Busentiña hamuga sun gürigia buidu hamá, hóuserun lau arumani luma areiduni. Ka funati uagu buin liña lubéi ubóu le lau anarimeni, áfarahani, marichaü luma furundei? Híruti sagü lan weyu warihin o waganbun luriban burí ñunsu le adügüti lun lásiruhan lau wara. Ka ínchahabaliña gürigia adüga wuribani? (Aliiha huméi 1 Huan 5:19.)

Adüga lumutiwa funa san Bungiu lun hínsiñebei lan woun wadügün wuribani? Uá. Lenege guánarügü ladügawa, lau ubafu lun wáyeihani línsiñehabu (Agumesehani 1:27; Hobu 34:10). Gama lumoun, adüga lumutiwa giñe lun wagía lan anúadirei kaba lan wadüga. Kei meha maha habéi furumiñetiña wagübürigu háyeihani Bungiu, aba hadügüni le wuribabei, lúmagiñe oura ligía aba lanügün figóu ubafu hawagu. Keiti harahüñü wabéi, galagante wamuti figóu hámagiñe. (Aliiha huméi 2 Lúrudu 32:4, 5.)

Busenti Bungiu lun wageindagun luma luriban wagaburi (Ariñawagúni 27:11). Ligía ladundehanbaliwa luéigiñe üma le buídubei. Anhein wadüga le lariñagubei woun ani áyeiha wameime ligaburi, gúndaabei wabagari. Inarüni siñá lan wáyeihani Bungiu uguñe weyu sin wachararun, gama lumoun, lasansiruba katei le. (Aliiha huméi Sálumu 32:8.)

Lau sun lígiruña lan Bungiu lun ñein lan wuribani uguñe weyu ariha hamaamugei sun gürigia ka lan lanügübei, anitebei dan lun lagumuchun lau sunsuinagubei (2 Féduru 3:7-9). Málühali ubóu abuincha hau gürigia buítiña, gúndaatiña ani gaganbaditiña lun Bungiu. (Aliiha huméi Sálumu 37:9-11.)