungua lun Bungiu. “Gúñountima wuriba lan nasandiragun nungua. Lidan límaniga áriebu, káteirügüñein wuribati le ñǘbuinbei lidoun nisaminan naganba. Íderagua lumutina nafurieidun luma naliihanu Bíbülia lun lebelurun idabagu nun. Ariñagati Filipuna 4:6 luma 7, aban lídangiñe bérusu le hínsiñetimabei nun: ‘Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan’. Anihein dan nerederun afurieida sun áriebu, ábati nasandiruni awalidaguni le líchugubei lidarangilan Heowá.”

Danme le ñein lan somu katei le adügüti lun wadiheridun saragu, gayaraati líderaguniwa dimurei le lariñagubei Hesusu lidan yanu le líchugubei luéigiñe wübü. Chóurugüdati woun: “Lubaragiñe hafurieidun lun Bungiu subudi laali ka lan habusenrubei” (Matéu 6:8). Íbini ítara, agurabati Bungiu lun wamuriahani le wemegeirubei luma. Mabulieida waméi láutima lan furíei wayarafada lun. Amisuraha  tumutiwa Bíbülia: “Yarafa humá lun Bungiu, ábame giñe layarafadun hun” (Santiagu 4:8).

Mámarügüñein lun wariñaguni tigarigu wanigi lun Heowá lahuuda furíei. “Aganba [l]umuti afurieiduni” ani góunigi lumutiña sun ha áluahabalin lau sun hafiñen (Sálumu 65:2). Ligía larufudahanbei Hesusu houn lani disipulugu “lunti lan hafurieidun lun Bungiu súnwandan, meferidirunga haméi haguraasun” (Lúkasi 18:1). Sigí wamá amuriaha luma Bungiu lun ladundehaniwa luma lun líderaguniwa chóuruñu luagu laganbubadiwa lan. Afiñe waméi busén lan líderaguniwa ani líderagubadiwa lan. Ánhawa afurieida lun sun dan, warufudubei lun afiñe wamá ani hemenigi wamá luagu (1 Tesalónikana 5:17).

Lun wafiñerun luagu Bungiu mosu wasubudiruni buidu (Huan 17:3). Lun lira, mosu waturiahanu Bíbülia furendei wamaamugei ka lan ligaburibei luma ida liña lan larihini katei. Anhein wadüga ítara, wafurendeirubei berese lan lau kada aban wádangiñe. Úati buídurügü lan wasubudirun bianraü katei luagu Bungiu. Ítara kei mégeiwa lan lásügürün saragu dan lubaragiñe ñein lan aban umadaguaü buiti haganagua bián gürigia, ítara liña giñe mégeiwa lan dan lun aweirideina lan wafiñen luma wemenigin luagu Bungiu eibu wasubudiruni buidu, wagumeserun adügei lugundan luma warihini ida liña lan líderaguniwa (2 Korintuna 10:15; Huan 8:29). Lau aban afiñeni ítarati tagagibudagua Janet luma tidiheri.

“Adügaali narihini ida liña lan lóunigiruniwa Heowá sun dan le lun lederebugudun nafiñen —tiña Janet—. Anihein meha dan, wasufurirun saragu marichaü darí lun wasaminarun miñuragunbadiwa lan lídangiñe gádantiwa. Lárigiñehali meha nafurieidun saragu narihei ida liña lan líderagunina Heowá lidan aban igaburi le meha masaminarungubei numuti. Dan le nafurieidun lun neteingiruni, saminatina luagun sun le adüga láalibei nuagu. Súnwandan lachülürün lídehan lidan dan, ani anihein dan, lídantima mégeiwa lan. Biní láadina giñe hau umadagu buítiña, kristiánugu inarünitiña ha aranseñubaña súnwandan lun híderagunina, ani rútiña aban buiti hénpulu houn nisaanigu. *

”Gunfuranda naali guenlé ka lan uagu lariñaga Malakíasi 2:16 iyereegu lan ígiraguni lun Heowá. Lun maríeiti le gúnfulibei, úati agarabaaguni gáritimati luéi agabarahani. Lau sun sügühali lan saragu irumu lúmagiñe lígirunina nani weiriei, chülümémegili dan nasandiragun nungua nábugua luma lau lumalan ani. Dan le nasandiragun nungua ítara, aba náluahan kaba lan nadüga hawagu amu gürigia, íderagua lumutina lira lun nabulieidagun luéi nigarigu.” Ítara liña tagunfulirun Janet lau adundehani méiniti le tídanbei Bíbülia libügürü moun lumuti lan tuouguounrügü lan taritagua (Ariñawagúni 18:1). *

Ariñagatu giñe Janet: “Nasubudiruni Bungiu lan ‘háguchibei méteñuhaña’ ani ligía lan ‘ágüdahabaliña würiña ha hilaguaaña hámari’ ligíatima íchugubei dǘgüdaguaü nun. Maweiyasunbei Heowá águrawa kei ladügüni nani weiriei” (Sálumu 68:5). Subudi tumuti Janet móuchagun lániwa Bungiu lau katei wuribati. Rúrugü lumuti lichú aau le wemegeirubei woun luma “óunwenbu ubafu” le lunbei líderaguniwa agagibudagua luma wadiheri (Santiagu 1:5, 13; 2 Korintuna 4:7).

Ánheinti wanufude lubéi luéi denchaü íchugubei saragu idiheri woun?