AGAGUDÚAÑU HUMÁ!
Irumu 2023: Meferidira waméi wemenigin | Ka tariñagubei Bíbülia?
Guentó, kei gumeseeli lan irumu 2023 ani busén wamuti létima buídubei wóuniwagua luma houn waduheñu, ka burí katei íchugubei emenigini woun lubá ámuñegü?
Rutu Bíbülia emenigini woun
Ayanuhatu Bíbülia luagu uganu buiti. Ariñaga tumuti woun sun lan turobuli le úmabei wagagibudagua uguñe, málühali lan agumucha. Ariñagatu sun le bürüwañubei tidan “lun larufudahóun woun labürühóua; […] lun wanügün gurasu […] gayara láamuga wemenigidúntima luagu Bungiu” (Rómana 15:4).
Anhein busén hubéi hafurendeirun lanwoun füramasei le tídanbei Bíbülia, aliiha huméi ariñahani le gíribei “La esperanza real de un mañana mejor”.
Aban emenigini le gayaraabei líderaguniwa uguñe weyu
Ítara liña emenigini le tídanbei Bíbülia kei aban óunguru (Ebüréu 6:19). Emenigini le, íderagua lumutiwa agagibudagua luma waturobulin le lánina uguñe weyu lun buidu lan warihini katei lubá ámuñegü ani lun gunda wamá le tímatimaati. Ariha wamá fiu hénpulu:
Ariha humá ida liña lan líderaguni emenigini le tídanbei Bíbülia aban wügüri lun gayara lan lígiruni átaguni. Ariha huméi bidéu “Aba meha liyereegudun ibagari le nanügübei nun”.
Ariha huméi ida liña lan líderaguniwa emenigini le tídanbei Bíbülia dan le weferidirun aban waduhe o aban wamada le hínsiñebei woun lidan óunweni. Ariha huméi bidéu Gurasu houn egeburihatiña.
Derebugugüda waméi wemenigin
Saragu gürigia hemenigitiña labuiduruba lan katei, lau sun lira, úati ni kata le achoururubalin houn lasusereduba lan. Luagu le aban oubaü, buídutimati le füramase tubéi Bíbülia. Ka uagu? Ladüga lúmagiñeti Heowá a liabin sun füramasei le tídanbei, “Bungiu, le meyeehanbei” (Titu 1:2). Ligíarügüñein gabafu lun lagunfuliruni sun le füramase lubéi; ligíarügüñein gayara ladügüni sun le labusenrunbei (Sálumu 135:5, 6).
Gayaraati lafiñerúniwa luagu emenigini le tídanbei Bíbülia. Agunbiraha wamutün lun hakutihanu Lererun Bungiu lun hederebudagüdüni hafiñen (Adügaü 17:11). Hínsiñeti hamuga hun heresibirun külase tídangiñeti Bíbülia mafayeihanga? Tati huméi irumu 2023 lau aban lubuidun emenigini!
a Heowá líribei Bungiu (Sálumu 83:18).