Gíbetiña gürigia asaminarutiña leferidirúniwa lan dan afurieiduni, ua lan aganbuti. Añahein amu furíeiñahaaña, gama lumoun sanditiña mounabún hamá. Álügüdaguati aban gürigia le mafiñenbei luagu Bungiu lungua ida liña lan funa Bungiu, ábati lafurieidun lun: “Agülülüharaüba somu katei narigeirugun. Maní liña Bungiu lungua”.

Gama lumoun, chóurugüda tumuti Bíbülia woun aganba lani Bungiu furíei. Tidan Bíbülia, darí wamuti dimurei burí le ariñawagúbei houn lílana aban ageiraü lidan binadu dan: “Gudemehabubei Wabureme hun danme laganbun hagúarahan amuriaha ídemuei, ani keime laganbunün, ítara luba lóunabunün” (Isaíasi 30:19). Ariñagati amu bérusu: “Resibi lumuti [hafurieidun ha richaguabaña] lau ugundani” (Ariñawagúni 15:8).

Abahüdaguatu giñe Bíbülia woun luagu burí furíei le meha ounabúbei. Anihein aban bérusu ariñaguti afurieida lan meha Hesusu “ayumuragua ligía [...] lun Bungiu le gabafubei lun lesefuruni” ani “aba [lan] laganbuni” (Ebüréu 5:7). Daritiwa amu burí hénpulu lidan Danieli 9:20, 21 luma 2 Krónikasi 7:1.

Kati uagu añahein lubéi gürigia asandirutiña ua lan aganbuti hafurieidun? Anhein busén wabéi laganbuni Heowá, * Bungiu le abürüdagüdübarun Bíbülia, wafurieidun, mosu lúnrügübei lan wafurieida. Moun lumuti wafurieidun ni houn amu búngiugu ni houn wagüchagu. Busenti giñe Bungiu le adügübaliwa lun úaragua lan sun le wamuriahan luma luma “lugundan”. Anhein wadüga ítara, chóurugüda lumuti woun “laganbubadiwa lan” (1 Huan 5:14). Ligíati, anhein busén wabéi laganbuniwa Bungiu, mosu wasubudiruni, gaganbadi wagíame lun.

Gíbetiña gürigia achoururuti mámarügüñein lan aban échuni lídangiñeti relihión furíei ani le lan lúgubu aganba lani Bungiu hafurieidun, óunabalei. Ariñagati Isaac, aban wügüri kéniana: “Aba meha nafurieidun lun namuriahan ídemuei lun gunfuranda nanu Bíbülia. Murusun dan lárigiñe, aba layarafadun aban gürigia nun lau ídemuei le nemegeirubei”. Busentu meha Hilda, aban würi filipinana, tígiruni agumulahani. Gíbeti wéiyaasu touchun tígiruni, siñá tumuti. Ábati lariñagun tani weiriei tun ka lan uagu mamuriahan tubéi luma Bungiu lun líderagunu. Lárigiñebei tafurieidun, aba tariñagun: “Wéiritu nanigi lau ídemuei le líchugubei nun. Aba lagumeserun lueirin nabusenrun nagumulahan agidara nuéi. Ígira numuti lagumulahóun sígaru”.

Anhein úaragua lubéi le habusenrubei luma lugundan Bungiu, busenbei funa san líderagunün?