Lidan irumu 2022, luágurügüñein wuribu, maseinsuni, hárabaganali herigini o katei líbeina lira layanuhóua lidan ñunsu. Bíbüliarügüñoun afuranguagüdei kátima lan uagu lasusereda sügǘ burí le.

Létima mini lubéi sügǘ le asuseredubei lidan irumu 2022

 Furangutimati larihíniwa lidan irumu le ásügürübei wawinwanduña lan lidan dan le unbei tagúara Bíbülia “lagumuhóun dan” (2 Timotéu 3:1). Gumeseti lagumuhóun dan le, lidan irumu 1914. Ariha huméi úara lan sügǘ burí le asuseredubei uguñe weyu luma le uágubei tariñaga Bíbülia lidan profesía lasusereduba lan lidan wadaani:

 “Wuribu” (Matéu 24:6).

•   “Lidan irumu 2022: Ábaya hagagibudagun gürigia ha awinwandubaña Yuropa luma lanarime luriban katei le lanügübei wuribu”. a

 “Ilamaü” (Matéu 24:7).

•   “Lidan irumu 2022: Ábatima laganwoundun ilamaü ubouagu”. b

 “Sandi” (Lúkasi 21:11).

•   “Giribuya poliu adagara hawagu gürigia, lanügüña viruela del mono saragu turobuli ani anihagua COVID-19 adüga saragu dañu. Arufuda lumuti sügǘ burí le weiri lan luriban sandi galugurahati ani siñati hanurahan gürigia luéi”. c

 “Larihúba burí katei hanufunati” (Lúkasi 21:11).

•   “Lanarime lárouga, lumabeigan, gudáü luma fuludu. Mabulieidun hamagili gürigia le asuseredubei lidan lidaani lubachouga, lidan irumu 2022, le ídanbei larihúa katei burí le, barühali günringuaü ani adügaali lun heferidiruni saragu milu gürigia habagari luma giñe lun heferidirunu saragu míñunu gürigia haban”. d

 “Gürigia agarabaagua luagun harúeite” (Lúkasi 21:9).

•   “Lidan irumu 2022: Adügati laganwoundun liserunga ubouagu lun weiri lan hagañi gürigia, ábati hagarabaagun hawagun gumadimatiña”. e

Kaba lanüga irumu le lunbei liabin?

 Úati ni aban wádangiñe asubudiruti kaba lan asusereda lidan irumu 2023. Le wasubudirubei málühali lan Larúeihan Bungiu, le aniheinbei agumadiha sielu, adüga lueirin burí asansiruni ubouagu (Danieli 2:44). Lagumuchuba arúeihani le lau sun le adügübei lun hasufurirun gürigia ani ladügüba giñe lun ladügǘniwa lugundan Bungiu ya ubouagu (Matéu 6:9, 10).

 Ínchaha wamutün afalarei le lariñagubei Hesusu lun “agagudúañu humá” lun harihini ida liña lan agunfulireina lan profesía le tídanbei Bíbülia uguñe weyu (Márükosu 13:37). Agunbiraha wamutün lun háluahaniwa anhein busén hubéi hasigirun afurendeira ida luba lan tíderagunün Bíbülia uguñe weyu luma lun hemenigiñu humá dandu huguya kei hiduheñu ñeinbei lan aban lubuidun dan ámuñegü.