Ka uagu hafurieida gürigia?
“Áhurera meha luagu seinsu nibagaribei. Ábatiha nafurieidun lun nagañeirun saragu irisini. Masuseredunti le namuriahabei.” (Samuel, * Kenia)
“Dan meha leskuela wabéi, furendeirügütiwa meha arisara lun wariñaguni wachügügiñe.” (Teresa, Filipina)
“Furíeitina dan le gaturóbulin nan. Furíei nuguya amuriaha ferudun luagu nifigoun luma lun aban nan kristiána buitu.” (Magdalene, Gana)
Arufudati dimurei burí le lariñagubei Samuel, Teresa tuma Magdalene furíei hamá gürigia luagu ámuñegueinarügü katei, anihein lídangiñe gadünamatimaati luéi amu. Añahein afurieidutiña tídangiñe sun hanigi, añahein amu, adüga hamuti ítaraguarügü, masandirunga ni kata. Meberesenga ka lan uagu hafurieida gürigia —lun lan yebe hásügürün aban egüsámini, hamuriahan lun hagañeirun áhurerutiña ha hínsiñetimabaña houn, lun buidu lan léibugun katei hadan haduheñu o lun furumiñeguarügü amu resun—, le linarün katei, sanditiña saragu míñunu gürigia megei hamá hafurieidun. Arufudati aban aturiahani íbini lan gürigia ha mabasiihantiña tidoun somu ligilisi furíeitiña.
Agia huguya, furíeitün san? Anhein ítara liña lubéi, ka hamuriahabei? Hechu humá yebe afurieida o mechun humá, másiñati álügüdagua humá hungua: Le funa san lúgubu hu lan furíei? Anihein san aganbuti? Anihein meha aban abürühati ariñaguti kéirügüñein lan “aban luwuyeri agaranihani” lahuuda furíei “kéigubeirügü hamuga layanuhaña lan gürigia luma aban liraüraü lilügün úduraü”. Añahein surusia samina hamuti ligiaméme, ariñagatiña ligía lan hadügübei gürigia lun hasandiragun houngua buidu sin harihin surusia. Agia huguya, ka hasaminarubei? Ladügarügü san ligía lan héchubei gürigia hafurieida, o lúnrügü hasandiragun houngua buidu?
Mama ligía tarufudahabei Bíbülia. Ariñagatu mámarügüñein lan lun hasandiragun gürigia houngua buidu lahuuda furíei. Ariñagatu woun anihein lan aganbuti furíei le adügǘbei keisi lubudubu ani luagu resun buiti. Inarüni san katei le? Ariha waméi ka lan íchugubei ichouruni woun luagu ítara liña lan.
^ par. 2 Sánsiwaali fiu iri.