Áluaha humá umadagu lun masandiragun humá hungua hábuguarügü | Ida luba tíderagunün Bíbülia?
Lidan irumu 2023, ariñagatiña aturiahatiña wéiritimahali lan hasandiragun saragu gürigia houngua hábuguarügü, ani adügati lira lun hasandiragun houngua wuriba. Ka gayaraabei líderagunün agagibudagua luma turobuli le?
“Dan le wasandiragun woungua wábuguarügü, gayaraati ladügün lun wuriba lan wátuadi luma lun magundan wamá. Lau sun lira, gayaraati wagagibudagun luma turobuli le lau wadügün lirahüñü katei sagü weyu lun wabuiduragüdüni wamadagua hama amu” (Vivek Murthy, le iridúbei lun larihin lau hátuadi gürigia Meriga). a
Mámarügüñein dan le ua hamá gürigia warugabu wasandiragua woungua wábuguarügü. Gayaraati giñe wasandiragun woungua ítara íbini añahein lan saragu gürigia warugabu. Gayaraati tíderaguniwa Bíbülia ka lan yebe lébunabei wasandiragun woungua wábuguarügü. Anihein adundehani huuti tidan le gayaraabei líderaguniwa lun masandiragun wamá woungua wábuguarügü luma lun wáluahan umadagu.
Adundehani tídangiñeti Bíbülia le gayaraabei líderaguniwa
Gayanuhadi humá. Aban lídangiñe katei le gayaraabei wadügün, lau wíchugun arigei lun le hariñagubei amu, lun mámarügü lan wagía ayanuha. Anhein berese wabéi hau amu, gayaraati ladügün lira lun buidu lan wamadagua hama.
Bérusu tídangiñeti Lererun Bungiu: “Mámarügüla katei le buídubei hun háluaha, áluaha huméi giñe le buídubei houn amu” (Filipuna 2:4).
Gibe hamá humadagu. Lunti aranseñu humá lun gamadagua humá hama gürigia derebuguhaña o nibureingiña, o gürigia lídangiñetiña amu néchani.
Bérusu tídangiñeti Lererun Bungiu: “Hínsiñehabu humá woun, keisi wínsiñehabu hun” (2 Korintuna 6:13).
Lun hibihin lanwoun ariñahani luagu le gayaraabei hadügüni lun buidu lan humadagua hama amu, aliiha huméi ariñahani le gíribei “Cómo saciar la sed de amistad”.
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community (Ariñahani lúmagiñeti liñun-agei lúrudu le arihibei lau hátuadi gürigia Meriga luáguti hasandiragun gürigia houngua hábugua), irumu 2023.