Dan le hadüga lan aban katei le madügünñaha humagili, másiñati álügüdagua humá hungua: “Kaba buiti lanüga le nun?”. Wuribati funa san hadügüni ligiaméme álügüdahani húniwagua libügürü furíei? Uá. Mama súnwandan wuriba lan. Maribanti wabusenrun wasubudiruni kaba lan buiti wibiha ánhawa afurieida lun Bungiu. Íbini meha aban wügüri buiti gíriti Hobu álügüdaguati lungua: “Ánhana agúara lun, lóunabubadina san?” (Hobu 9:16, TNM).

Lidan arütíkulu le ásügürübei, furendeitiwa mámarügüñein lan aban échuni lánina relihión furíei o ábanrügü katei le hadügübei gürigia lun hasandiragun houngua buidu. Le lúgubu aganba lani Bungiu le inarünibei furíei. Laganbubadiwa ánhawa afurieida keisi lubudubu luma luagu resun le richati. Ani amisuraha lumutiwa lun wayarafadun lun (Santiagu 4:8). Kati gayaraabei wagurabuni ánhawa afurieida gabügürügua? Ariha waméi.

Dan le liábingua turobuli o lénrengunga hun, sanditün san láfarahañadün lan idiheri? Anhein ítara liña lubéi, ru tumuti Bíbülia adundehani le hun: “Afurieida humá lun Bungiu sun dan” ani ariñaga huméi “sun katei lun Bungiu súnwandan dan le hafurieidun” (1 Tesalónikana 5:17; Filipuna 4:6). Tidan Bíbülia, dariwati füramasei le houn sun ha amuriahatiña ídemuei: “Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan” (Filipuna 4:7). Líderagubadiwa wíchuguni sun wawaguti lun Wáguchi le siélubei luma wariñaguni sun tigarigu wanigi lun lun darangilu lan wasandiragun woungua. Ligía tariñagubei Bíbülia woun lun wadügüni: “Ígirabei bidiheri lun Aburemei, ábame líderagunibu” (Sálumu 55:22).

Añahein saragu míñunu gürigia ubouagu asandiruti darangilaü le lárigiñe hafurieidun. Ariñagatu aban würi  luéigiñetu suru libiti Koréa, gíritu Hee Ran: “Lau sun wéinamu burí lan nituróbulin, sanditina gidá nan aban óunwenbu ihürügu nuáriua lárigiñe nafurieidun ani gayaraahali lan nasigirun nubaruaguóun”. Abahüdaguatu Cecilia, to awinwanduboun Filipina: “Wéiriti nidiheri hawagu nisaanigu. Ani lanwoun lira, mosu nóunigirunu núguchu to unboun ibidiñedina lan. Íderagua lumutina furíei lun darangilutima lan nasandiragun nungua dan le nadügüni nuberesegun lánina sagü weyu. Subudi numuti líderagubadina lan Heowá óunigiraña”.

Gíbeti san katei lun hichügü, hanufudetün heferidiruni hibagari o hásügürüña lídangiñe somu lamiselu? Hasandiruba aban óunwenbu awalidaguni, anhaün afurieida lun Bungiu le aranseñubei “lun líchugun gurasu woun súnwandan”. Chóurugüda tumuti Bíbülia woun ru lan “dǘgüdaguaü woun lidan sun wasufurirun” (2 Korintuna 1:3, 4). Samina wamá luagun le, dan meha  le lasandirunbei Hesusu aban óunwenbu idiheri, “aba láhuduragun afurieida lun Bungiu”. Ka asuseredubei? Aba “liabin aban ánheli siélugiñe lun líchugun erei lun” (Lúkasi 22:41, 43). Súfuriti meha giñe amu wügüri úaraguati gíriti Neemíasi ladüga hálugun gürigia wuribatiña hanufudedaguagüdüni lun masigi lan adügei lugundan Bungiu. Ábati lafurieidun: “Guentó Bungiu Baba héregüdabei núhabu”. Arufudati katei le asuseredubei lárigiñe íderagua lani Bungiu lun mígiraguagüdün lan lungua lun anufudei luma lun lagunfulirun lau wadagimanu le ichugúbei lun (Neemíasi 6:9-16). Ariñagati aban wügüri gíriti Reginald, le awinwandubei ageiraü Gana: “Dan le nafurieidun, dántima le násügürüña lan lídangiñe lénrengunga, sanditina kamá abahüdagua naali nituróbulin lun aban gürigia le gayaraabei líderagunina ani chóurugüda lumuti nun moun lumuti lan nadiheridun”. Furanguti gayara lan líchugun Bungiu awalidaguni woun ánhawa afurieida lun.

Gayaraati lasansiruni saragu lídangiñe katei le wasaminarubei wadügün dandu wabagari kei habagari waduheñu. Ka gayaraabei wadügüni lun buidu lan le lunbei wadügüni? Ariñagatu Bíbülia: “Anhein megei lubéi aban hídangiñe lichú aau [dántima le lagagibudagun luma lénrengunga], amuriahalá luma Bungiu, ábame líchuguni lun, ladüga mánginti ani ruti lau areini houn súngubei” (Santiagu 1:5). Ánhawa amuriaha lichú aau luma Bungiu, layusurubei lani sífiri sandu lun líderaguniwa árügüdei üma le buídutimabei. Chóurugüda lumuti Hesusu woun líchuguba lan Wáguchi Bungiu le siélubei sífiri sandu “houn ha amuriahabalin” (Lúkasi 11:13).

Íbini meha Hesukrístu amuriahati ídemuei luma Lúguchi lubaragiñe ladügün somu katei súdiniti. Ariñagatu Bíbülia afurieida lan meha Hesusu lun Bungiu “sun áriebu” lubaragiñebei lanúadiruniña 12 lani apostolugu (Lúkasi 6:12, TNM).

Ítara kei ligía, gíbetiña asandiragutiña houngua darangilu dan le harihini íderagua lániña Bungiu árügüdei üma le buídutimabei dan le hasaminarun hadügün aban katei. Abahüdagua tumuti Regina woun, to awinwanduboun Filipina, ka burí lan turobuli úmabei tagagibudagua: tanuriahaniña tiduheñu lárigiñebei lounwen tani weiriei, teferidiruni tuadigimari luma tagüriahaniña tisaanigu würiña tábugua. Ka íderagubarun lun tasaminaruni le lunbei tadügüni buidu? Ariñagatu: “Íderagua lumutina furíei lun narabachun luagun Heowá”. Ariñaga lumuti aban wügüri gíriti Kwabena, le awinwandubei ageiraü Gana, ka lan uagu lamuriaha ídemuei luma Bungiu: “Ábunagua meha muna nuadigimaribei ani buiti meha nafayeirún, gama lumoun, aba neferidiruni nuadigimari. Sagü meha nakutihani ka lan gayaraabei nadügüni, súnwandan meha namuriahan luma Bungiu lun líderagunina anúadirei le buídutimabei lídangiñe. Chouru numuti Heowá lan íderagubalina anúadira aban wadagimanu le ídehati lun gayara lan nanuriagun nungua luma lun netenirun lun neseriwidun lun”. Ladundehabadün giñe Bungiu anhaün afurieida lun luagu burí katei le gánibei luma humadagua luma.

Luágurügüñein fiu lídangiñe buiti le gayaraabei hasagaruni lídangiñe hafurieidun lun Bungiu wayanuha. (Aliiha humá luagu burí amu lidan rekuáduru “Buiti le lanügübei furíei”.) Anhein busén hubéi hasagarun buiti lídangiñe furíei, mosu hasubudiruni Bungiu furumiñe luma sun le füramase láalibei woun. Amisuraha wamutün ayanuha luma aban gefenti luagu Heowá íderagua láamugaün aturiahoun Bíbülia. * Másiñati ligíaba lan furumiñeti pasu híchiga lun hayarafadun lun Bungiu le unbei lariñawagúa tidan Bíbülia: “aganba bumuti afurieiduni” (Sálumu 65:2).