Sagü irumu imprimírü wamá ani afanreinha wagía saragu míñunu Bíbülia tuma burí amu agumeiraguagüdüni. Bunaguatiwa giñe sukursáli lidan saragu fulasu ubouagu tuma burí muna lun imprimírü wamá. Fánreinguañu waña lidan saragu milu damuriguaü ani óundaraguatiña lílana kada aban tidan burí muna gadünamatu to unboun wagúara Luban Hadamuridagun Gefentiña luagu Heowá. Ka afayeirubalin sun le agastarúbei?

Lau burí budagia le híchugubei gürigia lau sun hagundan lamainirúa wawadigimari (2 Korintuna 9:7). Lidan irumu 1879, tidan tibiaman garüdia to, to meha gíriboun Zion’s Watch Tower, ariñawagúati: “Afiñetiwa HEOWÁ lan ágüdahabalin tadügǘn [garüdia to] ani sunme ítara lan, mamuriahóunbei hama gürigia lun hagía lan ágüdahei, marihadihóun ligíame hama ni aban wéiyaasu”. Ítaramemegili wasaminan chülǘ lumoun dan le.

Gayaraati lounahóun budagia sügülügü tidoun somu sukursáli o lichugún tidoun aban tídangiñe gafu luntu budagia to hámaboun gefentiña luagu Heowá tidan Luban Hadamuridagun. Mamuriahantiwa hama gürigia lun híchugun diisi lídangiñe kada san fiádürü le hagañeirubei, másügüragüdün wagía ágeidinaü lidan burí wadamuridagun lun wamuriahan seinsu, maguburahantiwa giñe luagu burí eseriwiduni le wadügübei houn amu lidan háhuduragun lun Bungiu ni tuagu agumeiraguagüdüni to wederegeruboun houn. Úati afayeirutiwa luagu wapurichihan ni luagu warufudahan lidan damuriguaü ni luagu wábunagun lúbaana wadamuridagun. Ladüga ariñagati Hesusu: “Mafayeihantün [...] maguburaha humá giñe” (Matéu 10:8). Úati ni aban hádangiñe gefentiña luagu Heowá ha nadagimeinbaña tidan burí sukursáli ibihiti fáyeiti luagu luadigimari, nírügü lílana Sétanu le Arihibei lau Hawadigimari Gefentiña luagu Heowá lidan sun Ubóu.

Yúsuati giñe budagia lun hiderawagún ha asufurirutiña somu hárabaganali, herigini o katei líbeina lira. Lidan furumiñeti sígulu, íderagua hamutiña meha kristiánugu gürigia ha ásügürübaña lídangiñe somu lénrengunga ani adüga hamuti meha lau sun hagundan (Rómana 15:26). Ítarameme, íderagua wamutiña giñe ha asufurirubaña somu günringuaü uguñe weyu lauya wiñuragunu haban, wíchugun éigini tuma daüguaü houn ani agaraniha wagía houn. Aranseha wamutu giñe Luban burí Hadamuridagun Gefentiña luagu Heowá to lídanboun burí fulasu le asufurirubei damichi.