Tidaaniwagu Bíbülia, anihein meha aban amuligülei lun tadügǘn fulúaru tidan tiibe-agei haban gürigia. Lamuligidúniwa meha türigu, sebada o katei líbeina lira, ábanbei lídangiñe wadagimanu le hadügübei würiña o idamuni sagü weyu. Lidan binadu dan, dan meha ladimurehóun luagu lamuri amulihani, adügati meha lira lun lasaminarúniwa luagu le hadügübei gürigia sagü weyu (Áfuriduni 11:5; Heremíasi 25:10).

Dariwaali burí dibuhu hama harahüñü guáriua lidan binadu Ehiptu le arufudubalin ida liña lan meha lawadigimaríniwa lau amuligülei le. Biámañein meha dübü ayusurúti: aban le fadati ani duneyumati lamidangua luma amu le ñǘraütimati. Lárigiñe meha líchuguni nadagimeinti türigu o sebada lidoun duneti le luágubei dübü le fadabei, ábaha láhuduragun ligibugiñe, ábati lárügüdüni le aban dübü lau biángubei lúhabu lun láhürühani türigu o sebada darí lamuligiduni. Ariñagatu aban líburu labadinagua lan meha gádürü luma nefu líburu lihürü dübü le ñǘraütimabei. Anhein meha abuleseirúa aban gürigia lau, gayaraati meha lounwen gürigia ligía (Alidihatiña 9:50-54).

Megei hamuti meha iduheñu amuligülei lun habagaridun. Ligía meha tariñagunbei Bíbülia: “[Márügüdabei] limulinun [gürigia] lun lerederun buma lubarügü lafayeiruni le bafuredeirubei lun, lugundun ítara liña lira kéisigubeirügü bamuriahani libagari guánarügü luma”(2 Lúrudu 24:6).

Ariñawagúati tidan Bíbülia Hesukrístu lan “yarafabei tun lanigi” Bungiu (Huan 1:18). Yúsuati dimurei le lun larufudúniwa weiri lan lubuidun lanaagun Hesusu lungua luma Lúguchi. Lídangiñe aban binadu échuni lánina habalachun gürigia lun heigin láhücha dimurei le.

Lidaaniwagu Hesusu, balatiña meha huríu tuagu burí ubarari to abudúboun geyegu lau aban dábula ǘnabuti lun heigin. Balati meha kada aban hádangiñe lau louba luagu dábula ani ábaha línchuni lúruna dise luéi, ábatiha ladagaragüdüni larüna le lubaünan tuagu aban pilá, layusureiti larüna le lóunwenren. Ariñagatu aban líburu: “Lau habalachun ítara, ábaha lerederun lichügü aban wügüri yarafa lun laniguagu gürigia le luéigiñebei lubaünan”. Ligía meha lariñawagúnbei yarafa lan “tun lanigi” le aban.

Aban meha lubuidun chansi ichugúbei lun aban gürigia dan le ligirún lun labalachun ligibugiñe gürigia le ichügüdinaübei múnada o le amisurahabalin lidoun aban fedu. Ligía apostolu lubéi meha Huan, “disipulu le [meha] hínsiñetimabei lun Hesusu”, balañubei ligibugiñe lidan lagumuhóun adineruni le ladügübei hama lani disipulugu. Ariñagatu Bíbülia aba lan labalachun Huan “laniguagu Hesusu” lun lálügüdüni luagu aban katei (Huan 13:23-25, TNM; 21:20).